Ia Filigā e Faaalia le Agalelei i se Lalolagi Fe‘aina‘i
Ia Filigā e Faaalia le Agalelei i se Lalolagi Feʻainaʻi
“O le mea e manaʻomia i le tagata, o lona alofa [“agalelei,” NW] lea.”—FAATAOTO 19:22.
1. Aiseā e faigatā ai ona faaalia le agalelei?
PO O e manatu o oe o se tagata agalelei? Afai o lea, o le soifua ai i le lalolagi i aso nei e ono faafaigatā ai ona faia faapea. E moni, o le agalelei o loo taʻua i le Tusi Paia o se vaega o “fua o le agaga,” ae aiseā ua faigatā ai ona faaalia le agalelei e oo lava i atunuu o faapea mai o atunuu Kerisiano? (Kalatia 5:22) E pei ona tatou mātauina i le mataupu na muamua atu, e maua se vaega o le tali i le mea na tusia e Ioane—o le lalolagi uma o loo pulea e se agaga lē agalelei, o Satani le Tiapolo. (1 Ioane 5:19) Na faailoa mai e Iesu Keriso Satani o “le alii o lenei lalolagi.” (Ioane 14:30) O lea la, ua pei lenei lalolagi o lo latou taʻitaʻi fouvale, o ona uiga ua faamatalaina e ala i ana amioga sauā.—Efeso 2:2.
2. O ā luʻi e mafai ona aafia ai lo tatou faaalia o le agalelei?
2 E matuā afāina o tatou olaga pe a agaleaga mai isi iā i tatou. E ono faaalia e tuaoi lotovale lenei uiga, tagata ese e lē faaleuō, e oo lava i uō ma sui o le aiga o ē i nisi taimi e gaoioi ai ma le lē faaaloalo. E masani ona faapogaia le tigā i nisi taimi ona o omiga pe a feiloaʻi ma tagata o ē lē mafaufau ma soona feʻei ma lafo upu masoā. O le itiiti o le faaalia o le agalelei e isi tatou te ono lagona ai le lē fiafia iā i tatou lava, ma tatou te ono manatu ai e taui atu le leaga i le leaga. O na uiga e ono oo atu ai i faafitauli i le soifua mālōlōina faaleagaga ma le faaletino.—Roma 12:17.
3. O ā faafitauli matuiā ua fesagaʻi ma tagata ua tofotofoina ai lo latou naunau e faaalia le agalelei?
3 E mafai foʻi e tulaga faigatā o le lalolagi ona faafaigatā ai mo i tatou ona faaalia le agalelei. O se faaaʻoaʻoga, e lagona e tagata le mafatia ona o faiga taufaamataʻu ma faiga faatupu faalavelave, aemaise le ono faaaogāina e malo eseese o meatau o kasa oona po o meatau faaniukilia. E lē gata i lea, e faitau miliona tagata o loo matitiva, ua utiuti taumafa, faalētonu mea e nonofo ai, lavalava ma tausiga faafomaʻi. Ua avea o se luʻi le faaalia o le agalelei pe a foliga mai ua siliga tali i seu se auala e faaleleia ai tulaga o mea.—Failauga 7:7.
4. O le ā le faaiʻuga sesē e ono faia e se tasi pe a mafaufau e faatatau i le faaalia o le agalelei i isi?
4 E faigofie lava ona fai se faaiʻuga a se tasi e faapea, o le faaalia o le agalelei e lē o se mea e ao ona faamuamua ma o se faailoga lea o le vaivai. E ono manatu ua faaaogāsesē o ia ma faia o ia e aunoa ma se magafagafa i ona faalogona. (Salamo 73:2-9) Ae peitaʻi, ua saunia e le Tusi Paia le taʻitaʻiga talafeagai mo i tatou ina ua faapea mai: “O le tali filemu e liliueseina ai le ita; a o le upu faatigā e tupu ai le ita.” (Faataoto 15:1) O le agamalu ma le agalelei o vala ia e lua o fua o le agaga e fesootaʻi vavalalata ma e aogā pe a feagai ma tulaga faigatā.
