E Ao i Tagata o le Atua Ona Naunau i le Agalelei
E Ao i Tagata o le Atua Ona Naunau i le Agalelei
“Se ā foʻi se mea e finagalo ai Ieova iā te oe, pe a lē o ia mea, ia fai le amiotonu, ia naunau i le alofa [“agalelei,” NW], ma ia feooaʻi ma lou Atua ma le loto faamaulalo?”—MIKA 6:8.
1, 2. (a) Aiseā e lē o se mea e tatou te ofo ai e faapea, o loo faatalitalia e Ieova ona tagata ina ia faaalia le agalelei? (e) O ā fesili e fesootaʻi atu i le agalelei e ao ona tatou iloiloina?
O IEOVA o le Atua agalelei. (Roma 2:4; 11:22) E mautinoa lava sa tatau ona talisapaia e le uluaʻi ulugalii, o Atamu ma Eva le agalelei o le Atua! I le faatoʻaga i Etena na siʻomia i laʻua e foafoaga vaaia, lea sa faamaonia ai le agalelei o le Atua i tagata o ē na iai le tomai e olioli ai. Ma na faaauau pea ona agalelei le Atua i tagata uma, e oo lava i tagata e lē lotofaafetai ma amioleaga.
2 Talu ai na foafoaina le tagata i le faatusa o le Atua, ua iai la i le tagata le tomai e faaatagia ai uiga o le Atua. (Kenese 1:26) E lē o se mea la e ofo ai, o loo faatalitalia mai e Ieova i tatou ina ia faaalia le agalelei. E pei ona taʻua i le Mika 6:8, e ao i tagata o le Atua ona “naunau i le alofa [“agalelei,” NW].” Ae peitaʻi, o le ā le agalelei? E faapefea ona fesootaʻi atu i isi uiga o le Atua? Talu ai e mafai e tagata ona faaalia le agalelei, aiseā la ua sauā ma lē alolofa ai le lalolagi? Aiseā e ao ai iā i tatou o Kerisiano ona taumafai e faaalia le agalelei i a tatou feutagaʻiga ma isi?
O le ā le Agalelei?
3. E faapefea ona e faamatalaina le agalelei?
3 E faaalia le agalelei e ala i le naunau mo le lelei o isi. E faaalia e ala i gaoioiga fesoasoani ma upu agalelei. O le agalelei o lona uiga, o le faia o le mea lelei na i lo le faia o se mea e lamatia ai. O le tagata agalelei e faaleuō, agamalu, tigā alofa ma alofa. E alofa ma agalelei i isi. Na apoapoaʻi Paulo i Kerisiano e faapea: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) O lea la, o le agalelei o se vaega o le ofu faafaatusa o Kerisiano moni uma.
4. Ua faapefea ona taulamua Ieova i le faaalia o le agalelei i tagata?
4 E taulamua Ieova le Atua i le faaalia o le agalelei. E pei ona fai mai Paulo, ua “faaalia mai le agalelei ma le alofa i tagata o lo tatou Faaola le Atua,” ua ia ‘faaola i tatou i le faataeleina i le toefuataʻiina ma le faafouina e le Agaga Paia.’ (Tito 3:4, 5) Ua “faataeleina” pe faamamāina e le Atua ia Kerisiano faauuina i le toto o Iesu, o lona uiga ua faatatauina aogā o le taulaga togiola a Keriso mo i latou. Ua faafouina foʻi i latou e ala i le agaga paia, ma avea o se “foafoaga fou” (NW) o ni atalii faauuina i le agaga o le Atua. (2 Korinito 5:17) E lē gata i lea, ua faasafua atu le agalelei ma le alofa o le Atua i le “motu o tagata e toʻatele” o ē ua “ta foʻi o latou ofu, ma ua faasinasinaina o latou ofu i le toto o le Tamaʻi mamoe.”—Faaaliga 7:9, 14; 1 Ioane 2:1, 2.
