Fāʻagatama i Aso Anamua ma le Tāua o le Manumalo

“O I LATOU uma o ē fai aigofie e fai faatatau i mea uma lava.” “Afai foʻi e finau se tasi i le . . . tausinioga, e lē faapaleina o ia pe a lē finau e tusa ma tulafono.”—1 Korinito 9:25; 2 Timoteo 2:5.

O le tausinioga o loo faasino i ai Paulo, o se vaega autū o soifuaga o tagata Eleni anamua. O le ā ua taʻu mai e talafaasolopito iā i tatou e faatatau i na fāʻagatama ma le agaga na olaola ai i na ona pō?

I se taimi lata mai, na fai ai se faaaliga o fāʻagatama Eleni e taʻua o le Nike—Il gioco e la vittoria (“Nike—Le Taaloga ma le Manumalo”) lea sa fai i le Colosseum (malae taaalo telē) i Roma. * Ua maua mai i mea na faaalia ai i ina nisi tali i lenā fesili ma aumaia ai ni manatu e mafaufau ai e faatatau i le vaaiga a Kerisiano i taaloga.

O Taaloga o se Mea Mai Anamuā

E lē o Eleni ni tagata muamua na faia taaloga. E ui i lea, pe  tusa ma le senituri lona valu T.L.M., na faamatalaina ai e se fatusolo o Homer e faapea, o se atunuu e fiafia tele i tagata totoa ma le agaga tauvā, lea sa viiviia ai tomai faavaegaau ma tagata taaalo. E pei ona faamatalaina i lea faaaliga, o nei faafiafiaga faa-Eleni anamua, na amata i ni faatasiga faalelotu ina ia faamamaluina ai o latou atua i le taimi e fai ai falelauasiga o tagata totoa. O se faaaʻoaʻoga, na faamatalaina e Homer i lana tusi o le Iliad, lea e pito sili ona leva i tusi faa-Eleni, le auala e tuua ai e uō a Achilles o fitafita tau, a latou auupega i le falelauasiga o Patroclus ma tausinio ina ia faamaonia lo latou malosi i faipelega, piiga, togiina o le pulu mafolafola, veloina o le tao ma tuuga o taavale solofanua.

Na oo ina faamanatuina faafiafiaga faapena i Eleni atoa. Ua faapea mai le tusi lea ua faamatalaina mea i le faaaliga: “O nei faafiafiaga, na maua ai se avanoa mo tagata Eleni e faaalia ai le āva i o latou atua e ala i le taofia o fetauaʻiga sauā lea na tupu soo, ma sa mafai ai ona faatoʻafilemu lo latou agaga sauā ae auai i se tulaga lelei i tausinioga.”

Na masani ona faatasitasi tagata mai aai eseese i nofoaga o tapuaʻiga ina ia tapuaʻi ai i o latou atua e ala i taaloga tauvā. Mulimuli ane na oo ina faatāuaina faafiafiaga e fā ma ua aafia ai tagata Eleni uma. O nei faafiafiaga e fā, o le Olimepeka ma le taaloga na faia i Nemea, ma na faia na taaloga uma e faamamaluina ai Seu, o le taaloga o le Pythia ma le isi taaloga na faia i le Isthmus o Korinito, o nei taaloga e lua na faia e viia ai Apolo ma Poseidon. O le iʻuga, na ō mai tagata taaalo Eleni mai le lalolagi atoa ina ia auai ai. Sa faia i nei faafiafiaga ia taulaga ma tatalo ma sa faamamaluina ai foʻi o latou atua e ala i le faia o taaloga e tagata taaalo atamamai po o ni taaloga e matagofie i le vaai.

O faafiafiaga aupito i leva ma tāua, na amata mai i le 776 T.L.M., ia sa taʻi fā tausaga ma fai i Olimipia ina ia faamamaluina ai Seu. O le lona lua, o faafiafiaga o le Pythia. Sa faia lenei faafiafiaga e latalata ane i le ositaulaga lauiloa i lenā vaitaimi, i le aai o Delphi ma sa aofia ai foʻi ma taaloga. Peitaʻi, o lenei faafiafiaga sa faia ina ia viia ai le atua o Apolo, sa tele ina usu ai pese ma fai ai siva.

O Taaloga

Pe a faatusatusa atu i taaloga i aso nei, na tapulaa le aofaʻiga o taaloga ma sa na o tane na auai. O le polokalame o le Olimepeka i aso anamua, e leʻi faaauilumaina ai le sili atu i le sefulu taaloga. I le faaaliga na faia i le Colosseum, e mafai ona matamata ai i ata o nisi o nei taaloga na tusia ma vaneina i ipu omea ma na iai foʻi faatagata o tagata taaalo.

