Le Tofi Sili Ona Tāua ua Maua

INA ua pulapula lā goto lona soifua, na tusi ai le aposetolo matua o Ioane e faapea: “E leai soʻu fiafia e sili i lenei, pe a ou faalogo ua savavali laʻu fanau i le upu moni.”—3 Ioane 4.

Sa faasino atu le aposetolo faamaoni i lana fanau faaleagaga. Ae peitaʻi, e toʻatele lava mātua o le a latou faaleoina foʻi upu nei a le aposetolo. O loo latou matuā galulue mamafa e tausia aʻe a latou fanau “i aʻoaʻiga ma apoapoaʻiga” a Ieova, ma ua latou olioli i le taimi nei e vaai atu i a latou fanau matutua, o ‘⁠savavali i le upu moni.’ (Efeso 6:4) Ae peitaʻi, o le aʻoaʻoina o le fanau a se tasi i le auala i le ola e faavavau, o le tuuina atu lea iā i latou o le meaalofa aupito sili ona tāua. Talu ai, o le tuutoina i le Atua, e aofia ai le ola i se olaga e pei ona finagalo Ieova e ola ai Kerisiano, “o loo i ai le mea ua folafolaina mai i la le olaga nei atoa ma le atalī.”—1 Timoteo 4:8.

E matuā tāua i le finagalo o le Tamā lelei atoatoa, o Ieova, ia mātua tuutoina e matataʻu i le Atua o ē e taumafai malosi e aʻoaʻo a latou fanau i le itu faaleagaga. Pe a talileleia e fanau, ona latou matuā fiafia lea ona ua auai faatasi ma o latou mātua i le tapuaʻiga moni. Pe a oo ina matutua na tamaiti, o le a latou manatua pea na mea fiafia na tutupu. E manatua ma le fiafia e nisi le uluaʻi taimi na latou auai ai i le Aʻoga o le Faiva Faatiokarate. * Pe atonu foʻi latou te manatuaina le uluaʻi taimi ina ua mafai ona latou faitau se mau mai le Tusi Paia i le faiva mai lea fale i lea fale faatasi ma se tasi o latou mātua. E galo faapefea iā i latou le faalogo atu a o faitau mai e o latou mātua le tusi, O Laʻu Tusi, o Tala o Le Tusi Paia po o le tusi, Ia Faalogo Atu i le Faiaʻoga Sili? * E manatua e Gabriel se mea sa sili ona ia fiafia i ai: “Ina ua fā oʻu tausaga, sa pese mai loʻu tinā iā te aʻu i aso uma lava a o fai sana kuka. Ou te manatua lelei pea foʻi se tasi o pese o le sauniga. Mulimuli ane, sa fesoasoani lenā pese iā te aʻu e iloa ai le tāua o le auaunaga iā Ieova.” Atonu o loo e manatua foʻi le pese manaia lea e fai mai ai Gabriel. O se pese i le tusi pese faa-Peretania, Pese Atu Viiga iā Ieova, ma ua faamatuaina “Tapuaʻi iā Ieova a o Talavou.”

E amata le pese i upu nei: “Ua saunia e le Atua, le viiga i gutu o tama meamea; /Ua sii aʻe o latou leo e vivii atu iā Iesu.” O le mea moni, e iai tamaiti na maua le faaeaga e auaufaatasi ai  ma Iesu ma e foliga mai sa latou matuā fiafia moni lava iā te ia. Sa faaaogā foʻi e Iesu uiga aʻoaʻogofie o tamaiti e fai ma faaaʻoaʻoga mo ona soo ina ia faataʻitaʻi i ai. (Mataio 18:3, 4) O lea la, e iai lava le tulaga talafeagai o tamaiti i le tapuaʻiga iā Ieova. Ae ua faaauau pea upu o le pese: “Ioe, e oo lava i pepe e faasilisilia e le Atua.”

