Ia Talia le Taʻitaʻiga a le Atua Soifua

“Ia . . . liliu mai i le Atua soifua, o lē na faia le lagi, ma le lalolagi, ma le sami, ma mea uma lava o i ai.”—GALUEGA 14:15.

1, 2. Aiseā e talafeagai ai ona taʻua Ieova o le “Atua soifua”?

INA ua uma ona faamālōlōina e Paulo ma Panapa se tamāloa, na faamatala atu e Paulo i ē na vaaitino i lea mea i Lusa e faapea: “O tagata lava i maʻua nei e tutusa ma outou, ua ma folafola atu le tala lelei iā te outou, ia outou lafoaʻi nei mea lē aogā, ma liliu mai i le Atua soifua, o lē na faia le lagi, ma le lalolagi, ma le sami, ma mea uma lava o i ai.”—Galuega 14:15.

² Maʻeu le moni e faapea, o Ieova e lē o se tupua e leai se ola peitaʻi, o “le Atua soifua.” (Ieremia 10:10; 1 Tesalonia 1:9, 10) E lē gata o loo soifua o ia, ae o Ieova o le Puna o lo tatou ola. “O loo foaʻi mai e ia le ola, ma le mānava, ma mea uma lava i le vao mea atoa.” (Galuega 17:25) E finagalo le Atua ia tatou olioli i le ola i le taimi nei ma i le lumanaʻi. Na toe faaopoopo mai Paulo e faapea: “Ua lē tuu e ia o ona faailoga, i lona agalelei mai, ma foaʻi mai o ua mai le lagi iā te i tatou, ma tausaga o fuata a le tau, ma ona ua faamalilie i o tatou loto i le mea e ʻai ma le olioli.”—Galuega 14:17.

3. Aiseā tatou te maufaatuatuaina ai le taʻitaʻiga ua saunia e le Atua?

³ O le naunau mai o Ieova i o tatou ola ua tatou maufaatuatuaina ai lana taʻitaʻiga. (Salamo 147:8; Mataio 5:45) E lē taliaina e nisi lana taʻitaʻiga pe afai latou te maua se poloaʻiga a le Tusi Paia latou te lē malamalama ai pe foliga  mai foʻi o ni faasāsāaga. Ae peitaʻi, ua faamaonia le atamai o le maufaatuatuaina o le taʻitaʻiga a Ieova. Seʻi faataʻitaʻi: E tusa lava pe e leʻi malamalama se tagata Isaraelu i le tulafono e sā ona paʻi i se tino oti, ae na ia maua aogā ona o le usiusitai. Muamua, o lona usiusitai e vavalalata atu ai i le Atua soifua, ma le lona lua, e ʻalofia ai faamaʻi.—Levitiko 5:2; 11:24.

4, 5. (a) O le ā le taʻitaʻiga na tuuina atu e le Atua e faatatau i le toto a o lumanaʻi le faa-Kerisiano? (e) E faapefea ona tatou iloa e aofia ai Kerisiano i le taʻitaʻiga a le Atua e faatatau i le toto?

⁴ E tutusa lelei ma le taʻitaʻiga a le Atua e faatatau i le toto. Na ia fetalai atu iā Noa e lē tatau i tagata ona ʻaina le toto. E lē gata i lea, i le Tulafono na faaalia ai e le Atua e pau le auala e faaaogā ai le toto, o le tuuina lea i luga o le fata faitaulaga mo le faamagaloina o agasala. E ala i na faatonuga, ua faataatia ai e le Atua le faavae mo le faaaogāina silisili ona tāua o le toto—o le faasaoina o ola e ala i le togiola a Iesu. (Eperu 9:14) Ioe, ua faaalia i taʻitaʻiga a le Atua lona manatu mamafa i o tatou ola ma lo tatou lelei. I le talanoaina o le Kenese 9:4, na tusi ai le tagata faitofā o le Tusi Paia i le senituri lona 19 e suafa iā Adam Clarke e faapea: “O loo matuā tausia e Kerisiano i sasaʻe lenei poloaʻiga na tuu atu [iā Noa] . . . Na faasāina e le tulafono le ʻaina o le toto, talu ai na faasino atu i le toto e ao ona faamaligiina mo agasala a le lalolagi; ma i ona pō o le tala lelei e lē mafai ona ʻaina le toto, talu ai e ao ona talitonu pea i ai ua fai ma sui o le toto lea na faamaligiina mo le faamagaloina o agasala.”

