Po o E Taulaʻi Atu i le Taui?

E IAI se gasegase e faasolosolo mālie lava ona aafiaga. E muamua lava, e tau punitia ai le vaai. Afai e lē togafitia e mafai ona oo atu i le ʻiʻoimata. Ona oo ai lava lea, ina lē toe mafai ona iloa se mea. O le ā lenei gasegase? O le gasegase o mata e taʻua o le ogo—lea e faapogaia ai le tauaso.

E pei lava ona mafai ona faasolosolo ina lē lelei la tatou vaai ma oo atu ai ina faaleagaina, e mafai foʻi ona lē lelei se ituaiga o vaai e sili ona tāua—o la tatou vaai lea faaleagaga. O lea la, e matuā tāua ai le taulaʻi atu o la tatou vaai i mea faaleagaga.

Ia Taulaʻi Atu i le Taui

O “mea e lē vaaia” i o tatou mata e aofia ai le taui o le ola e faavavau, lea ua ofoina e Ieova i ona tagata faamaoni. (2 Korinito 4:18) O le mea moni, o le māfuaaga autū e auauna ai Kerisiano i le Atua ona latou te alolofa iā te ia. (Mataio 22:37) Peitaʻi, e finagalo Ieova ina ia tatou tepa taulaʻi atu i lo tatou taui. O lona finagalo ia tatou vaai atu iā te ia o se Tamā alofa o lē na te “tauia mai o ē matuā saʻili iā te ia.” (Eperu 11:6) O le mea lea, o i latou e iloa moni le Atua ma alolofa iā te ia, latou te faatāuaina faamanuiaga ua ia folafola mai ma faanaunau atu i le faataunuuga.—Roma 8:19, 24, 25.

O le toʻatele o le ʻaufaitau o lenei mekasini faatasi ai ma lona soa o le Ala Mai!, e fiafia i ata o loo faaalia mai ai le lalolagi Parataiso. O le mea moni, tatou te lē iloa foliga moni lava o le ā iai le lalolagi Parataiso, ae o ata ua lomia ua na o ni faataʻitaʻiga e faavae i fuaiupu o le Tusi Paia e pei o le Isaia 11:6-9. Peitaʻi, na faapea mai se tasi o fafine Kerisiano: “Pe a ou vaavaai i ata o le Parataiso i Le Olomatamata ma le Ala Mai!, ou te iloiloina ma le faaeteete e pei lava ona iloiloina e se tagata faimalaga se polosiua o loo iai ni taʻiala pe a faimalaga. Ou te taumafai malosi e faaata aʻu o loo iai i inā ona ou te faamoemoe ia ou iai i inā i le taimi atofaina a le Atua.”

Sa faapena le manatu o Paulo e faatatau i lona ‘taui na valaauina mai lugā.’ E leʻi manatu o ia iā te ia e faapea ua maua le faamoemoe, ae e ao ona faamaonia lona faamaoni e oo i le iʻuga. Ae, na faaauau pea ona ia ‘momoʻe punou aʻi i mea o lumanaʻi.’ (Filipi 3:13, 14) Sa faapena foʻi Iesu o lē na onosai i le maliu i le satauro ona o “le olioli sa tuu i ona luma.”—Eperu 12:2.

Pe o e masalosalo ea pe e te ulu atu i le lalolagi fou? O se mea lelei le aua le soona mautinoa naʻuā, ona o lo tatou mauaina o le taui o le ola e faalagolago i lo tatou tumau i le faamaoni seʻia oo i le iʻuga. (Mataio 24:13) Peitaʻi, pe afai tatou te faia le mea sili tatou te mafai e faataunuu ai mea o loo faafinagaloina e le Atua, ua iā i tatou la māfuaaga e mautinoa ai le mauaina o le taui. Ia manatua, o Ieova e “lē finagalo ia  fano se tasi, a ia oo uma lava i le salamo.” (2 Peteru 3:9) Pe afai tatou te faatuatua iā Ieova, o le a ia fesoasoani iā i tatou ia maua lo tatou taui. O le mea moni, e lē finagalo o ia e saʻilia se mea e taofia ai i latou e taumafai ma le faamaoni e faafiafia lona finagalo.—Salamo 103:8-11; 130:3, 4; Esekielu 18:32.

O le iloaina o le auala o loo manatu mai ai Ieova i ona tagata, e aumaia ai iā i tatou le faamoemoe—o se uiga tāua e pei foʻi o lo tatou faatuatua. (1 Korinito 13:13) O le upu Eleni ua faaliliuina i le “faamoemoe” i le Tusi Paia ua aumaia ai se manatu o le matuā naunau e “faatalitalia se mea lelei.” O le iai o lenā faamoemoe i le mafaufau, na tusi mai ai Paulo e faapea: “Ua matou mananaʻo tele ina ia outou taʻitasi ma faaali mai lea lava filigā, ina ia mautinoa le faamoemoe e oo i le gataaga; ina ia lē paiē, a ia faaaʻoaʻo i ē ua maua i le faatuatua ma le onosai mea na folafolaina.” (Eperu 6:11, 12) Afai tatou te faaauau ona auauna ma le faamaoni iā Ieova, e mafai ona tatou mautinoa lo tatou faamoemoe. E lē pei o le tele o faamoemoe faalelalolagi, ae o lenei faamoemoe o le ‘faamoemoe e le mā ai.’ (Roma 5:5) O lea la, e faapefea ona tatou tausia ia olaola ma manino lo tatou faamoemoe?

