O Lē Fea Tapuaʻiga e Ao Ona E Filifilia?

‘O TAPUAʻIGA eseese ua na o ni auala eseese e tau i le sini e tasi. O le mea moni, e na o le toʻatasi lava le Atua, a ea?’ O le manatu lenā o le toʻatele o ē lagona e faapea, e ui e tāua le auai i le lotu, ae e lē afāina po o lē fea tapuaʻiga e filifilia e se tasi e mulimuli ai.

O le iloiloga muamua lava, e foliga mai e talafeagai lenei manatu, talu ai e na o le toʻatasi lava le Atua, o Lē Ona le Malosi uma lava. (Isaia 44:6; Ioane 17:3; 1 Korinito 8:5, 6) Ae peitaʻi, e tatau ona tatou iloa eseesega iloga ma feteenaʻiga ua iai i le va o le tele o tapuaʻiga o ē e faapea mai o loo auauna i le Atua moni. E matuā eseese i latou i a latou gaoioiga, talitonuga, aʻoaʻoga ma o latou manaʻoga. E matuā telē ia eseesega o lea, o i latou e auai i se lotu po o se vaega faalelotu, e faigatā ona malamalama pe talia le mea e aʻoaʻo atu e isi lotu pe talitonu foʻi i ai.

I le isi itu, na fetalai Iesu e faapea: “O le Atua o le agaga lava ia; o ē tapuaʻi iā te ia, e tatau ona tapuaʻi atu ai i le agaga ma le faamaoni.” (Ioane 4:24) Pe e mafai ona tapuaʻi ma le faamaoni i le Atua ae i le taimi e tasi e talia le tele o manatu e feteenaʻi e faatatau i le Atua, o ana fuafuaga ma le auala ua ia finagalo e tapuaʻi atu ai iā te ia? Pe e talafeagai foʻi le talitonu e faapea, e lē afāina i le Atua o Lē e Ona le Malosi uma lava le auala tatou te tapuaʻi atu ai iā te ia?

Kerisiano i le Uluaʻi Senituri ma Aso Nei

O nisi taimi, na taofi eseese Kerisiano i le uluaʻi senituri. O se faaaʻoaʻoga, na tusi Paulo e faatatau iā i latou i Korinito e faapea: “Ua taʻua mai outou, oʻu uso e, iā te aʻu e o sa Keloē, o iā te outou misa. O lona uiga la, ua taʻitoʻatasi outou ma faapea ane, ‘O aʻu o lo sa Paulō, O aʻu o lo sa Apolō, O aʻu o lo sa Kefā, O aʻu o lo sa Kerisō.’”—1 Korinito 1:11, 12.

Pe na manatu Paulo i nei eseesega e itiiti le tāua? Pe e na ona mulimuli o tagata taʻitoʻatasi i ona lava ala i le faaolataga? E mautinoa e leai. Na timaʻi Paulo e faapea: “Le ʻau uso e, ou te ʻaiʻoi atu iā te outou i le suafa o lo tatou Alii o Iesu Keriso, ina ia tasi la outou upu uma lava, ina neʻi i ai ni maseiga iā te outou; a ia maopoopo lava i le loto e tasi ma le manatu e tasi.”—1 Korinito 1:10.

O le mea moni, o le autasi i talitonuga e lē maua e ala i le fai faamalosi. E maua pe a suʻesuʻe lelei e tagata taʻitoʻatasi mataupu ma oo ai ina taliaina le faaiʻuga e tasi. O lea la, o le suʻesuʻeina e le tagata lava ia o le Afioga a le Atua faatasi ai ma se faanaunauga faamaoni e faatatau mea ua aʻoaʻoina, o ni laasaga tāua ia e olioli ai i le ituaiga o autasi lea na tautala i ai Paulo. Pe e mafai ona maua lenā autasi? E pei ona talanoaina i le mataupu o muamua atu, ua leva ona feutagaʻi le Atua ma ona tagata o  se vaega. Pe e mafai ona iloa lenā vaega i aso nei?

