Le Malo o le Atua—O se Mea Moni i Aso Nei

“E mafai faapefea ona lotomalilie faatasi le tele o atunuu ia e matuā eseese a latou aganuu ma tulaga o atiina aʻe? Na faapea mai nisi, e na o se osofaʻiga mai se isi paneta e mafaia ona autasia le fanau a tagata.”—Le nusipepa Ausetalia, The Age.

SE OSOFAʻIGA mai se isi paneta? E tusa lava pe autasia e lenā mea ia atunuu uma o le lalolagi pe leai, ae o loo valoia mai i le Tusi Paia se mala o loo faaloloʻi mai, o le a autasia ai atunuu uma. O le mea moni, o lenā mala o le a aumaia e ʻau malolosi faalelagi.

Sa tautala faavaloaga Tavita le tupu o Isaraelu anamua e uiga i lenei tulaga i le lalolagi. I le uunaʻia e le agaga o le Atua, na ia tusia ai e faapea: “Ua tutū mai tupu o le lalolagi, ua pulega faatasi foʻi alii, e tetee atu iā Ieova ma lē na ia faauuina, ‘Seʻi tatou motusi ese a laʻua noataga, ma lafoaʻieseina a laʻua maea iā te i tatou.’” (Salamo 2:2, 3; Galuega 4:25, 26) Seʻi mātau e faapea, o le a pulega faatasi alii o le lalolagi e faasagatau iā Ieova, Lē na Foafoaina le vateatea ma lē na ia faauuina, po o lana tupu tofia, o Iesu Keriso. O le a faapefea ona faia o lenā mea?

E tusa ai ma le talafaasolopito o le Tusi Paia ma valoaga na faataunuuina i le tausaga e 1914, na faavaeina ai le Malo o le Atua i le lagi,  ma avea ai Iesu Keriso ma tupu. * Sa tasi lava le manatu o atunuu uma o le lalolagi i lenā taimi. Na i lo o le gauaʻi atu i le pule silisili ese a le Malo o le Atua lea faatoʻā faavaeina, ae sa latou feteenaʻi i le Taua Tele po o le Taua Muamua a le Lalolagi, ona o le fia maua o le pule.

O le ā le silasila a Ieova le Atua e tusa ai ma gaoioiga a pulega faaletagata? “E soisoi lē o afio i le lagi; e tauemu le Alii iā te i latou. Ona fetalai atu ai lea o ia iā te i latou i lona toʻasā, na te faaatuatuvaleina foʻi i latou i lona toʻasā tele.” Ona fetalai atu lea o Ieova i lona Alo, le tupu tofia o le Malo: “Ia e fai mai iā te aʻu, ona ou foaʻiina atu ai lea iā te oe o nuu ese e fai mou tofi, ma tuluʻiga o le lalolagi e fai mou. E te fasi gaugauina i latou i le tootoo uʻamea; e pei o le ipu a le fai ipu omea e te nutililii iā te i latou.”—Salamo 2:4, 5, 8, 9.

O lenei fasi gaugauina faaiʻu o atunuu tetee i le tootoo uʻamea, o le a faataunuuina iā Amaketo. O loo faamatalaina i le tusi o Faaaliga, lenei taualuga mataʻina e faapea, o “le taua i le aso tele o le Atua e ona le malosi uma lava,” lea o le a faapotopoto faatasi ai “tupu o le lalolagi ma le atu laulau uma.” (Faaaliga 16:14, 16) Ona o taaʻiga a temoni, o le a autasia ai atunuu uma o le lalolagi ma le sini e tasi; o le sii taua atu lea faasaga i le Atua e Ona le Malosi Uma Lava.

Ua matuā televave mai lava le taimi e faapotopoto faatasi ai tagata uma e tau faasaga i le pule silisili ese a le Atua. Ae o le mea malie, o le a lē aogā iā i latou lo latou autasi. Na i lo o lea, o a latou gaoioiga, ua avea ma faataʻimuaga o le filemu ua leva ona latou faatalitali i ai mo le fanau a tagata. E faapefea? I lenā taua faaiʻu, o le Malo o le Atua “na te tuʻimomomoina ma faaumatia ia malo uma lava [o le lalolagi], a o ia e tumau lava e faavavau.” (Tanielu 2:44) O le Malo o le Atua, ae lē o se faalapotopotoga faaletagata, o le pulega lenā o le a faataunuuina le faanaunauga o tagata mo se filemu i le lalolagi.

Le Pule Sili o le Malo o le Atua

O le Malo lenā o loo tatalo i ai le toʻatele o tagata lotofaamaoni e faapea: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) O le Malo o le Atua, e lē o se mea i totonu o le loto e pei ona taʻua e nisi, ae o se pulega moni lava ua mafai ona faataunuuina ni galuega ofoofogia talu lona faavaeina i le lagi i le 1914. Seʻi o tatou iloiloina ni vala autū e faaalia ai o le Malo o le Atua, o se mea moni o loo pule i aso nei.