Le Auala e Faaleleia ai la Tatou Vaai Faaleagaga

E lē mafai e o tatou mata ona taulaʻi i ni mea se lua i le taimi e tasi. E faapena foʻi i la tatou vaai faaleagaga. O le taulaʻi atu i mea o lenei faiga o mea, o le a lē taulaʻi atu ai o tatou mafaufau i le folafolaga a le Atua i le lalolagi fou. Mulimuli ane, atonu o le a faanenefu ma oo ina punitia ai le vaai ma lē toe mafaufau i ai. Pagā se tulaga lē manuia o le a iai! (Luka 21:34) O lea la, maʻeu le tāua pe afai e ‘faafaigofie le vaai’—o le taulaʻi atu lea i le Malo o le Atua ma o le taui o le ola e faavavau!—Mataio 6:22.

E lē o se mea e faigofie i taimi uma le faafaigofie o le vaai. E uaʻi atu o tatou manatu i faafitauli o aso fai soo, mea e faatosina ese ai le vaai—e oo lava i tofotofoga e ono tutupu mai. I lalo o nei tulaga, e faapefea ona tatou taulaʻi atu i le Malo ma le lalolagi fou ua folafola mai e le Atua e aunoa ma le teena o isi gaoioiga tāua? Seʻi o tatou iloiloina ni auala se tolu.

Suʻesuʻe i aso uma le Afioga a le Atua. O le faitauina e lē aunoa o le Tusi Paia ma le suʻesuʻeina o lomiga faale-Tusi Paia, e fesoasoani lea iā i tatou e faaautū atu ai o tatou mafaufau i mea faaleagaga. E moni, atonu ua tele ni tausaga o tatou suʻesuʻeina le Afioga a le Atua peitaʻi, e ao ona faaauau pea ona suʻesuʻe e pei lava ona manaʻomia ona tatou aai i meaʻai faaletino ina ia faatumauina ai o tatou ola. E lē mafai ona taofia lo tatou toe aai ona e faapea ua faitau afe ʻaiga sa tatou aai ai i le taimi ua tuanaʻi. E faapena foʻi la le Tusi Paia, tatou te manaʻomia ona faaauau pea e lē aunoa ona tausia i tatou i taumafa faaleagaga ina ia olaola ai pea lo tatou faamoemoe ma malosi ai lo tatou faatuatua ma le alofa.—Salamo 1:1-3.

Manatunatu loloto ma le lotofaafetai i le Afioga a le  Atua. Aiseā e tāua ai le manatunatu loloto? E lua māfuaaga. Muamua, o le manatunatu loloto e mafai ona faagoto ai iā i tatou mea ua tatou faitauina ma faatupu ai se talisapaia i le loto. O lona lua, o le manatunatu loloto e puipuia ai i tatou mai le faagaloina o Ieova, o ana galuega matagofie ma le faamoemoe ua ia tuu mai i o tatou luma. O se faataʻitaʻiga: O tagata Isaraelu ia na tuua Aikupito faatasi ma Mose, na latou vāaitino i le uiga ese o le malosi o Ieova. Na latou iloaina foʻi lana puipuiga alofa a o ia taʻitaʻiina i latou i lo latou tofi. Peitaʻi, ina ua taunuu atu Isaraelu i le vaomatua e agaʻi atu i le Nuu o le Folafolaga, na amata ona latou faitio ma faaalia le matuā leai o se faatuatua. (Salamo 78:11-17) O le ā lo latou faafitauli?

Na i lo le taulaʻi atu i le faamoemoe matagofie na tuu i o latou luma e Ieova, ae na uaʻi atu i o latou manaʻoga na iai i le taimi lava lenā atoa ai ma popolega faaletino. E ui lava i faailoga faavavega na latou molimauina, e toʻatele tagata Isaraelu na avea ma ē lē faatuatua ma faitio. Ua faapea mai le Salamo 106:13: “Ua vave galo iā te i latou o mea na fai [e Ieova].” O le faatalalē lenā e aunoa ma se faamolemolega na māfua ai ona lē ulu atu lenā augātupulaga i le Nuu o le Folafolaga.

