‘Sa Ia Aʻoaʻo i Matou ia Amanaʻia Lana Lotu’

SA ILOA e se tasi o Molimau a Ieova mai le itumalo o Rovigo, i Italia e faapea, sa iai se tuma iā te ia ma e matuiā tele lona tulaga. Ina ua mavae ni taimi na taofia ai o ia i le falemaʻi lea na ia talosaga atu ai ina ia togafitia o ia e aunoa ma le faaaogāina o le toto, sa fesoasoani atu iā te ia ni tagata tausimaʻi mai le faalapotopotoga o le kanesa i lo latou nuu.

O le malosi o le faatuatua o lenei tamaʻitaʻi maʻi e 36 tausaga, ma lona nofo sauni e felagolagomaʻi ma fomaʻi, na matuā faafiafiaina ai le ʻaufaigaluega a le falemaʻi o ē na togafitia o ia. A o leʻi maliu lenei tamaʻitaʻi maʻi i le kanesa, na tusia ai e se tasi o tausimaʻi o lē na fesoasoani atu iā te ia se faamatalaga i se mekasini faafomaʻi e uiga i le mea na tupu i le maʻi, lea na ia faaigoaina iā Angela.

“Sa matuā malosi le faamoemoe o Angela ma sa naunau e fia ola. Sa ia iloa lona tulaga ma le matuiā o lona maʻi, ma sa ia saʻili mo se vaifofō, se togafitiga po o se vailaau e pei foʻi ona faia e se tasi o i tatou. . . . Sa faasolosolo mālie lava ona matou masani atu iā te ia. E leʻi tetee mai lava o ia i la matou fesoasoani. I le tuufeagai ai, o le tautala saʻo mai o Angela, na faafaigofie ai mea uma. Sa o se fiafiaga le tausia o ia, talu ai sa matou iloa, o se taimi lea sa mafai ai ona matou feiloaʻi atu i se tagata faamaoni, ma mafai ona matou maua ai aogā. . . . Sa vave ona matou iloa, o le a avea lana lotu ma toʻatugā i le feagai ai ma lona maʻi.” O le manatu lenā o le tagata tausimaʻi talu ai sa ia lagona, sa tatau ona tui se toto iā Angela, ae sa ia teena.—Galuega 15:28, 29.

“Ona o i matou o ni tagata tomai i le tausia o tagata mamaʻi, na matou fai atu ai iā Angela, e matou te lē ioe i lana filifiliga lea ua faia, ae o lana fesoasoani, na matou malamalama ai i lona manatu e uiga i le ola. Na matou malamalama ai foʻi i le tāua o lana lotu iā te ia atoa ma lona aiga. E leʻi faavaivai Angela pe lolo atu foʻi i le maʻi, ae sa lototele o ia. Sa manaʻo o ia ia ola, ma sa tauivi, ina ia ola pea. Sa ia faailoa mai lona faanaunauga, ma lona talitonuga. Sa iā te ia se maumauaʻi, e lē masani ona iā i tatou, sa iā te ia foʻi se faatuatua mausalī lea sa lē iā i matou. . . . Na aʻoaʻo i matou e Angela i le tāua o le amanaʻiaina o lana lotu, o se mea e matuā ese mai lava ma la matou galuega. . . . E matou te talitonu, e matuā tāua mea na aʻoaʻo mai e Angela iā i matou, auā na matou fetaiaʻi ma ituaiga o tagata eseese uma, ma tulaga eseese, ma lotu eseese, ae ua mafai ona matou aʻoaʻo mai lenei tulaga ma mafai ona ofo atu se fesoasoani i tagata uma lava e matou te fetaiaʻi.”

Na faamamafa mai e le mataupu i le mekasini le Tulafono o Mataupu Faafomaʻi mo Alii ma Tamaʻitaʻi Tausimaʻi i Italia na faamaonia i le 1999, lea e faapea mai: “E faia e sē tausimaʻi ona tiute faatasi ma lona manatunatu i talitonuga ma aʻoaʻoga faalotu a le tagata maʻi, o amioga tatau faaleaganuu, faapea le lanu ma le ituaiga o tagata.” I nisi taimi, atonu e faigatā ai i fomaʻi ma tausimaʻi ona gaoioi e tusa ma talitonuga faalelotu o se tagata maʻi, ma tatou te talisapaia i latou e finagalo malilie e faia faapea.

O filifiliga e faia e Molimau a Ieova e faatatau i le soifua mālōlōina ma togafitiga faafomaʻi o latou tagata mamaʻi, ua matuā mafaufauina lelei. E latou te manatunatu mamafa i mea o fai mai ai le Tusi Paia, e pei ona faaalia i le tulaga o Angela, e lē o i latou o ni tagata maelega valea. (Filipi 4:5) I le lalolagi aoao, ua faateleina fomaʻi ua manatu mamafa i le lotofuatiaifo a o latou tagata mamaʻi o ē ua avea ma Molimau.