5. Aiseā e ao ai iā i latou o taʻitaʻia e le agaga o le Atua ona faaalia le agalelei?
5 O le agalelei o se vaega foʻi o fua o le agaga paia o le Atua po o le malosi galue. Na faapea mai Paulo: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā; e lē faatulafonoina mea faapena.” (Kalatia 5:22, 23) O lea la, pe lē ao ai ea la iā i latou o taʻitaʻia e le agaga o le Atua ona faaalia le agalelei i isi?
O le Agalelei Moni e Lē o se Vaivaiga
6. O le ā le taimi e avea ai le agalelei o se vaivaiga, ma aiseā?
6 E manatu nisi tagata i le agalelei o se vaivaiga. E latou te manatu e ao i se tasi ona taofiofimamau i ona manatu, i nisi taimi e faaalia ai uiga lē finauaʻia ina ia iloa ai lona malosi. O le mea moni lava ia, e manaʻomia le faamalosi ina ia faatino le agalelei ma ʻalofia le alofa valea. Talu ai o le agalelei moni o se vaega o fua o le agaga o le Atua, e lē o se vaivaiga la le lafoaʻia o amioga sesē. I le isi itu, o le alofa valea o se vaivaiga lea e faapogaia ai se tasi e lē amanaʻia mea sesē.
7. (a) Na faapefea ona faamaonia le faatalalē o Eli? (e) Aiseā e ao ai i toeaina ona leoleo faasaga i le faaalia o le alofa valea?
7 O se faaaʻoaʻoga, seʻi manatu foʻi iā Eli le ositaulaga sili o Isaraelu. Sa faatalalē Eli i le aʻoaʻia o ona atalii, o Hofeni ma Fineaso, o ē na galulue o ni faitaulaga i le malumalu. Talu ai sa lē faamalieina i laʻua i vaega o le taulaga na tofia atu iā i laʻua e ala i le Tulafono a le Atua, sa la faatonuina le auauna ina ia avatu se tufaaga mata, mai le tagata lea e ofoina atu lana taulaga a o leʻi susunuina le gaʻo o le taulaga i luga o le fata faitaulaga. Sa faia foʻi e atalii o Eli feusuaʻiga lē mamā ma fafine na auauna i le faitotoʻa o le malumalu. Ae na i lo le faateʻa ese mai o Hofeni ma Fineaso mai le malumalu, sa na ona aʻoaʻi lemū i laʻua e Eli. (1 Samuelu 2:12-29) E lētioa lava la “le afioga a Ieova i ia ona aso, ua lē faaalia mai soo”! (1 Samuelu 3:1) E tatau i toeaina Kerisiano ona faaeteete ia aua neʻi lolo atu i le faaalia o le alofa valea i ē fai mea sesē, i latou e ono lamatia ai le itu faaleagaga o le faapotopotoga. O le agalelei moni, na te ʻalofia upu leaga ma gaoioiga e solia ai tapulaa a le Atua.
8. Na faaalia faapefea e Iesu le agalelei moni?
8 E leʻi taʻusalaina lava lo tatou faaaʻoaʻo, o Iesu Keriso, i le faaalia o le alofa valea. O ia o le faaaʻoaʻoga sili o le agalelei moni. O se faaaʻoaʻoga, na ‘mutimuti vale lona alofa i tagata, ona ua lailoa i latou ma tuulafoaʻiina, e pei o mamoe e leai so latou leoleo.’ Sa faigofie i tagata loto faamaoni ona faalatalata atu iā Iesu, e oo lava i le aumaia o a latou fanau iā te ia. Manatu i le agalelei ma le alofa na ia faaalia a o ia ‘siitia i latou i ona aao ma faamanuia iā te i latou.’ (Mataio 9:36; Mareko 10:13-16) E ui sa agalelei Iesu, ae na maumauaʻi o ia mo le mea saʻo i le silafaga a lona Tamā i le lagi. E leʻi manatu māmā lava Iesu i le leaga, na ia maua le malosi mai le Atua e taʻusalaina ai taʻitaʻi lotu faafiaamiotonu. E pei ona taʻua i le Mataio 23:13-26, sa ia taʻu atu e lē aunoa le faasilasilaga: “Oi talofa iā te outou tusiupu ma faresaio, tagata faafiaamiotonu!”
