E Inosia Fua e Aunoa ma ni Māfuaaga

“Ua latou ʻinoʻino mai fua lava iā te aʻu.”—IOANE 15:25.

1, 2. (a) Aiseā ua lē malamalama ai nisi pe a taʻuleagaina Kerisiano, ae aiseā e lē tatau ai ona faateʻia i tatou i na faamatalaga? (e) O lē fea uiga o le upu “ʻinoʻino” o le a tatou talanoaina i lenei mataupu? (Tagaʻi i le faaopoopoga i le pito i lalo.)

UA TAUMAFAI Molimau a Ieova e ola e tusa ai ma mataupu silisili o loo i le Afioga a le Atua. Ona o lenā tulaga, ua latou mauaina ai se talaaga lelei i le tele o atunuu. Ae peitaʻi, e iai taimi na tuuaʻia sesē ai i latou. O se faataʻitaʻiga, na taʻua e se tagata aloaʻia o le malo i le aai o St. Petersburg, i Rusia e faapea: “Sa lipotia mai iā i matou e faapea, o Molimau a Ieova o se vaega faalotu faalilolilo e lalafi ma fasioti a latou lava fanau faapea ma i latou.” Ae ina ua uma ona ia mātauina Molimau a Ieova a o faagasolo se tauaofiaga faavaomalo sa faia, na faamatala ai e le tagata lava lenā e faapea: “Sa ou vaai i tagata e pei lava o i tatou ma e laufofoga fiafia . . . E filemu ma lē gaoiā, ma e alofa tele le tasi i le isi.” Na ia toe faaopoopo mai: “Ou te matuā lē malamalama pe aiseā lava e faia ai e tagata ia tala pepelo e faatatau iā i latou.”—1 Peteru 3:16.

² E lē fiafia auauna a le Atua i le taʻusesēina o i latou faapea e amioleaga, peitaʻi e lē faateʻia i latou pe a faia e nisi ni faamatalaga e faasagatau iā i latou. Sa lapataʻia e Iesu ona soo: “Afai e ʻinoʻino mai le lalolagi iā te outou, ua outou iloa ua muamua ona ʻinoʻino mai iā te aʻu. . . . Ia taunuu ai le upu ua tusia i la latou tulafono, Ua latou ʻinoʻino mai fua lava iā te aʻu.” * (Ioane 15:18-20, 25; Salamo 35:19; 69:4) Na ia muaʻi taʻu atu i ona soo e faapea: “Afai ua latou taʻua le matai o le aiga o Pelesepulo, e lē sili ea ona faapea atu foʻi i tagata o le aiga?” (Mataio 10:25) Ua malamalama Kerisiano, o le onosaia o na fāifaiga o se vaega o le “satauro” e latou te amoina pe a avea i latou ma soo o Keriso.—Mataio 16:24.

3. O le ā le tele ua sauāina ai tagata tapuaʻi faamaoni?

³ Ua loa ona iai se talaaga o le sauāina o tagata tapuaʻi faamaoni, e oo atu lava i tuā i le taimi o le tagata ‘amiotonu o Apelu.’ (Mataio 23:34, 35) O le sauāina o Kerisiano e lē faapea e muta mai i ni nai mea na tutupu. Na fetalai Iesu e faatatau i ona soo e faapea, “e inosia foʻi outou e tagata uma” ona o loʻu igoa. (Mataio 10:22) E lē gata i lea, na tusi le aposetolo o Paulo e faapea, o auauna uma a le Atua e aofia ai ma i tatou uma taʻitoʻatasi, e ao ona faatalitalia e sauāina. (2 Timoteo 3:12) O le ā le māfuaaga o lenei mea?

