Molimau Lē Fuafuaina i Oganuu e Tautala i le Faa-Peretania i Mekisikō

A O faatalitali le aposetolo o Paulo mo ana aumea faimalaga i Atenai, sa ia faaaogā le taimi e molimau lē fuafuaina atu ai. Ua faapea mai le Tusi Paia: “Ua tautala foʻi ma ē na feiloaʻi ma ia i le malae i aso fai soo.” (Galuega 17:17) I lana malaga mai Iutaia i Kalilaia, sa molimau lē fuafuaina atu ai Iesu i se fafine Samaria i tafatafa o se vaieli. (Ioane 4:3-26) Pe e te faaaogā avanoa uma e talanoa atu ai e uiga i le tala lelei o le Malo o le Atua?

E tele lava ina talaʻi lē fuafuaina ia le faapotopotoga e tautala i le faa-Peretania i Mekisikō. E masani ona latou talaʻi atu i tagata tafafao maimoa atu i nofoaga o mataaga, i tamaiti aʻoga fegasoloaʻi i le iunivesite, ma tagata mai isi atunuu ua mālōlō mai i a latou galuega, e masani ona ō atu e tafafao i paka ma faleʻaiga i Mekisikō. O le toʻatele o Molimau a Ieova e tautala i le faa-Peretania, e masani lava ona latou amataina ni talanoaga ma i latou na. E latou te matuā mataʻalia lava e talanoa atu i so o se tasi e foliga e sau mai se isi atunuu, po o se tasi e tautala i le faa-Peretania. Seʻi o tatou vaai pe e faapefea ona latou faia o lenā mea.

E tele taimi e na ona faailoa atu ai lava e uso Molimau mai isi atunuu o loo auauna i le oganuu faa-Peretania i latou i ē e foliga mai e ō mai mai i isi atunuu ma fesili atu i ai po o fea e latou te ō mai ai. O lenei faiga, na iʻu ai lava i le fesiligia o le Molimau po o le ā lana mea lea e fai i Mekisikō ma maua ai loa le avanoa e faamatala atu ai e le Molimau ona talitonuga faa-Kerisiano. O se faaaʻoaʻoga, o Gloria, e auauna o ia i le oganuu o loo tele ai le manaʻomia i le gagana faa-Peretania i Oaxaca, ua ia iloa le matuā faigofie ona amataina ni talanoaga faapena. A o foʻi atu i le fale mai le talaʻiga lē fuafuaina i se fale tele i le taulaga, na taofi ai Gloria e se ulugalii mai Egelani. Na faapea atu le fafine ma le ofo tele: “E faatoʻā ou vaai lea i se fafine uliuli o fealuaʻi i inei i Oaxaca!” Na i lo o le ita, na ʻata ia Gloria, ma na amata loa ona latou talanoa i le māfuaaga ua iai o ia i Mekisikō. Na valaaulia e le fafine ia Gloria e ō e inu sa la ipu kofe i lona fale. Ina ua uma se talanoaga, na ofo atu loa e Gloria ia mekasini o le Olomatamata ma le Ala Mai!, ae na teena e le fafine ma faapea mai, o ia e lē talitonu e iai se Atua. Na faapea atu ia Gloria, e fiafia o ia e talanoa i tagata e lē talitonu e iai se Atua ma e fiafia foʻi e fia iloa sona manatu i le mataupu, “Pe Tatou te Manaʻomia Maota mo Tapuaʻiga?” Na talia e le fafine ma faapea atu: “O se mea uiga ese pe afai e mafai ona e faatalitonuina aʻu e iai se Atua.” Sa manaia lava ni talatalanoaga na faia a o inuina le kofe. Na ō mulimuli ane le ulugalii i Egelani, ae sa faaauau pea ona faia talanoaga e ala i le i-meli.

Sa amata foʻi ona talanoa atu ia Gloria  iā Sarona, o se teine aʻoga mai Washington, D.C., o lē sa i Oaxaca ona o se galuega tauofo e galulue ma fafine o le atunuu e faauma ai ona suʻe lona faailoga maualuga i le iunivesite. Ina ua uma ona faamālō atu iā Sarona mo ana taumafaiga, ona faamatala atu lea e Gloria le pogai ua iai o ia i Mekisikō. Na iʻu lenei mea i se talanoaga manaia lava e uiga i le Tusi Paia ma le mea o le a faia e le Atua e lē na o ē matitiva, a o tagata uma lava. Na faapea mai Sarona, e mālie lenei mea, auā e leʻi talanoa atu o ia i ni Molimau a Ieova i le Iunaite Setete, ae o se tagata muamua lea ua ia feiloaʻi atu i ai i Mekisikō, o se tasi o Molimau a Ieova! Sa talia e Sarona se suʻesuʻega faale-Tusi Paia ma amata loa ona auai i sauniga faa-Kerisiano.

