Ia Faatāua Lau Meaalofa o le Ola i se Auala Saʻo

‘Ua faamamāina o outou loto fuatia ifo ai galuega e oti ai, i le toto o Keriso ina ia outou auauna i le Atua soifua.’—EPERU 9:14.

1. O ā faamaoniga o lo tatou matuā faatāuaina o le ola?

PE AFAI e fesiligia oe i le auala o e faatāuaina ai lou soifua, o le ā lau tali? E tatou te matuā faatāuaina le ola—o tatou lava ola faapea ma soifua o isi. O se faamaoniga o lenā mea, atonu tatou te ō i fomaʻi mo togafitiga pe a mamaʻi pe siaki foʻi i tatou. E tatou te mananaʻo ina ia ola ma maua le soifua mālōlōina lelei. E oo lava iā i latou o ē ua afu le soifua po o ē ua lē atoatoa le malosi o le tino e lē mananaʻo e feoti, latou te mananaʻo e ola pea.

2, 3. (a) O le ā le tiute tauave ua faamatilatila mai e le Faataoto 23:22? (e) Ua faapefea ona aafia le Atua i lenei tiute tauave ua taʻua i le Faataoto 23:22?

² O lou faatāuaina o le ola e aafia ai lau faiā ma isi. O se faaaʻoaʻoga, ua faatonu mai le Afioga a le Atua e faapea: “Ia e faalogo i lou tamā, o lē na fanaua oe; aua foʻi e te ʻinoʻino i lou tinā pe a loomatua o ia.” (Faataoto 23:22) I lenei faataoto o le uiga o le “faalogo,” e lē na o le faalogo i upu ae ia faalogo ma usitai i ai. (Esoto 15:26; Teuteronome 7:12; 13:18; 15:5; Iosua 22:2; Salamo 81:13) O le ā le māfuaaga faale-Tusi Paia e ao ai ona e faalogo i ou mātua? E lē faapea ona e matutua ou mātua iā te oe pe ona e sili atu lo la tomai na i lo oe. Ae e tusa ai ma le mau ona o i laʻua na “fanaua oe.” Ua faaliliuina e nisi faaliliuga lenei fuaiupu e faapea: “Ia e faalogo i lou tamā o lē na māfua ai ona e ola.” O lona uiga la, afai e te faatāuaina lou ola, ua e iloa e iai sau tiute tauave agaʻi i le puna o le ola.

³ O le mea moni, afai o oe o se Kerisiano moni, ua e iloa o Ieova o le Puna o lou ola. Ona o ia ua e “ola ai,” ua e “gaoioi” e tusa ma ou faalogona ma ua e “iai” pe soifua i le taimi nei, ua e mafai ai ona fuafua mo le lumanaʻi e aofia ai le ola e faavavau. (Galuega 17:28; Salamo 36:9; Failauga 3:11) E tusa ai ma le Faataoto 23:22, e alagatatau ona “faalogo” i le Atua ma usiusitai iā te ia, ona o le fia malamalama ma gaoioi e tusa ma lana silafaga i le ola, na i lo le fiafia i se isi lava manatu e faatatau i le ola.

Ia Manatu Mamafa i le Ola

4. I se taimi i le amataga o le talafaasolopito o le tagata, na faapefea ona avea le faatāuaina o le ola o se mataupu tāua?

⁴ Na faamanino mulimuli ane e Ieova talu le amataga o le talafaasolopito o le tagata e faapea, e leʻi finagalo o ia e faaaogā (pe faaleagaina) e tagata le ola i so o se māfuaaga. O le teuloto e Kaino o le ita ma le fuā, na ia fasiotia ai lona uso o Apelu ae leai sana mea sesē. Pe e te manatu sa iai se aiā tatau a Kaino e faia ai lenā filifiliga e faatatau i le ola? E lē o le finagalo lenā o le Atua. Na fesiligia ma faamasinoina Kaino e faapea: “Se ā le mea ua e faia? O loo alaga mai iā te aʻu mai le eleele le leo o le toto o lou uso.” (Kenese 4:10) Ia mātau, o le toto masaa o Apelu i le eleele sa fai ma sui o lona ola, lea na faamutaina ae leʻi taitai lona soifua ma na alaga atu i le Atua mo le taui ma sui.—Eperu 12:24.

5. (a) O le ā le faasāsāaga na faavaeina e le Atua i aso o Noa, ma o ai na faatatau atu i ai? (e) I le ā le uiga na avea ai lenei faasāsāaga o se laasaga tāua?