E ala i a latou amioga e fai ma faaaʻoaʻo, i le aiga, le aʻoga, ma isi nofoaga; e toʻatele tamaiti ua viia ai le Atua faapea o latou aiga. Maʻeu se faamanuiaga ona ua latou maua ni “Mātua Kerisiano o ē naunau i le upu moni.” (Teuteronome 6:7) O mātua e matataʻu i le Atua, e latou te tutū mo le Atua, o lē o loo aʻoaʻo i ana foafoaga ola e pei o se Tamā alofa ina ia savavali i le ala e ao ona latou ui ai. Maʻeu se faamanuiaga na latou maua! Ae i le isi itu, a o latou aʻoaʻoina talavou i o latou aiga, maʻeu lo latou fiafia e mauaina ni fanau e “usitai iā i latou ma maua ai le fiafia”! (Isaia 48:17, 18) Ua faapea mai ia Angélica, o lē o loo auauna nei i le ofisa o le lālā o Molimau a Ieova i Mekisikō: “E taumafai pea lava oʻu mātua e faatatauina ia mataupu silisili o le Tusi Paia. O le pogai lenā sa manaia ai lava loʻu olaga talavou ma sa ou matuā fiafia ai.”

E ioeina e na Kerisiano e faapea, e aogā le tausia lelei o lou tofi faaleagaga. Atonu o oe o se talavou na tausia aʻe i se aiga e faavae i tapulaa moni faa-Kerisiano. Afai o lea, ua apoapoaʻia oe e lenā lava pese e faapea: “Talavou Kerisiano e, taumafai e faamamā ou ala.” O le a oo mai le taimi e faia ai au lava filifiliga, o lea, i le taimi nei “aʻoaʻo a o e laʻitiiti e faalagolago iā Ieova./Ae aua le taumafai e fia lauiloa.”

Afai e faasesēina oe e faamuamua le fia lauiloa i lou olaga, o le a lē aogā toleniga uma na faia iā te oe, ma faaumatia ai ou faamoemoega i le lumanaʻi. O le naunau i le fia lauiloa, e mafai ona iʻu ai i lou lē mataala. Ua iʻu ai ina auaufaatasi nisi ma i latou o ē sa foliga mai e amio lelei, ae ua lē naunau i tapulaa faa-Kerisiano. Na faaalia mai lenā tulaga iā Tara, o se tagata autū lea o loo faaalia mai i le tala i le ata vitiō, Young People Ask—How Can I Make Real Friends? I le pei o Tara, e so o se talavou Kerisiano lava e faauō ma i latou e lē faatāuaina le tapuaʻiga moni, o le a oo ina iloa “o uō leaga, e leaga ai amio lelei,” e pei ona fai mai ai le pese. E tele ni tausaga o tauivi ina ia atiina aʻe ni uiga lelei, ae e vave lava ona faaleagaina amio lelei i se taimi puupuu.

E ioeina e faapea, e lē faigofie ona atiina aʻe le mataʻu i le Atua. Ae ua faaauau atili mai le pese e faapea, “afai e te manatua lou Atua a o e talavou,/Ma auauna iā Ieova i le agaga ma  le faamaoni,” o le a e atiaʻe ai se faavae mausalī e taulau manuia moni. “A oo ina e matua o le a sili ona e olioli.” O le a sili atu foʻi ona e talisapaia le tausiga alofa a Ieova, ma e leai se mea e mafai ona taofia ai oe mai le faia o le mea ua tonu i lana silafaga. O le auala lenā e avea ai oe o se tagata matua amioatua ua taʻumatuaina. E lē gata i lea, o le faaaogā ma le atamai o le tausiga faa-Kerisiano lea na e ola aʻe ai, e te maua ai le avanoa e “matuā faafiafiaina ai le finagalo o le Atua.” Maʻeu se faaeaga sili e mafai ona maua e se tagata!—Faataoto 27:11.

O le mea lea, talavou e, ia manatua pea le tāua o le toleniga mai iā Ieova faapea ou mātua Kerisiano. Ia avea lo la alolofa tele iā te oe ma uunaʻiga e te faia ai le mea e fiafia i ai le finagalo o Ieova. Ia faapei o Iesu Keriso ma le talavou o Timoteo, o le a e faafiafia le finagalo o lou Tamā faalelagi faapea ou mātua faalelalolagi. Afai ae avea oe o se matua, e lē taumatea e te ioe faatasi ma Angélica, lea na taʻua i le amataga, o lē na faapea mai: “Afai e oo i se taimi ae iai saʻu tama, o le a ou taumafai lava e faatupu i lona loto le alofa iā Ieova mai lava a o tamameamea, ina ia avea ma ona fetu taʻiala.” E mautinoa lava, o le auala saʻo e tau i le ola e faavavau, o le tofi aupito sili lea mai i le Atua!

[Faamatalaga pito i lalo]