⁵ E lē taumatea na faasino atu e lenei tagata poto i le tala lelei lea na faaautū atu iā Iesu. E aofia ai i lenā tala lelei le auina mai e le Atua o lona Alo e maliu mo i tatou, faamaligiina lona toto ina ia tatou maua le ola e faavavau. (Mataio 20:28; Ioane 3:16; Roma 5:8, 9) O loo aofia ai foʻi i le faamatalaga a lea tagata poto le faatonuga mulimuli ane e faapea e ao i soo o Iesu ona taumamao mai le toto.

6. O ā faatonuga na tuuina atu i Kerisiano e faatatau i le toto, ma aiseā?

⁶ Ua e silafia e faapea, na tuuina atu e le Atua le anoanoaʻi o tulafono i tagata Isaraelu. Ina ua mavae le maliu o Iesu, na lē toe avea ai o se tiute tauave a ona soo le tausia o na tulafono uma. (Roma 7:4, 6; Kolose 2:13, 14, 17; Eperu 8:6, 13) Ae peitaʻi, ina ua mavae sina taimi na lāgā ai se fesili e faatatau i se tasi o tulafono autū—o le peritomeina o tane. Pe e tatau i tagata e lē o ni Iutaia o ē sa fia maua aogā mai le toto o Keriso ona peritomeina, ina ia tausia pea le Tulafono? I le 49 T.A., na iloiloina ai lenā mataupu e le vaega pule o Kerisiano. (Galuega, mataupu 15) O le fesoasoani a le agaga paia, na faia ai le faaiʻuga a le ʻauaposetolo ma toeaina e faapea, ua faamuta le tulafono tau i le peritome ina ua iʻu le Tulafono. Ae peitaʻi, o loo tumau pea isi poloaʻiga a le Atua mo Kerisiano. Na tusi atu le vaega pule i faapotopotoga e faapea: “Ua lelei i le Agaga Paia ma i matou nei, ia lē faaee atu se tasi avega iā te outou, na o nei mea e tatau: ia faamamao outou i mea e fasia mo tupua, ma le toto, ma mea titina, ma le faitaaga. Afai tou te taumamao ma nei mea, e lelei ai outou.”—Galuega 15:28, 29.

7. O le ā le tāua i Kerisiano o le ‘faamamao ma le toto’?

⁷ E manino mai, na manatu le vaega pule e faapea, o le ‘⁠taumamao ma le toto’ e pei lona tāua ma le taumamao mai feusuaʻiga lē mamā po o le tapuaʻi i tupua. Ua faamaonia e lenei mea e faapea, o le faasāsāaga e faatatau i le toto  o se mataupu tāua. O Kerisiano lē salamō e ifo i tupua pe faia feusuaʻiga lē mamā, e lē fai mo latou “tofi le malo o le Atua”; “o latou tofi . . . , o le oti faalua lea.” (1 Korinito 6:9, 10; Faaaliga 21:8; 22:15) Mātau le eseesega: O le lē amanaʻia o le taʻitaʻiga a le Atua e faatatau i le paia o le toto e iʻu i le oti e faavavau. O le faatāuaina o le taulaga a Iesu e maua ai le ola e faavavau.

