O Ieova o ‘lo Tatou Malosi i Ona Pō o le Puapuaga’
O Ieova o ‘lo Tatou Malosi i Ona Pō o le Puapuaga’
“O loo mai iā Ieova le faaolataga o ē amiotonu; o ia lava lo latou malosi i ona pō o le puapuaga.”—SALAMO 37:39.
1, 2. (a) O le ā na tatalo ai Iesu mo ona soo? (e) O le ā le finagalo o le Atua mo ona tagata?
E SILISILI ese lava Ieova. E iai lona mana e puipuia ai ana auauna faamaoni i so o se auala lava e finagalo i ai. E mafai foʻi ona ia vavae ese ona tagata mai le lalolagi o tagata, ma tuu i se nofoaga saogalemu ma filemu. Ae peitaʻi, sa tatalo Iesu i lona tamā e faatatau i ona soo: “Ou te lē ole atu ina ia e ave ese iā te i latou i le lalolagi, a ia e tausi iā te i latou mai lē o loo leaga.”—Ioane 17:15.
2 Ua lē filifilia e Ieova i tatou e ‘ave esea i le lalolagi.’ Ae ua finagalo o ia e tatou te nonofo faatasi pea ma tagata o loo i le lalolagi ina ia folafola atu lana feʻau o le faamoemoe ma faamāfanafana atu i isi. (Roma 10:13-15) Ae pei ona taʻua e Iesu i lana tatalo, o le ola i lenei lalolagi, ua tatou matilatila atu ai i “lē o loo leaga.” O tagata lē usiusitai ma agaga leaga malolosi e māfua ai le tele o tigā ma puapuaga, ma e lē sao mai ai Kerisiano i na tulaga.—1 Peteru 5:9.
3. O le ā e mafai ona tupu e oo lava i tagata tapuaʻi faamaoni o Ieova, ae o le ā se faamāfanafanaga e tatou te maua i le Afioga a le Atua?
3 Ona o na puapuaga, e masani lava ona oo ai i tulaga o le loto vaivai. (Faataoto 24:10) O loo iai le tele o faamaumauga i le Tusi Paia o tagata faamaoni na oo i ai mafatiaga. Ua faapea mai le faisalamo: “E tele lava mea leaga e oo i lē ua amiotonu; a e laveaʻiina o ia e Ieova ai ia mea uma.” (Salamo 34:19) Ioe, e oo lava i “lē ua amiotonu,” e tupu ai lava mea leaga. I le pei o le faisalamo o Tavita, e iai taimi tatou te ‘matuā vaivai, ma momomo ai lava’ o tatou faalogona. (Salamo 38:8) Ae peitaʻi, e ese le faamāfanafanaina i le iloa faapea: “Ua latalata mai Ieova i ē ua loto momomo; ua ia faaola foʻi i ē ua loto nutimomoia.”—Salamo 34:18; 94:19.
4, 5. (a) Ina ia ōgatasi ma le Faataoto 18:10, o le ā e ao ona tatou faia ina ia maua ai le puipuiga a le Atua? (e) O ā nisi o laasaga patino e tatou te fai, ina ia maua ai le fesoasoani a le Atua?
4 Ina ia ōgatasi ma le tatalo a Iesu, o loo faapea ona manatu mamafa mai Ieova iā i tatou. O ia o lo tatou “malosi i ona pō o le puapuaga.” (Salamo 37:39) O loo faaaogā e le tusi o Faataoto se faaupuga talitutusa i le faapea mai: “O le suafa o Ieova, o le ʻolo malosi lea; e sola atu i ai le amiotonu, ona sao ai lea o ia.” (Faataoto 18:10) Ua faaalia i lenei mau le mea moni e faatatau i le manatu mamafa mai o Ieova i tagata. Ua saunia e le Atua le auala e sao ai, aemaise lava mo tagata amiotonu o loo saʻili atu iā te ia, e pei o loo tatou sosola atu i se olo malosi mo le puipuiga.
5 Pe a feagai ma faafitauli e mafatia ai, e faapefea ona tatou sosola pe sulufaʻi atu iā Ieova mo le puipuiga? Seʻi o tatou iloiloina ni vala tāua se tolu tatou te faia, ina ia maua ai le fesoasoani a Ieova. Muamua, e tatau ona tatou liliu atu i lo tatou Tamā i le lagi i le tatalo. Lona lua, e ao ona tatou gaoioi e ōgatasi ma lona agaga paia. Lona tolu, e tatau ona tatou gauaʻi atu i le faatulagaga a Ieova, e ala i le auaufaatasi ma uso Kerisiano e mafai ona latou faamāmā i o tatou puapuaga.
