Fesili Mai le ʻAufaitau

• E faapefea ona tatou faatigā i le agaga paia o le Atua, ae meamanū e leai se tino?

O upu nei na tusia e le aposetolo o Paulo: “Aua foʻi tou te faatigā i le Agaga Paia o le Atua.” (Efeso 4:30) Ua manatu nisi e faapea, o upu nei, ua faailoa mai ai, e iai le tino o le agaga paia. Ae peitaʻi, e tele ni lomiga a “le auauna e pule” ia ua faaalia ai faamaoniga faale-Tusi Paia ma faatalafaasolopito e faapea, e leʻi manatu ia uluaʻi Kerisiano e iai se tino o le agaga paia, po o se atua foʻi e tutusa ma Lē Silisili ona Maualuga e faapea, o se vaega o le Tasitolu po o le Tolutasi. * (Luka 12:42) O lea, e leʻi faasino atu Paulo i le agaga paia o le Atua e faapea, e iai sona tino.

O le agaga paia o le Atua, o lona mana galue e lē vaaia. (Kenese 1:2) O Iesu, sa papatiso “i le Agaga Paia,” e pei foʻi o Ioane, sa papatiso i le vai. (Luka 3:16) I le Penetekoso, i le 33 T.A., e 120 ni soo na “faatutumuina foʻi i latou uma i le Agaga Paia” e mautinoa lava e leʻi faatutumuina i se tagata faitino. (Galuega 1:5, 8; 2:4, 33) O i latou na ua faauuina e le agaga, e maua le faamoemoe faalelagi, ma ua taʻitaʻia i latou e le agaga i se olaga faamaoni. (Roma 8:14-17; 2 Korinito 1:22) Ua faatupu e le agaga mo i latou fua faale-atua ma fesoasoani iā i latou ina ia ʻalofia “galuega a le tino” agasala e ono iʻu ai i le lē fiafia mai o le Atua.—Kalatia 5:19-25.

Afai o i tatou o auauna a le Atua e iai le faamoemoe e ola i le lalolagi, e leʻi faauuina la i tatou e le agaga paia. Ae peitaʻi, e mafai lava ona tatou maua le tele o le agaga paia o le Atua e pei foʻi o i latou e iai le faamoemoe faalelagi. I lea, e mafai foʻi ona tatou faatigā i le agaga paia. E faapefea?

Pe afai e tatou te lē amanaʻia ia fautuaga mai le Tusi Paia ia na tusia e ala i le taʻitaʻiga a le agaga paia, e mafai ona tatou faatupuina ai ni uiga e ono tatou agasala ai ma le loto iai faasaga i le agaga paia, ma iʻu ai i le faaumatiaga. (Mataio 12:31, 32) Atonu e tatou te lē o faia se agasala matuiā i lenei taimi, ae e mafai ona tatou amata uia se auala sesē, e ono iʻu ai ina tatou aʻaitui i le taʻitaʻiga a le agaga paia. O tulaga na e mafai ai ona tatou faatigā i le agaga paia.

E faapefea la ona tatou ʻalofia le faatigā i le agaga paia o le Atua? E tatau lava ona pulea o tatou mafaufauga ma gaoioiga. I lana tusi i Kerisiano i Efeso mataupu e 4, na lapataʻi ai le aposetolo o Paulo ina ia ʻaloese mai faanaunauga e faia ni faamatalaga e lē moni,  teuloto pea o le ita, paiē, ma le tautala i upu lē tatau. Afai ua tatou oofu “i le tagata fou” ae toe foʻi e fai na mea, o le ā la le mea lea ua tatou faia? Ua tatou faasagatau la i le fautuaga le Tusi Paia le Afioga a le Atua ua faagaeeina e le agaga. O le faia o lenei mea, ua tatou faatigā ai i le agaga paia.

I le mataupu e 5 o le Efeso, ua tatou faitau ai i le fautuaga a Paulo e uiga i le ʻalofia o tuʻinanauga lē mamā o le faitaaga. Ua fautuaina foʻi e le aposetolo ia uso talitonu ina ia ʻaloese mai amioga e māasiasi ai, ma tausuaga i upu matagā. Afai e tatou te lē mananaʻo e faatigā i le agaga paia o le Atua, e tatau ona tatou manatuaina lenei mea pe a filifilia faafiafiaga. Aiseā e tatou te fiafia ai i na mea, i le talanoa i ai, faitau i ai, ma matamata i ai i ata i televise po o se isi lava mea?

O le mea moni, e iai isi auala e tatou te ono faatigā ai i le agaga paia. O le agaga o Ieova lea ua ala ai ona maua le autasi i le faapotopotoga, ae o lea ua tatou faasalalau atu ni tala taufaaleaga, pe faia foʻi ni faiga faaituʻau i totonu o le faapotopotoga. Po ua tatou lē faasagatau ai ea i le taʻitaʻiga a le agaga i le autasi? I le tulaga lautele, e tatou te ono faatigā ai foʻi i le agaga paia e pei o i latou na faapogaia fevaevaeaʻiga i le faapotopotoga i Korinito. (1 Korinito 1:10; 3:1-4, 16, 17) E tatou te faatigā foʻi i le agaga pe a tatou manatu māmā i le faaalia o le faaaloalo i tane i le faapotopotoga ua tofia e le agaga.—Galuega 20:28; Iuta 8.

