Auala e Maua ai se Soifuaga Faafualoa ma le Fiafia

“O TAGATA uma lava, e fia ola umi, ae leai se tasi e fia aafia i āuga o le tagata matua.” O lea, ua faapea mai ai se faamatalaga. O le toʻatele o tagata ua latalata ina litaea mai a latou galuega, ua vaavaai atu i luma ina ia tele se taimi e faia ai mea latou te fiafia ai na i lo o le faia o ni tiute tauave se tele. Ae peitaʻi, e latou te fefefe e ola i ni olaga e leai ni mea e fai ma le lē aogā. E lē mananaʻo foʻi e faaesea i latou, e lē fiafia ma tauau ina fai atu lo latou malosi.

O le ā la le auala e maua ai se olaga fiafia? O uō lelei ma se aiga alolofa, e fesoasoani i le mauaina o le fiafia e tagata matutua ma ē talavou. Ae e lē taulia na o mea e faia e isi i le olaga o se tagata matua. Ae e sili atu ona tāua mea e faia e se tagata matua mo isi.

I se suʻesuʻega ua loa tausaga talu ona faia i ni ulugalii matutua se toʻa 423, na faaalia ai, “o le faia o se sao i le faafualoaina o soifua o isi tagata, e ono fesoasoani i le faalevalevaina o o tatou lava ola.” Ua faamatala mai e Stephanie Brown, lea na faia le suʻesuʻega e faapea: “Ua iloa mai i nei suʻesuʻega, e lē o mea e tatou te maua mai i fesootaʻiga ma isi e aogā; a o mea tatou te foaʻi atu.” O na foaʻi e ono aofia ai le fesoasoani atu i isi e faia galuega i le fale, vaaia o tamaiti, faia o isi feʻau, saunia o auala e femalagaaʻi ai, po o le faalogologo atu foʻi i se tasi e manaʻo e talanoa mai.

I le tusa ma le 2,000 tausaga ua mavae, na fetalai ai Iesu Keriso e faapea: “E sili le manuia o lē na te foaʻi atu, i lo lē na te talia mai.” (Galuega 20:35) O le auala mo se olaga faaumiumi ma fiafia, e lē maua i le tele o ni tupe e teu i faletupe, po o le saʻili atu i togafitiga ma mea taumafa e fia faatumauina ai le talavou. Ae na i lo o lea, ia faaauau ona galue maelega ma faaaogā le taimi, ma le malosi e faalelei ai olaga o isi tagata.

Ae peitaʻi, e lē lava le tau ina foaʻi atu e faasaoina ai i tatou mai le olaga matua, maʻi, ma le oti. E na o le Malo o le Atua e mafai ona tafiesea na mea uma. I le pulega a lea Malo, o le a aveesea ai maʻi, e “leai foʻi se toe oti.” (Faaaliga 21:3, 4; Isaia 33:24) O le mea moni, o tagata usiusitai, o le a ola e faavavau ma le fiafia i le lalolagi parataiso. (Luka 23:43) E fiafia Molimau a Ieova e faailoa atu i isi tagata lenei auala e faavae i le Tusi Paia mo se olaga faafualoa ma le fiafia.