Vavega a Iesu—O le ā ua E Aʻoaʻoina Mai Ai?

ATONU e faateʻia oe e aʻoaʻoina e faapea, e lē o faaaogāina e tala o le Tusi Paia i le soifuaga o Iesu i le lalolagi le upu Eleni mo le “vavega.” O le upu Eleni (dyʹna·mis) e faaliliuina i nisi taimi o le “vavega” o lona uiga moni o le “mana.” (Luka 8:46) E mafai foʻi ona faaliliuina “mea ua mafai” po o galuega mamana. (Mataio 11:20; 25:15) E tusa ai ma se tasi tagata aʻoga, o lenei faaupuga Eleni ua “faamamafa ai galuega ofoofogia na faia, aemaise lava le mana lea na faataunuuina ai. Ua faamamafa e le mea na tupu le mana o le Atua e gaoioi ai.”

O se isi upu Eleni (teʹras) e masani ona faaliliuina e isi faaliliuga o se mea ofoofogia po o se faailoga. (Ioane 4:48; Galuega 2:19) Ua faamatilatila e lenei faaupuga le manatu o ē na maimoa ane. E masani lava ona maofa tagata ma soo i galuega  mamana a Iesu.—Mareko 2:12; 4:41; 6:51; Luka 9:43.

O le upu Eleni lona tolu (se·meiʹon) o loo faasino atu i vavega a Iesu e faailoa ai se “faailoga.” Ua faapea mai le tagata aʻoga o Robert Deffinbaugh, o loo “taulaʻi atu i le uiga loloto o le vavega.” Ua ia toe faaopoopo mai: “O le faailoga o se vavega lea ua faaalia ai se upu moni e faatatau i lo tatou Alii o Iesu.”

Se Togafiti po o se Mana Mai le Atua?

E lē o faamatalaina e le Tusi Paia vavega a Iesu o ni togafiti pe fuafua e faasesē ai tagata. O vavega o faalauiloaga ia o “le mana mamalu o le Atua” e pei o le mea na tupu i se tama o lē na tuliesea e Iesu temoni mai iā te ia. (Luka 9:37-43) Pe e mafai ea ona faia na galuega mamana e le Atua e Ona le Malosi Uma Lava—o Lē ua faamatalaina e ‘tele lona malosi’? (Isaia 40:26) O le mea moni e mafai!

Ua faasino atu tala o tusi o le evagelia i le pe tusa ma le 35 vavega a Iesu. Ae peitaʻi, e lē o faaalia mai le aofaʻiga atoa o ana vavega. O se faaaʻoaʻoga, ua faapea mai le Mataio 14:14: “Ua na [Iesu] silafia le motu o tagata e toʻatele, ona mutimuti vale ai lea o lona alofa iā te i latou, ua faamālōlō foʻi e ia o latou maʻi.” E lē o taʻuina mai pe toʻafia tagata mamaʻi na ia faamālōlōina i lenā aso.

Na tāua na galuega mamana i le faapea mai o Iesu o ia o le Alo o le Atua, le Mesia na folafolaina mai. Ua faamautinoa e le Tusi Paia, o le mana na avatu e le Atua na mafai ai e Iesu ona faia vavega. Na faasino atu e le aposetolo o Peteru iā Iesu o “le tagata ua faasinoina e le Atua iā te outou i mea mamana, ma vavega, ma faailoga ua faia e le Atua i o outou luma e ia, pei ona outou iloa foʻi.” (Galuega 2:22) I se isi mea na tupu, na faasino atu e Peteru e faapea, “o lē [Iesu] na faauuina e le Atua i le Agaga Paia ma le mana, o ia sa femaliuaʻi ma agalelei ma faamālōlō atu i ē na faatoʻilaloina uma lava e le tiapolo; auā sa iā te ia le Atua.”—Galuega 10:37, 38.