Muamua lava, e iai sona lālā malosi faaoosala o loo faauluulu i le tupu faauuina, o Iesu Keriso. I le 33 T.A., na faia ai e Ieova le Atua Iesu Keriso ma Ulu o le faapotopotoga Kerisiano. (Efeso 1:22) Talu mai lenā taimi, na faatinoina ai e Iesu lona tulaga ulu, ua faaalia ai lona tomai e pule ai. O se faaaʻoaʻoga, ina ua tupu se oge tele i Iutaia i le uluaʻi senituri, na vave lava ona gaoioi le faapotopotoga Kerisiano e avatu le fesoasoani i ona tagata. Sa faamaopoopoina se gaoioiga e tufatufa atu fesoasoani, ma na aauina atu ai Panapa ma Saulo mai Anetioka ma ni fesoasoani o meaalofa.—Galuega 11:27-30.

E tatou te faatalitalia se gaoioiga faapena mai iā Iesu Keriso i le taimi nei, talu ai ua faatinoina le pulega o le Malo. I taimi o mala; e pei o mafuiʻe, o oge, lologa, matagi malolosi, ma afā, po o le sasao aʻe o se mauga mū, e vave  lava ona tali atu faapotopotoga Kerisiano a Molimau a Ieova i manaʻoga o uso talitonu, ma isi i nofoaga ia ua afāina. O se faataʻitaʻiga, ina ua taia e ni mafuiʻe mataʻutia ia El Salvador iā Ianuari ma Fepuari 2001, na faamaopoopoina ai ni fesoasoani i vaega uma o le atunuu, ma na tofu sao uma ia vaega o faapotopotoga o Molimau a Ieova i Kanata, Kuatemala, ma le Iunaite Setete. E tolu o latou nofoaga o le tapuaʻiga ma le sili atu i le 500 fale na toe fausia i se taimi puupuu.

Tagatānuu o le Malo o le Atua

Talu lava lona faavaeina i le 1914, na aoaoina ai ma faamaopoopoina e le Malo faalelagi o le Atua ona tagatānuu mai atunuu uma o le lalolagi. Ua faataunuuina ai i lenei mea se valoaga mataʻina o loo faamauina e Isaia: “O aso e gata ai, e oo ina faatumauina ai o le mauga o i ai le fale o Ieova [lana tapuaʻiga moni faaeaina] i tumutumu o atu mauga, . . . ona gasolo ane ai lea o nuu uma i ai.” Ua faaalia i le valoaga e faapea, o le a ō atu “nuu e tele” i lenā mauga e aʻoaʻo ai i faatonuga ma tulafono a Ieova.—Isaia 2:2, 3.

O lenei galuega na iʻu ina maua ai se faalapotopotoga e sili ona mataʻiina i aso nei; ma se ʻauuso faavaomalo e sili atu i le 6,000,000 Kerisiano mai atunuu o le lalolagi e silia i le 230. I tauaofiaga faavaomalo a Molimau a Ieova, e masani lava ona maofa tagata e maimoa ane i le alofa, le filemu, ma le autasi i le vao o tagata e toʻatele, ua mafai ona lepetia papupuni i va o atunuu, aganuu ma gagana. (Galuega 10:34, 35) Pe e te lē ioe e faapea, ina ia mafai e se pulega ona aufaatasia le faitau selau o vaega eseese o atunuu i le filemu ma le autasi, e tatau foʻi i lea pulega ona malosi, tumau, ma ia moni?

Le Malo o le Atua ma Aʻoaʻoga

E tofu malo uma lava ma tapulaa e ao ona ausia e ona tagatānuu, ma o i latou uma e mananaʻo e ola ai i le pulega a lea malo, e tatau ona ausia na tapulaa. E faapena foʻi le Malo o le Atua, e iai tapulaa e tatau ona ausia e i latou uma o le a agavaa e avea ma tagatānuu o lea malo. Ae peitaʻi, e matuā faigatā mo le toʻatele o tagata e matuā eseese o latou talaaga, ona talia ma ola ai e tusa ma na tapulaa. Ae o le isi lenei vala e molimau i le moni o le pulega a le Malo o le Atua; o le aogā o lana polokalame tau aʻoaʻoga lea ua pāʻia ma faaliliuina ai e lē gata i mafaufau o tagata, a o o latou loto foʻi.