Le Malosi o le Tatalo
6. E faapefea ona manatu Kerisiano moni i le tatalo?
6 Ua fautuaina e nisi o tagata atamamai o le soifua mālōlōina le tatalo, ina ia avea ma vaifofō mo le loto mafatia ma le popole. E moni e saʻo le manatu faapea o sina taimi o manatunatuga, e pei o le faia o se tatalo e ono faateʻa ai le popole, ae e faapena foʻi le mea e mafai ona faia e nisi o leo e faalogoina i lo tatou siʻosiʻomaga, e oo lava foʻi i sina fofō i le papatua. Ae peitaʻi, e lē manatu faatauvaa Kerisiano i le tatalo faapea ua na o se vaifofō e faaleleia ai faalogona. E tatou te vaai i le tatalo o se sootaga mamalu ma Lē na Foafoaina Mea. O le tatalo e aofia ai lo tatou faamaoni ma le talitonuina o le Atua. Ioe, o le tatalo o se vaega o la tatou tapuaʻiga.
7. O le ā le uiga o le tatalo ma le mautinoa, ma e faapefea e na tatalo ona fesoasoani iā i tatou e faafetaiaʻia mafatiaga?
7 E tatau i a tatou tatalo ona iai le mautinoa, ma le maufaatuatuaina o Ieova. Na tusi le aposetolo o Ioane e faapea: “O lenei foʻi le loto tele ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia iā te i tatou.” (1 Ioane 5:14) O Ieova, o Lē Silisili, ua na o ia o le Atua moni e ona le malosi uma lava, e liuliualo faapitoa mai i tatalo faatauanau a ona tagata tapuaʻi. O le iloa faapea e faafofoga mai lo tatou Atua alofa iā i tatou pe a tatou tuu atu o tatou popolega ma faafitauli iā te ia, e lagona ai lava le faamāfanafanaina.—Filipi 4:6.
8. Aiseā e lē tatau ai i Kerisiano faamaoni ona lagona le matamuli po o le faatauvaa pe a faalatalata atu iā Ieova i le tatalo?
8 E lē tatau ona iai ni lagona matamuli o Kerisiano faamaoni, pe faapea o i latou e faatauvaa, po o le leai o se mautinoa pe a talanoa atu iā Ieova i le tatalo. E moni, pe a tatou lē fiafia iā i tatou lava po o le lofia i faafitauli, atonu e tatou te lē mafai i taimi uma ona faalatalata atu iā Ieova i le tatalo. I tulaga faapena, e lelei ona tatou manatua e “alofa foʻi [Ieova] i ona tagata ua tigāina” ma e na te “faamāfanafanaina ē ua faamaulaloina.” (Isaia 49:13; 2 Korinito 7:6) E tatou te manaʻomia ona liliu atu ma le mautinoa i lo tatou tamā faalelagi o ia o lo tatou malosi aemaise i taimi o mafatiaga ma puapuaga.
9. O le ā le vaega a le faatuatua i a tatou tatalo e fai i le Atua?
9 Ina ia maua atoatoa aogā mai le faaeaga o le tatalo, e tatau ona iai so tatou faatuatua moni. Ua faapea mai le Tusi Paia: “E tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.” (Eperu 11:6) O le faatuatua e sili atu na i lo le tau ina talitonu o “loo soifua” le Atua. O le faatuatua moni e aofia ai le matuā talitonu i le mana o le Atua ma lona finagalo malie, e faamanuia i tatou pe a usiusitai atu iā te ia. “O fofoga o le Alii o loo faasaga i ē amiotonu, e liliu mai foʻi ona taliga i a latou faatoga.” (1 Peteru 3:12) O le faaauau ona iloaina o loo manatu mamafa mai Ieova iā i tatou, e uigā atili ai a tatou tatalo.
10. O le ā le tulaga e ao ona iai a tatou tatalo pe afai e tatou te fia maua le tausiga faaleagaga mai iā Ieova?
10 E faafofoga Ieova i a tatou tatalo pe a faia ma le lotoatoa. Na tusi le faisalamo e faapea: “Ua ou valaau iā te oe ma le loto atoa; Ieova e, ia e tali mai iā te aʻu.” (Salamo 119:145) I le lē pei o tatalo e masani ona faia i le tele o lotu, o a tatou tatalo e lē na ona fai pe fai faaʻafaʻafa. Pe a tatou tatalo iā Ieova ma o tatou “loto atoa,” e uigā uma a tatou upu e fai ma e iai se fuafuaga na fai ai. Pe a uma atu na tatalo maumauaʻi, ona amata loa lea ona tatou lagona le toʻa, ona ua tatou “tuuina atu iā Ieova o mea e [tatou] te popole vale ai.” E pei ona folafola mai e le Tusi Paia, “o ia lava na te tausia” i tatou.—Salamo 55:22; 1 Peteru 5:6, 7.