O le Agalelei ma Isi Uiga Faale-Atua
9. E faapefea ona fesootaʻi atu le agalelei i le onosai ma le agaalofa?
9 O le agalelei e fesootaʻi atu i isi uiga e ati aʻe e le agaga o le Atua e pei o le onosai ma le agaalofa. O le mea moni, o se tasi na te atiina aʻe le agalelei e na te faaalia lenā uiga e ala i le onosai. E onosai o ia i tagata e lē agalelei. O le agalelei e fesootaʻi atu i le amio lelei ma e masani ona faaalia lenā uiga i gaoioiga fesoasoani mo le lelei o isi. O nisi taimi, o le upu Eleni o loo faaaogā i le Tusi Paia mo le “agalelei” e ono faaliliuina foʻi i le “amio lelei.” O le faaalia o le agalelei i le va o uluaʻi Kerisiano, na matuā maofa ai le ʻaufaapaupau, auā e tusa ai ma le faamatalaga a Tetuliano, na latou taʻua soo o Iesu o ‘ē olaola ai le agalelei.’
10. E faapefea ona fesootaʻi le agalelei ma le alofa?
10 E iai se fesootaʻiga i le agalelei ma le alofa. Na fetalai Iesu e faatatau i ona aposetolo e faapea: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Na taʻua e Paulo e tusa ai o lenei alofa: “E onosai le alofa, [ma] e agamalu.” (1 Korinito 13:4) O le agalelei e mafai foʻi ona fesootaʻi ma le “alofa faamaoni,” lea e tele ina faaaogā i le Tusi Paia. O le nauna Eperu e faasino atu i le “alofa faamaoni” e mafai ona faamatalaina e faapea, o le malosi o le agalelei lea e mafai ona fesoasoani i le faataunuuina o se fuafuaga. Ua faaalia le alofa faamaoni o Ieova i auala eseese. O se faataʻitaʻiga, ua vaaia lona alofa faamaoni i ana gaoioiga o le laveaʻiina ma le puipuiga.—Salamo 6:4; 40:11; 143:12.
11. O le ā le faamautinoaga ua aumaia e le alofa faamaoni o le Atua iā i tatou?
11 O le alofa faamaoni o Ieova ua tosina atu ai tagata iā te ia. (Ieremia 31:3) Pe a manaʻomia e auauna faamaoni a le Atua le laveaʻiina ma le fesoasoani, latou te iloa e alofa faamaoni o ia. Ona o lona alofa faamaoni e fesoasoani ai o ia iā i latou i taimi uma. O lea la, e mafai ona latou tatalo ma le faatuatua, e pei ona sa faia e le faisalamo o lē na faapea mai: “A o aʻu nei, ou te faatuatua i lou alofa, e fiafia loʻu loto i lau faaolataga.” (Salamo 13:5) Talu ai e alofa faamaoni le Atua, e faatuatua atoatoa ana auauna iā te ia. Ua iai iā i latou lenei faamautinoaga: “E lē tuuna e Ieova lona nuu, na te lē tuulafoaʻiina foʻi lona tofi.”—Salamo 94:14.
Aiseā ua Matuā Sauā ai le Lalolagi?