⁵ Ina ua uma le lolo, na toe iai se amataga fou i tagata e toʻavalu. I se poloaʻiga i tagata uma, na faailoa mai ai e le Atua le auala na te faatāuaina ai le ola ma le toto. Na ia fetalai e faapea, e mafai e tagata ona aai i aano o manu  peitaʻi, na ia aumaia lenei faasāsāaga: “O mea ola uma e feoaʻi, e a outou ia e fai ma mea e ʻai; ua ou foaʻiina atu ma outou o mea uma, e pei o laau afu e tupu lauolaola. A o le aano o manu o i ai le ola, o lona toto foʻi lea, aua tou te aai ai.” (Kenese 9:3, 4) Sa faauigasesē e nisi o tagata Iutaia lenei fuaiupu e faapea, e lē faatagaina tagata e ʻai aano po o le toto o manu e ola. Ae na faamanino mulimuli ane e faapea, na faasā e le Atua le ʻaina o le toto ina ia faatumauina ai le ola. E lē gata i lenā, o le poloaʻiga a le Atua iā Noa o se laasaga tāua lea i le faatinoina o Lona finagalo maualuga e aofia ai le toto—o se fuafuaga o le a maua ai e tagata le ola e faavavau.

6. E ala iā Noa, na faapefea ona faamamafa e le Atua Lana silafaga i le tāua o le ola?

⁶ Na faaauau ona fetalai le Atua e faapea: “Ou te taui atu lo outou toto o lo outou ola; ou te tauiatua i manu uma; o le tagata foʻi, ou te taui atu le ola o le tagata i le tagata lona uso. O sē na te faamaligiina le toto o le tagata, e faamaligiina lona lava toto e le tagata; auā o le faatusa o le Atua na fai ai e ia le tagata.” (Kenese 9:5, 6) Ua mafai ona e malamalama i le silafaga a le Atua mai lenei faatonuga mo tagata uma lava, o le toto o se tagata ua fai ma sui o lona ola. Na avatu e Lē na Foafoaina Mea le ola i le tagata, e lē tatau la i se tasi ona ia faamutaina lenā ola, auā ua fai lona toto ma sui o lona ola. E pei o Kaino, afai e fasioti tagata se tasi, e iai i Lē na Foafoaina Mea le aiā e “taui atu” ai i le ola o le fasioti tagata.

7. Aiseā e ao ai ona tatou fiafia i le faatonuga a le Atua iā Noa e faatatau i le toto?

⁷ E ala i lana faalauiloaga, na faatonuina e le Atua tagata e aua le faaaogāsesēina le toto. Pe sa e tomānatu ea i le māfuaaga? E lē gata i lea, o le ā le māfuaaga ua silasila ai faapena le Atua i le toto? O le mea moni, e aofia i le tali se tasi o aʻoaʻoga e sili ona tāua i le Tusi Paia. O le aʻoaʻoga autū lenā o le feʻau faa-Kerisiano e ui e lē o amanaʻia e le tele o lotu. O le ā lenā aʻoaʻoga, ma e faapefea ona aafia ai lou soifua, au filifiliga ma gaoioiga?

E Faapefea Ona Faaaogā le Toto i le Auala Saʻo?

8. I le Tulafono, o le ā le faasāsāaga na tuu e Ieova faatatau i le toto?

⁸ Na saunia e Ieova nisi faamatalaga e faatatau i le ola ma le toto ina ua ia tuuina atu Tulafono iā Isaraelu. I le faia faapea, na ia faia ai se isi laasaga i le faataunuuina o lana fuafuaga. Atonu ua e silafia na manaʻomia e le Tulafono le ofoina atu o taulaga i le Atua, e pei o taulaga o meaʻai, suāuu ma le uaina. (Levitiko 2:1-4; 23:13; Numera 15:1-5) Na iai foʻi taulaga na faia i manu. Na fetalai le Atua e faatatau i nei mea: “O i le toto le ola o le tino; ua ou tuuina atu ai foʻi iā te outou e fai aʻi le togiola mo outou i luga o le fata faitaulaga; auā o le toto o le mea lava lea e fai aʻi le togiola mo le tagata. O le mea lava lea na ou fai atu ai i le fanauga a Isaraelu, Aua le ʻaina ni toto e so outou.” Na toe faaopoopo atu Ieova e faapea, afai e tapē e se tagata tulimanu po o se faifaatoʻaga se manu mo mea taumafa, e ao ona sasaa le toto i le eleele ma ufiufi. O le lalolagi o le mea e tū ai aao o le Atua, o le sasaaina la o le toto i le eleele e faailoa atu ai ua toe avatu le ola i Lē Foaʻi Ola.—Levitiko 17:11-13; Isaia 66:1.