Le Pogai o le ʻInoʻino Fua

4. Ua faapefea ona faaalia e le Tusi Paia lē ua māfua ai le ʻinoʻino uma e aunoa ma se māfuaaga o loo iai?

⁴ Ua faaalia e le Afioga a le Atua faapea, e mai lava i le amataga, o loo iai se tasi e lē vaaia ua māfua ai le ʻinoʻino i tagata tapuaʻi faamaoni. Seʻi manatu i le fasiotia ma le lē alofa o le uluaʻi tagata faatuatua o Apelu. Ua taʻua e le Tusi Paia lona uso fasioti tagata o Kaino, o lē “na i lē o loo leaga,” o Satani le Tiapolo. (1 Ioane 3:12) Na faaalia e Kaino uiga o Satani, ma na faaaogā o ia e le Tiapolo e faataunuuina ai ana faufauga leaga. Ua faaalia foʻi i le Tusi Paia gaoioiga a Satani i lana osofaʻiga mataʻutia o Iopu ma Iesu Keriso. (Iopu 1:12; 2:6, 7; Ioane 8:37, 44; 13:27) Ua matuā manino le mata o le vai i le tusi o Faaaliga  i le pogai o le sauāina o soo o Iesu, i le faapea mai: “O le a tuuina atu ni o outou e le tiapolo i le fale puipui, ina ia tofotofoina ai outou.” (Faaaliga 2:10) Ioe, o Satani o le pogai lea o le ʻinoʻino fua e aunoa ma se māfuaaga i tagata o le Atua.

5. O le ā le māfuaaga o le ʻinoʻino o Satani i tagata tapuaʻi moni?

⁵ O le ā le māfuaaga o le ʻinoʻino o Satani i tagata tapuaʻi moni? I se faufauga e faaalia ai lona fiasili, na ia luʻia ai “le Tupu o le vavau,” o Ieova le Atua. (1 Timoteo 1:17; 3:6) Na ia finau mai ua faasāsā naʻuā le auala o loo pulea ai e le Atua ana foafoaga uma, ma e leai se tasi o auauna iā Ieova ona o se uunaʻiga lelei, ma e ala ona auauna tagata iā te ia ona o mea o loo latou maua mai ai. Na finau mai Satani afai e faataga o ia e tofotofoina tagata, e mafai ona ia faaliliueseina i latou uma mai le auauna atu i le Atua. (Kenese 3:1-6; Iopu 1:6-12; 2:1-7) I le taʻuvaleaina o Ieova faapea e sauā, e pepelo, ma e lē taulau, ua taumafai ai Satani e faatulaga o ia, ia pei o Ieova e pulea le aoao o mea. O lea la, o lona ʻinoʻino i auauna a le Atua ua uunaʻia e lona faanaunauga ina ia tapuaʻia o ia.—Mataio 4:8, 9.

6. (a) Ua faapefea ona aafia i tatou i le luʻi e faatatau i le pule silisili ese a Ieova? (e) E faapefea ona fesoasoani iā i tatou le malamalama i lenei finauga e tausia ai lo tatou faamaoni? (Tagaʻi i le pusa, itulau 16.)

⁶ Po o e silafia ea le auala ua aafia ai oe i lenei finauga? I le avea ai o se auauna a Ieova, atonu ua e silafia o le faia o le finagalo o le Atua e manaʻomia ai ni taumafaiga maumauaʻi, ae e lē mafaatusalia aogā e maua mai ai. Ae faapefea pe afai o tulaga i lou olaga ua māfua ai ona faigatā ma tigā, le usitaia pea o tulafono ma mataupu silisili a Ieova? Ae faapefea pe a foliga mai e te lē o maua lava ni aogā o le auauna atu iā Ieova? Po o le a e manatu ai ea e lē aogā ona saga faaauau ona auauna iā Ieova? Po o le alofa ea iā Ieova ma le talisapaia loloto o ona uiga matagofie, ua uunaʻia ai oe e faaauau pea ona savali i ona ala uma? (Teuteronome 10:12, 13) O le faatagaina o Satani e aumaia nisi o faigatā iā i tatou, ua tuu mai ai e Ieova le avanoa e avatu ai la tatou lava tali i le luʻi a Satani.—Faataoto 27:11.

‘Pe a Latou Upu Leaga iā te Outou’

7. O le ā se tasi o faufauga ua faaaogā e le Tiapolo e faaliliuese ai i tatou mai le auauna atu iā Ieova?

⁷ Seʻi o tatou iloiloina nei se tasi o gaoioiga taufaasesē ua faaaogā e Satani e taumafai ai ina ia faamaonia lana itu o le finauga—o le taʻuleagaina lea o isi i upu pepelo. Na taʻua e Iesu ia Satani o “le tamā o le pepelo.” (Ioane 8:44) O le igoa Tiapolo, o lona uiga o le “Taufaaleaga,” ua faailoa ai o ia o le taufaaleaga sili i le Atua, lana afioga, ma lona suafa paia. Ua faaaogā e le Tiapolo tala faatupu masalosalo, o tuuaʻiga sesē, ma pepelo e luʻia ai le pule silisili ese a Ieova, ma ua ia faaaogāina nei faufauga e taʻuleagaina ai auauna faamaoni a le Atua. O le faafaupuʻe atu o tuuaʻiga i nei Molimau, e atili ai ona faigatā mo i latou ona onosaia ni puapuaga matuiā o loo latou fesagaʻia.