12. O anafea ma na faapefea ona amata pulega matuā sauā?
12 O le tali o lenei fesili e fesootaʻi atu i le mea na tupu i le faatoʻaga i Etena. I le amataga lava o le talafaasolopito o tagata, na amata ai e se foafoaga agaga o lē e manatu faapito ma faamaualuga se faufauga ina ia avea o ia ma pule o le lalolagi. O le iʻuga o lana faufauga, ua avea ai o ia ma “alii o lenei lalolagi,” o sē e matuā sauā. (Ioane 12:31) Na lauiloa o ia o Satani le Tiapolo, o le tetee sili i le Atua ma tagata. (Ioane 8:44; Faaaliga 12:9) Ina ua faatoʻā uma lava ona foafoaina Eva, na aliaʻi mai ai lana faufauga manatu faapito ina ia faatuina se pule e faatusatusa i le pulega alofa a Ieova. O lea la, na amata pulega leaga ina ua filifilia e Atamu le auala o le tu ese mai i le pule a le Atua, ma teena ma le atoatoa lona agalelei. (Kenese 3:1-6) Na i lo le pulea e i laʻua o i laʻua lava, ua pulea Atamu ma Eva i aafiaga matapeʻapeʻa ma le faamaualuga o le Taipolo, ma avea ai i laʻua ma tagata o lana pulega.
13-15. (a) O ā nisi o āuga o le teena o le pulega amiotonu a Ieova? (e) Aiseā e lē alolofa ai lenei lalolagi?
13 Seʻi o tatou iloiloina nisi o āuga. Na tuliesea Atamu ma Eva mai se vaega o le lalolagi parataiso. Na la tuua se soifuaga matagofie e siʻomia i laau lauusiusi e faigofie ona maua ai fualaau faisua ma fualaau ʻaina ae ua oo atu i se tulaga faigatā i fafo o le faatoʻaga o Etena. Na fetalai atu le Atua iā Atamu: “Ua e usiusitai i le upu a lau avā, ma ua e ʻai i le laau na ou fai atu ai iā te oe, na faapea atu, e aua e te ʻai ai; o le mea lea ua malaia ai le laueleele ona o oe; e te ʻai ai ma le tigā i aso uma o lou ola; e tutupu mai ai o laau tuitui ma laau talatala iā te oe.” Sa faamalaiaina le laueleele o lona uiga, o le a matuā faigatā ona galueaʻiina. O aafiaga o le faamalaiaina o le laueleele i laau tuitui ma laau talatala, na matuā afāina ai fanau a Atamu, lea na faapea mai ai Lameko le tamā o Noa ua ‘tigā o latou lima, ona o le laueleele ua malaia iā Ieova.’—Kenese 3:17-19; 5:29.
14 Na suia e Atamu ma Eva o la olaga toʻafimālie i puapuaga. Na fetalai le Atua iā Eva: “Ou te matuā faateleina le tigā o lou maʻi tō; e te fanau mai tama ma le tigā; e uaʻi atu lou manaʻo i lau tane, e pule foʻi o ia iā te oe.” Mulimuli ane, na faia e le ulumatua a Atamu ma Eva o Kaino se gaoioiga sauā o le fasiotia lea o lona uso o Apelu.—Kenese 3:16; 4:8.
15 Na faalauiloa mai e Ioane e faapea: “O le lalolagi uma o loo nofo toʻilalo i loo leaga.” (1 Ioane 5:19) I le pei o lo latou taʻitaʻi ua faaalia e le lalolagi i aso nei gaoioiga leaga lea e aofia ai le matapeʻapeʻa ma le faamaualuga. E lētioa tumu le lalolagi i le lē alofa ma le sauā! Ae peitaʻi, o le a lē faaauau ai pea ona iai lenā tulaga. O le a faamautinoa e Ieova, i le pulega o lona Malo o le a iai le agalelei ma le alofa, na i lo le finauvale ma le sauā.
O le a Faaalia le Agalelei i le Malo o le Atua
16. Aiseā o le a matuā iloga ai le agalelei i le pulega a le Atua e ala iā Iesu Keriso, ma o le ā ua manaʻomia ai ona tatou faia?
