E Manatu Alofa Moni Mai le Atua iā te Oe

E MASANI lava ona tatou valaau atu i le Atua mo se fesoasoani pe a oo faafuaseʻi mai ni tulaga faigatā. Auā, e “silisili lava lo tatou Alii, e tele lona malosi; e lē ma faamatalaina lona poto.” (Salamo 147:5) E sili atu ona tomai o ia e fesoasoani mai iā i tatou i le feagai ai ma o tatou faafitauli. E lē gata i lea, ua valaaulia i tatou e le Tusi Paia ina ia “momoli atu o [tatou] loto i ona luma.” (Salamo 62:8) Aiseā la e toʻatele ai ua manatu e faapea, e lē o tali mai le Atua i a latou tatalo? Po o le uiga ea e lē o manatu alofa mai o ia?

Na i lo o le vave tuuaʻia o le Atua ona e foliga mai e lē o faia se gaoioiga, seʻi toe tomānatu i le taimi a o e laʻitiiti. Pe sa e faitioina ou mātua e faapea e lē alolofa iā te oe, ona o le lē faia o mea uma sa e manaʻo i ai? E toʻatele tamaiti e faia faapena. Ae peitaʻi, ina ua e matua, ua e iloa ai, e tele auala e faaalia ai le alofa, ma o le talia o manaʻoga uma e talosaga atu ai se tamaitiiti, e lē o se auala alofa lenā e faia.

E faapena foʻi la, afai e lē tali mai Ieova i a tatou tatalo uma e tusa ma mea o tatou mananaʻo i ai, e lē faapea ai ua ia tuulafoaʻiina i tatou. O le mea moni, e tele ni auala o loo faaalia ai, e manatu alofa mai le Atua iā i tatou.

“O Ia o Loo Ola ai i Tatou”

O le mea muamua lava, e faafetai atu i le Atua ona o ia “o loo ola ai i tatou, ma gaoioi ai, o loo i ai foʻi i tatou.” (Galuega 17:28) O le foaʻiina mai o le ola iā i tatou, e mautinoa ai lona manatu alofa mai mo i tatou!

E lē gata i lea, e foaʻi mai pea e Ieova mea tatou te manaʻomia ina ia tatou ola ai pea. Ua tatou faitau ai e faapea: “Ua faatupu e ia mutia mo manu vaefā, atoa ma mea totō e aogā i tagata; e faatupu mai le mea e ʻai i le eleele.” (Salamo 104:14) E tele atu mea e faia e Lē na Foafoaina Mea na i lo o le tau ina saunia o mea tatou te manaʻomia e tausi ai o tatou ola. O loo ia foaʻi mai ma le aao mafola le “ua mai le lagi iā te i tatou, ma tausaga o fuata a le tau, ma ona ua faamalilie i o tatou loto i le mea e ʻai ma le olioli.”—Galuega 14:17.

Ae peitaʻi, o loo taumānatu pea nisi e faapea, ‘Afai e alofa tele mai le Atua iā i tatou, aiseā ua ia lē taofia ai mafatiaga ia e oo iā i tatou?’ Pe e te iloa le tali i lenā fesili?

Pe Tuuaʻia le Atua i o Tatou Mafatiaga?

O le tele o mafatiaga o le fanau a tagata, e pogai mai iā i latou lava. O se faaaʻoaʻoga, ua lauiloa le tulaga matuā lamatia o nisi o amioga mataʻutia. Ae o loo faia pea e tagata ia feusuaʻiga lē mamā, faaaogā sesē o le ʻava malosi ma fualaau faasāina, le ulaula tapaa, auai i taaloga e lamatia ai le ola, ave taavale saoasaoa, ma isi mea faapena. Afai o le faia o na gaoioiga mataʻutia e iʻu ai i mafatiaga, o ai la e tuuaʻia? O le Atua, po o lē sa faia le gaoioiga valea? Ua faapea mai le Afioga a le Atua: “Aua neʻi faasesēina outou, e lē ulagia le Atua, auā o le mea e lūlūina e le tagata, o le mea lava lea e seleseleina mai ai e ia.”—Kalatia 6:7.

