Pe e Ao Ona E Auai i se Lotu?

‘E LĒ manaʻomia ona iai saʻu lotu pe alu foʻi i se lotu ina ia talitonu ai i le Atua!’ O le auala lenā e manatu ai le toʻatele e faatatau i le avea ma se sui o se lotu po o se faalapotopotoga faalelotu. O le mea moni, ua manatu nisi e faapea, latou te lagona le vavalalata atu i le Atua pe a ō i fafo ma fiafia i foafoaga na i lo le auai i se sauniga faalelotu i se falesā. O le manatu taatele i aso nei e faapea, o le auaufaatasi atu i se vaega faalelotu po o se faalapotopotoga e lē o se mea manaʻomia lea e talitonu ai i le Atua.

Ae peitaʻi, e ese le manatu o isi tagata. Ua latou finau mai e faapea, pe a fia maua e se tasi le faamaoniga a le Atua, e tāua tele le avea ma sui o le lotu ma auai i ai. O lea la, e tāua le mataupu e faatatau i le auai o se tasi i le lotu, ae lē na o se saʻiliʻiliga e faia e tagata o ē suʻesuʻe i lotu ina ia iloa pe toʻafia e masani ona ō i lotu ma isi mea e uiga i lotu. Talu ai o loo aofia ai la tatou faiā ma le Atua, pe e lē talafeagai ea le saʻilia o le silafaga a le Atua e faatatau i le mataupu? O le ā la tatou te aʻoaʻoina mai i lana Afioga, le Tusi Paia e uiga i lenei mataupu?

Le Auala na Feutagaʻi ai le Atua ma Tagata i Aso Anamua

I le toetoe 4,400 tausaga ua mavae, na taia ai le lalolagi atoa i se lolo. E lē faigofie ona faagalo lenā mea na tupu, ma ua maua i tusitusiga a tagata i le lalolagi aoao ni tala e faatatau i le lolo. E ui lava e eseese nei tala e uiga i le lolo, ae e iai ni mea e tutusa ai, e aofia ai le mea moni e toʻaitiiti ni nai tagata ma ni meaola na faasaoina.

Pe na teʻi lava ua faasaoina nei tagata ina ua oo mai le lolo? Ua faaalia i tala o le Tusi Paia e faapea e lē o le mea lenā na tupu. O le mea e mataʻina, e leʻi faailoa atu e le Atua i tagata taʻitoʻatasi e faatatau i le oo mai o le Lolo. Na i lo lea, na ia fetalai atu iā Noa, ma lapataʻia ai e  Noa tagata i na ona pō e uiga i le oo mai o le Lolo.—Kenese 6:13-16; 2 Peteru 2:5.

Sa faalagolago le faasaoina o se tasi i lona aufaatasi atu i lea vaega sa galulue felagolagomaʻi, ma lotomalie e talia le faatonuga a le Atua na tuu atu iā Noa. E oo lava i meaola na i le vaa na faasaoina ona o le iai faatasi ma lenei vaega. Na tuuina atu ni faatonuga maʻoti iā Noa e faia ai ni sauniuniga talafeagai mo le faasaoina o meaola.—Kenese 6:17–7:8.

Ina ua mavae le faitau selau o tausaga, na avea ē na tupuga mai iā Noa e ala i lona atalii o Semu ma pologa i Aikupito. Ae peitaʻi, na finagalo le Atua ia faasaʻoloto i latou ma aumaia i le nuu folafolaina lea na ia folafola atu i lo latou augātamā o Aperaamo. E leʻi faailoaina atu foʻi lenei mea i tagata taʻitoʻatasi ae na muaʻi faailoa atu iā i latou na filifilia e avea ma o latou taʻitaʻi—o Mose ma lona uso o Arona. (Esoto 3:7-10; 4:27-31) Ina ua faasaʻolotoina lea vaega o tagata o ē sa avea muamua ma pologa i Aikupito, na tuuina atu iā i latou i le mauga o Sinai Tulafono a le Atua ma avea ai ma nuu o Isaraelu.—Esoto 19:1-6.

Na mafai ona faasaoina tagata taʻitoʻatasi o Isaraelu, talu ai sa latou auaufaatasi atu ma le vaega na faavaeina e le Atua ma sa mulimuli i faatonuga a taʻitaʻi filifilia o lenei vaega. Na faia foʻi sauniuniga mo tagata Aikupito taʻitoʻatasi ina ia auaufaatasi atu i lenei vaega lea e mautinoa na maua le faamaoniga a le Atua. Ina ua tuua e Isaraelu Aikupito, na latou ō ma nei tagata Aikupito o ē na ono maua faamanuiaga mai le Atua.—Esoto 12:37, 38.

I le uluaʻi senituri, na amata ai e Iesu lana galuega talaʻi ma na aoaoina tagata e avea ma ona soo. Na ia feutagaʻi ma i latou o se vaega ae na ia alofa atu i tagata taʻitoʻatasi e tusa ma o latou manaʻoga. Na fetalai atu Iesu i le ʻausoo e 11: “O outou foʻi, ua outou tumau iā te aʻu i oʻu tofotofoga. E faapei ona tofia mai e loʻu Tamā o le malo iā te aʻu, e faapea foʻi ona ou tofia outou.” (Luka 22:28, 29) Mulimuli ane, na liligi ifo le agaga paia o le Atua i soo a o faatasitasi i latou o se vaega.—Galuega 2:1-4.

Ua faaalia manino i nei faaaʻoaʻoga e faapea, i aso ua mavae na feutagaʻi Ieova ma ona tagata i se vaega ua faamaopoopoina. E moni sa iai ni nai tagata taʻitoʻatasi na fesootaʻi i ai le Atua e pei o Noa, Mose, Iesu ma isi, ae na Ia faaaogā i latou na ina ia fesootaʻi atu i se vaega o tagata galulue felagolagomaʻi. E leai se māfuaaga e talitonu ai e faapea e ese le auala o loo feutagaʻi ai le Atua ma ana auauna i aso nei. O le mea moni, ua lāgā ai se isi fesili: Pe ua lava le auaufaatasi atu i so o se vaega faalelotu lava? O le a tatou iloiloina lenei fesili tāua i le mataupu o sosoo mai.

[Ata i le itulau 4]

Ua leva ona feutagaʻi le Atua ma ona tagata o se vaega ua faamaopoopoina