O le Agaga o le Atua o lo Tatou Fesoasoani Lea
11. O le ā se tasi o auala e tali mai ai Ieova iā i tatou pe a faaauau ona “ole atu” mo lana fesoasoani?
11 O Ieova e lē na o se Faafofoga tatalo ae o ia foʻi o Lē e Tali mai i tatalo. (Salamo 65:2) Na tusi Tavita e faapea: “O le aso e puapuagaina ai aʻu, ou te valaau atu ai iā te oe; auā e te tali mai iā te aʻu.” (Salamo 86:7) Ona o lenā tulaga, sa faalaeiau ai e Iesu ona soo e faaauau ona “ole atu” mo le fesoasoani a Ieova auā o le a “foaʻiina mai e . . . [le] Tamā o i le lagi le Agaga Paia i ē ole atu ai iā te ia.” (Luka 11:9-13) Ioe, e gaoioi le mana galue o le Atua o se fesoasoani, po o se faamāfanafana i ona tagata.—Ioane 14:16.
12. E faapefea ona fesoasoani le agaga o le Atua iā i tatou pe a foliga mai ua faigatā tele faafitauli?
12 E tusa lava pe tatou te fesagaʻi ma puapuaga, e mafai lava e le agaga o le Atua ona tuuina mai iā i tatou le “tele o le mana.” (2 Korinito 4:7) Sa faapea mai ma le mautinoa le aposetolo o Paulo o lē na onosaia le tele o tulaga e faapopoleina ai: “Ou te mafaia mea uma lava ona o ia ua faamalosi mai iā te aʻu.” (Filipi 4:13) I se tulaga talitutusa, e toʻatele Kerisiano i aso nei ua lagona le faafouina o le malosi faaleagaga ma faalogona, i le taliina o ā latou tatalo. O le tulaga masani lava, o faafitauli e foliga mai e faigatā, e lē matuā faigatā tele pe a tatou mauaina le fesoasoani a le agaga o le Atua. Ona o le malosi mai i le Atua, e mafai ona tatou faapea atu e pei ona sa faia e le aposetolo: “Ua puapuagatia i matou i mea uma, a e lē faaatuatuvaleina; ua fememeaʻi, a e lē matuā fememeaʻi; ua sauāina, a e lē tuulafoaʻiina; ua lafotuina i lalo, a e lē fano.”—2 Korinito 4:8, 9.
13, 14. (a) Ua faapefea ona avea Ieova o lo tatou malosi e ala i lana Afioga tusia? (e) Ua faapefea i le faatatauina o mataupu silisili o le Tusi Paia ona fesoasoani iā te oe lava ia?
13 Ua faagaeeina ma faasaoina foʻi e le agaga paia le Afioga tusia a le Atua mo lo tatou lelei. Ua faapefea ona avea Ieova o lo tatou malosi i taimi o puapuaga e ala mai i lana Afioga tusia? O se tasi o auala, o le aumaia lea o le atamai ma le mafaufau. (Faataoto 3:21-24) Ua toleni i tatou e le Tusi Paia i le auala e mafaufau ai, ma faaleleia ai le tomai e fefulifulisaʻi ai mea. (Roma 12:1) E ala i le faitauina e lē aunoa ma le suʻesuʻeina o le Afioga a le Atua, faatasi ai ma le faatatauina, e mafai ai ona tatou “aʻoaʻosooina e iloa ai le lelei ma le leaga.” (Eperu 5:14) Atonu ua e iloa e oe lava le auala na fesoasoani ai mataupu silisili o le Tusi Paia e faia ni filifiliga atamai ina ua e fesagaʻi ma faafitauli. Ua aumai e le Tusi Paia iā i tatou le poto e fesoasoani e maua ai vaifofō aogā mo faafitauli faigatā.—Faataoto 1:4.