 E fesootaʻi atu vavega a Iesu i lana feʻau. Ua faaalia i le Mareko 1:21-27 le tali atu a le toʻatele o tagata i aʻoaʻoga a Iesu ma se tasi o ana vavega. Ua faapea mai le Mareko 1:22, “ua matuā ofo foʻi i latou i lana aʻoaʻoga” ma ua faasino atu e le fuaiupu e 27 e faapea ona “taufaiofo” ai lea o tagata ina ua ia tuliesea le temoni. Ua aumaia e galuega mamana ma le feʻau a Iesu faamaoniga o ia o le Mesia na folafolaina.

Sa lē na ona faapea mai Iesu o ia o le Mesia. E lē gata na faamaonia i ana upu ma gaoioiga ae na faamaonia foʻi i faaaliga o le mana mai i le Atua e ala i ana vavega na ia faia. Ina ua lāgā fesili e faatatau i lana matafaioi ma lana galuega, na tali atu ma le lototele Iesu: “Ua iā te aʻu le molimau e sili iā Ioane [le Papatiso]; auā o galuega na tuuina mai iā te aʻu e le Tamā ia ou faaumaina, o galuega lava ia ou te faia, e molimau mai ia iā te aʻu ua auina mai aʻu e le Tamā.”—Ioane 5:36.

Faamaoniga o le Moni o Vavega a Iesu

Aiseā tatou te mautinoa ai le moni aʻiaʻi o vavega na faia e Iesu? Ia iloilo nisi o faailoga o le moni.

I le faia o ana galuega mamana, e leʻi faauaʻi atu e Iesu iā te ia lava. Na ia faamautinoa ua viia le Atua ona o vavega na ia faia. O se faaaʻoaʻoga, a o leʻi faamālōlōina se tamāloa tauaso, na faamamafa e Iesu o le a faia le faamālōlōga “ina ia faaalia ai o galuega a le Atua iā te ia.”—Ioane 9:1-3; 11:1-4.

E lē pei o tagata o ē faitogafiti, o ē faia faiga faamaneta ma ē fai faamālōlōga i le faatuatua, e leʻi faaaogāina e Iesu le faasioa, faiga faatogafiti, faaaliga ofoofogia, o faiga faataulāitu po o sauniga e faagaee ai faalogona. Na te leʻi faaaogāina faiga faanuupō po o se mea e manatu i ai tagata e paia. Mātau le auala na faamālōlō ai ma le loto maulalo e Iesu tamāloloa tauaso e toʻalua. Ua faapea mai le tala: “Ona mutimuti vale ai lea o le alofa o Iesu, ua paʻi atu i o la mata; ona vaai loa ai lea o la mata, ona la mulimuli mai ai lea iā te ia.” (Mataio 20:29-34) E leʻi faia ni sauniga tetele po o ni faaaliga faalialiavale. Sa faatinoina e Iesu ana galuega mamana i le lautele, i luma o le toʻatele na vāaitino i ai. E leʻi faaaogāina ni tulaga faalialiavale. I le tuufaafeagai ai e lē mafai ona faamaonia i aso nei mea ua tutupu ua taʻua o ni vavega.—Mareko 5:24-29; Luka 7:11-15.

I nisi taimi na fetalai atu Iesu e uiga i le faatuatua o i latou o ē na maua aogā mai i ana vavega. Ae peitaʻi e lē faapea o le lē faatuatua o se tasi na taofia ai Iesu mai le faatinoina o se vavega. A o iai o ia i Kapanaumi i Kalilaia, “ona latou au mai ai lea iā te ia o tagata e toʻatele ua uluitinoina e temoni; ona ia tulia ai lea o agaga i le upu lava, ua faamālōlōina foʻi e ia o i latou uma na mamaʻi.”—Mataio 8:16.

E leʻi faia vavega a Iesu ona o le fia iloa o se tasi ae ina ia faamalie ai manaʻoga faaletino moni o tagata. (Mareko 10:46-52; Luka 23:8) E leʻi faia foʻi e Iesu vavega ina ia maua ai sona taui.—Mataio 4:2-4; 10:8.

Pe e Maufaatuatuaina Tala a Evagelia?

Ua taʻu mai iā i tatou mea moni e faatatau i vavega a Iesu e ala i tala a Evagelia e fā. Pe e iai ni māfuaaga tatou te talitonu ai i nei tala a o iloiloina le moni aʻiaʻi o vavega na faia e Iesu? Ioe.

