Mauaina o Fautuaga e Sili Ona Aogā

O LE mea moni, e matuā fiafia lava pe afai e taulau manuia se olaga. O le mauaina o fautuaga aogā ma le naunau ina ia gaoioi e ōgatusa ma ia fautuaga, o vala autū na i le mauaina o se olaga faapena i lenei lalolagi fenuminumiaʻi. Ae peitaʻi, e lē o fiafia tagata e utagia i taimi uma na fautuaga aogā. E toʻatele ua faapea mai, e tatau ona ola lava le tagata ia e tusa ma mea ua ia manaʻo i ai e fai. Ae ua faaalia i faamaumauga a le Tusi Paia, na ofo atu e Satani, le fili muamua o le pule silisili ese a le Atua i uluaʻi tagata le avanoa e tutoʻatasi ai mai le Atua. Ua faamauina i le Kenese 3:5 lana folafolaga iā Eva: “Ua silafia e le Atua, o le aso lua te aai ai [mai le laau e iloa ai le lelei ma le leaga], e pupula ai o oulua mata; ona avea ai lea o oulua e pei ni atua o loo iloa le lelei ma le leaga.”

Pe sa taulau manuia mulimuli ane le olaga o Atamu ma Eva e aunoa ma ni āuga matuiā, ona sa taʻitaʻia atoa e o laʻua lava manatu? E matuā leai lava. Sa vave ona la lē fiafia i iʻuga ona o le manatu ua la iloa le lelei mai le leaga. Na la iloa le lē fiafia mai o le Atua ma amata ai ona la ola i se olaga faigatā ma le lē lelei atoatoa, ma iʻu ai i le oti. (Kenese 3:16-19, 23) Ua aafia i tatou uma i le oti. Ua faapea mai le Tusi Paia: “[Ua] oo mai le agasala i le lalolagi i le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata uma lava, auā ua agasala uma.”—Roma 5:12.

E ui lava ua iai iʻuga leaga ona o le filifiliga a Atamu ma Eva, ae e toʻatele lava e lē o talitonu i le atamai o le faatatauina o le fautuaga mai Lē na Faia le tagata. Ae peitaʻi, ua taʻua i le Tusi Paia e faapea, o le Tusi Paia “e mai le Agaga o le Atua ia, e aogā foʻi,” e mafai ona fesoasoani iā i tatou “ina ia atoatoa ona lelei ai . . . ia saunia lava ia i galuega lelei uma lava.” (2 Timoteo 3:16, 17) E mautinoa lava o le a sili atu ona tatou fiafia pe a tatou mulimuli i fautuaga a le Tusi Paia. O le olaga faaleaiga, o le nofoaga sili lea e faatatauina ai lenei fautuaga.

 Faamaoni i le Faaipoipoga

E tusa ma le faamatalaga i le Tusi Paia, na fuafuaina e le Atua le faaipoipoga ia tumau. (Kenese 2:22-24; Mataio 19:6) E lē gata i lea, ua faapea mai le Tusi Paia, ‘o le moega foʻi o le ulugalii ia leai sona leaga,’ o lona uiga e lē tatau ona faaleagaina lenei faatasiga i ni feusuaʻiga lē mamā i fafo atu o le faaipoipoga. (Eperu 13:4) Ae peitaʻi, e pei lava ona e iloa, o le tele o faaipoipoga i aso nei, ua lē o ausia lenei tapulaa. Ua fai ma masani a nisi le faatafai solo i tagata i le galuega e lē o ni a latou paaga. O isi ua pepelo i o latou aiga ae o loo evaeva ma se tagata ua ia fiafia i ai na i lo o a latou lava paaga. Ua oo ina tuua e isi o latou taʻitoʻalua ae nonofo ma se isi e laʻitiiti ifo i le faapea mai, i lenei auala ua ia lagona ai e pei lava ua toe laʻitiiti ma e sili atu ona fiafia ai e pei o le tulaga o Veronika lea na taʻua i le mataupu ua mavae atu.