8. O le ā e faailoa ai na tāua i uluaʻi Kerisiano le taʻitaʻiga a le Atua e uiga i le toto?

⁸ Na faapefea ona malamalama ma gaoioi uluaʻi Kerisiano e tusa ma le taʻitaʻiga a le Atua e faatatau i le toto? Ia manatua le faamatalaga a Clarke e faapea: “I ona pō o le tala lelei e lē mafai ona ʻaina le toto, talu ai e ao ona talitonu pea i ai ua fai ma sui o le toto lea na faamaligiina mo le faamagaloina o agasala.” Ua faamautūina e talafaasolopito e faapea, na manatu i ai uluaʻi Kerisiano o se mataupu tāua. Na tusi Tetuliano e faapea: “Pe a faia se faafiafiaga i se malae mataaga, o i latou sa galala i le fia inu, sa latou talitalia le toto na tafe mai i le tino o le tagata o loo faasala . . . e fai ma vaifofō o latou maʻi māliu.” E faatatau i le eseesega ma tagata faapaupau o ē na ʻaina le toto, na faapea mai Tetuliano o Kerisiano latou te “lē faaaofia ai . . . le toto o ni manu i a [latou] taumafa masani. . . I faamasinoga o Kerisiano, tou te ofoina atu iā i latou sosisi e faia i le toto. Ae ua outou iloa ua faasāina na mea iā i latou.” Ioe, e ui lava i faamataʻuga e oo i le oti, e lē ʻaina lava e Kerisiano le toto. O le taʻitaʻiga a le Atua o le mea sili lenā ona tāua iā i latou.

9. E ese mai le ʻaina o le toto lava ia, o le ā e aofia ai i le taumamao mai le toto?

⁹ Atonu na manatu nisi e faapea, na uiga le vaega pule e faapea, e lē tatau i Kerisiano ona ʻaina pe inu le toto lava ia po o le ʻaina o aano o manu e leʻi faaaluina le toto po o mea taumafa e faia i le toto. E moni o le uiga muamua lenā o le faatonuga a le Atua iā Noa. O le faaiʻuga na faia e le ʻauaposetolo na taʻu atu i Kerisiano ina ia ‘taumamao i latou ma mea ua titina’ o lona uiga o aano o manu o loo iai pea le toto. (Kenese 9:3, 4; Galuega 21:25) Ae peitaʻi, na iloa e uluaʻi Kerisiano e iai se isi mea e sili atu e aofia ai. O nisi taimi, na faaaogā ai le toto mo togafitiga faafomaʻi. Na mātauina e Tetuliano e faapea, na ʻaina e nisi tagata faapaupau le toto ona o se taumafaiga e foʻia ai le maʻi māliu. Atonu e iai nisi auala na faaaogā ai le toto ina ia togafitia ai faamaʻi pe faaleleia ai le soifua mālōlōina. O lea la, o le taumamao o Kerisiano ma le toto e aofia ai le lē faaaogāina mo “togafitiga faafomaʻi.” Na latou tausia lenā tulaga e tusa lava pe lamatia ai o latou soifua.

Faaaogāina o le Toto e Togafitia ai Maʻi

10. O ā nisi o auala ua faaaogā ai le toto e togafitia ai maʻi, ua lāgā ai le ā le fesili?

¹⁰ Ua taatele i aso nei le faaaogāina o le toto e togafitia ai maʻi. I le amataga na faaaogā le toto atoa i tuigātoto—lea na maua mai i se tasi na ofo mai lona toto, teuina ma mulimuli ane tui atu i se maʻi atonu o se tasi na lavea i le taua. Mulimuli ane, na iloa ai e tagata suʻesuʻe le auala e vaevaeina ai le toto i vaega autū. O le faaaogāina o na vaega o le toto, e faasafua atu e fomaʻi le toto lea na maua mai i isi foʻi maʻi, atonu e tuiina le vaega faasuavaia o le toto (plasma) i se tagata ua manuʻa ae tui sela mūmū i le isi. O saʻiliʻiliga faaauau pea ua faaalia ai e mafai ona fai ni gaoioiga i se vaega autū, e pei o le vaega faasuavaia, ina ia maua ai nisi vaega ninii e mafai ona avatu i nisi foʻi maʻi. O loo faaauau pea nei saʻiliga ma ua lipotia mai auala fou ua faaaogā ai nei vaega ninii. O le ā faapefea ona tali atu se Kerisiano i ia mataupu? Ua ia maumauaʻi e lē taliaina se tuigātoto ae peitaʻi, e uunaʻia o ia e se fomaʻi e talia se tasi o vaega autū o le toto atonu o sela mūmū ia ua vavae ese mai le toto. Pe atonu o le togafitiga e aofia ai na o se vaega ninii ua maua mai se vaega autū. E faapefea ona tali atu se auauna a le Atua i ia tulaga, i lona manatuaina o le toto e paia ma i le tulaga aoao tetele e faasaoina soifua i le toto o Iesu?