E tolu taaloga tamoʻe na faia e eseese le mamao—e tusa ai ma le fua faa-Eleni pe tusa ma le 220 iata (200 mita); o le isi e faaluaina le mamao o le taaloga muamua e tusa ma le 440 iata (400 mita) ma le taaloga umi lava e tusa ma le 5,000 iata (4,500 mita). E tamomoʻe ma toleni telenoa tagata taaalo. Sa auai tagata tauvā i ni taaloga tauvā e lima: tamoʻe, oso mamao, togiina o le pulu mafolafola, veloina o le tao ma le piiga. O isi tauvaga na aofia ai faipelega ae o isi e aofia ai le faipelega ma le piiga, lea ua faamatalaina faapea, “o se taaloga sauā e lē faaaogāina ai mea faipelē.” E iai foʻi le tuuga taavale solofanua e tosoina e tamaʻi solofanua se lua pe fā po o solofanua matutua, ma e tusa ai ma le fua faa-Eleni o le mamao e sili atu i le maila po o le 1,600 mita.

O le faipelega e matuā sauā ma i nisi taimi e  iʻu ina oti ai se tasi. E fusi o latou lima i paʻu malō o manu ma faapipii i ai uʻamea. E lētioa a lē talitonu se tasi e suafa iā Stratofonte i ona foliga ina ua vaai i le faata, i le taimi na māeʻa ai se fusuaga sa faia mo le fā itula. Ua molimau mai faatagata ma ata na tusia anamua e faapea, na matuā faaleagaina foliga o tagata fusu.

E tusa ai ma tulafono o piiga, e na o luga lava o le tino e mafai ona pii ai, ma o le tagata e manumalo, o ia lea e muamua ona ia taofiofia faatolu le isi tagata tauvā i lalo o le palapala. Peitaʻi, o le isi ituaiga taaloga lea e aofia ai le faipelega ma le piiga e leai ni tulafono. E mafai e tagata tauvā ona kiki, tuʻi ma mimilo ia lima. E pau lava le mea e faasā, o le sali ese lea o le mata, felaʻu ma le ū. O le sini o lenei taaloga, o le matuā taofiofia lea o le isi tagata taalo i lalo o le palapala ma faamalosia o ia e siilima. Ua manatu i ai nisi o se “vaaiga aupito i sili lea o taaloga uma.”

O le taaloga pito sili ona taʻutaʻua o le faipelega ma le piiga lea na faia i aso anamua, na faia i le Olimepeka i le 564 T.L.M. Na gagau e Arrhachion le tamaʻi vae o le isi tagata taalo, o lē na tau titinaina o ia. Na siilima le isi tagata taalo ona ua tigāina tele i le taimi lenā a o leʻi maliu Arrhachion. Na faailoa atu e faamasino e faapea, ua manumalo nei le tino maliu o Arrhachion!

Sa sili ona maoaʻe ia tauvaga o tuuga taavale solofanua i taaloga uma, na fiafia i ai tagata maualuluga o le atunuu, talu ai o lē manumalo e lē o le avetaavale a o lē ona le taavale ma solofanua. O taimi faigatā o le tauvaga o le amataga lea o le tuuga, ona e tatau ona tausisi le taavale i lana auala, aemaise ai o taimi e mimilo ai i pou o i pito uma e lua o le malae tutuu. O le faia o mea sesē po o se solitulafono e mafai ona tupu ai ni faalavelave faafuaseʻi lea ua avea ai lenei taaloga o se mea mataʻina.

O le Taui

Na faapea mai le aposetolo o Paulo: “O ē tausinio i le ala tanu, e tausinio uma i latou, a e maua le taui e le toʻatasi.” (1 Korinito 9:24) O le manumalo o le mea aupito i sili na ona tāua. E leai se pine siliva po o le apamemea, e leai se tulaga lua po o le tulaga tolu i na ona pō. Na faamatalaina e le faaaliga e faapea, o le “manumalo po o le Nike o le sini lenā o tagata taaalo. E na o le manumalo e taliaina e le tagata taaalo auā, o loo atagia ai ona uiga faaletino ma tau amio, ma viia ai o ia e lona lava nuu.” Na taaofaʻi lenei tulaga i se faamatalaga mai iā Homer e faapea: “Ua ou iloa ona faia mea sili ona lelei i taimi uma.”

