Po o Faamalosia Oe e le Afioga a le Atua?

PE A lua fesagaʻi ma luʻi, e faapefea ona e taulimaina? I le tulaga o Iesu, o le manatuaina o se mau talafeagai na fesoasoani iā te ia e fesagaʻi ai ma luʻi a Satani. (Mataio 4:1-11) E faapena foʻi ona faamalosia e le Afioga a le Atua le tupu o Tavita ina ua fesagaʻi ma faigatā. Na ia faapea mai: “O le tele o manatunatu i loʻu loto ua fiafia ai loʻu agaga ona o faamāfanafanaga mai iā te oe.”—Salamo 94:19.

I se tulaga tutusa, o le manatuaina o se mau e fiafia i ai e faamāfanafana ai tatou pe aumaia ai iā i tatou le malosi pe a fesagaʻi ma luʻi. O se faaaʻoaʻoga, o Rex, ua 89 tausaga o lona soifua, na avea o se faievagelia faataimi atoa talu mai le 1931. Ae ua ia faapea mai: “E masani ona ou lagona loʻu lē agavaa pe a ou maua se tofiga faapitoa i le faiva.” Na faapefea ona ia taulimaina? “Na ou manatuina le mau e sili ona ou fiafia i ai, o le Faataoto 3:5 lea e faapea: ‘Ia e faatuatua iā Ieova ma lou loto atoa; a e aua le faalagolago i lou lava atamai.’ O le manatuaina ma le faatatauina o lenei mau na fesoasoani iā te aʻu e faataunuu ai ma le manuia loʻu tofiga.”

E faapena foʻi ona aogā i tamaiti le iai o se mau e fiafia i ai. Ua faapea mai Siaki e ono tausaga, o lana mau e fiafia lava i ai o le Mataio 24:14. Ua uunaʻia e lenei mau o ia ina ia ō faatasi ma ona mātua e talaʻi. Ua ia faapea mai: “Ou te fiafia matou te ō i le talaʻiga i Aso Toonai uma faatasi ma oʻu mātua ma loʻu tuafafine.”

E pei o Iesu, pe e iai nisi taimi e te fesagaʻi tuusaʻo ai ma ni luʻi i lou faatuatua? Atonu e avea le filipi 4:13 ma se tasi o au mau e te fiafia i ai. E pei o le tupu o Tavita, pe o e mafatia i ‘manatunatuga o lou loto’? Atonu e fesoasoani iā te oe le manatuaina o le filipi 4:6, 7 ina ia e onosai ai. Pe e te popole i nisi taimi e faapea ua lē o aogā lau auaunaga i le Atua? O lea o le manatuaina o le 1 Korinito 15:58 o le a avatu ai iā te oe le malosi.

E ala i la manatuaina o mau talafeagai, ua matuā galue ai le Afioga a le Atua i o tatou olaga. (Eperu 4:12) O na mau tatou te fiafia i ai, e mafai ona aumaia ai iā i tatou le malosi ma faamāfanafanaga.—Roma 15:4.