E lē gata i lea, e masani lava ona fefasiaʻi tagata pe faatigāina le tasi i le isi. Pe a vatau se atunuu, e mautinoa lava e lē tuuaʻia le Atua i na mafatiaga. Pe a osofaʻia e se tagata solitulafono se tuaoi ma manua ai, pe oti ai foʻi, pe tuuaʻia la le Atua i na mea? O le mea moni, e leai! Afai e faapologaina, sauāina, pe fasiotia e se taʻitaʻi o se malo tagata o loo ia pule i ai, pe tatau ona tatou tuuaʻia le Atua? O se mea valea lenā.—Failauga 8:9.

Ae faapefea le faitau miliona o tagata o loo ola i olaga matuā matitiva pe e matelāina? Pe tuuaʻia le Atua? E leai. Ua matuā lava ma totoe mea  ʻai ia o loo maua i lenei lalolagi, e fafaga ai tagata uma. (Salamo 10:2, 3; 145:16) Ae ona o le lē tutusa o le tufatufaina o le anoanoaʻi o mea taumafa ua foaʻiina mai e le Atua, ua tele ai le mativa ma le matelāina. O le manatu faapito o tagata ua lē mafai ai ona faaleleia lenā faafitauli.

Le Māfuaaga Autū

O ai la e tuuaʻia pe a maʻi pe maliu foʻi se tasi ona o le tino matua? Pe e faateʻia oe i le iloa e lē tuuaʻia foʻi le Atua i lenā mea? E leʻi foafoaina e le Atua le tagata ina ia oo ina matua ma oti.

Ina ua tuuina le uluaʻi ulugalii o Atamu ma Eva i le faatoʻaga o Etena, na avatu e Ieova iā i laʻua le faamoemoe o le ola e faavavau i se lalolagi parataiso. Ae peitaʻi, e manino mai, sa finagalo o ia ina ia faatumuina le lalolagi i tagata o le a talisapaia lo latou tofi. I lea, sa ia tuu atu ai ni tuutuuga o lo la faamoemoe mo le ola i le lumanaʻi. E na o le pau lava le tulaga o le a ola ai Atamu ma Eva i le Parataiso, pe afai e tumau ona la gauaʻi atu i Lē alofa na foafoaina i laʻua.—Kenese 2:17; 3:2, 3, 17-23.

Ae faanoanoa, ona sa fouvale Atamu ma Eva. Na filifili Eva e usiusitai atu iā Satani le Tiapolo. Sa ia pepelo atu iā Eva, ma e pei lava na ia faapea atu, e iai se mea lelei o loo taofia e le Atua mai iā te ia. O lea, na amata ai ona ia ui i se auala fia tutoʻatasi mai le Atua, ma taumafai ia pei o le Atua, “o loo iloa le lelei ma le leaga.” Na fouvale ai foʻi Atamu ia.—Kenese 3:5, 6.

Ina ua la agasala i lenei mea, na lē toe agavaa ai i laʻua mo le ola e faavavau. Sa pagatia i laʻua i iʻuga malaia o le agasala. Na faasolo ina mou atu lo la malosi ma oo ina vaivai o la tino, ma iʻu ai ina feoti. (Kenese 5:5) Ae peitaʻi, e sili atu ona matuiā iʻuga o la laʻua fouvalega. O loo tatou mafatia ai pea i āuga o le agasala a Atamu ma Eva. Na tusi le aposetolo o Paulo e faapea: “O lenei, faapei ona oo mai o le agasala i le lalolagi i le tagata e toʻatasi, [Atamu] o le oti foʻi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) Ioe, ona o le fouvale o Atamu ma Eva, ua sosolo atu ai le agasala e pei o se papala i le fanau uma a tagata.