5. O fea nisi o vala o le olaga e manaʻomia ai le agalelei?
5 Talu ai o le faaalia o fua o le agaga paia o le Atua e matuā tāua tele iā i tatou o Kerisiano, e ao la ona tatou iloilo le auala e mafai ai ona tatou faaalia se tasi o na uiga—o le agalelei. Pe e talafeagai ea ona filigā e faaalia le agalelei i se lalolagi feʻainaʻi? Afai e mafai, o fea nisi o vala e mafai ona tatou faaalia atu ai, tatou te lē o faatagaina aafiaga a Satani e taofia ai lo tatou agalelei, aemaise lava i tulaga faigatā? Seʻi o tatou iloiloina le faaalia o le agalelei i le aiga, i mea e faigaluega ai, i aʻoga, i o tatou tuaoi, i la tatou faiva, ma i uso talitonu.
Faaalia le Agalelei i Totonu o le Aiga
6. Aiseā e tāua ai le agalelei i totonu o le aiga, ma e faapefea ona faaalia?
6 Ina ia maua faamanuiaga ma le taʻitaʻiga a Ieova, e tāua tele fua o le agaga ma e manaʻomia ona atiina aʻe. (Efeso 4:32) Seʻi o tatou talanoaina le manaʻomia e sui o le aiga ona faaalia le agalelei o le tasi i le isi. I feutagaʻiga i aso faisoo, e ao i le tane ma le avā ona faaalia le agalelei ma le alofa o le tasi i le isi ma i a la fanau. (Efeso 5:28-33; 6:1, 2) E manaʻomia ona faamaonia lenā agalelei i le auala e fetalanoaaʻi ai sui o le aiga, o fanau ia āva ma faaaloalo i o latou mātua ma e ao i mātua ona feagai ma a latou fanau i le auala saʻo. Ia vave ona faamālō atu i ai, ae aua neʻi vave ona taʻusalaina i latou.
7, 8. (a) O ā ituaiga o amioga e ao ona tatou ʻalofia pe afai tatou te faaalia le agalelei moni i le aiga? (e) E faapefea i fesootaʻiga lelei ona saosaolaumea i le malosi o le autasi o le aiga? (i) E faapefea ona e faaalia le agalelei i lou aiga?
7 O le agalelei i o tatou aiga, e aofia ai le utagia o le fautuaga a Paulo lea na faapea mai: “Ia tuu ese ai e outou lava o nei mea uma, o le ita, o le lotoa, o le loto leaga, o le upu leaga, ma le upu matagā ai o outou gutu.” E ao i aiga Kerisiano ona feutagaʻi le tasi ma le isi i se uiga faaaloalo i aso uma. Aiseā? Auā foʻi o fesootaʻiga lelei o se vala tāua tele o ni aiga e malolosi ma soifua mālōlōina lelei. Ina ia faaleleia ni feeseeseaʻiga e tulaʻi mai, ia taumafai e foʻia le faafitauli na i lo le taumafai e manumalo i le finauga. E faia e sui o le aiga taumafaiga e faatupuina ai le agalelei ma le magafagafa o le tasi i le isi.—Kolose 3:8, 12-14.
8 O le agalelei o se uiga lelei ma e uunaʻia ai i tatou e faia mea lelei i isi. O lea la, ia avea i tatou o nisi e aogā, magafagafa, loto fesoasoani i se uiga lelei i isi sui o le aiga. E manaʻomia ai taumafaiga a tagata taʻitoʻatasi ma le ʻauaiga uma ina ia faaalia le agalelei lea e atagia atu ai le lelei o se aiga. O le iʻuga, e lē gata o le a latou maua ai faamanuiaga a le Atua, ae i totonu o le faapotopotoga ma i nuu o loo latou iai, o le a latou āva ai iā Ieova le Atua le faaaʻoaʻoga autū o le agalelei.—1 Peteru 2:12.
Faaalia le Agalelei i Nofoaga e Faigaluega Ai
9, 10. Ia faamatala ni faafitauli e tutupu i le mea e faigaluega ai, ma ia faamatala mai pe faapea ona ono taulimaina ma le agalelei.