Ae peitaʻi, o le faanaunau o se tasi e faafiafia o ia lava e tusa lava po o le ā le iʻuga e oo i ai, o le a lē tumau lenā fiafia. E faamaonia e Ronald lenā mea. I le talitonu o le a faaleleia ai lona olaga, na ia lafoaʻia lana avā ae fai se aiga fou ma se fafine o lē sa avea ma ana avā faalilolilo mo le ono tausaga ma ua toʻalua ai lana fanau. Ae peitaʻi, ina ua mavae sina taimi talu ona faamutaina lana faaipoipoga, ae tiaʻi o ia e lana avā fou! Na iʻu ina alu atu Ronald ma nonofo ma ona mātua. Sa ia faamatalaina le matuā “paʻū maulalo” o lona tulaga. Ua na o se faaaʻoaʻoga se tasi lenā o le anoanoaʻi o mea tutupu. O amioga e māfua i tuʻinanauga manatu faapito, ua matuā tele ai faaipoipoga e talai ma aiga malepelepe, ma iʻu ai i mafatiaga o le lē mafaitaulia o tamaiti faapea tagata matutua.

Ae i le isi itu, o le utagia o fautuaga a le Tusi Paia e iʻu ai i le fiafiaga moni. E faapena le tulaga o Roberto, lea na faapea mai: “Ona o fautuaga a le Tusi Paia, ua mau ai pea loʻu toʻalua. Semanū ma te lē maua le fiafiaga moni pe ana ou lolo atu i tofotofoga i se tagata e lē o saʻu paaga, e tusa lava pe foliga mai e lelei lenā tagata. Ua fesoasoani aʻoaʻoga a le Tusi Paia ou te faatāuaina ai laʻu paaga, o lē ua tele tausaga o ma faatasi.” O le fautuaga a le Tusi Paia e faapea, aua “neʻi faaʻoleʻole se tasi i lana avā na fai a o tauleʻaleʻa,” na faia se vaega tele i le olaga o Roberto. (Malaki 2:15) O ā isi vala e mafai ona tatou maua ai aogā mai fautuaga a le Atua?

Le Tausia Aʻe o a Tatou Fanau

I le faitau sefulu o tausaga ua mavae, na taatele ai le manatu e faapea, e lē tatau ona faataatitiaina e mātua ni tapulaa se tele e tusa ai ma le tausia aʻe o a latou fanau. E foliga mai o se mea tatau ona tuu atu i tamaiti e faia a latou lava filifiliga i le auala e mafaufau ma amio ai.  O le sini, ia aua neʻi taofiofia lo latou tuputupu aʻe. I nisi o nofoaga, e leai ni faasologa maopoopo tau aʻoaʻoga e faia ai, ae filifili lava tamaiti latou pe auai i ni vasega pe leai, ma e filifilia foʻi e i latou lava po o ā faafiafiaga ma faatonuga e latou te talia. O āiāiga a se tasi o aʻoga faapena, e “faatagaina ai tamaiti e faailoa atu o latou faalogona atoatoa e aunoa ma ni manatu, po o le faalavelave ane o se tagata matua.” O nisi o tagata faufautua e uiga i amioga a tagata i aso nei, e latou te lē ioe i le aogā o le tuuina atu o nisi o aʻoaʻiga, e tusa lava po o tulaga ua manatu ai mātua e tatau ona avatu ai se aʻoaʻiga alofa.

O le ā ua iʻu i ai? E toʻatele ua talitonu e faapea, o le soona tuufau o tamaiti, ua tele ai ina latou maua avanoa e faateleina ai le solitulafono ma le faaaogāsesēina o fualaau faasāina. Na faaalia i se suʻesuʻega na faia i le Iunaite Setete e faapea, e toetoe lava o le 70 pasene o tagata na suʻesuʻeina, sa manatu e lē o maua e tamaiti ma le ʻautalavou le tele o le taʻitaʻiga a mātua ia latou te manaʻomia. Pe a taumafai e faamatala atu ia tulaga o le tafanaina o tamaiti i aʻoga ma isi solitulafono matuiā na faia e talavou, e toʻatele lava e tuuaʻia le “lē lelei o le aʻoaʻiga a mātua.” Ma e tusa lava pe lē matuiā tele iʻuga, ae ua selesele lava e tamaiti ma mātua fua oona o le leaga ona aʻoaʻia o tamaiti.