11. O le ā le tulaga saʻo e faatatau i le faaaogāina o le toto i togafitiga ua leva ona tausisi i ai Molimau?

¹¹ I le tele o tausaga ua mavae na faamanino ai e Molimau a Ieova lo latou tulaga. O se faaaʻoaʻoga, na latou saunia se mataupu ma na lomia i The Journal of the American Medical Association (Novema 27, 1981; na toe lomia i le polosiua, Pe Mafai Faapefea e le Toto Ona  Faasaoina Lou Ola? itulau 27-29). * I lenā mataupu na sii mai ai fuaiupu i le Kenese, Levitiko ma le Galuega. Na faapea mai: “E ui o nei fuaiupu e lē o tusia mai ai ni faaupuga faafomaʻi, ae ua manatu i ai Molimau o le faasāsāaga lea o le tuiina o le toto atoa, o RBC (sela mūmū), ma le vaega faasuavaia o loo iai kopusele (plasma), e faapena foʻi le WBC (sela papaʻe) atoa ai foʻi ma le vaega o sela faatoʻa toto (platelets).” Na taʻua e se tusi o le Emergency Care o le 2001, i le ulutala “Mea e Aofia ai i le Toto”: “Ua faia aʻe le toto i ni vaega: o le vaega faasuavaia o le toto, sela mūmū, sela papaʻe ma sela faatoʻa toto.” O lea la, e tusa ai ma togafitiga faafomaʻi, e lē taliaina e Molimau le tuiina o le toto atoa po o ona vaega autū e fā.

12. (a) O le ā le tulaga ua faaalia e faatatau i vaega ninii ia e maua mai i vaega autū o le toto? (e) O fea e maua ai isi faamatalaga faaopoopo e faatatau i lenei mataupu?

¹² Na faaauau mai le mataupu e faapea: “O lea malamalamaga faalelotu a Molimau a Ieova e lē faasāina faasoloatoa ai le faaaogāina o vaega ninii o le toto e pei o le polotini e taʻua o le albumin, le immune globulin, ma ni sauniuniga e faaleoleo pe afai ua alu tele le palapala (hemophiliac); e ao i Molimau taʻitoʻatasi ona filifili le tagata lava ia pe na te mafai ona taliaina ia vaega.” Talu mai le 1981, o le tele o vaega ninii eseese (ia na maua mai i vaega autū e fā) ua faatulagaina e faaaogā mo togafitiga faafomaʻi. E tusa ai ma lenei tulaga na saunia e Le Olomatamata o Iuni 15, 2000, ni faamatalaga aogā i le mataupu “Fesili mai le ʻAufaitau.” Ina ia maua e le faitau miliona o le ʻaufaitau aogā, ua toe lomia ai le tali i le itulau e 29-31 o lenei mekasini. Ua aumaia ai faamatalaga auʻiliʻili e fefulifulisaʻi ai, ae o le a e mātauina e ōgatusa ma manatu ia na aumaia i le 1981.