9 O le faasologa masani o galuega atonu e avea o se luʻi mo se Kerisiano le faaalia o le agalelei i ē latou te faigaluega faatasi. O le faatavā i le va o tagata faigaluega e ono faaleagaina ai se galuega a se tasi e se tagata faigaluega e lē faamaoni pe faitogafiti, ma o le a faapea ona taʻufaatauvaaina ai se talaaga o se tasi i le pule. (Failauga 4:4) E lē faigofie ona faaalia le agalelei i na taimi. Peitaʻi, e ao ona manatua e faapea, o le agalelei o le mea saʻo lea e ao ona fai, e ao i se auauna a Ieova ona tauivi e faaalia le agalelei iā i latou e lē masani lelei i ai. O le faaalia o se uiga manatu mamafa i isi e ono fesoasoani lea iā i tatou e faia faapea. Atonu e mafai ona e faaalia le manatu mamafa pe afai e gasegase se tasi o le ʻaufaigaluega po o se tagata foʻi o lona aiga. E oo foʻi i le fesili i le tulaga sologa lelei o se tasi po o le aiga e mafai ona iai se aafiaga lelei i le isi tagata. Ioe, e ao i Kerisiano ona saʻili e faatupuina le autasi ma le filemu pe afai e mafai iā i latou. I nisi taimi, o se upu agalelei lea e faaalia ai le amanaʻia ma le manatu mamafa o le a fesoasoani i lea tulaga.
10 I nisi tulaga, e ono malolosi ai manatu o le pule i tagata faigaluega ma atonu e manaʻo i tagata uma ina ia faia se vaega i se gaoioiga lotonuu, po o se aso faamanatu e lē faale-Tusi Paia lona tupuaga. Pe afai e lē faatagaina e le lotofuatiaifo o se Kerisiano o ia e auai, atonu o le a oo ai i ni feteenaʻiga. I lenā taimi e lē o se faiga atamai le faamatala auiliili i ai o le auala e sesē ai le lolo atu i manatu o le pule. O le mea moni, o i latou o ē tatou te lē tapuaʻi faatasi, o le auai i se aso faamanatu e foliga mai o le mea saʻo lea e ao ona fai. (1 Peteru 2:21-23) Atonu e mafai ona e faamatala atu ma le agalelei au māfuaaga o lou lē auai. Aua le tali atu ni faaupuga tigā i nisi faaupuga tigā. E lelei i se Kerisiano ona mulimuli i le fautuaga lelei a le Roma 12:18 e faapea: “Afai e mafaia iā te outou, ia outou nofo lelei ma tagata uma lava.”
Faaalia le Agalelei i le Aʻoga
11. O ā luʻi ua fesagaʻi ma talavou i le faaalia o le agalelei i tamaiti aʻoga?
11 O se matuā luʻi mo talavou le faaalia o le agalelei i isi tamaiti aʻoga. E masani ona faanaunau talavou ina ia taliaina i latou e tamaiti o le vasega. Ua faia e nisi tama ni uiga sauā ina ia amanaʻia ai o ia e isi tamaiti ma fia malosi ai foʻi i isi tamaiti o le aʻoga. (Mataio 20:25) O nisi talavou e mananaʻo e fia faalialia i mea tau aʻoaʻoga, taaloga po o isi gaoioiga. O le fia faalialia o latou tomai, e masani ona latou lē agalelei ai i isi tamaiti o le vasega ma tamaiti o le aʻoga, ma mafaufau sesē ai e faapea, o taleni ma le tomai ua latou maua ua sili ai i latou i isi tamaiti. E ao i se Kerisiano talavou ona faaeteete ia aua neʻi faataʻitaʻi i na tamaiti. (Mataio 20:26, 27) Na faapea mai Paulo “e onosai le alofa, e agamalu,” ma e lē “mitamita vale le alofa, e lē faafefeteina.” O lea la, o le matafaioi a se Kerisiano, o le aua neʻi mulimuli i faaaʻoaʻoga a i latou o ē agaleaga, peitaʻi ia pipii atu i fautuaga a le Tusi Paia i a latou feutagaʻiga ma tamaiti o le aʻoga.—1 Korinito 13:4.
12. (a) Aiseā atonu o se luʻi ai i talavou le faaalia o le agalelei i o latou faiaʻoga? (e) O ai e mafai ona vaai i ai talavou mo se fesoasoani pe a uunaʻia i latou e aua le agalelei atu?