O le ā o fai mai ai le Tusi Paia e faatatau i lenei mea? Ua fautua mai le Tusi Paia e faapea, e tatau ona faatino le pule a mātua i le alofa ma ia maumauaʻi. Ua faapea mai le Tusi Paia: “Ua fusifusia le valea i le loto o le tama; a e faateʻaeseina ai iā te ia i le sasa e aʻoaʻi aʻi.” (Faataoto 22:15) O le mea moni, e tatau ona talafeagai aʻoaʻiga uma a mātua ma tulaga o mea. E ao ona avatu so o se aʻoaʻiga ma le agamalu, le pulea o le tagata lava ia, ma le magafagafa. Auā o le faailoga lea o le alofa.

O le faatinoina o le pule a mātua i se auala alofa, ia lē soona faia ma le sauā, e mafai ona maua ai iʻuga aupito sili ona lelei.

E iai iʻuga lelei ua mātauina ona o le faatatauina o lenei fautuaga. Ua faapea mai ia Arturo, o se tamāloa i Mekisikō e 30 ona tausaga faatoʻā uma ona faaipoipo: “Sa faamanino mai e loʻu tamā iā te aʻu ma oʻu uso e faapea, o ia ma loʻu tinā, e iai le pule i le aiga. E la te lē faatalatū lava e aʻoaʻia i matou. Ae, e iai pea lava taimi e talanoa mai ai i laʻua iā i matou. Nei la ua ou matua, ou te matuā faatāuaina lava le olaga mautū na ou olioli ai, ma ou te iloa, ona o le taʻitaʻiga lelei na ou maua.”

 Faaaogā Fautuaga e Sili Ona Aogā

Ua iai i le Afioga a le Atua, le Tusi Paia fautuaga e sili ona aogā i le fanau a tagata. E lē na o le liʻo o le aiga e aogā i ai lenā taʻitaʻiga. Ua fesoasoani iā i tatou i le tele o auala. Talu ai o loo aʻoaʻo mai ai i tatou i le auala e tatou te gaoioi ai i lenei lalolagi e lē o naunau le toʻatele e talia lenā Puna sili o le atamai e ao ona pulea ai o latou olaga mo lo latou lava lelei.

Ua faamautinoa mai e Ieova le Atua o Lē na Foafoaina le tagata lenei mea e ala i le faisalamo o Tavita: “Ou te aʻoaʻo iā te oe, ma faasino iā te oe i lea lava ala e te savali ai; ou te faatonu iā te oe, ma ou vaai iā te oe.” (Salamo 32:8) Pe e mafai ona e mafaufau i le uiga o le silasila mai o Lē na Foafoaina Mea iā i tatou ina ia leoleomaluina i tatou mai mea e ono lamatia ai? O le fesili la lenei mo i tatou taʻitoʻatasi e faapea: ‘Po o le a ou talia ma le lotomaulalo le taʻitaʻiga a Ieova e puipuia ai i tatou?’ Ua faailoa mai ma le alofa iā i tatou i lana Afioga e faapea: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6.

O le iloa o Ieova, e manaʻomia ai ni taumafaiga ma le finafinau, ae e mafai lava ona maua e tagata e ala i le Tusi Paia. O le ala o le olaga ua ia fautuaina mai, “o loo i ai le mea ua folafolaina mai i la le olaga nei atoa ma le atalī.” O le auala moni lea i le taui sili ona aogā o loo ofoina mai ai.—1 Timoteo 4:8; 6:6.

Afai ua e fiafia i le malamalama ua e maua mai i le Tusi Paia, faapea faamanuiaga ua iʻu iai ona o le ola e ōgatusa ma lea malamalama, ia faamuamua la i lou olaga le faitauina o le Tusi Paia ma mafaufau loloto i ai. O le faia faapea, o le a fesoasoani iā te oe ina ia taulau manuia a o feagai ma mea faigatā i aso nei ma nisi i le lumanaʻi. E lē gata i lea, o le a e maua ai le faamoemoe o le ola e faavavau i le lalolagi fou a le Atua, lea o le a aʻoaʻoina ai tagata uma e Ieova ma o le a tele foʻi lo latou manuia.—Isaia 54:13.

[Ata i le itulau 5]

O fautuaga a le Tusi Paia e mafai ona faamalosia ai noataga o le faaipoipoga

[Ata i le itulau 6]

O fautuaga a le Tusi Paia, o le faavae mo le taʻitaʻiga lelei, ae e mafai ai foʻi ona maua le fiafia

[Ata i le itulau 7]

O i latou e faatatauina fautuaga a le Tusi Paia, e mafai ona olioli i se olaga paleni