8. Na faapefea ona tuuaʻia e Satani Iopu, ma o ā iʻuga na oo i ai?

⁸ Seʻi manatu i le mea na tupu iā Iopu, o le uiga o lona suafa o le “Taulaʻiga o le Lotoa.” E lē gata ina faapogaia e Satani le maumau atu o lafumanu a Iopu, lana fanau, lona soifua mālōlōina, ae o Satani foʻi na ia faafoliga maia Iopu o se tagata agasala ua faasalaina e le Atua. E ui lava sa matuā faaaloalogia Iopu, ae na oo ina  inosia o ia e oo lava i lona aiga ma uō sa vavalalata atu iā te ia. (Iopu 19:13-19; 29:1, 2, 7-11) E lē gata i lea, na taumafai Satani e ala i le ʻau faamāfanafana sesē e “tuʻimomomoina [Iopu] i upu.” Muamua lava, na latou faia ni faamatalaga faaʻaloʻalo, e foliga mai ai na faia e Iopu se agasala matuiā, ona tuuaʻia moni loa lea o ia faapea o se tagata agasala. (Iopu 4:6-9; 19:2; 22:5-10) Pagā le mafatia ai o le loto o Iopu i lenā mea!

9. Na faapefea ona foliga mai Iesu o se tagata agasala?

⁹ Ona o Iesu e taulamua i le faasilisilia o le pule silisili ese a Ieova, na avea ai o ia ma taulaʻiga o le lotoa o Satani. Ina ua afio mai Iesu i le lalolagi, sa taumafai Satani e faafoliga atu ua faaleagaina le itu faaleagaga o Iesu e pei lava foʻi o Iopu, ma o Satani foʻi na māfua ai ona foliga mai o Iesu o se tagata agasala. (Isaia 53:2-4; Ioane 9:24) Sa taʻua e tagata Iesu, o sē e inu tele ma ʻai tele, ma faapea mai sa “iā te ia le temoni.” (Mataio 11:18, 19; Ioane 7:20; 8:48; 10:20) Na tuuaʻia sesē o ia o sē e taufāifai. (Mataio 9:2, 3; 26:63-66; Ioane 10:33-36) Na matuā faanoanoa ai Iesu, ona sa ia silafia na taʻuleagaina ai ma le lē tonu lona Tamā ona o lenei mea. (Luka 22:41-44) Na faasatauroina Iesu e pei o se tagata solitulafono mataʻutia mulimuli ane ai. (Mataio 27:38-44) A o tausia lona faamaoni atoatoa, sa onosaia e Iesu upu o ‘le faatuʻiese o ē agasala.’—Eperu 12:2, 3.

10. Ua faapefea ona avea le vaega totoe faauuina ma taulaʻiga a Satani i aso nei?

¹⁰ I aso nei, ua faapena foʻi ona avea le vaega totoe o soo faauuina o Keriso ma taulaʻiga o le lotoa o le Tiapolo. Ua faamatalaina Satani faapea o “lē na molia . . . uso [o Keriso], o lē na molia i latou i luma o lo tatou Atua i le ao ma le pō.” (Faaaliga 12:9, 10) Talu mai le taimi na lafo mai ai o ia mai le lagi i le lalolagi, ua faateteleina e Satani ana taumafaiga ina ia faatalitonuina tagata faapea, e tatau ona ʻinoʻino i uso o Iesu. (1 Korinito 4:13) I nisi o atunuu, ua taʻua pepelo i latou o se lotu ua vavae ma e mataʻutia, e pei lava ona taʻua ai Kerisiano o le uluaʻi senituri. (Galuega 24:5, 14; 28:22) E pei ona taʻua i le amataga, ua taʻuleagaina i latou e ala i faasalalauga pepelo. Ae peitaʻi, “i le viia ma le faaleagaina, i le taʻuleagaina ma le taʻuleleia,” ua taumafai ma le lotomaulalo uso faauuina o Keriso, faatasi ma le lagolagosua o a latou aumea o “isi mamoe” e “tausi i poloaʻiga a le Atua, ma . . . taofi le mau iā Iesu.”—2 Korinito 6:8; Ioane 10:16; Faaaliga 12:17.

11, 12. (a) O ā māfuaaga o nisi o fāifaiga ua oo i Kerisiano? (e) O ā auala e ono faapuapuagatia ai fua se Kerisiano ona o lona faatuatua?