9. Ua na o le ā le auala e faaaogā ai le toto e pei ona faaalia i le Tulafono, ma o le ā le fuafuaga o lenei mea?

⁹ E lē faapea o lenā tulafono o se faiga faalelotu e leai sona tāua iā i tatou. Pe na e mātauina le māfuaaga na lē ʻaina ai e Isaraelu le toto? Na fetalai le Atua: “O le mea lava lea na ou fai atu ai i le fanauga a Isaraelu, Aua le ʻaina ni toto e so outou.” O le ā le māfuaaga? “[O le toto] ua ou tuuina atu ai foʻi iā te outou e fai aʻi le togiola mo outou i luga o le fata faitaulaga.” Pe ua e iloa ua aumaia e lenei mea se malamalamaaga i le māfuaaga na fetalai ai le Atua iā Noa e faapea, e lē tatau ona ʻaina e tagata le toto? Ua finagalo Lē na Foafoaina Mea e silasila i le toto o se mea e sili ona tāua, ua tuu mo se fuafuaga faapitoa e faasaoina ai le tele o soifua. Ua faia e le toto se vaega tāua i le faamagaloina o agasala. O lea la, i le Tulafono, na pau le auala na faatonuina e le Atua le faaaogāina ai o le toto, o le tuuina lea i luga o le fatafaitaulaga e togiola  ai ola o tagata Isaraelu, o ē saʻili le faamagaloga a Ieova.

10. Aiseā na lē mafai ai ona maua le faamagaloga atoatoa i toto o manu peitaʻi, o le ā na faamanatu mai e taulaga na faia e tusa ai ma le Tulafono?

¹⁰ E ōgatusa lenei malamalamaaga e uiga i le toto mo le faamagaloina o agasala ma aʻoaʻoga faa-Kerisiano. I le faasino atu i lenei vala o le Tulafono na faatulaga e le Atua, na tusi le aposetolo Kerisiano o Paulo: “Na toe ina uma foʻi o mea uma ona faamamāina i le toto e tusa ma le tulafono; a lē o i ai foʻi se faamaligiina o le toto, ua leai foʻi se faamagaloina.” (Eperu 9:22) Na faamanino e Paulo e faapea, o taulaga na manaʻomia e leʻi avea ai Isaraelu ma tagata lelei atoatoa e lē agasala. Na ia tusi: “O ia taulaga na faamanatu ai agasala i lea tausaga ma lea tausaga; auā e lē mafai ona aveeseina o agasala i le toto o povi poʻa ma ʻoti.” (Eperu 10:1-4) Peitaʻi, na aogā pea na taulaga. Na faamanatu atu ai iā Isaraelu e faapea, o i latou o tagata agasala ma e manaʻomia se mea e sili atu ina ia maua ai le faamagaloga atoatoa. Peitaʻi, afai e lē mafai e le toto lea na fai ma sui o ola o manu ona faamagaloina agasala a tagata, e mafai ea e se isi toto ona faia faapea?

Na Saunia le Tali e Lē Foaʻi Ola

11. E faapefea ona tatou iloa o taulaga i toto o manu na faasino atu i se isi mea?

¹¹ Na faasino atu le Tulafono i se auala e sili ona aogā i le faataunuuina o le finagalo o le Atua. Na fesili Paulo: “O lenei, se ā le aogā o le tulafono?” O lana tali: “Na faaopoopo mai lea ona o solitulafono, ina seʻia maliu mai le fanau na folafola i ai, sa saunia e agelu na aumaia e le tautuu upu [Mose].” (Kalatia 3:19) I se tulaga tutusa, na tusi Paulo: “O le tulafono ua i ai le ata o mea lelei atalī, a e lē o le matuā tusa o ia mea.”—Eperu 10:1.

12. E tusa ai ma le toto, e mafai faapefea ona tatou iloa le faamalamalamaga atili o le finagalo o le Atua?

¹² I le aotelega, seʻi toe tomānatu i aso o Noa, na faatonuina e le Atua tagata ia ʻai aano o manu e faatumauina ai le ola, peitaʻi e lē mafai ona latou ʻaina le toto. Mulimuli ane, na fetalai le Atua e faapea, “o i le toto le ola o le tino.” Ioe, na ia finagalo e silasila i le toto e fai ma sui o le ola ma fetalai e faapea: “[O le toto] ua ou tuuina atu ai foʻi iā te outou e fai aʻi le togiola mo outou i luga o le fata faitaulaga.” Peitaʻi, ua iai se isi faamalamalamaga atili o le finagalo o le Atua. Ua iai i le Tulafono le ata o mea lelei atalī. O ā na mea lelei atalī?

