“E Ma te Fia Faapea Atu ‘Ioe!’”

NA MAUAINA e le ofisa o Molimau a Ieova i Nigeria se tusi, i sona vaega, o loo faapea mai:

“O la ma tama o Anesone, na oti o ia ina ua 14 ona tausaga. Ae a o leʻi oti, na ia tausia ni moa se lua. O lona faanaunauga na i ai ia faatau atu, ma o le tupe e maua mai ai, o le a auina atu o se meaalofa mo le galuega talaʻi i le lalolagi aoao. Ae peitaʻi na oti o ia a o leʻi faatauina nei moa.

“O i maʻua o ona mātua, ma i le iloaina o lona faanaunauga, na ma tausia ai nei moa ma faatau atu. O lea ua ma auina atu ai lenei tupe, o le meaalofa tauofo a Anesone. Ae ona o le folafolaga a Ieova, ua ma tepa taulaʻi atu ai i le taimi lea ua latalata mai o le a matou toe feiloaʻi ai ma Anesone. E ma te fia faapea atu ‘⁠Ioe!’ pe a ia fai mai pe na ma faia e pei ona ia matuā faanaunau i ai, o le auina atu lea o le tupe mo le Ofisa. Ae ui i lea, ua ma faatalitali nei i le taimi o le a toe vaai ai, e lē gata iā Anesone a o ‘le faapotopotoga toʻatele o ē matamata mai,’ lea o le a toe faatutūina mai.”—Eperu 12:1; Ioane 5:28, 29.

E pei ona taʻua manino i le tusi o i luga, o le talitonuina o le faamoemoe o le toetū, e lē gata o le a faamalosia ma faatumauina ai, ae o le a faalaeiauina ai foʻi Kerisiano moni. Maʻeu le faafiafiaina o le a iai, e lē gata i le aiga o Anesone a o le faitau miliona o aiga i le toe faafeiloaʻia o ē pele iā i latou ua maliliu ona o le fili o le oti!—1 Korinito 15:24-26.

Ua iai i le Tusi Paia ni faamautinoaga o lenei faamoemoe pupula o le toetū, o se tasi o mea ofoofogia ua lē o toe umi ona faataunuuina lea i le lalolagi fou, i lalo o le pulega o le Malo o le Atua. (2 Peteru 3:13) I le faailoaina mai o le gaoioiga a le Atua o le a faia mo le fanau a tagata, ua faapea mai le Tusi Paia: “E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.”—Faaaliga 21:4.