¹¹ O le mea moni, e lē o fāifaiga uma ua oo i auauna a le Atua ua māfua “ona o le amiotonu.” (Mataio 5:10) O nisi o faafitauli atonu ua māfua ona o lo tatou lava tulaga lē lelei atoatoa. E leai so tatou viiga e maua pe “afai [tatou] te onosai pe a tuʻia [i tatou] ona o le agasala.” Ae peitaʻi, i le silasila a Ieova “o le mea lenei e mālie, pe afai o le loto fuatia i la le Atua e onosai ai se tasi i le tigā, a o faatigāina fua lava o ia.” (1 Peteru 2:19, 20) O ā la tulaga e ono tupu ai lenei mea?

¹² Ua faileagaina nisi ona o lo latou lē auai i tū ma aga e lē faale-Tusi Paia lea e fesootaʻi atu i falelauasiga. (Teuteronome 14:1) Ua avea talavou Molimau ma taulaʻiga o fāifaiga i upu ona o lo latou tausisi i tapulaa mamā tau amio a Ieova. (1 Peteru 4:4) Ua tuuaʻia sesē nisi o mātua Kerisiano faapea e “faatamala” po o le “agaleaga” ona o lo latou taumafai e saʻilia togafitiga e lē faaaogā ai le toto mo a latou fanau. (Galuega 15:29) Ua lafoaʻia Kerisiano ma ʻinoʻino i ai o latou tauaiga ma o latou tuaoi, ona o le avea ma auauna a Ieova. (Mataio 10:34-37) O i latou uma na ua oo i tulaga na oo i perofeta, faapea ma Iesu lava ia i le faapuapuagatiaina fua o i latou.—Mataio 5:11, 12; Iakopo 5:10; 1 Peteru 2:21.

Onosaia o Fāifaiga

13. O le ā e fesoasoani iā i tatou e tausia ai lo tatou paleni faaleagaga pe a fesagaʻi ma fāifaiga ogaoga?

¹³ Pe a tatou oo i le ogaoga o fāifaiga ona o lo tatou faatuatua, e tatou te ono lotovaivai ai e pei foʻi o le perofeta o Ieremia, ma oo mai ai le manatu e lē mafai ona tatou saga auauna atu i  le Atua. (Ieremia 20:7-9) O le ā e fesoasoani iā i tatou e tausia ai lo tatou paleni faaleagaga? Ia taumafai e vaai i mea e pei ona silasila i ai Ieova. E tagaʻi Ieova iā i latou o loo tumau i sauāga o tagata manumalo, ae lē na o ni tagata ua faileagaina. (Roma 8:37) Taumafai e faaata i lou mafaufau i latou na sapasapaia le silisili ese o Ieova e ui i tulaga uma e faalumaina ai na aumaia e le Tiapolo iā i latou—o tane ma fafine e pei o Apelu, Iopu, Maria le tinā o Iesu, ma isi o auauna faamaoni a Ieova anamua, faapea foʻi ma auauna a Ieova i aso nei. (Eperu 11:35-37; 12:1) Ia manatunatu i o latou ala faamaoni. Ua valaaulia i tatou ia manumalo i le lalolagi e ala i lo tatou faatuatua, e pei ona sa faia e na tagata faamaoni e toʻatele i aso ua mavae faapea ma aso nei.—1 Ioane 5:4.

14. E faapefea i le tatalo faatauanau ona faamalosia i tatou ia tumau i le faamaoni?

¹⁴ Pe a faapopoleina i le ‘tele o manatunatuga o tatou loto,’ ia tatou tatalo faatauanau iā Ieova, ma o le a ia faatoʻafilemuina ma faamalosia i tatou. (Salamo 50:15; 94:19) O le a ia aumai iā i tatou le poto e manaʻomia e fesagaʻia ai puapuaga, ma fesoasoani iā i tatou e manatua ai pea le finauga tele i le pule silisili ese a Ieova, lea e māfua ai le ʻinoʻino fua i ana auauna. (Iakopo 1:5) E mafai foʻi ona aumaia e Ieova “le manuia . . . mai le Atua, o loo silisili lava i mea uma e manatu i ai.” (Filipi 4:6, 7) O lenei manuia po o le filemu mai le Atua, e mafai ai ona tatou maua le toʻa ma tumau ai i lalo o omiga e sili ona ogaoga, e aunoa ma se faalētonu pe fefe. E mafai e Ieova e ala i lona agaga, ona faatumauina i tatou po o le ā lava o loo ia faatagaina e oo iā i tatou.—1 Korinito 10:13.