O le taui na tuuina atu i le tagata manumalo i taaloga a tagata Eleni sa fai ma mea faafaatusa—o se pale e fai i laulaau. Na taʻua e Paulo lenā pale o le “pale palagofie.” (1 Korinito 9:25) Ae peitaʻi, sa tāua lenā taui iā i latou. Na faaata ai le malosi faalenatura lea na faamalosia lē na manumalo i le taaloga. O le manumalo lea na tuliloaina ma le maumauaʻi, na iʻu i faamanuiaga mai o latou atua po o atua fafine. Ua faamaonia e tagata fai faatagata ma le ʻau tusiata i a latou galuega ia sa faaalia i le faaaliga, le auala na latou manatu na avatu ai e Nike le atua fafine Eleni e fai apaʻau, le pale i ē manumalo. O le manumalo i le Olimepeka, o le tumutumuga lea o le olaga o se tagata taalo.

 O pale o taaloga o le Olimepeka sa faia i laulaau o le olive vao—o taaloga na fai i Isthmia na faaaogā ai lau o le paina, o taaloga na fai i Pythia ma Nemea na faaaogā ai se isi ituaiga o laau. O ē na faatulagaina taaloga mai isi vaipanoa na latou ofoina meaalofa tautupe po o isi taui ina ia tosina ai tagata e aupito sili ona lelei le taaalo. O nisi ipu tuu teu ia sa faaalia i le faaaliga sa fai ai faailoga i taaloga o le Panathena, ia na faia i Atenai e faamamaluina ai le atua fafine o Athena. O nisi o nei ipu na tuu muamua i ai suauu mai Attica. Ua tusia se ata o le atua fafine i le isi pito o le ipu, ma le faaupuga “taui o le tauvaga mo le atua fafine o Athena.” A o le isi pito o loo tusi ai se taaloga patino, atonu o lea na manumalo ai le tagata taalo.

Na fiafia aai o Eleni i le lauiloa o latou tagata taaalo, ia na avea ai i latou ma tagata aupito sili ona taʻutaʻua i o latou vaipanoa ona o o latou manumalo. O le toe foʻi mai o lē na manumalo na faamanatuina i se solo manumalo. Na faia o latou faatusa ina ia faafetai atu ai i o latou atua, o se tulaga mamalu e lē masani ona faia mo tagata ma sa viiviia foʻi i latou e le ʻaufatusolo. Mulimuli ane, na tuuina atu i ē manumalo ia tulaga muamua i sauniga i le lautele ma latou maua penisione mai tupe na totogi e le lautele.

Fale Toleni ma Tagata Taalo

O tagata e fia avea ma tagata tau e tatau ona auai i taaloga. E tofu uma lava aai i Eleni ma fale toleni, o i inā na aʻoaʻoina ai tauleleʻa i le itu faaletino, tau le mafaufau ma le faaleagaga. O fale o le fale toleni e fausia faataamilomilo i se avanoa telē e i totonu e fai ai toleniga, e siʻo e poletito ma isi potu e faaaogā e fai ma faletusi ma potu aʻoga. O na nofoaga e masani ona ō atu i ai tane talavou mai i aiga taualoa o ē e mafai ona tuu atu le tele o le taimi mo aʻoaʻoga na i lo le faigaluega. I inei, e faia ai e nei tagata taaalo ni sauniuniga filigā ma e umi tele faatasi ai ma le fesoasoani a ē na aʻoaʻoina i latou, o i latou foʻi ia e faatonuina meaʻai e ao ona aai ai tagata taaalo ma faamautinoa e lē o faia e tagata taaalo feusuaʻiga.

O le faaaliga lea na faia i le Colosseum na maua ai se avanoa o tagata tafafao e matamata ai i ni ata ma faatagata o tagata taaalo i aso anamua, ma o le tele o nei mea o ni kopi na faia e tagata Roma. E tusa ai ma talitonuga o Eleni anamua, na tutusa le atoatoa lelei faaletino ma le atoatoa lelei tau amio, ma e na o tagata maualuluga na maua lea tulaga, o lea na avea ai o latou fuaitino aulelei ma faaaʻoaʻoga lelei i isi. Na fiafia tagata Roma i nei faatagata ma mea na vaneina, ma o le tele o nei mea na teuteuina ai o latou faletaalo, fale tāʻele mo le lautele, fale o tagata ma maota o tupu.

Sa matuā fiafia tele tagata Roma e matamata i faiga sauā, o lea na naunau tele ai i latou i taaloga faa-Eleni ia sa faia i Roma, o le faipelega, piiga ma le taaloga o le faipelega ma piiga. Na manatu tagata Roma i nei taaloga, e lē o ni taaloga tauvā e iloa ai po o ai e lelei tele lana taalo, ae o se mea e faafiafia ai i latou. Na lafoaʻia le uluaʻi fuafuaga e faapea, o taaloga o se tauvaga e faia e tagata taaalo aloaʻia o se vaega lea o latou aʻoaʻoga. Peitaʻi, na taʻufaatauvaa e tagata Roma ia taaloga faa-Eleni i se tulaga e faapea, a lē o se faamalositino a o leʻi tāʻele, po o se  taaloga e matamata i ai e faia e tagatānuu e maulalo o latou tulaga, e tai tutusa ma tauvaga e tau seʻia oti.

