Fesili Mai le ʻAufaitau

Aiseā na faataga ai e Tavita, o se auauna faamaoni a Ieova ia lana avā o Mekala na te teuina se tupua e pei ona taʻua i le 1 Samuelu 19:12, 13?

Muamua lava, seʻi o tatou iloiloina le tala atoa. Ina ua oo i le avā a Tavita le tala o le faufauga a le tupu o Saulo e fasiotia Tavita, na ia gaoioi loa. Ua faapea mai le Tusi Paia: “Ua tuutuu ifo e Mekala ia Tavita i le faamalama, ua alu o ia, ua sola, ona sao ai lea. Ona tago lea o Mekala i le tupua [lea e foliga mai lona telē e pei o se tane], ua tuu ai i le moega, ma le ie fulufulu ʻoti ua ia faaaluga ai lona ulu, ma na ufiufi ai i le ie afu.” Ina ua ō mai ave feʻau a Saulo e puʻe iā Tavita, na faapea atu Mekala iā i latou: “O loo maʻi o ia.” O lenei togafiti na faatuai ai le saʻiliga o Tavita, ma na taulau ai Tavita i lana solaaga.—1 Samuelu 19:11-16.

Na manatu tagata suʻesuʻe i toēga mea i le eleele e faapea, i aso anamua na teu ai tupua e lē gata e faaaogā mo faiga faaletapuaʻiga ae sa faaaogā foʻi mo fuafuaga faaletulafono. I aso nei, o loo iai faamaumauga tau fanua ma suafa ma mavaega ina ia iloa po o ai e ao ona maua le tofi, ae o aso anamua sa faaaogā tupua mo lenā tulaga. O le mea moni, o le umia o se tupua e tusa o nisi tulaga, e avatu ai i se tane a se afafine le aiā tatau faaletulafono e maua ai le fanua a le tamā o lana avā ua maliu. Atonu o le māfuaaga lea e pei ona faamatalaina i se mea na tupu muamua, na ave ai e Rasela tupua a lona tamā ma le māfuaaga na matuā popole ai Lapana ina ia toe maua mai. I lenā mea na tupu, e leʻi iloa e le tane a Rasela o Iakopo le mea na faia e lana avā.—Kenese 31:14-34.

Ina ua avea Isaraelu ma nuu, na latou maua Tulafono e Sefulu, ma o le tulafono lona lua na faapitoa i le faasāina o le faia o tupua. (Esoto 20:4, 5) Mulimuli ane, na faasino atu e le perofeta o Samuelu i lenei tulafono ina ua talanoa atu i le tupu o Saulo. Na ia faapea atu: “O le fouvale, e tusa ia ma le agasala o le faataulāitu; o le finau vale, e tusa ia ma le leaga o le tapuaʻi i tupua.” (1 Samuelu 15:23) Ona o lea tulaga e foliga mai e leʻi faaaogāina tupua mo le faatulagaina o tofi i le nuu o Isaraelu. Ae peitaʻi, e foliga mai na faaauau pea ona tausia e nisi o aiga Isaraelu na faiga faanuupō faa-Iutaia. (Faamasino 17:5, 6; 2 Tupu 23:24) O le teuina la e Mekala o se tupua faatasi ma ana meatotino e manatu ai e faapea, e leʻi tuuina atoatoa atu lona loto iā Ieova. A lē o le lē iloa e Tavita o le tupua po o na ia lē faasāina le teuina e Mekala ona o ia o le alo o le tupu o Saulo.

O le manatu o Tavita i le tuutoina atoatoa iā Ieova na faaalia i upu e faapea: “E silisili Ieova, e tusa ona matuā viia o ia; e sili foʻi ona mataʻutia o ia i atua uma. Auā o atua uma o nuu o tupua lava ia; a o Ieova na ia faia le lagi.”—1 Nofoaiga a Tupu 16:25, 26.

[Ata i le itulau 29]

O le lona lua o Tulafono e Sefulu na faasāina ai le faia o tupua e pei o le tupua lea o loo faaalia i inei

[Faamatalaga i Ata]

Mai le tusi The Holy Land, Tusi lona II, 1859