Le Faamaoniga Sili o le Manatu Alofa Mai o le Atua

Po o le uiga o lenei mea sa faaleagaina mo sina vaitaimi le foafoaga faaletagata a le Atua? E leai, ma o lea ua tatou oo mai i le  faamaoniga sili o le manatu alofa mai o le Atua iā i tatou. Na matuā faigatā le taulaga na faia e le Atua lava ia, i le saunia o le auala e togiola ai le fanau a tagata mai le agasala ma le oti. O le totogi o le togiola, o le soifua lelei atoatoa faaletagata lea o Iesu, na finagalo malie e foaʻiina mai mo i tatou. (Roma 3:24) I lea, na tusi ai le aposetolo o Ioane e faapea: “Auā ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.” (Ioane 3:16) Ona o lenei gaoioiga mataʻiina o le alofa, ua tatou toe maua ai le faamoemoe o le ola e faavavau. Na tusi atu Paulo i Kerisiano i Roma: “E faapea foʻi ona taʻuamiotonuina o tagata uma lava i le amiotonu e tasi, latou te ola ai.”—Roma 5:18.

E mafai ona tatou mautinoa e faapea, i le taimi atofaina a le Atua, o le a lē toe i ai ni mafatiaga po o le oti i le lalolagi. Na i lo o lea, o le a pule atoatoa ia tulaga ia o loo vaaia i le tusi o Faaaliga: “Faauta, ua i ai le afioaga o le Atua faatasi ma tagata, e mau foʻi o ia ma i latou; e fai foʻi i latou mona nuu, e iā te i latou le Atua lava. E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” (Faaaliga 21:3, 4) Atonu e te faapea mai, ‘E lē mafai ona ou ola e aulia atu lenā taimi. Ae peitaʻi, atonu o le mea lenā e tupu, ae e tusa lava pe e te oti, e mafai ona toe faatūina oe e le Atua mai le oti. (Ioane 5:28, 29) O le fuafuaga lenā a le Atua mo i tatou, ma o le mea lenā o le a tupu. E matuā sesē lava la le faapea mai, e lē o manatu alofa mai le Atua i le fanau a tagata!

“Faalatalata Atu i le Atua”

Ua avea o se faamāfanafanaloto le iloa ua amata ona saunia e le Atua se vaifofō tumau mo faafitauli ia ua mafatia ai tagata. Ae faapefea le taimi nei? O le ā e mafai ona tatou faia pe a maliu se tasi e pele iā i tatou, pe maʻi foʻi sa tatou tamaitiiti? Ia, e leʻi oo i le taimi a le Atua e aveesea ai maʻi ma le oti. Ua faailoa mai e le Tusi Paia ina ia tatou faatali teisi mo le faataunuuina o lenā tulaga. Ae e lē o tuua i tatou e le Atua e aunoa ma se fesoasoani. Ua faapea mai le soo o Iakopo: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:8) Ioe, ua valaaulia i tatou e Lē na Foafoaina i tatou ina ia faia se faiā vavalalata ma ia, ma o i latou e faia faapea, e mafai lava ona latou lagonaina lana lagolagosua e oo lava i tulaga aupito sili ona faigatā.

E faapefea ona tatou faalatalata i le Atua? O le fesili foʻi lenā na lāgā e le tupu o Tavita pe tusa ma le tolu afe tausaga ua mavae e faapea: “Ieova e, . . . o ai ea e mau i lou mauga paia?” (Salamo 15:1) Na tali lava e Tavita ia lana fesili ina ua ia toe faapea mai: “O lē savali ma le amio saʻo, ma ua fai le amiotonu, ma tautala ma le faamaoni i lona loto. O lē ua lē tuuaʻi fua i lona laulaufaiva, ua lē agaleaga i lē la te tuaoi.” (Salamo 15:2, 3) O lona uiga la, e talia fiafia e Ieova o ē o loo mulimuli atu i le auala lea na teena e Atamu ma Eva. Ae faalatalata atu o ia iā i latou o ē faia lona finagalo.—Teuteronome 6:24, 25; 1 Ioane 5:3.