13. Aiseā e tāua ai le maliu o Iesu?

¹³ Ua faaautū atu ia mea atalī i le maliu o Iesu Keriso. Na faataugā ma faasatauroina Iesu. Na ia maliu e pei o sē solitulafono. Na tusi Paulo e faapea: “Na maliu Keriso i ona pō e tatau ai, ina o vaivai pea i tatou, o le sui o ia o ē faalēmataʻu. . . . ua faaalitinoina mai e le Atua lona lava alofa iā te i tatou, ina ua maliu Keriso ma sui o i tatou, a o tatou agasala pea.” (Roma 5:6, 8) Na saunia e Keriso le togiola e faamagalo ai a tatou agasala e ala i lona maliu. O lenā togiola o le mataupu autū lenā o le feʻau faa-Kerisiano. (Mataio 20:28; Ioane 3:16; 1 Korinito 15:3; 1 Timoteo 2:6) O le ā le fesootaʻiga o le togiola i le toto ma le ola, ma e faapefea ona aafia ai lou soifua?

14, 15. (a) Ua faapefea i nisi faaliliuga o le Efeso 1:7 ona faamamafa le maliu o Iesu? (e) O le ā le mea moni e faatatau i le Efeso 1:7 atonu ua misia?

¹⁴ Ua faamamafa e nisi lotu le maliu o Iesu,  ma ua faapea mai o latou tagata lotu, “na maliu Iesu mo aʻu.” Seʻi o tatou iloilo le auala o faaliliu ai e isi faaliliuga o le Tusi Paia le Efeso 1:7: “O ia ma e ala i lona maliu ua tatou maua ai le laveaʻiina, o lona uiga o le aveesea lea o a tatou agasala.” (The American Bible, a Frank Scheil Ballentine, 1902) “E ala i le maliu o Keriso ua tatou saʻoloto ai, ma ua faamagalo ai a tatou agasala.” (Today’s English Version, 1966) “O ia ma e ala iā Keriso ma le faataulagaina o lona soifua ua tatou saʻoloto ai, o lona uiga o le saʻolotoga e faamagalo ai agasala.” (The New Testament, a William Barclay, 1969) “E ala i le maliu o Iesu ua magalo ai a tatou agasala ma ua tatou saʻoloto ai.” (The Translator’s New Testament, 1973) Ua e silafia ua faamamafaina le maliu o Iesu i na faaliliuga. Atonu e faapea mai nisi, ‘E matuā tāua le maliu o Iesu. O lea la, o le ā e lē o maua i nei faaliliuga?’

¹⁵ O le mea moni, afai e te faalagolago i na faaliliuga, atonu o le a e misia ai se manatu matuā tāua, ma e tapulaa ai lou malamalamaaga i le feʻau a le Tusi Paia. E lē o faaalia e na faaliliuga le mea moni e faapea i le uluaʻi tusitusiga o le Efeso 1:7 ua aofia ai le upu Eleni o lona uiga o le “toto.” Ae o nisi o Tusi Paia ua tai tutusa ma le uluaʻi tusitusiga e pei o le Tusi Paia Samoa: “O ia foʻi ua tatou maua ai le togiola i lona toto, o le faamagaloina o agasala, e tusa ma le oloa faulaʻi o lona alofa tunoa.”

16. O le faaupuga o “lona toto” o le ā le mea e ao ona tatou manatunatu i ai?

¹⁶ E matuā tāua tele le faaupuga o “lona toto” ma e ao ona tatou manatu mamafa i ai. E iai se mea e sili atu na manaʻomia na i lo le maliu o se tasi, e oo lava foʻi i le maliu o le tagata lelei atoatoa o Iesu. Na ia faataunuuina mea na faaataina e le Tulafono, aemaise lava le Aso o le Togisala. I lenā aso faapitoa, e ofo atu ai manu ia ua faatulagaina i le Tulafono e fai ai taulaga. Pe a māeʻa ona ave lea e le faitaulaga sili se vaega o le toto o ia manu i le Mea e Sili Ona Paia o le fale fetafaʻi po o le malumalu, ma o i inā na ia ofoina atu ai i le Atua, e pei lava o loo iai o ia i luma o le Atua.—Esoto 25:22; Levitiko 16:2-19.

