Po o Pulea Lou Soifuaga e Tulaga o Loo Iai?

UA TAATELE puapuaga ma faafitauli i nei “aso faigatā.” (2 Timoteo 3:1) O nisi faafitauli atonu e lē tumau ma o le a oo ina mou atu. O nisi e faaauau mo ni masina pe oo lava i ni tausaga. O le iʻuga, e toʻatele nisi ua manatu e pei o le faisalamo o Tavita, o lē na alaga atu iā Ieova e faapea: “Ua faateleina puapuaga o loʻu loto; ia e aveeseina aʻu i mea ou te tigā ai.”—Salamo 25:17.

Po ua lofitūina oe i faafitauli? Afai o lea, e mafai ona e maua le fesoasoani ma faalaeiauga i le Tusi Paia. Seʻi o tatou iloiloina soifuaga o ni auauna faamaoni se toʻalua a Ieova o ē na taulau manuia i le taulimaina o faigatā: O Iosefa ma Tavita. E mafai ona tatou aʻoaʻoina ni lesona aogā e ala i le iloiloina o le auala na la tali atu ai i faigatā, ma o le a fesoasoani iā i tatou e faafetaiaʻia tulaga faapena i aso nei.

Fesagaʻi ma Luʻi Mataʻutia

I le taimi na 17 ai tausaga o Iosefa, na iai se faafitauli matuiā i lona lava aiga. Na iloa e ona uso matutua e faapea, “ua sili le alofa o lo latou tamā iā te ia [Iosefa] a e itiiti i ona uso uma.” O lea, na “latou ʻinoʻino ai lea iā te ia, ma ua lē mafai ona tautala filemu iā te ia.” (Kenese 37:4) E mafai ona tatou tōmanatu i le atuatuvale o Iosefa ona o lea tulaga. Mulimuli ane, na oo ina matuā faateteleina le ita o uso o Iosefa o lea, na latou faatauina atu ai o ia e fai ma pologa.—Kenese 37:26-33.

A o fai ma pologa i Aikupito, na teena e Iosefa faaosoosoga a le avā a lona matai ia faia amioga lē mamā. I le ita ona o le teena o ia, na ia tuuaʻi sesē ai Iosefa i le taumafai e faamalosia o ia. Na tuu foʻi Iosefa i le “fale puipui” ma na “latou faatigā i ona vae i le noanoaga; ua oo lava o ia i le uʻamea.” (Kenese 39:7-20; Salamo 105:17, 18) Pagā le faigatā o lenei mea! Pe tusa ma le 13 tausaga na pologa ai Iosefa ma fai o ia ma pagota, talu ai o faiga lē saʻo na faia e isi iā te ia, e aofia ai ma nisi o lona lava aiga.—Kenese 37:2; 41:46.

 Na feagai foʻi Tavita o Isaraelu anamua ma faigatā a o talavou. Na faamalosia o ia e fesolasolataʻi solo mo ni tausaga, auā na tulia o ia pei o se manu e le tupu o Saulo. Sa lamatia le soifua o Tavita. I se tasi o mea na tupu, na alu atu ai o ia iā Aimeleka le faitaulaga mo ni meaʻai. (1 Samuelu 21:1-7) Ina ua iloa e Saulo na fesoasoani Aimeleka iā Tavita, na ia faatonuina le fasiotia e lē gata o Aimeleka ae faapea foʻi faitaulaga uma ma o latou aiga. (1 Samuelu 22:12-19) Pe e mafai ea ona e tōmanatu i le matuā faanoanoa o Tavita ona o lana gaoioiga na māfua ai lea mala mataʻutia?

Seʻi manatunatu i le tele o tausaga o faigatā ma le faileagaina na onosaia e Iosefa ma Tavita. E mafai ona tatou aʻoaʻoina mai ni lesona aogā e ala i le iloiloina o le auala na la taulimaina ai o la tulaga faigatā. Seʻi o tatou iloiloina ni auala se tolu e aogā ai le faataʻitaʻi i nei tane.

Aua Neʻi Teuloto le Ita ma le Loto Tigā

Muamua lava, na mumusu nei tane faamaoni e teuloto iā i laʻua le loto tigā ma le ita faamoemoe. A o falepuipui Iosefa, sa ono faigofie ona iai ni ona mafaufauga leaga i ona uso ona o le faalataina o ia, ma mafaufau i se auala e toe taui ma sui atu ai pe a toe vaai iā i latou. E faapefea ona tatou iloa na teena e Iosefa na mafaufauga leaga? Seʻi manatu i le auala na ia gaoioi ai ina ua ia maua le avanoa e taui ma sui atu ai i ona uso o ē na ō mai i Aikupito e faatau saito. Ua faapea mai le tala: “Ona alu ese lea o ia iā te i latou, ma tagi. . . . Ona poloaʻi ai lea o Iosefa [i ana auauna] e faatutumu i a latou [ona uso] taga i saito, ma ia toe avatu a latou tupe ia taʻitasi i lana taga, ia avatu foʻi iā te i latou ni oso mo la latou malaga.” Mulimuli ane, ina ua auina atu ona uso e aumai lo latou tamā i Aikupito, na faalaeiau atu Iosefa iā i latou i upu nei: “Aua neʻi outou femisaʻi i le ala.” E ala i upu ma gaoioiga na faamaonia ai e Iosefa e leʻi tigā lona loto pe ita ai foʻi.—Kenese 42:24, 25; 45:24.