O lea la, pe a faitauina le Tusi Paia po o lomiga e fesoasoani i le suʻesuʻeina o le Tusi Paia, ia mafaufau loloto i mea sa e faitauina. E tāua lenā tulaga i lou soifua mālōlōina ma lou tuputupu aʻe faaleagaga. O se faaaʻoaʻoga, pe a faitauina le Salamo 106, e pei ona sii mai se vaega i luga, ia mafaufau loloto i uiga o Ieova. Mātau le auala na faaalia ai lona onosai ma lona alofa mutimutivale i tagata Isaraelu. Tagaʻi i le auala na ia faia ai mea uma na te mafai e fesoasoani ai iā i latou ia oo atu i le Nuu o le Folafolaga. Mātau le auala na faaauau ai ona latou fouvale iā te ia. Manatu i le tigā o Ieova a o ia faaoo atu lona alofa mutimutivale ma lona onosai i tagata e aunoa ma se loto talisapaia. E lē gata i lea, e ala i le mafaufau loloto i fuaiupu e 30 ma le 31, o loo faamatalaina mai ai le maumauaʻi ma le loto tele o Fineaso e tū mo le amiotonu, ua tatou mautinoa ai e lē faagaloina e Ieova ona tagata faamaoni ma e na te matuā tauia i latou.

Ia faatatau mataupu silisili o le Tusi Paia i lou olaga. A o tatou mulimuli i mataupu silisili o le Tusi Paia, tatou te iloa ai o loo aogā fautuaga a Ieova iā i tatou. Ua faapea mai le Faataoto 3: 5, 6: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” Manatu i amioga lē mamā a le toʻatele o tagata ua māfua ai faafitauli o le mafaufau, faalogona ma le tino. E ala i le lolo atu i faafiafiaga e vave mavae, ua oo ai i na tagata mala mo ni tausaga pe mo le olaga atoa foʻi. I se eseesega iloga, o i latou e savavali i le ‘ala lauitiiti’ o le a latou maua le ola i le faiga fou o mea, ma ua faalaeiauina ai i latou e faaauau pea i le auala i le ola.—Mataio 7:13, 14; Salamo 34:8.

O se luʻi le faatatauina o mataupu silisili o le Tusi Paia. I nisi taimi, o se vaifofō e lē faale-Tusi Paia atonu e foliga mai o se fesoasoani vave lea i se tulaga faigatā. O se faaaʻoaʻoga, i taimi o faigatā  tautupe, atonu e tofotofoina ai ina ia faatulagalua manaʻoga o le Malo. Ae peitaʻi, o i latou e faatuatua ma taulaʻi atu i mea faaleagaga ua latou mautinoa e faapea, i le iʻuga “e manuia ē ua matataʻu i le Atua.” (Failauga 8:12) E ono faigaluega ova taimi se Kerisiano mai i lea taimi i lea taimi peitaʻi, ia aua lava neʻi pei o Esau o lē na faatalalē i mea faaleagaga ma lafoaʻi ai faapea o ni mea e lē tāua.—Kenese 25:34; Eperu 12:16.

Na faamatala ma le manino e Iesu o tatou tiute tauave o ni Kerisiano. E ao ona tatou ‘muaʻi saʻili le malo ma le amiotonu a le Atua.’ (Mataio 6:33) Pe a tatou faia faapea, o le a faaalia mai e Ieova lona alofa faatamā iā i tatou e ala i le faamautinoa ua tatou maua mea faaletino tatou te manaʻomia. E mautinoa e lē finagalo Ieova ia avea ma a tatou avega mamafa le soona popole i mea ua ia fetalai i ai o le a ia tausia. O lenā popolega tele e mafai ona pei o se ogo faaleagaga, e lē togafitia, o le a faasolosolo mālie ai ina lē mamao la tatou vaai ma gata mai ai na o mea faaletino ma oo ai ina tatou tauaso faaleagaga. Pe afai tatou te tumau pea i lenā tulaga, o le a oo mai le aso o Ieova iā i tatou e “pei o se mailei.” Pagā se tulaga leaga o le a iai!—Luka 21:34-36.

Ia Taulaʻi Atu Pea e Pei o Iosua

Ia faaauau pea ona tatou taulaʻi atu i lo tatou faamoemoe mamalu o le Malo, ma ia faatulaga saʻo isi tiute tauave i le tulaga e tatau ona iai. E ala i le tausisi i le faasologa o le faia o suʻesuʻega, manatunatu loloto ma le faatatauina o mataupu silisili o le Tusi Paia, e mafai ai ona mautinoa lo tatou faamoemoe e pei o Iosua. I le taʻitaʻiina o Isaraelu i le Nuu o le Folafolaga, na ia faapea mai: “Ua outou iloa ma o outou loto atoa, ma o outou agaga atoa, e leʻi iʻuvale se upu e tasi i upu lelei uma na fetalai mai ai le Alii lo outou Atua iā te outou; ua taunuu uma iā te outou, ua lē iʻuvale se upu e tasi.”—Iosua 23:14.

Tau ina ia avea le faamoemoe o le Malo e faamalosia ai oe, ma ia faafiafiaina ai e pei ona atagia mai i ou manatunatuga, faalogona, filifiliga ma gaoioiga.—Faataoto 15:15; Roma 12:12.

[Ata i le itulau 21]

Pe o e masalosalo ea pe e te ulu atu i le lalolagi fou?

[Ata i le itulau 22]

O le manatunatu loloto o se vaega tāua o suʻesuʻega faale-Tusi Paia

[Ata i le itulau 23]

Ia taulaʻi atu i manaʻoga o le Malo