O Kerisiano ma Fāʻagatama

O aafiaga faalotu o nei taaloga o se tasi o māfuaaga talafeagai lea na ʻalofia ai e Kerisiano i le uluaʻi senituri na taaloga, auā ‘pe faapefea ona feagai le malumalu o le Atua ma tupua?’ (2 Korinito 6:14, 16) Ae ā taaloga i aso nei?

E manino mai, o fāʻagatama i aso nei e lē o faamamaluina ai atua faapaupau. Ae peitaʻi, pe lē moni ea e pei o loo tapuaʻi atu nisi i nei taaloga e pei ona sa faia i aso anamua? E lē gata i lea e pei ona faaalia i lipoti, ina ia manumalo se tasi, e loto malilie nisi tagata taaalo e faaaogā fualaau ina ia faaleleia ai o latou tomai e taaalo ai ae e mafai ona afāina ai o latou soifua mālōlōina pe lamatia ai foʻi o latou ola.

O le manumalo faaletino i Kerisiano, e itiiti le aogā. O uiga faaleagaga o le “tagata lilo o le loto,” o loo faamatagofieina i tatou i le silafaga a le Atua. (1 Peteru 3:3, 4) Ua tatou iloa e lē o i latou uma o auai i taaloga i aso nei e malosi ai le agaga o le fia manumalo, peitaʻi e toʻatele e iai lenā agaga. Pe e mafai ea i le aumea atu iā i latou ona fesoasoani iā i tatou e mulimuli ai i le fautuaga a le Tusi Paia ina ia ‘aua neʻi faia se mea e tasi ma le finau vale, ma le mitamita fua; a ia taʻitasi ma manatu ma le loto maulalo?’ Pe e lē iʻu na aufaatasiga i “le feitagaʻi, o le femisaʻi, o le losilosi vale, o le lotoa, o le finau vale, o le fevaevaeaʻiga”?—Filipi 2:3; Kalatia 5:19-21.

O taaloga i aso nei e fepaʻiaʻi tino o tagata e faigofie ai lava ona tutupu faiga sauā. O i latou e tosina atu i na taaloga e ao ona manatua upu a le Salamo 11:5: “E tofotofo e Ieova i lē ua amiotonu; a ua inosia e lona finagalo lē fai amio leaga, ma lē fiafia i le faasauā.”

I le taimi talafeagai, e mafai ona avea le faamalositino o se mea e fiafia ai, ma na faapea mai Paulo, e “aogā foʻi le faamasani i la le tino.” (1 Timoteo 4:7-10) Ae peitaʻi, ina ua ia talanoa e faatatau i taaloga Eleni, na faataʻitaʻi mai e Paulo i Kerisiano le tāua o le pulea o i latou lava ma ia latou tumau. O le laualuga o na mea uma, na tauivi ai Paulo ia maua le “pale” mai le Atua, o le ola e faavavau. (1 Korinito 9:24-27; 1 Timoteo 6:12) I lenā tulaga, ua ia faataatia ai se faaaʻoaʻoga mo i tatou.

[Faamatalaga pito i lalo]

[Pusa/Ata i le itulau 31]

Ua Mālōlō le Tagata Faipelē

O lenei faatagata e faia i ʻapamemea mai i le senituri lona fā T.L.M., ua faaalia mai ai āuga o taaloga faipelē i aso anamua, lea e tusa ai ma le tusi o le faaaliga i Roma e faapea, “o le malosi o le tagata faipelē . . . seʻia oo ina matuā vaivai lava lea na faia ai le manuʻa e sui aʻi le manuʻa, sa avea ma faaaʻoaʻoga e faaneenee i ai.” Ua faapea atili mai le faamatalaga, “o manuʻa na maua mai le fusuaga lea ua toe faaopoopo atu i isi foʻi manuʻa mai i le isi fusuaga ua mavae.”

[Ata i le itulau 29]

Sa sili ona maoaʻe i tauvaga i aso anamua le tauvaga o tuuga taavale solofanua

[Ata i le itulau 30]

Na manatu tagata tusiata i aso anamua e faapea, na faapaleina e Nike, o le atua fafine e fai ona apaʻau lē na manumalo