Se Tusi iā Noa

“PELEINA Noa, e tele taimi na ou faitau ai i le Tusi Paia e uiga iā te oe ma le auala na e fausia ai se vaa lea na faasaoina ai oe ma lou aiga i le Lolo.”

O le amataga lenā o se tusi na tusia e se teine e 15 tausaga le matua e igoa ia Minnamaria lea na tuuina atu i se tauvaga tusigatala mo tamaiti e taʻi 14 i le 21 tausaga. O le tauvaga, sa fuafuaina e le matagaluega o auaunaga a le fale meli i Finilani, e le faalapotopotoga o Faiaʻoga a le Malo mo le Gagana Finilani, ma le Sosaiete Tautusi a Finilani. Sa manaʻomia ona tusia e tagata tauvā se tusi e faavae mai i se tusi. E mafai ona tusi atu i le tusitala o le tusi po o se tagata o loo taʻua ai. Na filifilia e faiaʻoga le sili atu i le 1,400 tusi mai a latou tamaiti aʻoga, ma tuuina atu i faamasino o le tauvaga. Ona filifilia lea e le komiti o le tauvaga ia le tala e aupito sili ona lelei, ma isi tala e sili ona lelei e sefulu e pito atu i ai i le tulaga lua, ma isi tala e sefulu e sili ona lelei i le tulaga tolu. Sa fiafia ia Minnamaria ona sa tulaga tolu lana tala.

Aiseā na tusi atu ai e Minnamaria, o se teine aʻoga talavou lana tusi iā Noa, o se tagata sa soifua pe ā ma le 5,000 tausaga ua mavae? Na ia faapea mai: “O le Tusi Paia lava le tusi na oso muamua mai i loʻu mafaufau. Ua ou masani lelei ma tagata o le Tusi Paia. E tele ni faamatalaga na ou faitau ai e uiga iā i latou ma o loo ou manatua lelei pea i latou. Sa ou filifilia Noa ona sa manaia lona soifuaga ma sa ese mamao lava ma loʻu olaga.”

Na faaiʻuina le tusi a Minnamaria iā Noa i upu nei: “O loo avea pea oe ma faaaʻoaʻoga o le faatuatua ma le usiusitai. Ua faalaeiauina e lou soifuaga i latou uma o ē e faitau i le Tusi Paia ina ia gaoioi e tusa ma lo latou faatuatua.”

Ua faaalia lelei i le tusi lenei a se tagata talavou e faitau i le Tusi Paia e faapea, o le Tusi Paia ‘⁠o loo ola ma o loo matuā galue’ i olaga o tagata talavou atoa foʻi ma ē matutua.—Eperu 4:12.