Agalelei i Taimi o Faigatā

NA TIMAʻI mai Paulo e faapea: “Ia tatou agalelei, . . . i tagata uma lava, aemaise i le aiga o le faatuatua.” (Kalatia 6:10) O loo taumafai ma le filigā Molimau a Ieova i le lalolagi aoao e faatatau lenā mataupu silisili i o latou soifuaga, o le agalelei i tagata uma aemaise lava i o latou uso talitonu. Ua vaaia pea lava pea lenei uiga i taimi o faigatā. Seʻi o tatou iloiloina ni faaaʻoaʻoga talu ai nei mai i atunuu e tolu.

Iā Tesema 2002, na taia ai Guam i se afā e sili atu i le 190 maila (300 kilomita) le malosi. E tele fale na faaleagaina ma o nisi fale na matuā faatamaʻia atoatoa. Na vave ona faatulaga e faapotopotoga i le vaipanoa lenā se vaega o le ʻau faamamā e fesoasoani i aiga Molimau ua matuā pagatia. Na saunia e le lālā a Guam mea fai fale ma tagata galulue e toe faaleleia fale na faaleagaina, ma na lagolagosua mai i ai le lālā i Hawaii. Ina ua mavae ni nai vaiaso, ae taunuu mai loa se vaega o le ʻau kamuta mai Hawaii e fesoasoani i le galuega o faugāfale ma ina ia fesoasoani iā i latou ia na ō mai, na mālōlō ai nisi uso o le vaipanoa lea mai i a latou galuega ina ia fesoasoani i le galuega. O le agaga fiafia e galulue soosootauʻau sa avea o se molimau i tagata uma i lea vaipanoa.

I se pitonuu o le aai o Mandalay, i Myanmar, na faafuaseʻi ai ona tupu se mū e lē mamao ese mai le Maota o le Malo. E latalata ane iai le fale o se tuafafine ua lē o toe talaʻi ma lona aiga. Na agi atu le matagi agaʻi i le itu o loo iai lona fale, o lea na ia momoʻe atu ai i le maota mo se fesoasoani. I le taimi lenā, o loo toe faafou ai le maota ma na toʻatele uso na iai. Na faateʻia i latou ina ua vaai atu i le tuafafine auā latou te leʻi iloa e nofo o ia i le vaipanoa lea. Na vave ona gaoioi uso e fesoasoani i le laʻuina ese o meatotino a le aiga ina ia malupuipuia. Ina ua faalogo le tane e lē o se molimau e uiga i le mū, na ia faavave atu i le fale ma iloa ai le ʻauuso o loo fesoasoani i lona aiga. Na matuā faagaeetia o ia ma loto faafetai, sa toʻa foʻi o ia talu ai e masani lava ona iai tagata gaoi latou te gaoia mea i tulaga faapena. O le agalelei o uso, na uunaʻia ai le tuafafine ma lana tama tama e toe aufaatasi atu i le faapotopotoga Kerisiano, ma o loo auai pea i laʻua i sauniga uma i le taimi nei.

I le tausaga faaleauaunaga na mavae atu, e toʻatele na fesagaʻi ma se oge i Mozambique ona o se lā mala ma le lē lelei o mea totō. Na vave ona tali atu le ofisa o le lālā o Molimau a Ieova i lenā vaipanoa e ala i le saunia o meaʻai mo i latou o ē manaʻomia. Na tufatufaina atu  meaʻai i Maota o le Malo ae o nisi taimi ina ua māeʻa sauniga a le faapotopotoga. Na faapea mai se tasi tuafafine o se matua nofo toʻatasi: “Na ou sau i le sauniga ma le faanoanoa, ou te lē iloa po o ā mea o le a ʻai e laʻu fanau pe a foʻi i le fale.” Na vave ona faalaeiauina o ia ona o le fesoasoani agalelei na saunia e uso. Na ia faapea mai: “Ua pei ua ou toetū!”

O loo “agalelei” foʻi Molimau i le auala faaleagaga e ala i le tufa atu o le feʻau faamāfanafana loto o le Tusi Paia ma le faamoemoe. Ua latou talitonu e pei o le tagata atamai i aso anamua: “A o lē faalogo [i le poto mai le Atua], e nofo o ia ma le fifilemu; e filemu o ia, e lē fefe i se mea leaga.”—Faataoto 1:33.

[Ata i le itulau 31]

1, 2. O le tufatufaina atu o meaʻai iā i latou o manaʻomia i Mozambique

3, 4. Na faaleagaina e le afā le tele o fale i Guam

[Faamatalaga i Ata]

Tamaitiiti, itu tauagavale: Andrea Booher/FEMA News Photo; fafine, i luga: AP Photo/Pacific Daily News, Masako Watanabe