15. O le ā e fesoasoani iā i tatou e ʻalofia ai faalogona tigā pe a tatou puapuagatia?

¹⁵ O le ā e fesoasoani iā i tatou ia aua ai neʻi afāina i faalogona tigā iā i latou e ʻinoʻino mai fua? Ia manatua o o tatou fili sili o Satani ma temoni. (Efeso 6:12) E ui lava ina sauāina ma le iloa e nisi i tatou, ae o le toʻatele lava o ē tetee i tagata o le Atua, e latou te faia ona o lo latou lē malamalama po o le faia ona ua faaaogā i latou e nisi. (Tanielu 6:4-16; 1 Timoteo 1:12, 13) Ua finagalo Ieova ina ia “faaolaina o tagata uma lava, ma ia oo ina iloa lelei le upu moni.” (1 Timoteo 2:4) O le mea moni, o nisi na tetee muamua mai ua avea nei ma o tatou uso Kerisiano ona na latou mātauina a tatou amioga lelei. (1 Peteru 2:12) E lē gata i lea, e mafai foʻi ona tatou aʻoaʻoina se lesona mai le faaaʻoaʻoga a Iosefa le atalii o Iakopo. E ui lava sa matuā puapuagatia Iosefa ona o ona ʻafa uso, ae e leʻi teufatu e Iosefa ni lagona ita iā i latou. Aiseā? Ona sa ia iloa na iai le taʻitaʻiga a Ieova i le mea na tupu, ma na Ia faafoeina mea ina ia faataunuuina ai Lana fuafuaga. (Kenese 45:4-8) E mafai foʻi e Ieova ona faamamaluina lona suafa ona o ni puapuaga lē tonu tatou te ono fesagaʻia.—1 Peteru 4:16.

16, 17. Aiseā e lē tatau ai ona tatou soona popole i taumafaiga a tagata tetee e taofia le galuega talaʻi?

¹⁶ E lē manaʻomia ona tatou soona popole fua, pe afai e foliga mai o loo taulau tagata tetee mo sina taimi i le taofiofia o le agaʻigaʻi i luma o le talaʻia o le tala lelei. Ua lūlūina nei e Ieova nuu e ala i le avatuina o le molimau i le lalolagi aoao, ma ua aumaia ai mea e manaʻomia. (Hakai 2:7) Ua faapea mai le Leoleo Mamoe Lelei o Keriso Iesu: “O aʻu mamoe e faalogo mai i latou i loʻu leo, ua ou iloa foʻi i latou, ua latou mulimuli mai foʻi iā te aʻu; ou te avatu foʻi le ola faavavau iā te i latou; . . . e lē mafai lava e se tasi ona fao iā te i latou ai loʻu lima.” (Ioane 10:27-29) O loo aofia foʻi agelu paia i le seleselega tele faaleagaga o loo faia. (Mataio 13: 39, 41; Faaaliga 14:6, 7) O lea la, e leai se upu po o se mea e mafai ona fai e tagata tetee e taofia ai fuafuaga a le Atua.—Isaia 54:17; Galuega 5:38, 39.

¹⁷ E masani lava ona ese le iʻuga o faiga a tagata tetee i lo le mea na latou faamoemoe i ai. E tele ni tala sesē na faasalalauina e faatatau i Molimau a Ieova i se tasi o nuu i Aferika e aofia ai ma le tala e faapea, o Molimau a Ieova o ni tagata e tapuaʻi i le Tiapolo. Ona o lenei la tulaga, po o le ā lava le taimi e asiasi atu ai Molimau, e tamoʻe ai lava Grace ma lafi i tua o lona fale seʻia latou toe ō ese. I se tasi aso na uu ai i luga e le faifeʻau o lana lotu se tasi o a tatou lomiga ma faapea atu iā i latou uma na iai, e aua neʻi faitauina ona e latou te ō ese ai mai lo latou faatuatuaga. O lenā mea na faagaeetia ai le fia iloa o Grace. O le isi taimi na asiasi ane ai Molimau, na i lo le lafi ae ua latou talanoa ma maua ai sana kopi o le lomiga lea. Na amata le suʻesuʻega faale-Tusi Paia, ma papatisoina ai i le 1996. O loo faaaogāina nei e Grace lona taimi e saʻilia ai isi ua faamatala sesē i ai Molimau a Ieova.

Ia Faamalosi Nei Lou Faatuatua

18. Aiseā e manaʻomia ai ona faamalosi lo tatou faatuatua a o leʻi oo mai puapuaga mataʻutia, ma e faapefea ona tatou faia faapea?