I se tulaga tutusa, e leʻi ita Tavita i le tupu o Saulo. I ni mea se lua na tutupu, na maua ai e Tavita le avanoa e fasiotia ai Saulo. Ae peitaʻi, ina ua uunaʻia o ia e ana ʻau ina ia fasioti Saulo, na faapea atu Tavita: “Ia faamamao e Ieova iā te aʻu ona ou faia lenā mea i loʻu alii, lē ua faauuina e Ieova, e faaoo ai loʻu lima iā te ia, auā o ia ua faauuina e Ieova.” Na tuu atu e Tavita le mataupu iā Ieova ma faapea atu i ana ʻau: “O loo soifua Ieova, e fasia lava o ia e Ieova, pe oo i ona aso e oti ai, pe alu ifo i se taua e fano ai.” Mulimuli ane, na fatu e Tavita se pese e auē ai ina ua maliliu Saulo ma lona atalii o Ionatana. E pei o Iosefa, e leʻi manumalo le ita faamoemoe iā Tavita.—1 Samuelu 24:3-6; 26:7-13; 2 Samuelu 1:17-27.

Pe tatou te taofiofia ni faalogona o le ita  faamoemoe ma le loto tigā pe a faapogaia e ni faiga lē saʻo ni tigā iā i tatou? E faigofie lava ona tupu lenā mea. Pe afai e pulea e o tatou faalogona i tatou, atonu o le a sili atu ona leaga iʻuga tatou te maua na i lo faiga lē saʻo na māfua ai. (Efeso 4:26, 27) E tusa lava pe itiiti po o le lē mafai foʻi ona pulea i tatou i mea e faia e isi, ae e mafai ona pulea la tatou tali atu. Pe afai tatou te faatuatua e faapea, o le a faatautaia e Ieova mataupu i lana taimi atofaina, o le a faigofie ai ona lē toe tigā o tatou loto pe feita ai foʻi.—Roma 12:17-19.

Faia le Mea Sili E te Mafaia

O le lesona lona lua tatou te aʻoaʻoina mai, ia aua neʻi avea o tatou tulaga e taofia ai i tatou mai le faia o gaoioiga e masani ona fai. Atonu ona o le atugalu i mea e lē mafai ona tatou faia ua tatou lē faia ai mea e mafai ona fai. O lona uiga la, ua amata ona pulea i tatou e o tatou tulaga. Na ono mafai ona tupu lenei mea iā Iosefa. Na i lo lea, na ia filifili e faia le mea sili na te mafaia. A o avea o se auauna, “sa alofagia Iosefa e ia [lona matai], ua ia auauna iā te ia, ua na tofia ai o ia e pule i lona aiga.” Sa gaoioi foʻi Iosefa i le auala lava lenā a o iai i le falepuipui. Talu ai o le faamanuia a Ieova ma le filigā o Iosefa, “ua tuu atu e le alii o le fale puipui i le pule a Iosefa o ē na fusifusia uma sa i le fale puipui; o mea uma na latou faia i lea mea, o ia lava na faia.”—Kenese 39:4, 21-23.

I tausaga ia na fesolasolataʻi solo ai Tavita na ia faia foʻi le mea sili na te mafaia. A o aumau i le vaomatua i Parana, na leoleoina ai e Tavita ma ana ʻau ia lafumanu a Napalu mai i tagata faomea. Na faapea mai se tasi o leoleo mamoe a Napalu: “Sa fai ma pa i latou iā i matou i le pō ma le ao.” (1 Samuelu 25:16) A o iai o ia i Sekeleka, na osofaʻia ai e Tavita aai i le itu i saute na fai ma fili o Isaraelu, ma faamautū ai tuaoi o Iuta.—1 Samuelu 27:8; 1 Nofoaiga a Tupu 12:20-22.

Pe e manaʻomia ona tatou faia ni taumafaiga malolosi ina ia faia ai le mea sili tatou te mafai? E ui atonu o se luʻi le faia faapea, ae e mafai lava ona tatou taulau manuia. I le toe tōmanatu i lona soifuaga, na tusi Paulo e faapea: “Ua aʻoaʻoina aʻu ia toʻa filemu loʻu loto i mea ua iā te aʻu . . . i mea uma lava ou te i ai, ma mea uma e oo iā te aʻu ua aʻoaʻoina ai aʻu ia ou maʻona, ma ou fia ʻai, ia faulaʻi mai mea, ma ia oge mea.” Na faapefea ona iai iā Paulo lenei vaaiga i le olaga? E ala i lona faalagolago pea iā Ieova. Na faailoa mai e Paulo: “Ou te mafaia mea uma lava ona o ia ua faamalosi mai iā te aʻu.”—Filipi 4:11-13.