E toʻatele tagata mai isi atunuu ua ō atu i nofoaga o mataaga i matafaga i Mekisikō e saʻili ai mo ni tulaga faaparataiso. Na faaaogā e Laurel le avanoa lenei e amata ai ni talanoaga i Acapulco, i le fesili atu i tagata pe e sili atu ona foliga parataiso ia Acapulco na i lo o atunuu latou te ō mai ai, ma o le ā le mea e latou te fiafia ai iā Acapulco. Ona ia faamatala atu lea e faapea, ua toeitiiti lava ona avea loa lea o le lalolagi atoa ma parataiso moni. O se talanoaga foʻi faapenei ma se fafine mai Kanata na ia feiloaʻi i ai i se ofisa o se fomaʻi manu, na mafai ona amata ai se suʻesuʻega faale-Tusi Paia. Pe faamata e aogā se talanoaga faapena i le vaipanoa o loo e nofo ai?

I Auala ma Nofoaga Faitele

E masani lava ona amataina se talanoaga i le auala po o nofoaga faitele i lou fesili atu: “E te iloa nanu?” E toʻatele tagata Mekisikō e iloa ona o a latou aʻoaʻoga pe ona sa latou nonofo i le Iunaite Setete.

Na faafeiloaʻi e se ulugalii Molimau se tinā matua o lē sa alu i le nofoa faataavale lea sa tulei e se tamaʻitaʻi tausimaʻi. Sa la fesili atu i le tinā matua pe e iloa nanu. Sa ia tali mai na te iloa talu ai e tele tausaga sa nofo ai o ia i le Iunaite Setete. Na talia e le tinā matua Le Olomatamata ma le Ala Mai!, ia e leʻi faitau muamua lava i ai, ma taʻu atu iā i laʻua lona igoa o Consuelo, ma le mea e nofo ai. I le fā aso mulimuli ane ina ua la asiasi atu i lea nofoaga, na la iloa ai, o se nofoaga mo tagata matutua e faatautaia e taupousā o le Lotu Katoliko. I le taimi muamua, sa faigatā ona faafesootaʻi atu ia Consuelo, talu ai sa masalosalo ia taupousā ma fai atu e lē mafai ona talia i laʻua e Consuelo. Na talosaga atu le ulugalii Molimau i taupousā ina ia faailoa atu iā Consuelo o lea e la te i le falemaʻi ma e fia feiloaʻi iā te ia. Na talia fiafia e Consuelo le ulugalii e ō mai. Talu mai ai lava, ua olioli ai lenei tinā ua 86 tausaga i se suʻesuʻega faifai pea o le Tusi Paia, e ui lava i faamatalaga lē fiafia e fai ane e taupousā. Sa auai foʻi o ia i nisi o sauniga faa-Kerisiano.

Ua faapea mai le Faataoto 1:20: “O loo alaga le poto i fafo; ua leo tele i malae.” Seʻi mātau le mea na tupu i se malae i San Miguel de Allende. I se tasi taeaopō, na faalatalata atu ai ia Ralph se tamāloa ua faamatuā tagata sa nofonofo i se nofoa. Na matuā faateʻia le tamāloa ina ua ofo atu i ai Le Olomatamata ma le Ala Mai! ma sa faamatala atu lana tala iā Ralph.

Sa avea o ia o se fitafita o le taua i Vietiname, ma ona o lona vaai pea i le toʻatele o tagata na fasiotia i le taua, na iʻu ai ina mafatia ona faalogona ma ua pagatia ai o ia i le tete o lona tino a o auai i le vaegaau. Na auina mai o ia mai le muāʻau o le taua i se toagalauapi o le vaegaau. O i inā, na tofia ai o ia e faatāʻeele ia tino oti o tagata  ma sauniuni e aauina atu i vaa i le Iunaite Setete. I le 30 tausaga ua mavae, e oo mai i le taimi nei, o loo mafatia pea o ia i ana miti i le pō ma faalogona mataʻu. A o nofonofo o ia i lea malae i lenā taeao, sa tatalo lē leoa atu o ia mo se fesoasoani.

Sa talia e le fitafita matua ia lomiga faapea ma le valaaulia ina ia auai i le Maota o le Malo. Ina ua uma le sauniga, na ia faapea mai, i lenā lua itula i le Maota o le Malo, o le uluaʻi taimi lea talu mai le 30 tausaga, na oo ai iā te ia se lagona o le toʻafilemu. E na o le lua vaiaso na iai lenei tamāloa i San Miguel de Allende, ae sa ia lagona le fiafia i le tele o suʻesuʻega faale-Tusi Paia ma auai i sauniga uma seʻia oo ina toe foʻi atu i lona aiga. Sa faia foʻi ni fuafuaga ina ia faaauau ai pea lana suʻesuʻega.