16 E finagalo Ieova ma Iesu Keriso lē na tofia e avea mulimuli ane ma Tupu o Lona Malo, ina ia mātauina o la tagatānuu i le agalelei. (Mika 6:8) Na faailoa mai e Iesu iā i tatou se faataʻimuaga o le matuā olaola o le agalelei i le pulega ua tuuina atu iā te ia e lona Tamā. (Eperu 1:3) E mafai ona mātauina lenei mea i fetalaiga a Iesu na fai atu i taʻitaʻi o lotu sesē, o ē na faatigāina tagata i avega mamafa. Na ia fetalai: “Ia outou ō mai iā te aʻu, o outou uma o ē tigāina ma mafatia i avega, o aʻu foʻi e mālōlō ai outou. Ia outou amoina laʻu amo, ma ia outou faaaʻoaʻo iā te aʻu, auā o aʻu lē agamalu ma le loto maulalo; ona maua lea e outou o le mālōlōga mo outou agaga. Auā e avegofie laʻu amo, o laʻu avega foʻi e māmā ia.” (Mataio 11:28-30) O le toʻatele o ē atonu o taʻitaʻi lotu po o isi foʻi ituaiga taʻitaʻi o le lalolagi, ua latou faatigāina tagata i avega mamafa i le tele o tulafono ma tiutefai. Ae peitaʻi, o le mea na faafinagaloina e Iesu mai ona soo ia talafeagai o latou manaʻoga ma mea latou te mafai. O le avega a Iesu e faafouina ai ma e agalelei! Pe lē uunaʻia ai ea i tatou ia pei o ia i le faaalia o le agalelei i isi?—Ioane 13:15.
17, 18. Aiseā tatou te talitonu ai e faapea, o le a faaalia e i latou o ē pule faatasi ma Keriso i le lagi ma ona sui faalelalolagi le agalelei?
17 O fetalaiga mataʻina a Iesu i ona aposetolo o loo faamatilatila ai le auala e matuā iloga ai ona eseese le pulega o le Malo o le Atua mai pulega a tagata. Ua faapea mai le Tusi Paia: “Sa latou fefinauaʻi foʻi po o ai so latou [le ʻau soo] e sili. A ua fetalai atu o ia iā te i latou, “O tupu o nuu ese ua aliitaʻi i latou; o ē pule foʻi iā i latou ua taʻua i latou o ē agalelei. A e lē faapea outou; peitaʻi o lē sili iā te outou, ia avea o ia ia pei o lē aupito itiiti; o le pule foʻi, ia pei o le auauna ia. Auā po o ai lē sili; o lē taoto ea e ʻai, po o lē auauna mai? E lē o lē taoto e ʻai ea? A o aʻu nei, o loo iā te outou pei o le auauna lava.”—Luka 22:24-27.
18 Ua saʻilia e taʻitaʻi faaletagata tulaga silisili e ala i le ʻaliitaʻi’ i tagata, ma e ala i le saʻilia o ni tofi maualuluga i le talitonu e faapea, o na tofi o le a maoaʻe ai o latou tulaga na i lo i latou o loo latou pulea. Ae peitaʻi, na fetalai Iesu e faapea o le tulaga sili moni lava e maua mai i le auauna atu i isi—o le filigā ma le faaauau pea ona tauivi e auauna i isi. O i latou uma o le a pule faatasi ma Iesu i le lagi pe auauna o ni ona sui faalelalolagi, e ao ona tauivi malosi e mulimuli i lana faaaʻoaʻoga o le lotomaulalo ma le agalelei.
19, 20. (a) Na faapefea ona faaalia e Iesu le tele o le agalelei o Ieova? (e) E faapefea ona tatou faaaʻoaʻo iā Ieova i le faaalia o le agalelei?