Ia Faatalitali iā Ieova

O le lesona lona tolu, na i lo le faaaogā o auala e lē faale-Tusi Paia e suia ai o tatou tulaga, e ao ona tatou faatalitali iā Ieova. Na tusi le soo o Iakopo e faapea: “Ia atoatoa foʻi le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.” (Iakopo 1:4) E mafai ona “atoatoa foʻi le galuega” a le onosai pe a tatou onosaia tulaga faigatā e aunoa ma le saʻilia o se auala e lē faale-Tusi Paia e faamuta vave ai tulaga faigatā. O lea la o le a tofotofoina ma faamalosia lo tatou faatuatua, ma o le a iloa ai le malosi o lona mana. O le ituaiga onosai lea na iā Iosefa ma Tavita. E la te leʻi saʻilia se vaifofō e ono lē fiafia ai le finagalo o Ieova. Na i lo lea, na la faia mea sili la te mafaia. Sa la faatalitali iā Ieova ma maʻeu faamanuiaga na la maua ona o le faia faapea! Na faaaogā e Ieova i laʻua e laveaʻiina ma taʻitaʻia ona tagata.—Kenese 41:39-41; 45:5; 2 Samuelu 5:4, 5.

Atonu tatou te fesagaʻi ma tulaga tatou te ono manatu ai e sili pe a saʻili ni vaifofō e lē faale-Tusi Paia. O se faaaʻoaʻoga, pe ua e faavaivai ona ua lē maua se paaga faaipoipo talafeagai? Afai o lea, aua lava neʻi faia ni filifiliga e solia ai le faatonuga a Ieova e faaipoipo “tau lava i lē ua i le Alii.” (1 Korinito 7:39) Po o e feagai ea ma ni faafitauli i lau faaipoipoga?  Na i lo le aafia i le agaga o le lalolagi lea e uunaʻia ai le nofo valavala ma le tatalaina o faaipoipoga, ia galulue soosootauʻau ma lau paaga e foʻia faatasi ia faafitauli. (Malaki 2:16; Efeso 5:21-33) Po o iai ni faafitauli i le tausia o lou aiga ona o tulaga tautupe? O le faatalitali iā Ieova e aofia ai le ʻalofia o gaoioiga e lē talafeagai pe lē faaletulafono ina ia maua ai le tupe. (Salamo 37:25; Eperu 13:18) O le mea moni, e ao iā i tatou uma lava ona galulue mamafa i le faia o le mea sili tatou te mafai, ma faia taumafaiga ina ia faaamanuia mai ai Ieova iā i tatou. A o tatou faia faapea, seʻi o tatou maumauaʻi e faatalitali iā Ieova mo le vaifofō silisili ona lelei.—Mika 7:7.

O le a Lagolagoina Oe e Ieova

O le manatunatu loloto i le auala na taulau ai tagata o le Tusi Paia e pei o Iosefa ma Tavita i le feagai ai ma faanoanoaga ma tulaga faigatā, e mafai ona tatou mauaina ai ni aogā. O lea, e ui ina e na o ni nai itulau o le Tusi Paia o loo faamatalaina ai a latou tala, ae na latou onosaia faigatā mo le tele o tausaga. Ia fesili ifo iā te oe lava: ‘Na faapefea ona loto malilie na auauna a le Atua i mea na oo iā i latou? Na faapefea ona tumau lo latou olioli? O ā uiga na latou atiina aʻe?’

E tatou te mauaina foʻi aogā mai le iloiloina o le tumau o auauna a Ieova i aso nei. (1 Peteru 5:9) Ua lomia i tausaga taʻitasi le tele o talaaga o soifuaga o tagata i le Olomatamata ma le Ala Mai! Pe e te faitau ma manatunatu loloto i faaaʻoaʻoga a nei Kerisiano faamaoni? E lē gata i lea, o loo iai i a tatou faapotopotoga i latou ua tumau ma le faamaoni i tulaga faigatā. Pe e te auaumea e lē aunoa ma i latou na i sauniga a le faapotopotoga ma aʻoaʻo mai ni lesona mai iā i latou?—Eperu 10:24, 25.

Pe a e feagai ma tulaga e tofotofoina ai, ia mautinoa e tausia ma lagolagoina oe e Ieova. (1 Peteru 5:6-10) Ia galue malosi ina ia aua neʻi pulea e lou tulaga lou soifuaga. Ia mulimuli i faaaʻoaʻoga a Iosefa, Tavita ma isi e ala i le aua neʻi ita faamoemoe, ia faia le mea sili e te mafaia ma faatalitali iā Ieova mo le vaifofō silisili ona lelei. Ia faalatalata atu iā te ia e ala i le tatalo ma gaoioiga faaleagaga. I lenei auala, o le a e maua ai le olioli ma le fiafia e ui i taimi faigatā.—Salamo 34:8.

[Ata i le itulau 21]

Na galue Iosefa i le faia o le mea sili na te mafaia

[Ata i le itulau 23]

Na faatalitali Tavita iā Ieova mo le vaifofō o ona faafitauli