Molimau Lē Fuafuaina i le Galuega ma le Aʻoga

Po o e faailoa atu o oe o se tasi o Molimau a Ieova i le mea e te faigaluega ai? Na faia faapena e Adrián, o lē na te faatauina atu ia fale mautotogi mo tagata tafafao mai i Cape San Lucas. Ua faamatala mai e lē la te faigaluega faatasi o Judy le iʻuga e faapea: “I le na o le tolu tausaga ua mavae, pe afai na e taʻu mai iā te aʻu o le a avea aʻu ma Molimau a Ieova, ou te faapea atu, ‘E toe afe avea aʻu o se Molimau a Ieova!’ Ae ua ou manaʻo e faitau i le Tusi Paia. Sa ou manatu, ‘E lē faigatā naʻuā, talu ai ou te fiafia e faitau?’ Ae ua ou iloa e lē o le tulaga lenā, auā pe tusa e na o le ono itulau na ou faitauina, ae ou iloa, ua ou manaʻomia se fesoasoani. E na o le pau lava le tagata na ou mafaufau i ai, o laʻu uō lea na ma faigaluega faatasi, o Adrián. Sa ou fia talanoa atu iā te ia, talu ai, e na o ia lava le tagata amio saʻo i le fale faigaluega.” Sa vave lava ona ofo atu ia Adrián e ō atu ma lana uō o Katie, ma tali fesili uma lava a Judy. Na amata se suʻesuʻega a Katie ma Judy, ma e leʻi umi lava se taimi, ae avea loa Judy ma Molimau papatisoina.

Ae faapefea le molimau atu lē fuafuaina i le aʻoga? E toʻalua ni tamaiti Molimau sa aʻoaʻoina le gagana Sepania i le iunivesite, ae na lē aooga i le tasi aso ona sa auai i se fonotaga faa-Kerisiano. Ina ua la foʻi atu i le aʻoga, na faatonuina i laʻua ina ia faamatala atu i le gagana Sepania ia a la mea na fai. Na la faaaogā le avanoa e avatu ai se molimau i le mea sili ona lelei na la mafaia i le faa-Sepania. Sa matuā fiafia le faiaʻoga o Silvia i valoaga o le Tusi Paia. Sa ia talia se suʻesuʻega faale-Tusi Paia i le faa-Peretania ma ua avea nei ma tagata talaʻi o le tala lelei. Ua iai foʻi nisi o lona aiga ua faia foʻi ni suʻesuʻega. Fai mai ia Silvia: “Ua ou maua le mea na ou saʻilia i loʻu olaga atoa.” O le mea moni, e mafai ona maua ni iʻuga lelei i le molimau lē fuafuaina.

Faaaogāina o Isi Avanoa

O le faaalia o le agaga talimālō, e mafai foʻi ona avatu ai se molimau. Sa iloa le moni o lenā mea i le tulaga o le ulugalii o Jim ma Gail, o ē o loo auauna i San Carlos, i Sonora. O se fafine na alu i le tā o le ono i le taeao e faasavali ana taʻifau, sa tū ma talanoa faaviivii atu i le manaia o lo la lotoa. Sa valaaulia o ia e Jim ma Gail mo se ipu kofe. O se taimi muamua lea i tausaga e 60  ua ia faalogo ai iā Ieova ma le faamoemoe o le ola e faavavau. Na amata ai se suʻesuʻega faale-Tusi Paia.

Sa faapena foʻi ona agalelei ia Adrienne i tagata ese. Sa taumafa o ia i se faleʻaiga i Cancún, ina ua alu atu se tama talavou ma fesili atu pe sau o ia mai Kanata. Ina ua ia tali atu ioe, na faamatala atu e le tama e faapea, o loo la taumafai ma lona tinā e fesoasoani i lona tuafafine e saunia se lipoti o le aʻoga e faatatau i tagata Kanata. Na sau le tinā lea e iloa nanu ma nofo i tafatafa o Adrienne. Ina ua uma ona taliina ma le onosai ni fesili a le fafine e uiga i tagata Kanata, ona ia faapea atu lea: “Ae e iai se māfuaaga sili ona tāua na ou sau ai mai Kanata i inei; ina ia fesoasoani e aʻoaʻo tagata e uiga i le Tusi Paia. E te fiafia i lenā mea?” Na tali mai le fafine, e fiafia. Ua sefulu tausaga talu ona alu ese mai lana lotu, ma o loo taumafai e suʻesuʻe e ia lava le Tusi Paia. Na ia tuuina atu iā Adrienne lona tuatusi ma le numera o le telefoni , ma amataina ai se suʻesuʻega faale-Tusi Paia na fua mai.