17. Na faapefea ona faataunuu e Iesu le mea na faaatagia e le Aso o le Togisala?

¹⁷ Na faataunuu e Iesu le mea na faaatagia e le Aso o le Togisala, e pei ona faamatalaina e Paulo. Muamua, na ia taʻua e faapea, e faatasi i le tausaga ona ulu atu le ositaulaga o Isaraelu i le Mea e Sili Ona Paia ma le toto e ofo atu “mo ia lava, atoa foʻi ma sesē o le nuu.” (Eperu 9:6, 7) Ina ia talafeagai ma lenā mea sa tupu, ina ua faatūina aʻe o se agaga, na afio atu ai Iesu i le lagi. I le avea o se agaga e leai sona tino aano ma toto, ua mafai ai ona “iloa ai nei o ia i luma o le Atua mo i tatou.” O le ā na ia avatu i le Atua? E lē o se mea faaletino ae o se mea e sili ona tāua. Na faaauau le faamatalaga a Paulo e faapea: “A o Keriso ua maliu mai, o le ositaulaga sili . . . , ona ulu faatasi lava lea o ia i totonu o le mea paia, e lē ma le toto o ʻoti ma tamaʻi povi, a o lona lava toto, ua na maua le togiola faavavau mo i tatou. Auā afai o le toto o povi poʻa, ma ʻoti, . . . e faapaiaina ai e oo i le faamamāina o le tino, e lē sili ea ona faamamāina o outou loto fuatia ifo ai galuega e oti ai, i le toto o Keriso, o lē na avatua o ia e ia i le Agaga faavavau e fai ma taulaga e lē ponā i le Atua, ina ia outou auauna i le  Atua soifua?” O le mea moni, na avatu e Iesu i le Atua le aogā o lona toto.—Eperu 9:11-14, 24, 28; 10:11-14; 1 Peteru 3:18.

18. Aiseā e ao ai ona tāua faamatalaga a le Tusi Paia e faatatau i le toto i Kerisiano i aso nei?

¹⁸ O lenei upu moni ua tatou malamalama ai i vala ofoofogia o faamatalaga a le Tusi Paia e uiga i le toto—aiseā ua silasila ai le Atua i le toto e pei ona ia faia, o le ā la tatou vaaiga e tatau ona iai ma le māfuaaga e ao ai ona usiusitai i faasāsāaga ua faia e le Atua e faatatau i le faaaogāina o le toto. Pe a e faitau i le Tusi Paia Kerisiano Eleni, o le a e maua ai nisi faasinoga e taulaʻi atu i le toto o Keriso. (Tagaʻi i le pusa.) Ua faaalia manino mai ai e faapea, e ao i Kerisiano ona faatuatua “i lona [Iesu] toto.” (Roma 3:25) Na pau le auala tatou te maua ai le faamagaloga ma le filemu ma le Atua e ala ‘i le toto’ o Iesu na faamaligiina. (Kolose 1:20) E mautinoa le moni o lenei mea iā i latou o loo iai i se feagaiga faapitoa ma Iesu ina ia pule faatasi ma ia i le lagi. (Luka 22:20, 28-30; 1 Korinito 11:25; Eperu 13:20) Ua moni foʻi lea tulaga i le “motu o tagata e toʻatele” i aso nei, o ē o le a faasaoina na i le “puapuaga tele” o loo sau ma olioli i le ola e faavavau i se lalolagi parataiso. I se tulaga faafaatusa, ua ‘ta o latou ofu i le toto o le tamaʻi mamoe.’—Faaaliga 7:9, 14.

19, 20. (a) Aiseā na finagalo ai le Atua e faasā le faaaogāina o le toto, ma e ao faapefea ona tatou manatu i ai? (e) O le ā e ao ona tatou naunau ia iloa?