12 E ao i talavou ona feutagaʻi ma le agalelei ma o latou faiaʻoga. E toʻatele tamaiti aʻoga e fiafia e faaita o latou faiaʻoga. Ua latou manatu ua latou popoto pe a faaitiitia le faaaloalo i o latou faiaʻoga, e ala i le auai i gaoioiga e solia ai tulafono a le aʻoga. E ala i lo latou tau faamataʻu, atonu latou te taaʻina ai isi ina ia aufaatasi atu iā i latou. Pe afai e musu se talavou Kerisiano, o le a avea o ia ma taulaʻiga o tauemuga pe faileagaina foʻi. O le feagai ai ma na tulaga i tausaga aʻoga e tofotofoina ai se Kerisiano e filifili pe faaalia le agalelei. Ae ui i lea, ia manatua, maʻeu le tāua o le avea ma auauna faamaoni a Ieova. Ia e mautinoa o le a ia lagolagoina oe e ala i lona agaga i nei taimi faigatā o le soifuaga.—Salamo 37:28.
Faaalia le Agalelei i Tuaoi
13-15. O le ā e taofia ai i tatou mai le faaalia o le agalelei i se tuaoi, ma e faapefea ona faafetaiaʻia nei luʻi?
13 Pe e te nofo i sou lava fale, se fale mautotogi, se nofoaga e paka ai taavale toso, po o fea lava e te nofo ai, e mafai ona e mafaufau i auala e faaalia ai le agalelei ma le manatu mamafa mo le lelei o tuaoi. E lē faigofie foʻi lenei mea.
14 Ae ā pe afai e faailoga tagata lou tuaoi iā te oe ona o lou lanu, atunuu po o le tapuaʻiga? Ae ā pe afai e lē mafaufau i nisi taimi po o le matuā lē amanaʻia lava foʻi o oe? I le avea ai o se auauna a Ieova, e aogā tele le faaalia o le agalelei i le tele e mafai ai. O le a matilatila ese ai oe o sē e faafouina ai—e matuā viia moni ai Ieova le faaaʻoaʻoga sili o le agalelei. E te lē mailoa e ono suia ai uiga o lou tuaoi ona o lou agalelei. E ono avea ai o ia ma se tasi e vivii iā Ieova.—1 Peteru 2:12.
15 E ono faaalia faapefea le agalelei i o tatou tuaoi? O se tasi o auala, e ala i amioga lelei a sui uma o le aiga ma ia faaalia fua o le agaga. Atonu e mātauina e tuaoi lenei mea. I nisi taimi, e te ono mafai ona faia ni gaoioiga lelei i ou tuaoi. Ia manatua o le agalelei o lona uiga o le naunau lea i le lelei o isi.—1 Peteru 3:8-12.
Faaalia le Agalelei i la Tatou Faiva
16, 17. (a) Aiseā e tāua ai le agalelei i la tatou faiva i le lautele? (e) E faapefea ona faaalia le agalelei i vala eseese o le faiva i le fanua?
16 O le agalelei e ao ona mātaulia ai la tatou faiva faa-Kerisiano, a o tatou maumauaʻi e faia taumafaiga ina ia oo atu i tagata i o latou aiga, i pisinisi ma nofoaga faitele. E ao ona tatou manatua o loo fai i tatou ma sui o Ieova, o lē e agalelei.—Esoto 34:6.
17 O le ā e aofia ai i au taumafaiga ina ia faaalia le agalelei i lau faiva? O se faaaʻoaʻoga, a o molimau atu i le auala tele e mafai ona e faaalia le agalelei e ala i le faapuupuu ma ia faautauta a o e faalatalata atu i tagata. E masani lava ona pisi autafa o le auala i tagata savavali, o lea ia faaeteete neʻi e polokaina le auala. E lē gata i lea, pe a e molimau atu i oganuu pisinisi, ia faaalia lou agalelei e ala i le faapuupuu ma ia manatua e tatau ona uaʻi atu faatauoloa i tagata faatau.
