Po ua Faia le Finagalo o le Atua?

“Ia faia lou finagalo i le lalolagi, e pei ona faia i le lagi.”—Mataio 6:10, “LT.”

SA VAAVAAI atu ma le matuā matataʻu ia Julio ma Christina a o mū la laʻua fanau e toʻafā ma maliliu ai. Na soʻa e se avetaavale onā la latou taavale sa tū i le mea e paka ai, ma pasae aʻe ma mū ai. Sa mafai ona faasaoina le tamaitiiti lona lima o Marcos, ua iva ona tausaga, ae na aafia lona tino atoa i le afi, ma faaleagaina ai ona foliga i lona olaga atoa. Na matuā mafatia le loto o lona tamā. Sa faamāfanafanaina o ia lava faapea lona aiga i faaupuga e faapea: “E tatau ona tatou malamalama, e tusa lava po o ā mea e oo mai, pe lelei pe leaga, ae o le finagalo lenei o le Atua.”

E toʻatele tagata e faapena o latou lagona pe a fesagaʻi ma se mea mataʻutia faapenei. Ua latou manatu e faapea: ‘Afai e iai i le Atua le malosi uma lava ma e manatu mai iā i tatou, o le mea lea ua tupu, atonu e lelei mo i tatou i se isi itu, e ui lava ina faigatā ona talitonuina.’ Pe e te ioe i lenā manatu?

O le manatu faapea, po o le ā lava le mea e tupu, pe lelei pe leaga, ua faaalia ai le finagalo o le Atua, e masani ona faavae mai i fetalaiga a Iesu na e i le Tatalo a le Alii, lea e sii mai i luga. Pe e leʻi faia ea le finagalo o le Atua i le lagi? I le tatalo, “Ia faia lou finagalo i le lalolagi,” pe tatou te lē ioe ea o mea ia e tutupu i le lalolagi, o le finagalo lea o le Atua?

E lē o mautonu le toʻatele e tusa ai ma lenei manatu. Iā i latou, e atagia mai ai le lē manatu mamafa mai o le Atua i faalogona o tagata na ia foafoaina. Ua latou fesili mai e faapea: ‘E mafai faapefea i se Atua alofa ona finagalo e aumaia mea leaga i tagata e lē sala? Afai e iai se lesona e tatau ona tatou aʻoaʻoina mai mea leaga, o le ā lenā lesona?’ Atonu o lou lagona lenā.

E tusa ai ma lenei mea, na tusi ai le soo o Iakopo le ʻafa uso o Iesu e faapea: “A faaosoosoina se tasi, aua le faapea, ‘Ua faaosoosoina aʻu mai le Atua,’ auā e lē mafai ona faaosoosoina o le Atua i mea leaga, e lē faaosooso atu foʻi o ia i se tasi.” (Iakopo 1:13) E lē o le Atua le puna o mea leaga. E mautinoa lava la, o mea uma ia e tutupu i le lalolagi i aso nei, e lē o le finagalo lenā o le Atua. O loo taʻua foʻi i le Tusi Paia, le loto o le tagata, le manaʻo o atunuu, le manaʻo o le Tiapolo. (Ioane 1:13; 2 Timoteo 2:26; 1 Peteru 4:3) Pe e te ioe o le mea na tupu i le aiga o Julio ma Christina, e lē o le finagalo lenā o se Tamā faalelagi e alofa?

O lea, o le ā na uiga i ai Iesu ina ua ia aʻoaʻoina ona soo e tatalo: “Ia faia lou finagalo”? Pe sa na o se talosaga i le Atua ina ia faalaa mai i ni tulaga patino, po o le mea na aʻoaʻo i tatou e Iesu ina ia tatalo mo se mea e sili atu ona tāua ma sili ona lelei, se suiga e mafai ona faamoemoe uma i ai tagata? Seʻi o tatou suʻesuʻeina atili po o le ā o fai mai ai le Tusi Paia.

[Faamatalaga i Ata i le itulau 3]

Taavale: Dominique Faget-STF/AFP/Getty Images; tamaitiiti: FAO photo/B. Imevbore