O le Matafaioi a Lou Lotofuatiaifo

13, 14. (a) O le ā le lotofuatiaifo, ma e faapefea ona aofia i mataupu e tusa ai ma le toto? (e) O le ā le taʻiala na saunia e le Atua mo Isaraelu e faatatau i le ʻaina o aano o manu, ae o ā fesili atonu na lāgā ai?

¹³ O lenā faamatalaga e manaʻomia ai le faaaogāina o le lotofuatiaifo o se tasi pe a faia filifiliga. Aiseā? E ioe Kerisiano e mulimuli i taʻitaʻiga a le Atua, ae i nisi taimi e faia ai filifiliga a le tagata lava ia ona faaaogā loa lea o le lotofuatiaifo. O le lotofuatiaifo o se tomai e masani ona iai i le tagata, lea e mafai ona ia iloilo ma faia filifiliga aemaise i amioga talafeagai. (Roma 2:14, 15) Ae peitaʻi, ua e silafia e eseese lotofuatiaifo. * Ua taʻua e le Tusi Paia o nisi ‘⁠loto fuatiaifo e vaivai,’ o lona uiga la e malolosi isi. (1 Korinito 8:12) E eseese Kerisiano i le tele  latou te faia e agaʻigaʻi ai i luma i le aʻoaʻoina o le finagalo o le Atua, i le manatu mamafa i Ona manatu ma le faatatauina pe a faia filifiliga. E mafai ona tatou faataʻitaʻi lenei mea i tagata Iutaia ma le ʻaina o aano o manu.

¹⁴ O loo manino le Tusi Paia e faapea, o le tagata e usitai i le Atua o le a lē ʻaina aano o manu e leʻi faaaluina le toto. Ua matuā tāua lenei faatonuga ma e ui lava na matuā faigatā tulaga o mea, ae na agasala fitafita Isaraelu ina ua ʻaina aano o manu e leʻi faaaluina le toto. (Teuteronome 12:15, 16; 1 Samuelu 14:31-35) Peitaʻi, atonu na lāgā ai ni fesili. Pe a fasi e se tagata Isaraelu se mamoe, o le ā le vave e ao ona faaalu ai lona toto? Pe e tatau ona ia tui le faaʻī o le manu ina ia faaalu ai le toto? Pe e ao ona tautau le mamoe i ona vae e lua pito i tua? E mo le ā le umi? O le ā na te faia i se povi telē? E tusa lava pe uma ona faaalu le toto ae atonu o loo totoe lava sina toto i le aano o le manu. Pe e mafai ona ia taumafa lenā aano o le manu? O ai e faia le filifiliga?

15. Na faapefea ona tali atu nisi tagata Iutaia e faatatau i le ʻaina o aano o manu peitaʻi, o le ā na faatonuina i latou e le Atua e fai?

¹⁵ Seʻi manatu i se Iutaia maelega ua fesagaʻi ma na fesili. Atonu e manatu o ia e faapea e ʻalofia le faatauina o aano o manu o loo faatau i le maketi, e pei ona manatu le isi tagata Iutaia e lē ʻaina aano o manu ona e lē taumatea sa ofoina atu muamua i se tupua. Atonu e ʻaina e nisi tagata Iutaia aano o manu pe a māeʻa ona faia i ai ni faiga faapitoa e aveesea ai le toto. * (Mataio 23:23, 24) O le ā sou manatu e faatatau i na taofi eseese? E lē gata i lea, talu ai e lē manaʻomia e le Atua na gaoioiga e pei ona faamatalaina, pe talafeagai la mo tagata Iutaia ona auina atu le tele o fesili i le fono o le ʻau rapi ina ia fai se tulafono mo tulaga taʻitasi uma? E ui o lenā tū na iʻu ina faia i Iutaia, ae tatou te fiafia ona e leʻi faatonuina e Ieova tagata tapuaʻi moni e saʻili faaiʻuga e faatatau i le toto i lenā auala. Na aumaia e le Atua taʻiala faavae i le tapēina o manu ma faaalu o latou toto, ae na te leʻi faaopoopo atu nisi faamatalaga auʻiliʻili.—Ioane 8:32.