E manino lava la, o se faiga atamai le iloilo o tatou uiga ma gaoioiga e tusa ma mea ua tatou iloa o le taʻitaʻiga a le agaga paia e pei ona atagia mai i le Tusi Paia ma le faapotopotoga. Seʻi o tatou ‘tatalo faatasi foʻi ma le agaga paia,’ ma gauaʻi atu i lana taaʻiga ma ia gaoioi pea e ōgatusa ma mea ua fai mai ai le Afioga a le Atua. (Iuta 20) Seʻi avea ma o tatou faanaunauga maumauaʻi ia aua lava neʻi o tatou faatigā i le agaga, ae ia taʻitaʻia ai pea i tatou mo le faamamaluina o le suafa paia o Ieova.

• Na faatusaina e Iesu Keriso le faigatā i se tagata mauʻoa ona sao i le Malo i se kamela o loo taumafai e faaofiofi atu i se pū o se nila. Pe sa manatu Iesu i se kamela moni ma se nila moni?

E tutusa lelei lava faamatalaga a mau e tolu o le Tusi Paia. Na fetalai ai Iesu e faapea: “E faigofie ona ui atu o se kamela i le pū o le au [“nila,” NW ], a e faigatā ona sao o le mauʻoa i le malo o le Atua.” (Mataio 19:24; Mareko 10:25; Luka 18:25)

I nisi tusi, ua faatusaina ai, le ‘pū o le nila,’ i se faitotoʻa vaiti lava i se tasi o alatatala vatele i Ierusalema. Afai sa tapunia le alatatala vatele i le pō, sa mafai ona tatala le faitotoʻa vaiti. Sa manatu i ai e mafai e se kamela ona ofi ai i lea faitotoʻa vaiti. Po o le manatu lenei sa iai i le finagalo o Iesu?

E manino mai e leai. E foliga mai sa faasino atu Iesu i se nila suʻisuʻi. Talu ai sa taatele i lenā itulagi i aso anamua ia nila uʻamea ma nila sa faia i ponaivi, atonu o ni mea sa masani ona faaaogā i aiga. E tusa ma le faaliliuga o le New World Translation ua aveesea ai e le Luka 18:25 so o se fenuminumiaʻi e uiga i fetalaiga a Iesu, auā ua ia faapea mai ai: “E faigofie ona ui atu o le kamela i le pū o le nila suʻisuʻi, ae faigatā i le mauʻoa ona sao i le malo o le Atua.”

E toʻatele le ʻautusitala o lomifefiloi e ioe i le manatu e faapea, “o le nila suʻisuʻi” e pei ona faaliliuina ai i le New World Translation.  O le upu Eleni mo le ‘nila’ i le Mataio 19:24 ma le Mareko 10:25, o le (rha·phisʹ) e mai le veape o lona uiga, “suʻi.” O le upu Eleni o loo i le Luka 18:25 (be·loʹne) e masani ona faasino atu i se nila e faaaogā e suʻi ai taotoga o tagata. Ua faapea mai le Vine’s Expository Dictionary of Old and New Testament Words: “O le manatu ua faatatauina ai ‘le pū o le nila’ i faitotoʻa vaiti, e foliga mai o se faatatauga faaonapōnei; ae leai se faamaoniga mai anamua sa faauiga faapena. O le sini autū o le fetalaiga a le Alii, ia faailoa atu ai le lē taulau o le tagata, ma e lē tatau la ona taumafai e faamāmā le faigatā ona ulu atu o se tagata mauʻoa i le malo, e ala i le faauiga o le nila i se isi mea e ese mai i le nila moni lava.”—1981, Tusi 3, itulau 106.

Ua faapea mai nisi, i nei fuaiupu, e tatau ona faasino atu i le “kamela” e faapea, o le “maea.” E talitutusa lava ia upu Eleni mo le maea, o le kaʹmi·los, ma le kamela, o le kaʹme·los. Ae peitaʻi, o le upu Eleni mo le “kamela” lea e aliali mai i le Mataio 19:24, i tusitusiga faa-Eleni anamua o Evagelia a Mataio (le Sinaitic, le Vatican No. 1209, ma le Alexandrine). Ua faamatalaina mai e faapea, na uluaʻi tusia e Mataio lana Evagelia i le gagana Eperu, ma atonu na ia faaliliuina ai i le faa-Eleni. Sa ia silafia lelei lava le mea na fetalai i ai Iesu ma ia faaaogāina ai le upu saʻo.

O lea la, sa uiga i se nila faaletino ma se kamela moni. Sa ia faaaogā nei mea e faamamafa ai le lē taulau o se mea. Ae pe sa faauiga e Iesu e faapea, e leai se tagata mauʻoa e mafai ona sao i le Malo? E leai, auā sa lē tatau ona faauiga faaletino le fetalaiga a Iesu. Sa ia faaaogā ni faatusatusaga faamamafa e faataʻitaʻia ai le lē mafai e se kamela moni ona ofi i se pū o se nila suʻisuʻi, e lē mafai e se tagata mauʻoa ona sao atu i le Malo pe afai e faaauau pea ona pupū i ana ʻoa ma lē faamuamua ai Ieova i lona olaga.—Luka 13:24; 1 Timoteo 6:17-19.

O le faamatalaga lenei na faia e Iesu ina ua faatoʻā uma lava ona teena e se tauleʻaleʻa mauʻoa le faaeaga sili e avea ai ma soo o Iesu. (Luka 18:18-24) E lē mafai e se tagata mauʻoa o lē ua sili lona naunau i ana ʻoa na i lo o mea faaleagaga ona faatalitalia na te maua le ola e faavavau i faatulagaga a le Malo. Ae, e iai nisi tagata mauʻoa na avea ma soo o Iesu. (Mataio 27:57; Luka 19:2, 9) O lea, o se tagata mauʻoa e iloa lelei ona manaʻoga faaleagaga, ma saʻili le fesoasoani tauatua, e mafai ona maua le faaolataga mai le Atua.—Mataio 5:3; 19:16-26.

[Faamatalaga pito i lalo]