¹⁹ E manino la, o le toto e iai sona uiga tāua i le silafaga a le Atua. E tatau foʻi ona faapena iā i tatou. E manatu mamafa Lē na Foafoaina Mea i le ola, e iai foʻi lana aiā e faasā ai mea o faia e tagata i le toto. Ona o lona manatu mamafa i o  tatou ola, sa finagalo o ia e faaaogāina le toto i se auala e sili ona tāua, ma e pau lea o le auala e maua ai le ola e faavavau. O lenā auala e aofia ai le toto tāua o Iesu. Maʻeu lo tatou lotofaafetai ona sa gaoioi Ieova le Atua mo lo tatou lelei i le faaaogāina o le toto—le toto o Iesu—i lenā auala faasaoola! E maʻeu foʻi lo tatou lotofaafetai iā Iesu i lona liligiina mai faataulaga o lona toto mo i tatou! O le mea moni, e mafai ona tatou malamalama i le manatu lea na faaalia e Ioane: “O lē ua alofa mai iā te i tatou, na ia laveaʻi mai foʻi iā te i tatou i a tatou agasala i lona lava toto, na ia faia foʻi i tatou ma nuu faatupu, o ositaulaga i lona Atua ma lona Tamā ia iā te ia le viiga ma le pule e faavavau faavavau lava. Amene.”—Faaaliga 1:5, 6.

²⁰ Ua leva ona finagalo lo tatou Atua atamai ma o Lē Foaʻi Ola i lenei auala faasaoola. O lea, atonu tatou te fesili ai e faapea, ‘O le ā le aafiaga o lenei mea i a tatou filifiliga ma gaoioiga?’ O le a talanoaina i le mataupu o sosoo mai lenei fesili.

O le a Faapefea Ona E Tali?

• O le ā ua tatou aʻoaʻoina e faatatau i le silafaga a le Atua i le toto mai faamatalaga iā Apelu ma Noa?

• E tusa ai ma le Tulafono, o ā tapulaa na tuu e le Atua i le faaaogāina o le toto, ma aiseā?

• Na faapefea ona faataunuu e Iesu le mea na faaatagia e le Aso o le Togisala?

• E faapefea e le toto o Iesu ona faasaoina ai o tatou ola?

[Fesili mo le Suʻesuʻega]

[Pusa i le itulau 18]

O LE TOTO O AI E FAASAOINA AI SOIFUA?

“O lenei, inā tausi ia outou iā te outou, atoa ma le lafu mamoe uma lava ua tofia ai outou e le Agaga Paia e fai ma leoleo, ia leoleo atu i le ekalesia a le Atua, ua faatauina e ia mona i lona lava toto.”—Galuega 20:28.

“O lenei, ua taʻuamiotonuina nei i tatou i lona toto, e lē faaolaina ea i tatou e ia ai le toʻasā i se ā?”—Roma 5:9.

“Sa leai so outou faamoemoe, sa aunoa foʻi ma le Atua i le lalolagi. A o ona pō nei, ona o Keriso Iesu, o outou sa vava mamao anamua ua faalatalataina mai ai i le toto o Keriso.”—Efeso 2:12, 13.

“Ua finagalo le Atua ia mau i totonu iā te ia le tumu atoatoa; ina ia faaleleia e ia o mea uma lava ma ia, ina ia lelei i le toto o lona satauro.”—Kolose 1:19, 20.

“O lenei, le ʻau uso e, ua tatou saʻoloto e ulu atu i le mea e sili ona paia ona o le toto o Iesu.”—Eperu 10:19.

“E leʻi togiolaina outou i mea e pala, . . . nai la outou amio lē aogā na tuuina mai e o outou tamā; a o le toto tāua o Keriso pei o lo le tamaʻi mamoe e lē ponā lava, e leai foʻi sona ila.”—1 Peteru 1:18, 19.

“Afai tatou te savavali i le malamalama, faapei ona i ai o ia i le malamalama, ona tatou mafuta faatasi ai lea o le tasi ma le tasi, o le toto foʻi o Iesu Keriso lona Alo e faamamāina ai i tatou i agasala uma lava.”—1 Ioane 1:7.

“Ua tatau lava oe ina ia e tago i le tusi tāʻai, ma tatala i ona faamaufaailoga; auā na fasia oe, ua e faatauina foʻi tagata i lou lava toto mo le Atua, mai ituaiga uma, ma gagana eseese, ma nuu, atoa ma atunuu.”—Faaaliga 5:9.

“Auā ua lafo i lalo lē na molia o tatou uso, . . . A ua latou manumalo iā te ia ona o le toto o le Tamaʻi Mamoe, ma le upu a la latou mau.”—Faaaliga 12:10, 11.

[Ata i le itulau 16]

E ala i le Tulafono, ua faamanino mai e le Atua e faapea, e iai le vaega a le toto i le faamagaloina o agasala

[Ata i le itulau 17]

E mafai ona faasaoina le tele o soifua ona o le toto o Iesu