Lipoti a Ē Faalauiloa le Malo

‘Sau ia ma Fesoasoani Mai iā te i Matou’

IĀ IULAI 2000, na avatu ai se valaaulia mo Molimau e tautatala i le gagana Siamani i Oseteria, Siamani ma Suisilani ina ia ō atu i Polivia. Aiseā? Talu ai, sa iai se vaega o le ʻaufaifaatoʻaga e nonofo maouta i le atunuu i se mamao e tusa ma le 180 maila [300 kilomita] mai Santa Cruz i Polivia e tautatala i le faa-Siamani, o ni tagata lolotu e taʻua o le ʻau Mennonite na faaalia le naunau i le Tusi Paia.

Pe tusa ma le 140 Molimau na tali atu i le valaaulia. Na ō nisi mo ni nai vaiaso a o isi na ō mo se tausaga pe sili atu foʻi. I le faia faapea, na latou faaalia ai le agaga lea sa i misionare i le uluaʻi senituri o ē na utagia le valaaulia: “Sau ia i Maketonia, ma fesoasoani mai iā te i matou.”—Galuega 16:9, 10.

E faapeʻī le molimau atu i lenā oganuu? Ua faamatala mai e se toeaina o le faapotopotoga i lenā vaipanoa: “O le malaga atu i se tasi o vaipanoa e 43 o loo nonofo ai le ʻau Mennonite i se pikiapu e alu ai le valu itula i auala gaoā. O le asiasi atu i vaega mamao e manaʻomia ai ni aso se fā ma e momoe i le pō i ni faleʻie. Ae peitaʻi, e mautinoa e aogā taumafaiga talu ai e leʻi faalogo muamua lava nei tagata i le tala lelei.”

I le taimi muamua, o le toʻatele o le ʻau Mennonite e leʻi taliaina fiafia ia asiasiga. Ae peitaʻi, o taumafaiga faifai pea na fesoasoani iā i latou ia iloa le mea o loo ofoina atu e Molimau a Ieova. O se faaaʻoaʻoga, na faapea mai se tasi o faifaatoʻaga, ua tusa ma le tausaga talu ona ia faitauina le mekasini o le Ala Mai! Na ia toe faaopoopo mai lea e faapea: “Ou te iloa e toʻatele tagata i inei e lē talitonu i mea ua outou fai mai ai, ae o aʻu ua ou talitonu o le upu moni lea.” I se isi nofoaga na faapea mai se tamāloa: “Ua fai mai nisi o oʻu tuaoi o outou o perofeta pepelo, ae ua fai mai nisi ua iā te outou le upu moni. Ou te manaʻo ou te iloa e aʻu lava ia.”

Ua iai nei se faapotopotoga e tautatala i le gagana Siamani i Polivia, e 35 tagata talaʻi e aofia ai ma faievagelia faataimi atoa e 14. Seʻia oo mai i le asō, e toʻa 14 o ē sa avea muamua ma nisi o le ʻau Mennonite ua avea nei ma tagata talaʻi o le Malo, e toʻa 9 isi ua auai e lē aunoa i sauniga. Na faapea mai se tasi o tamā matua faatoʻā uma ona papatiso: “Ua manino la matou vaai i le taʻitaʻiga a Ieova. Ua ia auina mai uso ma tuafāfine agavaa e tautatala i le gagana Siamani e fesoasoani iā i matou. Matou te matuā talisapaia lava.” Na faaopoopo mai lona afafine e 17 tausaga le matua na papatiso foʻi e faapea: “O le maelega o uso ma tuafāfine talavou o ē na ō mai i inei e faalaeiauina ai. O le toʻatele o i latou o paeonia ua faaaluina o latou taimi ma tupe e fesoasoani ai i isi. Ua avea lea ma mea ua ou manaʻo ai e faia faapea.”

O le mea moni, o i latou na faia taumafaiga e ō atu ai e fesoasoani ua latou mauaina le fiafia ma le faamalieina.