E faapefea ona tatou faia le finagalo o le Atua? E manaʻomia ona tatou iloa po o ā ‘mea lelei ma le mālie i luma o le Atua lo tatou Faaola,’ ma gaoioi ai loa e ōgatusa ma na mea. (1 Timoteo 2:3) E aofia ai i lenā mea le aveina i fale o le poto saʻo o le Tusi Paia, le Afioga a le Atua. (Ioane 17:3; 2 Timoteo 3:16, 17) E aofia ai mea e sili atu na i lo o le tau ina faitau o le Tusi Paia. E manaʻomia ona tatou faaaʻoaʻo i tagata Iutaia o le uluaʻi senituri i Perea, o ē na faalogologo i le talaʻiga a Paulo. Ua tatou faitau ai e uiga iā i latou na e faapea: “Ua latou talia le upu ma le fiafia tele, ua saʻili i Tusi i lea aso ma lea aso, pe moni ia mea.”—Galuega 17:11.

E faapena foʻi i aso nei, o le suʻesuʻe māeʻaeʻa i le Tusi Paia, e faamalosia ai lo tatou faatuatua i le Atua, ma fesoasoani iā i tatou ina ia atiina aʻe se faiā ma ia. (Eperu 11:6) E fesoasoani foʻi iā i tatou e malamalama ai i le auala tonu o loo feutagaʻi ai Ieova ma le fanau a tagata; e lē gata e aogā mo le taimi nei, aemaise lava le lelei mo se taimi umi mo i latou uma o ē ua sao o latou loto.

Seʻi manatunatu i faamatalaga a nisi o Kerisiano o ē na iai se faiā vavalalata ma le Atua. Ua faapea mai ia Danielle e 16 tausaga le matua: “E ese loʻu alofa iā Ieova ma e anoanoaʻi ni mea e  ao ai ona ou loto faafetai ai iā te ia. Na ia foaʻiina mai iā te aʻu ni mātua alolofa o ē alolofa faamaoni iā te Ia, ma o ē na aʻoaʻoina aʻu e tusa ma lana Afioga.” Ua tusi mai se Kerisiano i Uruguay e faapea: “Ua matuā faatumulia loʻu loto i le faafetai, ma ua uunaʻia ai aʻu ou te faafetai atu iā Ieova ona o lona alofa tunoa ma se faauōga ma ia.” E talia fiafia e le Atua tamaiti laiti. Ua faapea mai ia Gabriela e fitu tausaga le matua: “E sili atu ona ou alofa i le Atua na i lo o se isi lava mea i le lalolagi atoa! E iai laʻu lava Tusi Paia, ma ou te fiafia e aʻoaʻo e uiga i le Atua ma lona Alo.”

E faitau miliona tagata i le lalolagi aoao i aso nei ua ioe faatasi ma le faisalamo o lē na faapea mai: “A o aʻu nei, ou te faalatalata atu i le Atua ou te lelei ai.” (Salamo 73:28) Na latou maua le fesoasoani e taulimaina ai faafitauli o loo fesagaʻi nei ma i latou, ma ua iai so latou faamoemoe mautinoa e ola e faavavau i Parataiso i le lalolagi. (1 Timoteo 4:8) Aiseā e lē fai ai ma ou sini lou “faalatalata atu i le Atua”? O le mea moni, ua faamautinoa mai iā i tatou e faapea: “E lē mamao o ia ma i tatou taʻitoʻatasi.” (Galuega 17:27) Ioe, o loo silasila alofa moni mai le Atua iā te oe!

[Ata i le itulau 5]

E tele auala ua faaalia ai le manatu alofa mai o le Atua iā i tatou

[Ata i le itulau 7]

E oo lava i tamaiti laiti, e mafai ona faalatalata atu i le Atua

[Ata i le itulau 7]

O loo fesoasoani mai le Atua iā i tatou i aso nei ina ia tatou tumau. I lana taimi atofaina, o le a ia aveesea ai maʻi ma le oti