14 Ua saunia e le Afioga a le Atua se isi puna o le malosi mo i tatou—le faamoemoe o le faaolataga. (Roma 15:4) Ua taʻu mai e le Tusi Paia iā i tatou faapea, e lē faaauau ona tutupu mea leaga e aunoa ma se mutaaga. Po o ā lava puapuaga o loo tatou pagatia ai, ua na o ni mea e lē tumau. (2 Korinito 4:16-18) Ua iā i tatou le “faamoemoe i le ola faavavau, na folafolaina mai talu mai tausaga o le vavau e le Atua e lē mafai ona tala pepelo.” (Tito 1:2) O le olioli i lenā faamoemoe, i le iloaina o le lumanaʻi pupula ua folafola mai e Ieova, e mafai ai ona tatou onosaia puapuaga.—Roma 12:12; 1 Tesalonia 1:3.
Le Faapotopotoga—O le Faamaoniga o le Alofa o le Atua
15. E faapefea ona avea Kerisiano ma faamanuiaga o le tasi i le isi?
15 O le isi sauniuniga mai iā Ieova e mafai ona fesoasoani iā i tatou i taimi o puapuaga, o le aufaatasiga o loo tatou fiafia ai i le faapotopotoga Kerisiano. Ua faapea mai le Tusi Paia: “E alofa le uō i aso uma lava; a e fanau le uso mo le aso vale.” (Faataoto 17:17) Ua faalaeiau le Afioga a le Atua i tagata uma i le faapotopotoga, ia āva ma alofa le tasi i le isi. (Roma 12:10) Na tusi le aposetolo o Paulo e faapea: “Aua le saʻili se tasi i lona lava lelei, a ia taʻitasi ma saʻili i le lelei o le isi.” (1 Korinito 10:24) O le iai o lenā manatu, e mafai ona tatou taulaʻi atu ai i mea o loo manaʻomia e isi na i lo o tatou lava puapuaga. Pe a tatou faia mea mo isi, e lē gata ua tatou fesoasoani ai iā i latou, ae ua tatou maua ai foʻi le fiafia ma le faamalieina lea e mafai ai ona tatou gafatia o tatou lava mafatiaga.—Galuega 20:35.
16. E mafai faapefea e Kerisiano taʻitoʻatasi ona faalaeiau atu i isi?
16 E mafai e tane ma tuafāfine matutua faaleagaga ona faia se vaega tāua i le faamalosia o isi. Ina ia faia faapea, e latou te gaoioi ina ia faigofie ona ō atu tagata iā i latou ma faaavanoa atu i latou. (2 Korinito 6:11-13) E faamanuiaina le faapotopotoga pe a taumafai tagata uma e faamālō i ē laiti, ia ati aʻe tagata talitonu fou, ma faalaeiau iā i latou o maua i le loto mafatia. (Roma 15:7) O le alofa faaleuso e fesoasoani foʻi iā i tatou e ʻalofia ai le agaga o le masalosalo o le tasi i le isi. E lē tatau ona tatou vave fai se faaiʻuga faapea, o faafitauli o le tagata lava ia, o se faailoga o lona vaivai faaleagaga. Ua tonu le uunaʻiga a Paulo i Kerisiano, ina “ia faamāfanafana i ē loto iti.” (1 Tesalonia 5:14) Ua faaalia e le Tusi Paia e mafai foʻi ona oo puapuaga i Kerisiano faatuatua.—Galuega 14:15.
17. O ā avanoa o loo iai e tatou te faamalosia ai le sootaga o le ʻauuso faa-Kerisiano?
17 O sauniga faa-Kerisiano o se avanoa sili lea ona lelei mo i tatou e faamāfanafana ma faalaeiau ai o le tasi i le isi. (Eperu 10:24, 25) O lenei gaoioiga alofa e lē muta mai i sauniga a le faapotopotoga. E fiafia foʻi tagata o le Atua e ati aʻe uso talitonu i faatasiga faasamasamanoa. Pe a tulaʻi mai puapuaga, o le a tatou fesoasoani le tasi i le isi auā ua uma ona tatou faavaeina se sootaga māfana. Na tusi le aposetolo o Paulo: “Ina neʻi i ai i le tino se maseiga, a ia fetausiaʻi faatasi uma itu tino. Pe afai e tigā le tasi itu tino, ia tigā faatasi ai itu tino uma lava; pe viia le tasi itu tino, ia olioli faatasi ai itu tino uma lava.”—1 Korinito 12:25, 26.
