Fesili Mai le ʻAufaitau

O le ā na uiga i ai le fetalaiga a Iesu i ona soo e faapea: “Na ou iloa Satani ua paʻū mai le lagi e pei o le uila”?

Na seʻi faatoʻā uma lava ona filifilia e Iesu soo e toʻa 70, “ua aauina atu o i latou e taʻitoʻalua ua muamua atu iā te ia, i aai uma ma mea uma o le a maliu atu i ai o ia.” Ina ua toe foʻi mai le toʻa 70, na latou olioli ona o mea na mafai ona latou faia i la latou galuega talaʻi. Na latou faapea atu: “Le Alii e, ua usiusitai mai temoni iā te i matou, ona o lou suafa.” O lea na fetalai atu ai Iesu: “Na ou iloa Satani ua paʻū mai le lagi pei o le uila.”—Luka 10:1, 17, 18.

Muamua, sa foliga mai, na faasino atu Iesu i se mea ua uma ona tupu. Ae peitaʻi, i le 60 tausaga mulimuli ane ina ua uma ona fetalaia e Iesu na upu, na tusia ai foʻi e le aposetolo matua o Ioane ni upu talitutusa faapena: “Ua lafo foʻi le tarako tele, o le gata tuai lea, ua igoa i le tiapolo, i le ma Satani, o lē faasesē i le lalolagi uma; ua lafo ifo i le lalolagi, ua lafo foʻi ana agelu faatasi ma ia.”—Faaaliga 12:9.

Ina o tusia e Ioane na upu, sa iai pea Satani i le lagi. E faapefea ona tatou iloa? Talu ai, o Faaaliga, o se tusi o valoaga ae lē o se talafaasolopito. (Faaaliga 1:1) I lea, i le taimi na tusia ai e Ioane le tusi o Faaaliga, ae e leʻi lafoina ifo Satani i le lalolagi. Ae ua faamaonia na tupu le mea lenei ina ua faatoʻā uma lava ona faauuina Iesu e fai ma tupu o le Malo o le Atua i le lagi i le 1914. *—Faaaliga 12:1-10.

Aiseā la na fetalai ai Iesu e uiga i le lafoina ifo o Satani mai le lagi e peiseaī o se mea ua uma ona tupu? Ua manatu nisi tagata popoto e faapea, sa aʻoaʻia e Iesu ona soo ona o lo latou soona mitavale. Sa latou talitonu e faapea, na faapea atu Iesu: ‘Ua outou manumalo i temoni, ae aua tou te soona mitavale. Sa oo ina mimita Satani, ma iʻu ai ina vave lafoina ifo o ia.’

E tatou te lē vave faia se faaiʻuga i le mataupu. Ae peitaʻi, e foliga mai sa olioli Iesu ma ona soo ma faasino atu i le tuliesea o Satani i le lumanaʻi. Sa silafia lelei e Iesu na i lo o se isi lava o ona soo le matuā feʻai o le Tiapolo. Seʻi manatu i le matuā olioli o Iesu ina ua faalogo atu ua usiusitai temoni i ona soo, o ni tagata lē lelei atoatoa! O lenei usiusitai o temoni, ua na ona faaata mai ai se aso i le lumanaʻi o le a tau ai Iesu, po o Mekaeli le agelu sili ma Satani ma lafoina ifo ai Satani mai le lagi i le lalolagi.

Ina ua fetalai Iesu e faapea, na ia vaai atu “ua paʻū” ifo Satani mai le lagi, sa ia faamamafa atu ai e mautinoa lava le paʻū o Satani. E tali tutusa lava le valoaga lenei ma isi valoaga o le Tusi Paia ia o loo tautala i mea o le a tutupu i le lumanaʻi e peiseaī ua uma ona tutupu. O se faaaʻoaʻoga, seʻi mātau le faaaogāina feauauaʻi o le taimi ua tuanaʻi ma le taimi o i le lumanaʻi i le valoaga i le Isaia e 52:13–53:12 e faatatau i le Mesia. Sa faapena ona faaalia e Iesu le mautinoa o le a tuliesea Satani mai le lagi e tusa ai ma le fuafuaga a Lona Tamā. Sa mautinoa lelei foʻi e Iesu e faapea, i le taimi atofaina a le Atua, o le a lafoina ai Satani ma ana temoni i le to e lē gata, ma mulimuli ane, faaumatia ai e faavavau.—Roma 16:20; Eperu 2:14; Faaaliga 20:1-3, 7-10.

[Faamatalaga pito i lalo]