16. Aiseā atonu e eseese ai manatu o Kerisiano e faatatau i le taliaina o se tui o vaega ninii mai se vaega autū o le toto?

¹⁶ E pei ona taʻua i palakalafa e 11 ma le 12, e lē taliaina e Molimau a Ieova le tuiina o le toto atoa po o ona vaega autū e fā—vaega faasuavaia o le toto, sela mūmū, sela papaʻe ma sela faatoʻa toto. Ae faapefea vaega ninii ia e maua mai i vaega autū, e pei o le serum lea ua iai mea (antibodies) e tau faasaga i se faamaʻi po o le ‘ona e māfua pe a ū e se gata? (Tagaʻi i le itulau e 30, palakalafa e 4 o lenei mekasini.) Ua manatu nisi o nei vaega ninii ua lē toe taʻua o le toto ma e lē aofia ai i le faatonuga e ʻfaamamao ma le toto.’ (Galuega 15:29; 21:25; itulau 31, palakalafa 1) O lo latou tiute tauave lenā. Ua uunaʻia e lotofuatiaifo o isi i latou e teena so o se mea e maua mai le toto (manu po o tagata) e tusa lava pe o  se vaega ninii o se tasi o vaega autū. * Peitaʻi, e iai nisi atonu e taliaina tui o le polotini mai le vaega faasuavaia o le toto ina ia tetee atu i se faamaʻi po o se ʻona o se ū a se gata ae latou te lē taliaina isi vaega ninii. E lē gata i lea, o nisi vaega e maua mai se tasi o vaega autū e fā atonu e tutusa gaoioiga ma le vaega atoa ma faia se galuega o le faatumauina o le ola lea e lē mafai ona taliaina e le toʻatele o Kerisiano.

17. (a) E faapefea ona fesoasoani o tatou lotofuatiaifo pe a fesagaʻi ma ni fesili e faatatau i vaega ninii o le toto? (e) Aiseā e tāua ai le faia o filifiliga i nei mataupu?

¹⁷ O le mea ua fai mai ai le Tusi Paia e uiga i le lotofuatiaifo e aogā tele pe a faia na filifiliga. O le laasaga muamua, o le aʻoaʻoina lea po o le ā ua fai mai ai le Afioga a le Atua ma taumafai e faaōgatusa lou lotofuatiaifo ma le Tusi Paia. O le a faaauupegaina ai oe e filifili e tusa ma le taʻitaʻiga a le Atua na i lo le fesili i se tasi e faia se filifiliga mo oe. (Salamo 25:4, 5) O le taliaina o vaega ninii o le toto, ua manatu i ai nisi e faapea, ‘O se mataupu o le lotofuatiaifo, e lē afāina la.’ E sesē lenā manatu. E lē faapea e lē tāua se mataupu pe afai e tuu atu i le lotofuatiaifo o se tasi. E tāua tele. O se tasi o māfuaaga e mafai ona aafia ai isi tagata o ē e ese o latou lotofuatiaifo mai iā i tatou. Ua tatou mātauina lenei mea mai le fautuaga a Paulo e uiga i aano o manu atonu na ofoina atu muamua i se tupua ma mulimuli ane faatau atu i se maketi. E ao i se Kerisiano ona manatu mamafa ina ia aua neʻi ‘faatausuai i loto fuatiaifo vaivai.’ Afai e na te faatausuai i isi, e mafai ona “fano ai le uso vaivai, o lē na maliu ai Keriso mo ia” ma agasala ai iā Keriso. O lea la, o mataupu e faatatau i vaega ninii o le toto o le filifiliga lenā a le tagata lava ia, ae e ao ona manatu i na filifiliga e tāua.—1 Korinito 8:8, 11-13; 10:25-31.

18. E faapefea ona ʻalofia le faaleagaina o le lotofuatiaifo o se Kerisiano e ia lava e tusa ma filifiliga e faatatau i le toto?