18. O le ā le uunaʻiga e tatau ona tatou ʻalofia pe a tatou lagona le loto vaivai?
18 E iai taimi e tatou te lagona ai le matuā loto vaivai e aufaatasi atu ma uso Kerisiano. E ao ona tatou teena na faalogona ina neʻi taofia i tatou mai le mauaina o fesoasoani ma faamāfanafanaga mai i ō tatou uso talitonu. Ua lapataʻi mai le Tusi Paia iā i tatou e faapea: “O lē ua vavae ese, ua saʻili o ia i lona manaʻo; e finau o ia i le poto uma lava.” (Faataoto 18:1) O ō tatou uso ma tuafāfine o se faamaoniga o le manatu mai o le Atua iā i tatou. Pe a tatou iloaina lenā sauniuniga alofa, o le a tatou maua le mapusaga i taimi o puapuaga.
Ia Tausia Pea se Vaaiga Saʻo
19, 20. Ua faapefea ona fesoasoani le Tusi Paia iā i tatou e teena ai le manatu na o itu lava e leaga ai?
19 Pe a tutupu mai mea e tatou te loto vaivai ai ma lagona ai le faanoanoa, e faigofie lava ona alu le mafaufau na o itu lava e leaga ai. O se faaaʻoaʻoga, pe a oo mai faigatā o le olaga, e ono fesiligia e nisi lo latou lava tulaga faaleagaga, e aofia ai ma le manatu faapea ua faaalia e nei mea ua lē toe fiafia le Atua iā i latou. Ae ia manatua, e lē faaosooso e Ieova tagata i “mea leaga.” (Iakopo 1:13) Ua faapea mai le Tusi Paia: “E lē fiafia o ia ona faapuapuagaina pe faatigāina tagata.” (Auega 3:33) O le mea moni, e matuā faanoanoa lava Ieova pe a tigāina ana auauna.—Isaia 63:8, 9; Sakaria 2:8.
20 O Ieova o “le Tamā e ona le alofa mutimuti vale, o le Atua foʻi e ana le faamāfanafanaga uma.” (2 Korinito 1:3) E na te tausia i tatou, ma o le a faamaualugaina ai i tatou i ona pō e tatau ai. (1 Peteru 5:6, 7) O le iloaina pea o loo alofa le Atua iā i tatou, o le a fesoasoani iā i tatou e tausia ai pea se vaaiga saʻo ma maua ai foʻi le fiafia. Na tusi Iakopo e faapea: “Oʻu uso e, ia outou manatu, o le mea e fiafia tele ai pe a maua outou i tofotofoga eseese.” (Iakopo 1:2) Aiseā? Na ia tali e faapea: “Auā a uma ona tofotofoina e maua e ia le pale o le ola, ua folafolaina mai e le Alii i ē alolofa atu iā te ia.”—Iakopo 1:12.
21. Po o ā lava faigatā e tatou te fesagaʻia, o le ā le faamautinoaga ua avatu e le Atua iā i latou e faamaoni iā te ia?
21 E pei lava ona lapataʻia i tatou e Iesu, o le a maua i tatou e puapuaga i le lalolagi. (Ioane 16:33) Ae peitaʻi, ua folafola mai e le Tusi Paia faapea e leai se “puapuaga . . . po o le atuatuvale, po o le sauā, po o le oge, po o le lē lavalavā, po o le pagatia” e faateʻaeseina i tatou i le alofa o le Atua ma lona Alo. (Roma 8:35, 39) Maʻeu le faamāfanafanaina i le iloa faapea, so o se mafatiaga e tatou te fesagaʻia ua na o sina taimi puupuu lava. Ae i le taimi lenei, a o tatou faatalitali atu i le iʻuga o puapuaga o tagata, o loo manatu mamafa mai pea lo tatou Tamā alofa o Ieova iā i tatou. Pe afai e tatou te liliu atu iā te ia mo se puipuiga, o le a avea o ia ma “ʻolo maualuga mo lē ua faasauāina, o le ʻolo maualuga i ona pō e i ai le puapuaga.”—Salamo 9:9
O le ā na Tatou Aʻoaʻoina?
• O le ā e tatau ona faatalitalia e Kerisiano a o soifua i lenei lalolagi leaga?
• E faapefea i a tatou tatalo faatauanau ona faamalosia tatou pe a fesagaʻi ma puapuaga?
• E faapefea ona avea le agaga paia o le Atua ma fesoasoani?
• O le ā e tatou te faia e fesoasoani ai le tasi i le isi?
[Fesili mo le Suʻesuʻega]
[Ata i le itulau 18]
E tatau ona tatou saʻili iā Ieova e pei o loo tatou sosola atu i se olo malosi
[Ata i le itulau 20]
E faaaogā e i latou e taʻumatuaina faaleagaga avanoa uma e faamālō ma faalaeiau atu ai i isi