Pe e Ao Ona Faia po o le Lē Faia Foʻi i Isi?

O LE mea e te lē manaʻo e faia iā te oe, ia aua e te faia i isi.” O lenei faaupuga e uiga i amio na faia e se faiaʻoga ma o se faifilosofia lauiloa o Saina e suafa iā Confucius. I aso nei i ni tausaga e 2,500 mulimuli ane ai, o loo talitonu pea le toʻatele, pe a latou ʻalofia le faia o so o se mea e leaga ai isi, ua latou faataunuuina le tiute tauave tau amio.

E moni ua iai aogā o na tulafono tau amio na faia e Confucius. Ae i le isi itu, ua faaalia e le Tusi Paia se isi vala tau amioga ma feutagaʻiga a tagata. O le agasala le faia o mea sesē i isi tagata, ae o loo faamatalaina foʻi i le Tusi Paia le isi agasala o le lē faia foʻi o se mea. Na tusi le soo Kerisiano o Iakopo e faapea: “O lē ua iloa e fai le mea lelei, a e lē faia, o le agasala lea iā te ia.” (Iakopo 4:17) E lē na o le faatonuina o Kerisiano e aua le faia mea leaga i isi, ae na ofo atu e Iesu Keriso lenei fautuaga: “O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.”—Mataio 7:12.

O le uluaʻi fuafuaga a le Atua ia feutagaʻi le tasi ma le isi e pei ona latou mananaʻo ia faia iā i latou. Na ia faataatia se faaaʻoaʻoga sili ona lelei o le faaalia o le manatu mamafa mo le lelei o isi i le auala na ia foafoaina ai tagata: “Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laʻua o le tane ma le fafine.” (Kenese 1:27) O lona uiga na tuuina atu ma le agalelei e le Atua i tagata le lotofuatiaifo, lea pe a aʻoaʻoina lelei o le a latou feutagaʻi ai ma isi i le auala latou te mananaʻo e feutagaʻi ai ma i latou.

O le toʻatele ua matuā mafatia i aso nei i le leai o se fesoasoani po o se mapusaga, ona o gaoioiga lē lelei a tagata manatu faapito. E manino mai, e iai se mea e sili atu ona manaʻomia na i lo le na o le ʻaloese mai le faia o mea e leaga ai isi, ae e ao foʻi ona faia iā i latou mea e lelei ma aogā. Talu ai o lenei mea, ua tauofo ai Molimau a Ieova e faia gaoioiga tonu e fesoasoani ai i isi ina ia aʻoaʻo le faamoemoe matagofie o loo i le Afioga a le Atua. Pe a latou asiasi atu i o latou tuaoi ma le tala lelei mai le Tusi Paia, latou te faia lenei mea ona o le alofa, o le faia lea o mea i isi e pei ona latou mananaʻo e faia iā i latou.