E pei ona tatou mātauina, na faia vavega a Iesu i le lautele a o vāaitino i ai le toʻatele. Na tusia uluaʻi tusi o le Evagelia i le taimi a o soifua le toʻatele o ē na vāaitino i ai. Ua taʻua e le tusi The Miracles and the Resurrection e tusa ma le faamaoni o tusitala o Evagelia e faapea: “O le tuuaʻia o le ʻaufaievagelia e faapea, na latou natia mea moni na tutupu, ae na tusia le anoanoaʻi o tala e uiga i vavega ina ia faasalalau atu taʻutinoga faalelotu, o se manatu matuā lē tonu lea. . . . O i latou na tusia evagelia na faia ni faamaumauga faamaoni.”

O tagata Iutaia na tetee i le faa-Kerisiano sa lē masalosalo i galuega mamana e pei ona faamatalaina i Evagelia. Na latou fesiligia na o le mana lea na faia ai nei vavega. (Mareko 3:22-26) E oo foʻi iā i latou na faitio mulimuli  ane, na lē mafai ona faafitia moni vavega a Iesu. I le tuufaafeagai ai, i le senituri muamua ma le lona lua T.A., na iai ni faamatalaga e uiga i galuega mamana na faia e Iesu. E manino la, ua iā i tatou se faavae maumauaʻi e talitonu ai i le saʻo aʻiaʻi o tala a Evagelia e uiga i ana vavega.

O Lē na Faia Vavega

O le faia o se iloiloga i vavega a Iesu o le a lē lava pe afai ua na ona faamatala mai e na iloiloga e uiga i lo latou moni aʻiaʻi. I le faamatalaina o galuega ofoofogia a Iesu, ua faaalia e Evagelia o ia o se tasi e lē mafaatusalia le alofa ma e naunau i le lelei o tagata.

Seʻi tatou iloiloina le mea na tupu i se lepela na faalatalata ma ole atu iā Iesu: “Afai ua e finagalo i ai, e te mafaia ona faamamā iā te aʻu. Ona mutimuti vale lea o le alofa o Iesu iā te ia” ma aapa atu lona aao ua paʻi atu i le lepela, ma fetalai atu: “Ou te loto i ai, inā mamā ia oe.” Na faamālōlōina le tamāloa. (Mareko 1:40-42) E tusa ma lenei mea na tupu, na faaalia e Iesu le tigā alofa lea na uunaʻia ai o ia e faaaogā le mana mai i le Atua e faia ai vavega.

O le ā na tupu ina ua fetaui Iesu ma se solo o se maliu mai le aai o Naina? O le tama lea ua oti e na o le pau lava lea o le tama a le fafine ua oti lana tane. Na “mutimuti vale lea o le alofa” o Iesu i le fafine, na faalatalata ma faapea atu: “Aua e te tagi.” Na ia toe faatūina loa lea o lana tama.—Luka 7:11-15.

O le lesona faamāfanafanaloto tatou te maua mai i vavega a Iesu e faapea, na ia ‘mutimutivale alofa’ ma fesoasoani i tagata. Ae peitaʻi, o na vavega e lē na o ni tala o aso ua mavae. Ua faapea mai le Eperu 13:8: “O Iesu Keriso e lē liu lava ia, o ananafi, ma le asō, e oo foʻi i le faavavau.” O loo pule nei o ia o se Tupu i le lagi, ma e mafai ona faaaogā le mana faavavega na foaʻi e le Atua iā te ia i se auala e sili atu na i lo lea na ia faia a o soifua i le lalolagi o se tagata. E lē o toe umi ona faaaogā lea e Iesu e faamālōlō ai tagata usiusitai. E fiafia Molimau a Ieova e fesoasoani iā te oe e aʻoaʻoina nisi mea e sili atu e faatatau i lenei faamoemoe pupula i le lumanaʻi.

[Ata i le itulau 5]

O vavega a Iesu o faailoaga ia o le “mana ofoofogia o le Atua”

[Ata i le itulau 7]

O Iesu o sē e alofa