“O se Mea Aupito Sili Ona Lelei e Mafai Ona E Faia”

O ALEXIS, o se tamaitiiti e lima ona tausaga e nofo i le nuu o Morelia, i Mekisikō, o loo suʻesuʻe ona mātua i le Tusi Paia ma o loo auai i sauniga a Molimau a Ieova. A o auai i se fonotaga matagaluega ma lo latou aiga, na mātauina ai e Alexis se faataʻitaʻiga e uiga i le talaʻi atu mai lea fale i lea fale. I le taimi lenā, sa ia liliu atu loa ma fesili atu i lona tamā, “Papa, Papa, aiseā e te lē alu ai e talaʻi?” Na tali atu lona tamā, “O lea ou te suʻesuʻe ina ia mafai ona ou faia le mea lenā.” Na tali atu ma le matuā fiafia ia Alexis, “Papa, o se mea aupito sili ona lelei e mafai ona e faia.”

Sa iloa e lenei tamaitiiti le manaʻomia ona gaoioi ia ōgatusa ma lona poto ua maua e uiga iā Ieova. Talu ai e nonofo faatasi o ia ma nai ona tei laiti i le fale e tasi, e muamua ai lava ona ia tatalo atu iā Ieova ona ia talanoa atu ai lea iā i latou e uiga i mea na latou aʻoaʻoina ma ona mātua mai le tusi, O Laʻu Tusi o Tala o Le Tusi Paia. E ui lava e leʻi iloa e Alexis faitau, ae na ia iloa lelei lava mataupu uma i le tusi mai ata o loo faamatala ai ia tala. Sa ia faapea atu foʻi, o ia ua fia alu e asiasi atu i tagata i o latou fale ina ia faailoa atu iā i latou mea ua ia aʻoaʻoina e uiga i fuafuaga a le Atua.

O le mea moni, e mafai lava e ē matutua ma talavou ona ola e ōgatusa ma mea ua faatalitalia mai e Ieova, “Lē e Paia,” mai iā i latou ma maua ai se faaeaga aupito sili o le avatua lea o se molimau i atunuu e uiga iā te ia. (Isaia 43:3; Mataio 21:16) E mautinoa lava, o le tasi lea o mea aupito sili ona lelei e mafai e se tagata ona faia.