Aogā o le Auaufaatasi i le Vaega Saʻo

Na fesili le faisalamo o Tavita e faapea: “Ieova e, o ai ea e nofo i lou fale fetafaʻi? O ai ea e mau i lou mauga paia?” E mautinoa, o se fesili faatupu manatu lenā fesili. Na avatu e Tavita le tali: “O lē savali ma le amio saʻo, ma ua fai le amiotonu, ma tautala ma le faamaoni i lona loto.” (Salamo 15:1, 2) O se malamalamaaga saʻo i le Tusi Paia o le a mafai ai e se tasi ona iloa le tapuaʻiga o loo tausia na mea e manaʻomia e le Atua. O lea la, e ala i le auaufaatasi atu i lenā vaega, o le a olioli ai se tasi i se aufaatasiga faalaeiau ma tagata o ē tapuaʻi i le Atua ma le autasi i le “agaga ma le faamaoni.”

Ua faaalia e Molimau a Ieova e faapea, e maua le autasi i talitonuga ma gaoioiga e ui lava e lē o autasi le lalolagi i aso nei. Ua iai faatasi ma i latou ē na avea muamua ma sui o tapuaʻiga ma ituaiga o tagata. O isi Molimau na avea muamua ma ē masalosalo i le iai o le Atua po o le lē talitonu o loo soifua le Atua. Peitaʻi, o nisi e leai so latou manatu mamafa e uiga i tapuaʻiga. Ua lafoaʻia e nisi a latou tapuaʻiga, aganuu ma aʻoaʻoga faafilosofia, ae ua olioli nei i se autasi faaletapuaʻiga e lē o faapea ona vaaia i le lalolagi i aso nei.

O le faavae mo lenā autasi o le Afioga a le Atua, le Tusi Paia. O le mea moni, ua iloa e Molimau a Ieova e faapea, e lē mafai ona latou faamalosia isi i le mea e fai. Ae peitaʻi, ua latou talisapaia le faaeaga o le faalaeiauina o isi e aʻoaʻo le Tusi Paia, ina ia faavae mausalī ai a latou filifiliga tau tapuaʻiga. I lenei auala, e toʻatele foʻi nisi e mauaina aogā mai le tapuaʻi i le Atua i le “agaga ma le faamaoni.”

I aso nei, ua matuā telē le lamatiaga o tagata e mafatia mai aafiaga leaga ma faatosinaga a le lalolagi. E tāua le filifilia o aumea saʻo. Ua taʻua e le Tusi Paia e faapea, “o lē latou te feoaʻi ma tagata popoto, e poto lava ia” ma “o le feoaʻi ma ē amio leaga e leaga ai amio lelei.” (Faataoto 13:20; 1 Korinito 15:33) O se puipuiga le auaumea ma tagata tapuaʻi moni a le Atua. O lea la, ua faamanatu mai e le Tusi Paia iā i tatou e faapea: “Ia tatou manatunatu foʻi le tasi i le tasi, ina ia taufaatupu ai le alofa ma galuega lelei; aua le lafoaʻiina le faapotopotoina o i tatou, pei o le masani o isi, a ia fefaamāfanafanaʻi; ia atili ai foʻi ona faapea ina ua outou iloa o le Aso o loo taulata mai.” (Eperu 10:24, 25) Maʻeu se faamanuiaga i uō moni, uso ma tuafāfine faaleagaga pe a fesoasoani le tasi i le isi ina ia faataunuu ai o latou tiute tauave i luma o le Atua!

Na faamautinoa mai e Ottmar lenei manatu. Na tausi aʻe o ia i se aiga Katoliko i Siamani ma e leʻi toe alu o ia i le lotu. Ua ia faamatala mai: “So o se taimi lava na ou alu ai i le lotu, e aunoa ma se mea na ou maua mai ai.” Ae peitaʻi, na tumau pea lona faatuatua i le Atua. Na oo ina ua ia fesootaʻi ma Molimau a Ieova ma talitonu ai e faapea, o i latou o auauna moni a le Atua. Na ia iloa le manaʻomia ona ia auaumea ma i latou. Ua ia faapea mai: “O le maelega faatasi ma le faalapotopotoga i le lalolagi aoao, ua ou olioli ai i le filemu o le mafaufau ma le loto. Ua ou maua le fesoasoani e agaʻigaʻi ai i luma i le mauaina atili o le poto saʻo o le Tusi Paia. O se mea matuā tautele lea iā te aʻu.”