¹⁸ O se isi vala e ao ona iloiloina lea ua faamamafa ai le tāua o filifiliga e faatatau i le toto. O aafiaga o le a iā te oe ona o na filifiliga. Afai o le taliaina o vaega ninii o le toto o le a faalavelavea ai lou lotofuatiaifo ua uma ona aʻoaʻoina e le Tusi Paia, e lē tatau ona e lē amanaʻiaina. E lē tatau foʻi ona e lē amanaʻia uunaʻiga a lou lotofuatiaifo pe a taʻu atu e se tasi iā te oe e faapea: “E lē sesē le taliaina o vaega ninii o le toto; e toʻatele isi latou te taliaina.” Ia manatua, e faitau miliona tagata i aso nei latou te lē amanaʻiaina o latou lotofuatiaifo, ma ua iʻu ai ina lē toe aogā, lea ua māfua ai ona latou tala pepelo po o le faia o isi mea sesē e aunoa ma le salamō. E mautinoa e mananaʻo Kerisiano e ʻalofia na ala.—2 Samuelu 24:10; 1 Timoteo 4:1, 2.

19. O le ā le mea tāua e ao ona tatou manatua pe a fesagaʻi ma ni togafitiga faafomaʻi e aofia ai le toto?

¹⁹ Ua faapea mai le tali na toe lomia i itulau e 29-31 e latalata i le faaiʻuga: “Talu ai e eseese manatu ma filifiliga e faavae i le lotofuatiaifo, po o lona uiga ea la e lē tāua lenei mataupu? E leai. E matuā tāua lava.” E faapitoa lava ona tāua talu ai e aofia ai la oulua faiā ma le “Atua soifua.” O lenā faiā e na o le pau lea o le auala e maua ai le ola e faavavau, e faavae i le mana o le toto o Iesu e faasaoina ai oe. Ia matuā manatu mamafa i le tāua o le toto talu ai e faasaoina e le Atua soifua ona o le toto. Na tusia ma le tonu e Paulo e faapea: “Sa leai so outou faamoemoe, sa aunoa foʻi ma le Atua i le lalolagi. A o ona pō nei, ona o Keriso Iesu, o outou sa vava mamao anamua ua faalatalataina mai ai i le toto o Keriso.”—Efeso 2:12, 13.

[Faamatalaga pito i lalo]

Pe E te Manatua?

• O le ā le taʻitaʻiga na tuu atu e le Atua iā Noa, i tagata Isaraelu ma i Kerisiano e faatatau i le toto?

• O le ā ua matuā teena e Molimau a Ieova e tusa ai ma le toto?

• O le ā le uiga o le faapea o le mauaina o vaega ninii mai se vaega autū o le toto o se mataupu lea o le lotofuatiaifo o se tasi, ma o le ā e lē uiga i ai lenā mea?

• I le faia o filifiliga, aiseā e ao ai ona tatou faatāua la tatou faiā ma le Atua?

[Fesili mo le Suʻesuʻega]

[Siata i le itulau 22]

(Tagaʻi i le lomiga mo le ata atoa)

TULAGA ALOAʻIA FAATATAU I LE TOTO

TOTO ATOA

FAASĀINA

Sela mūmū

Sela papaʻe

Sela faatoʻa toto

Vaega faasuavaia o le toto

FILIFILIGA A LE KERISIANO

Vaega ninii mai sela mūmū

Vaega ninii mai sela papaʻe

Vaega ninii mai sela faatoʻa toto

Vaega ninii mai le vaega faasuavaia o le toto

[Ata i le itulau 20]

Na filifili le vaega pule e ao i Kerisiano ona ‘faamamao ma le toto’

[Ata i le itulau 23]

Aua e te lē amanaʻiaina lou lotofuatiaifo pe a e fesagaʻi ma se filifiliga e faatatau i vaega ninii o le toto