“Lafo ia Lau Mea e ʻAi i Luga o le Vai”

I le talanoa atu i upu moni o le Tusi Paia i so o se avanoa, e masani ona avatu ai se molimau i tagata sa laʻitiiti pe na lē maua foʻi se avanoa e faalogo ai i le feʻau o le Malo. I se faleʻaiga pisi i le aai i le taulaga o vaa o Zihuatanejo, na valaaulia ai e se Molimau ni tagata se toʻalua mai se isi atunuu e latou te nonofo faatasi i lana laulau, ona ua tumu le faleʻaiga. O lenei ulugalii, sa fefolauaʻi mai lea atunuu i lea atunuu mo le fitu tausaga. Sa la faaalia lo la lē fiafia i Molimau a Ieova. Ina ua uma le feiloaʻiga i le faleʻaiga, na asiasi atu le Molimau i le ulugalii i luga o lo la vaa, ma valaaulia i laʻua e ō atu i lona fale. Na la talia le sili atu i le 20 mekasini ma tusi e 5, ma folafola atu o le a la saʻilia ia Molimau i le isi atunuu o le a la afea.

Sa mātauina e Jeff ma Deb se aiga ma sa latou pepe teine aulelei i se nofoaga e taumamafa ai ma fai ai faatauga a tagata lautele i Cancún. Ina ua la fai atu se tala i le aulelei o le pepe, na valaaulia i laʻua e le ulugalii e taumamafa faatasi sa latou pizza. Sa iloa ai o lenei aiga e mai i Initia. E la te leʻi faalogo lava e uiga i Molimau a Ieova pe na vaai foʻi i a tatou lomiga. Na latou ō ma ave ni lomiga a Molimau.

Sa tupu foʻi se mea faapena i se motu e tuese i le talafatai o Yucatán. Na talosaga atu se ulugalii fou faatoʻā uma ona faaipoipo mai Saina iā Jeff e puʻe ni o la ata, lea sa fiafia o ia e faia. Sa ia iloa ai i inā, e ui lava ua mavae le 12 tausaga talu ona nonofo lea ulugalii i le Iunaite Setete, ae e la te leʻi vaai lava pe faalogo e uiga i Molimau a Ieova! Na amataina ai se talanoaga manaia. Na faalaeiauina i laʻua e Jeff ina ia saʻili Molimau pe a foʻi atu i lo la aiga.

Atonu e iai se mea faapitoa na tupu i lou vaipanoa na mafai ai ona maua se avanoa e molimau lē fuafuaina atu ai. Ina ua alu atu le peresitene o le Iunaite Setete e asiasi i le peresitene o Mekisikō i lana faatoʻaga, e latalata i Guanajuato, na lolofi atu le ʻautusitala mai le lalolagi atoa i lea mea. Na filifili se tasi aiga Molimau e latou te faaaogā lenei avanoa e talaʻi atu ai i le gagana Peretania. Sa tali fiafia mai tagata i le oganuu. O se faaaʻoaʻoga, e tele ni taua na lipotia atu e se tasi tusitala, e pei o taua na faia i Kosovo ma Kuwait. Na maliu ai i ona lima se tasi na la faigaluega faatasi ina ua fana e se fitafita lafi solo. Ae ina ua faalogo i le toetū, na faafetai atu ma loimata le tusitala i le Atua ona ua faailoa atu iā te ia e iai se fuafuaga o le olaga. Na ia faapea atu, e ui lava o le a ia lē toe vaai i le ulugalii Molimau, ae o le a manatua pea i lona loto lenei tala lelei mai le Tusi Paia.

E pei lava ona faaalia i mea na tutupu o loo taʻua i luga, e masani lava ona lē iloa le iʻuga o na molimau. Ae peitaʻi, na faapea mai le tupu poto o Solomona: “Inā lafo ia lau mea e ʻai i luga o le vai; auā a mavae aso e tele e te toe maua.” Na ia faapea mai foʻi: “O le taeao ia e lūlū ai au saito, aua foʻi le mapu lou lima i le afiafi; auā e te lē iloa po o le fea e manuia, o lenei, po o lenā, pe gatusa ona lelei o ia mea e lua.” (Failauga 11:1, 6) Ioe, ia maelega “e lafo lau mea e ʻai” i luga o le tele o vai ma “lūlū ai au saito” ma le matamau, e pei ona faia e Paulo ma Iesu, e pei foʻi ona faia e Molimau i aso nei i oganuu e tautala i le faa-Peretania i Mekisikō.