Ua faapefea ona faatinoina e le pulega a le Malo o le Atua lenei galuega fitā? E ala i auala na faatinoina e le ʻauaposetolo, o le talaʻi atu mai lea fale i lea fale, ma aʻoaʻo tagata taʻitoʻatasi i le Afioga a le Atua. (Galuega 5:42; 20:20) E faapefea ona aogā lenei ituaiga o aʻoaʻoga? Na tusi atu se patele Katoliko, o Jacques Johnson i se nusipepa faalevaiaso a Kanata e faatatau i ana taumafaiga ina ia faalotovaivaia se fafine mai le faia o se suʻesuʻega ma Molimau a Ieova. Na ia faapea mai: “Na ou matuā iso lava ma ou iloa, ua leai se mea ou te mafaia.  O i inei na ou iloa ai, ua fai si leva ona atiaʻe e nei fafine Molimau a Ieova se faauōga māfana ma lenei tinā sa lē mafai ona fealuaʻi. Sa faafesootaʻia e nei fafine lea tinā e ala i le fesoasoani atu iā te ia, ma faauō atu i ai, ma atiaʻe ni fesootaʻiga uigā i lona loto. E leʻi pine ae avea o ia ma sui maelega o le lotu, ma ua leai se mea ou te mafaia e taofia ai o ia.” E pei lava ona pāʻia o le loto o lenei tinā na avea muamua ma Katoliko i le feʻau a le Tusi Paia lea na aʻoaʻo atu e Molimau a Ieova, faatasi ma a latou amio faa-Kerisiano, ua faapena foʻi ona pāʻia ai loto o le faitau miliona o tagata i le lalolagi aoao.

O lenei aʻoaʻoga o le Malo, e faavae mai i le Tusi Paia, e faamaualugaina ai le tāua o ana tulafono ma tapulaa tau amio. E aʻoaʻoina ai tagata ina ia alolofa ma āva le tasi i le isi e tusa lava po o ā o latou talaaga. (Ioane 13:34, 35) Ua fesoasoani ai foʻi i tagata ina ia utagia le apoapoaʻiga e faapea: “Aua foʻi tou te amio faatasi ma lenei lalolagi, a e peitaʻi ia liliuina i le toe fuataʻiina o outou loto, ina ia outou suʻesuʻe pe se ā le finagalo o le Atua, o mea ua lelei, ma le mālie, ma le atoatoa.” (Roma 12:2) Ua lafoaʻia o latou ala tuai o le olaga, ae ua fiafia e ola e tusa ma tulafono ma mataupu silisili o le pulega a le Malo. Ona o lea, e faitau miliona ua maua le filemu ma le fiafia i le taimi nei, faatasi ma se faamoemoe pupula i le lumanaʻi.—Kolose 3:9-11.

O se fesoasoani tāua i le faataunuuina o lenei autasi i le lalolagi, o le mekasini lenei o Le Olomatamata. E ala i auala ua faamaopoopoina ai faaliliuga, ma masini ua mafai ona lomia ai mekasini i gagana eseese, ua mafai ai ona maua i le taimi e tasi ia mataupu autū o Le Olomatamata i gagana e 135, ma ua mafai ai e le sili atu ma le 95 pasene o tagata i le lalolagi e latou te faitauina, ona suʻesuʻe ia mataupu i le taimi lava e tasi i la latou lava gagana.

Na faia e se tusitala Mamona se lisi o misionare e sili atu ona taulau e ese ai mai i a latou misionare. Na ia tusia e faapea, o Le Olomatamata ma le Ala Mai!, ia e lomia e Molimau a Ieova, o ni mekasini e aupito sili ona lelei i le faia o le galuega faaevagelia, ma faapea mai: “E leai se tasi e mafai ona faitioina le Olomatamata ma le Ala Mai! e faapea, ua faatupuina ai i tagata le uiga o le lē popole po o le faifailemū; ae i le tuufeagai ai, ua uunaʻia e nei mekasini se lagona o le mataala lea ou te lē o maua lava i lomiga a isi lotu. O Le Olomatamata ma le Ala Mai! ua matuā faafouina ai auā e faavae i mea moni, ua suʻesuʻeina lelei a latou mataupu, ma fetaui lelei ma mea o loo tutupu i le lalolagi i aso nei.”

E matuā malolosi lava faamaoniga e iloa ai le moni o le Malo o le Atua, ma ua matuā gaoioi nei. O loo faasoa atu ma le malosi ma le fiafia e Molimau a Ieova “lenei tala lelei o le malo” i o latou tuaoi, ma valaaulia i latou ina ia avea ma tagatānuu o lea Malo. (Mataio 24:14) Pe e talafeagai lea faamoemoe iā te oe? E mafai ona e olioli i faamanuiaga e maua mai i le auaufaatasi ma i latou ua aʻoaʻoina ai, ma taumafai ina ia ola e tusa ma tapulaa a lea Malo. Ae e sili atu ona lelei, e mafai ona e maua le faamoemoe o le ola i lalo o le pulega a le Malo i le lalolagi fou folafolaina lea o le a “mau ai le amiotonu.”—2 Peteru 3:13.

[Faamatalaga pito i lalo]

[Ata i le itulau 4, 5]

I le 1914 na aufaatasi ai atunuu i se taua a le lalolagi

[Ata i le itulau 6]

O fesoasoani tauofo, o le faamaoniga lea o le alofa faa-Kerisiano

[Ata i le itulau 7]

E maua e Molimau a Ieova i le lalolagi aoao aogā mai le polokalame tauaʻoaʻoga e tasi