18. O le ā le vaega a le faautaga poto e faia i le faaalia o le agalelei i la tatou faiva?
18 E tatau ona faaaogā le faautaga poto i le faiva i le fale le fale. Ia aua le umi o iai i le fale, aemaise lava pe a leaga le tau. Pe e mafai i lau faautaga poto ona e mātauina ua lē toʻa le tagata ia po o le lē fiafia foʻi i lou iai i le fale? Atonu i le vaega o le lalolagi o loo e alaala ai, e masani ona asiasi soo atu ai Molimau a Ieova. Afai o le tulaga lenā, ia faaalia le magafagafa iā i latou, ia agalelei ma ia tausaafia. (Faataoto 17:14) Ia taumafai e malamalama i le māfuaaga ua lē fia faalogo ai le tagata o le aiga i lenā aso. Manatua, atonu o le a asiasi atu iai se tasi o ou uso po o se tuafafine Kerisiano i lenā aiga i se taimi i le lumanaʻi. Afai e te feiloaʻi i se tasi e lē mafaufau, ia faia ni taumafaiga e faaalia ai le agalelei. Aua e te leotele pe faaʻūʻū ae ia tautala i se leo mālū. O se Kerisiano e agalelei e lē manaʻo e faapogaia se finauga ma le tagata o le aiga. (Mataio 10:11-14) Atonu i se aso, o le a faalogo ai lenā tagata i le tala lelei.
Faaalia le Agalelei i Sauniga a le Faapotopotoga
19, 20. Aiseā e moomia ai le agalelei i le faapotopotoga, ma e faapefea ona faaalia?
19 E tāua foʻi le faaalia o le agalelei i o tatou uso talitonu. (Eperu 13:1) Talu ai o i tatou o se vaega o le ʻauuso i le lalolagi aoao, e tāua ai le agalelei i a tatou feutagaʻiga ma isi.
20 Afai e sili atu i le tasi pe lua pe sili atu foʻi faapotopotoga o loo faaaogāina se Maota o le Malo, e tāua le feutagaʻi ma le agalelei ma le faaaloalo ma i latou i isi faapotopotoga. O le agaga faatavā e faigatā ai ona galulue soosootauau pe a oo mai i le faatulagaina o taimi mo sauniga ma isi mea tāua e pei o galuega faamamā po o le toe faafouina o ni vaega o le maota. Ia agalelei ma magafagafa e tusa lava pe ono eseese ni taofi. I lenei auala o le a manumalo ai le agalelei ma o le a faamanuia Ieova i au taumafaiga ua faia mo le lelei o isi.
Ia Faaauau Ona Faaalia le Agalelei
21, 22. I le ōgatasi ma le Kolose 3:12, o le ā e ao ona tatou faia?
21 O le agalelei o se uiga e aofia ma aafia ai vala uma o tatou olaga. O lea la, e ao ona avea ma vaega tāua o tatou uiga faa-Kerisiano. E ao ona avea ma masani le faaalia o le agalelei i isi.
22 E ao iā i tatou uma lava ona agalelei i isi i aso uma ma faatatauina upu a Paulo e faapea: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o ē ua filifilia e le Atua, o ē ua paia ma ua alofaina.”—Kolose 3:12.
Pe E te Manatua?
• O le ā e faigatā ai mo se Kerisiano ona faaalia le agalelei?
• Aiseā e tāua ai le faaalia o le agalelei i le aiga?
• O ā nisi o luʻi i le faaalia o le agalelei i le aʻoga, i galuega ma tuaoi?
• Ia faamatala le auala e faaalia ai e Kerisiano le agalelei i la latou faiva i le lautele.
[Fesili mo le Suʻesuʻega]
[Ata i le itulau 18]
O le faaalia o le agalelei e tagata uma o le aiga e faatupuina ai le autasi ma le galulue soosootauau
[Ata i le itulau 19]
E mafai ona e faaalia le agalelei pe a gasegase se tasi lua te faigaluega faatasi po o se isi foʻi o lona aiga
[Ata i le itulau 20]
E lagolagoina e Ieova i latou o ē faaalia ma le faamaoni le agalelei e ui i tauemuga
[Ata i le itulau 21]
O le fesoasoani i se tuaoi o loo iai le manaʻoga, o se gaoioiga o le agalelei