Na Ia Teena Tofotofoga Ona o le Fesoasoani a le Tusi Paia

E matuā anoanoaʻi tofotofoga i le lalolagi i aso nei. E lē faigofie ai ona taofimau i tapulaa tau amio a le Tusi Paia. O se faataʻitaʻiga, atonu e avea o se luʻi le utagia o le fautuaga a le Tusi Paia e faapea: “Inā sosola ese ia outou i le faitaaga.”—1 Korinito 6:18.

O se tasi o Molimau a Ieova lea o le a tatou faaigoaina iā Sapati, sa faigaluega i se kamupani tele a Scandinavia, i Polani. Sa tauivi malosi o ia ina ia tausia lona faamaoni.

Sa lauiloa ia Sapati o se tasi o Molimau a Ieova. Ona o le fiafia o ona pule i lona maelega ma le faamaoni, na tuuina atu ai iā te ia nisi o faaeaga. Ae peitaʻi, o nei faaeaga, e aofia ai lona auai i nisi o fonotaga a le falefaigaluega ia sa faia ai ni faafiafiaga lē mamā.

Sa amata loa ona faalētonu le mafaufau o Sapati, ma faapea ifo: “Ua iloa lelei e loʻu pule, o aʻu o le Molimau a Ieova. O le pogai lenā ua ia maufaatuatuaina ai aʻu ma faalagolago mai iā te aʻu. Afai la ou te lē auai, o lona uiga o le a tuli aʻu ma le galuega, lea sa matuā faigatā lava ona ou mauaina. Ae ā pe a na ona ou alu lava ou te matamata?”

Ae na oo ina iloa e Sapati, e tele mea ia o le a aafia ai o ia. Ua faatalitalia o ia na te “vaaia” ia tane mai isi atunuu, e ala i le saʻilia o ni “teine” mo ni fuafuaga faaleituaiga lē mamā e ō e tafafao ma tamāloloa i le pō. O le ā se gaoioiga o le a ia faia?

Sa manatu loa ia Sapati e faamanatu i le pule e uiga i lona manatu faavae i le Tusi Paia e faatatau i amioga lē mamā. Sa vave lava ona manino mai le lē fetaui o le galuega iā Sapati, ma ua lē o toe umi ona ia faamavae loa lea. Sa ia maua se galuega fou e laʻitiiti le totogi ae leai ni tofotofoga faapena. Ua mamā nei lona loto fuatiaifo.

O le ā se mea e te faia pe a uunaʻia oe e se tasi e faia sou sao pe manatu māmā i amioga lē mamā? Po o le a e loto e faia vave se suiga? O le mea lenā na faia e Iosefa i aso ua mavae, e pei ona faamatalaina mai i le Tusi Paia i le Kenese 39:7-12.