Le Luʻi i le Toleniina o Fanau i Aso Nei

UA FAI lava si leva o le afiafi, ma ua sauni foʻi le tagata e ona se faleʻaiga e tapuni ae alu i le fale. Ae ulufale atu loa ni fafine se toʻalua ma se tamaitiiti, ma ota sa latou taumafataga. Ona o le vaivai tele, na manatu ai lē e ona le faleʻaiga e fai i ai, ua tapuni le fale, ae na ia toe manatu e tautuaina i latou. A o talanoa nei fafine e toʻalua ma aai, ae o loo fetamoʻeaʻi le tamaitiiti i le faleʻaiga ma faatoʻulu solo masi i le fola o le fale ma soli i ona vae. Sa na o le ʻataʻata lava o le tinā e aunoa ma le taofia o le tamaitiiti. Ina ua ō ese atu ia tagata na aai, sa toe faamamā uma ai e le pule o le faleʻaiga ua matuā vaivai le fola ua palapalā.

E pei ona e iloa, o lenei mea moni na tupu i le olaga, ua faaalia ai, o le tele o aiga, e lē o lelei ona toleniina ai tamaiti. E eseese lava māfuaaga. O nisi o mātua, e tuufau a latou fanau e fai lava le mea e loto i ai tamaiti, i le manatu faapea, e ao ona tausia aʻe tamaiti i se siʻomaga saʻoloto. Po ona o lo latou pisi tele, atonu e lē uaʻi totoʻa atu ai mātua i a latou fanau ma avatu le toleniga manaʻomia. Ua manatu nisi mātua, e sili atu ona tāua aʻoga a a latou fanau, o lea, ua soona tuufau ai le tamaitiiti, pau lava le mea, ia maua ni togi lelei i le aʻoga ma alu atu i se kolisi maualuga.

Ae ua faapea mai nisi, e manaʻomia ona suia tapulaa tau amio a mātua ma tagata lautele. Ua latou finau mai e faapea, ua oo ina faia e tamaiti solitulafono eseese, ma ua faateteleina faiga sauā i aʻoga. I lea, na faamamafa mai ai e le pule aʻoga o se aʻoga tulaga lua i Seoul, i le Malo o Korea e faapea, e tatau lava ona faamuamua le toleniina o tamaiti ina ia faaleleia ai o latou uiga. Na ia faapea mai: “E tatau ona aʻoaʻo muamua tamaiti ia avea ma tagata lelei, ona aʻoaʻo mulimuli ai lea o le poto.”

O le toʻatele o mātua o ē e mananaʻo ia ulu atu a latou fanau i kolisi ma ia taulau manuia i le olaga, e faataliga tuli lava i nei fautuaga lapataʻi. Afai o oe o se matua, o le ā le ituaiga o tagata e te manaʻo ia avea ai lau tamaitiiti? O se tagata matua e manatu mamafa i amioga mamā ma avega tauave? Po o se tasi foʻi e magafagafa mo isi, ma gauaʻi gofie, ma e iai se agaga fiafia? Afai o lea, faamolemole ia iloilo le mataupu lea e sosoo mai.