Pe Mafai e Au Tatalo Ona Suia le Tulaga o se Faafitauli?

O AI se tasi o i tatou e leʻi fesagaʻi ma se tulaga faigatā sa lē mafai ona pulea? Ua faaalia i le Tusi Paia e faapea, na iloa e le aposetolo o Paulo, e mafai e le tatalo ona suia ai le tulaga o se mea faigatā.

Ina ua faafalepuipuiina sesē o ia i Roma, na talosaga atu ai Paulo i ona uso tapuaʻi ina ia tatalo mo ia i lona faapea atu: “Ua atili loʻu ʻaiʻoi atu iā te outou e fai lenā mea, ina ia vave ona toe tuuina atu ai o aʻu iā te outou.” (Eperu 13:18, 19) I se tasi taimi, na faaalia ai e Paulo le mautinoa e faapea, o le a tali mai le Atua i tatalo ina ia vave ona toe tatalaina o ia. (Filemoni 22) E leʻi pine ae tatalaina loa Paulo ma toe amataina lana galuega faamisionare.

Ae, pe mafai moni e le tatalo ona suia le tulaga o ou faafitauli? Atonu. Ae ia manatua, o tatalo, e lē na ona faia e pei o se masaniga faalotu. O se talanoaga moni ma lo tatou Tamā faalelagi e alofa ma e sili ona malosi. E lē tatau lava ona tatou faatalatū e tatalo atu mo ni mataupu patino, ona faatali lea ma le onosai seʻi iloa po o le ā le auala o le a tali mai ai Ieova.

Atonu e lē tali saʻo mai le Atua i tatalo uma, atonu foʻi e lē tali mai i le auala po o le taimi lea tatou te faatalitalia. O se faaaʻoaʻoga, sa tatalo pea lava pea Paulo e faatatau i “le mea matuitui i le tino.” Po o le ā lava le faafitauli sa iai iā Paulo, e leʻi aveesea e le Atua, ae sa ia faamāfanafanaina o ia i upu nei: “O loʻu nei alofa tunoa e lava lea e fesoasoani iā te oe; auā o le vaivai e faaatoaina ai loʻu mana.”—2 Korinito 12:7-9.

E mafai foʻi ona tatou mautinoa e faapea, e tusa lava pe lē aveesea e le Atua se faafitauli patino, ae e mafai ona ia “sauni foʻi faatasi ma le faaosoosoga se mea e sao ai, ina ia [tatou] lava oono.” (1 Korinito 10:13) Ua lē o toe umi se taimi, ona aveesea atoatoa lea e le Atua ia mafatiaga o tagata. Ae i le taimi nei, o le liliu atu i “le faafofoga tatalo” e mafai ona suia ai tulaga o ni faafitauli.—Salamo 65:2.