Pe E te Manatua?

Pe na e fiafia e faitau lomiga talu ai nei o Le Olomatamata? Ia, seʻi vaai pe mafai ona e taliina fesili o loo mulimuli mai:

• O le ā e faaalia ai faapea e iai uso ma tuafāfine o Iesu?

O le faamatalaga lenā a le Tusi Paia i le Mataio 13:55, 56 ma le Mareko 6:3. O le upu Eleni (adelphos) o loo maua i na fuaiupu o loo faaaogā e faamatalaina ai “se ituaiga o faiā faaletino po o faiā faaletulafono [ma] e uiga atu i uso moni po o ʻafa uso.” (The Catholic Biblical Quarterly, Ianuari 1992)—12/15, itulau 3.

• O le ā ua matuā manino mai e faatatau i le tulaga o taua o loo iai nei, ma o le ā e masani lava ona avea ma māfuaaga autū?

I tausaga talu ai nei ua malaia tagata i faigātaua, ma e autū lava i taua a tagata o le atunuu lava latou—taua i le va o vaega o tagatānuu feteenaʻi o le atunuu lava latou. O vala o loo saosaolaumea i taua i le atunuu, o le feitagaʻi o tagata o le atunuu lava ia, o le va o ituaiga, feeseeseaʻiga faalotu, faiga lē tonu, ma tulaga fesouaʻiina faapolotiki. O le isi māfuaaga o taua, o le matapeʻapeʻa po o le manaʻo i le pule ma le manaʻo tele i tupe.—1/1, itulau 3-4.

• E faapefea ona tatou iloa e leʻi finagalo Iesu ia aʻo faatauloto e Kerisiano upu o le tatalo faataʻitaʻi?

Na aumaia e Iesu le faataʻitaʻiga o lenei tatalo i lana Lauga i luga o le Mauga. Pe tusa o le 18 masina mulimuli ane ai, na ia toe taʻua ai manatu autū o lana faatonuga lea na ia faia muamua e faatatau i le tatalo. (Mataio 6:9-13; Luka 11:1-4) O le manatu tāua ia mātauina, na te leʻi toe faia le tatalo ma taʻua upu tonu lava na ia taʻua muamua, e manino la le mata o le vai, na te leʻi tuuina mai se tatalo faalelotu e lagi faatauloto ona fai.—2/1, itulau 8.

• Ina ua mavae le Lolo, o fea na maua mai ai e le lupe le lau olive lea na ia aumaia i le vaa?

E tatou te lē o iloa le tele o le masima po o le māfanafana na iai vai o le lolo. Ae peitaʻi o laau o le olive e lauiloa e toe tātupu e tusa lava pe tā i lalo. O nisi o laau atonu na sao mai le lolo, na toe tātupu o latou lau.—2/15, itulau 31.

• A o faia le taua i totonu lava o Nigeria, lea na lē faigofie ai ona alu atu se isi i Biafra, na faapefea ona maua e Molimau a Ieova i lenā vaipanoa taumafa faaleagaga?

Na tofia se tagata o le auaunaga faalemalo e tiute i Europa, a o le isi sa tofia e galue i le malae vaalele i Biafra. O i laʻua uma nei, o ni Molimau. Sa la taliaina le faia o se galuega sa lamatia ai o la ola, o le tufaina atu lea o taumafa faaleagaga i Biafra, lea na aogā i le tele o uso seʻia oo i le taimi na uma ai le taua i le 1970.—3/1 itulau 27.

• O le ā le mea na faataunuuina i le Filemu i Westphalia, ma na faapefea ona aafia ai lotu?

O le Toefuataʻiina na vaevaeina ai le Emepaea Paia o Roma i lotu e tolu—Katoliko, Luteru ma le lotu Kalavini. Na faatuina le Porotesano Soofaatasi ma le Katoliko Soofaatasi i le amatamataga o le senituri lona 17. Ona mapuna aʻe lea o se feteenaʻiga faalotu i Bohemia ma iʻu ina avea o se feteenaʻiga mo le mauaina o le paoa e pulea ai isi malo. O taʻitaʻi o le Katoliko ma le Porotesano, sa uunaʻia e le naunau mo le mauaina o le pule faapolotiki ma manuia tau i fefaatauaʻiga. Mulimuli ane, na faia talanoaga mo le filemu i Westphalia i Siamani. Ina ua mavae le toetoe lava lima tausaga, ona sainia loa lea o le Feagaiga i Westphalia i le 1648, ma iʻu ai le Taua e Tolusefulu Tausaga le umi, ma faailogaina ai le tulaʻi mai o Europa e pei ona iai nei o se konetineta e pulea atoatoa e le setete ia lava.—3/15, itulau 20-23.

• O le ā le uiga o le faailoga, po o le igoa o “le manu feʻai”—le numera 666?

O loo taʻua lenei faailoga i le Faaaliga 13:16-18. O loo faatatau atu le manu i pulega a tagata, ma o le uiga o le iai i le manu “o le numera a le tagata” ua faaalia ai faapea ua faaatagia e malo le tulaga paʻū o le tagata lē lelei atoatoa. O le 6 faaopoopo le 60 faaopoopo le 600 ua faaalia ai faapea, ua matuā leaga lava i fofoga o le Atua. O i latou o loo iai lenei faailoga ua latou avatu le mamalu i Malo faapolotiki, po o lo latou vaai atu foʻi i ai mo le faaolataga.—4/1, itulau 4-7.