19 Seʻi o tatou vaai i le isi fautuaga alofa na ofo mai e Iesu. O le faaalia o le tele o le agalelei o Ieova, na fetalai ai Iesu: “Pe afai tou te alolofa atu i ē alolofa mai iā te outou, pe se ā ea se faafetai iā te outou i lea mea? Auā ua alolofa atu ē agasala i ē alolofa mai iā te i latou. Pe afai foʻi tou te agalelei atu i ē agalelei mai iā te outou, se ā ea se faafetai iā te outou i lea mea? Auā ua faia lea lava mea ē ua agasala. Pe afai tou te avatu tupe i ē nonō mai, ma outou faamoemoe i ai e toe maua mai ai, se ā ea se faafetai iā te outou i lea mea? Auā e avatu e tagata agasala tupe e nonōina e tagata agasala ina ia latou maua mai sona faatusa. Peitaʻi outou, ia outou alolofa atu i ē o fai outou mo latou fili, ma ia agalelei atu, ma ia avatu tupe e nonōina, aua le faamoemoe i se mea e tasi e au mai; e tele ai lo outou taui, e avea foʻi outou ma fanau a le Silisili ese; auā o ia lē agamalu i ē agavale, atoa ma ē amio leaga. O lenei, ia mutimuti vale lo outou alofa, pei ona alofa mutimuti vale o lo outou Tamā.”—Luka 6:32-36.
20 O le agalelei o le Atua e lē manatu faapito. E lē faatalitalia le toe taui atu. O le agalelei o Ieova “na te faaoso i lona lā i ē ua amio leaga atoa ma ē ua amio lelei ua ia faatotō ifo foʻi le ua i ē ua amiotonu, atoa ma ē ua amiolētonu.” (Mataio 5:43-45; Galuega 14:16, 17) I le faaaʻoaʻo atu i lo tatou Tamā faalelagi, e lē gata o le a tatou ʻalofia ai le faamanuʻalia o ē lē loto faafetai, ae ia faia mea lelei iā i latou, e oo lava i o tatou fili. E ala i le faaalia o le agalelei, tatou te faaali atu ai iā Ieova ma Iesu e faapea, tatou te faanaunau e ola i le Malo o le Atua, lea o le a iai le agalelei ma isi uiga o le Atua i faiā uma faaletagata.
Aiseā e Faaalia ai le Agalelei?
21, 22. Aiseā e ao ai ona tatou faaalia le agalelei?
21 E matuā tāua le faaalia o le agalelei e se Kerisiano moni. O faamaoniga o le iai iā i tatou o le agaga o le Atua. E lē gata i lea, pe a tatou faaalia le agalelei moni, ua tatou faaaʻoaʻo ai iā Ieova le Atua ma Iesu Keriso. O le agalelei o se mea foʻi e manaʻomia mo i latou o le a avea ma tagatānuu o le Malo o le Atua. O lea la, e ao ona tatou naunau i le agalelei ma faamasani e faatino.
22 O ā nisi auala aogā e mafai ona tatou faaalia ai le agalelei i o tatou olaga i aso faisoo? O le a talanoaina i le mataupu o sosoo mai.
E Faapefea Ona E Tali?
• O le ā le agalelei?
• Aiseā ua sauā ma lē alolofa ai le lalolagi?
• E faapefea ona tatou iloa o le a iai le agalelei i le pulega a le Atua?
• Aiseā e tāua ai le faaalia o le agalelei e i latou e faanaunau e soifua i le Malo o le Atua?
[Fesili mo le Suʻesuʻega]
[Ata i le itulau 13]
E tauivi toeaina Kerisiano ina ia agalelei i feutagaʻiga ma le lafu
[Ata i le itulau 15]
O le alofa faamaoni o Ieova o le a ia fesoasoani ai i ana auauna i taimi faigatā
[Ata i le itulau 16]
O le agalelei o Ieova na te faaoso ai le lā ma faatotō ai le ua i tagata uma