O se Valaaulia i Ē o Saʻiliʻili

O tagata e malilie e pulupulu lima faatasi o se vaega, e mafai ona latou faataunuuina se galuega ma le uigā na i lo tagata taʻitoʻatasi e galulue na o i latou. O se faaaʻoaʻoga, o faatonuga nei a Iesu i ona soo a o toeitiiti ona ia tuua lea o i latou: “O lenei, ia outou ō atu e fai nuu uma lava ma soo, ma papatiso atu iā te i latou i le suafa o le Tamā, ma le Atalii, ma le Agaga Paia; ia outou aʻoaʻo atu iā te i latou ia tausi i mea uma ua ou fai atu ai iā te outou.” (Mataio 28:19, 20) E faapefea ona faataunuuina ma le manuia lenei galuega pe a leai se taʻitaʻiga pe faamaopoopoina? E faapefea ona usitaia e se tasi lenei faatonuga o le Tusi Paia pe afai na te taumafai e auauna i le Atua e aunoa ma le auaufaatasi atu i isi?

 I le tausaga ua mavae atu nei, na tufatufa atu ai e Molimau a Ieova i le lalolagi aoao tusi faale-Tusi Paia, tamaʻitusi ma polosiua e 91,933,280 ma mekasini e 697,603,247, ma e ala i lenā galuega ua oo atu ai le feʻau mai le Afioga a le Atua i le faitau miliona o tagata i atunuu e 235. Ua faamaonia i lenei lipoti e sili atu mea e mafai ona faataunuuina e se vaega ua faamaopoopo lelei, na i lo mea e mafai ona faia e se tagata e toʻatasi e na o ia lava!

E faaopoopo atu i le tufatufaina o lomiga faale-Tusi Paia, ua faia e Molimau a Ieova talanoaga faale-Tusi Paia e aunoa ma se totogi, ina ia fesoasoani i tagata e maua se malamalamaaga loloto o mea e manaʻomia e le Atua. I le tausaga ua mavae, o le fua faatatau o na suʻesuʻega faale-Tusi Paia na faia i vaiaso taʻitasi ma tagata taʻitoʻatasi po o ni tagata e 5,726,509. Ua fesoasoani lenei faatonuga faale-Tusi Paia i le toʻatele o tagata ina ia maua se faavae mausalī e faia ai a latou filifiliga i mataupu tau tapuaʻiga. Ua valaaulia oe ina ia aʻoaʻoina mea e manaʻomia e le Atua e pei ona faatulaga mai i le Tusi Paia. O lea, o le a mafai ai ona e faia lau filifiliga.—Efeso 4:13; Filipi 1:9; 1 Timoteo 6:20; 2 Peteru 3:18.

Pe afai e te manaʻo e faafiafia le finagalo o Ieova, e tāua ai la lou auai i tapuaʻiga—ae e lē faapea ai la e auai i so o se tapuaʻiga po o se talitonuga. E manaʻomia ona faavae lau filifiliga tau tapuaʻiga i le poto saʻo o le Tusi Paia, ae lē o aʻoaʻoga lē faavaea po o mea e taʻu atu e se isi iā te oe e faapea e mai le Tusi Paia. (Faataoto 16:25) Ia aʻoaʻo i mea e manaʻomia e le tapuaʻiga moni. Ia faatusatusa ma ou lava talitonuga. Pe a māeʻa, ia faia loa lau filifiliga e tusa ma au saʻiliʻiliga.—Teuteronome 30:19.

[Ata i le itulau 7]

Ua olioli Molimau a Ieova i le autasi i se lalolagi e lē autasi