¹⁸ Ona e mafai lava e Satani ona faapogaia le inosia fua o i tatou i so o se taimi, o lea la, o le taimi lenei e tāua ai ona faamalosia lo tatou faatuatua. E faapefea ona tatou faia lenei mea? Na tusia i se tasi o lipoti mai se atunuu na sauāina ai tagata o Ieova e faapea: “E tasi le mea ua manino mai: O i latou e iai se masaniga lelei faaleagaga ma faatāuaina atoatoa upu moni o le Tusi Paia, e leai se faafitauli o le tumau pe a oo mai tofotofoga. A o i latou e fai ma misi sauniga  i ‘aso e taugalemu ai,’ pe tau lē talaʻi foʻi, ma lolo atu i nai tamaʻi teteega e tulaʻi mai, e masani lava ona paʻūʻū i tofotofoga faigatā.” (2 Timoteo 4:2) Afai e te silafia ni itu e manaʻomia ai ona e faia ni faaleleiga, ia fai nei loa ni taumafaiga ae aua le faatuai.—Salamo 119:60.

19. O le ā ua faataunuuina e le faamaoni o auauna a le Atua i le feagai ai ma le ʻinoʻino e aunoa ma se māfuaaga?

¹⁹ O le faamaoni o tagata tapuaʻi moni i le aasa o le ʻinoʻino o Satani iā i latou, o le faamaoniga manino lenā o le faamaoni, le tatau, ma le tonu o le pule silisili ese a Ieova. Ua faafiafiaina ai le finagalo o le Atua i lo latou faamaoni. E ui lava ina faifaia i latou e tagata, ae o lē e maualuga aʻe lona malualii i le lagi ma le lalolagi, “e lē mā . . . iā te i latou, ina ia taʻua o ia o lo latou Atua.” Ioe, e mafai ona tatou faapea atu ma le tonu iā i latou uma lava e faamaoni: “E lē aogā le lalolagi ona i ai o i latou.”—Eperu 11:16, 38.

[Faamatalaga pito i lalo]

Pe Mafai Ona E Faamatala?

• O le ā le māfuaaga o le ʻinoʻino fua o loo faia i tagata tapuaʻi moni?

• Na faapefea ona faaaogā e Satani fāifaiga ma tuuaʻiga e taumafai ai e gausia le faamaoni o Iopu ma Iesu?

• Ua faapefea ona faamalosia i tatou e Ieova ina ia tumau a o feagai ma le ʻinoʻino mai o Satani?

[Fesili mo le Suʻesuʻega]

[Pusa i le itulau 16]

Na Latou Iloa le Finauga Moni

Na faapea mai se tasi o Molimau a Ieova i Ukraine, le atunuu lea sa faasā ai le talaʻiga o le Malo i le silia i le 50 tausaga: “O le tulaga na oo i Molimau a Ieova, e lē tatau ona fuaina ona o le auala o loo faia ai i tatou e isi tagata. . . . O le toʻatele lava o tagata aloaʻia sa na ona faia o lo latou tiute. Ae ina ua sui le faigāmalo, na sui foʻi le vaega faaupufai na faamaoni atu i ai ia tagata aloaʻia, a o matou e tumau pea iā Ieova. E matou te iloa le māfuaaga moni o o matou faafitauli, auā ua faailoaina mai i le Tusi Paia.

“E matou te leʻi manatu o matou e na o ni ē na aafia fua i pulega sauā a tagata. O le mea na fesoasoani iā i matou e tumau ai, o le malamalama lelei i le finauga na lāgā i le faatoʻaga i Etena—le finauga i le aiā a le Atua e pule ai. . . . Sa matou filifili e lagolagoina le finauga e fesootaʻi atu e lē gata mo le lelei o tagata, ae o le finagalo malie o le Silisili Ese i le aoao o mea. Sa matou malamalama i le finauga moni o loo aofia ai. O le māfuaaga lenei sa matou malolosi ai ma mafai ona tausia lo matou faamaoni e oo lava i lalo o tulaga sili ona faigatā.”

[Ata i le itulau 13]

O ai na māfua ai fāifaiga na feagai ma Iesu?

[Ata i le itulau 15]

Sa lagolagoina e Iopu, Maria, ma auauna a le Atua i aso nei e pei o Stanley Jones le silisili ese o Ieova

[Ata i le itulau 16]

O Victor Popovych, sa puʻea faapagota i le 1970