Pe e Manaʻomia ni Fautuaga Lelei?

I ASO nei, e toʻatele tagata e talitonu, ua latou maua le tomai e iloa ai le lelei mai le leaga, ma e iai la latou aiā e faia ai so o se mea latou te mananaʻo i ai. Ae ua faapea mai isi, e tusa lava po o le ā le mea e fai, ae tau lava ina ia faamalieina ai le tagata. Ae o loo aafia faaipoipoga ma olaga faaleaiga lea ua manatu tagata e faapea o le faatulagaga faavae lea o le olaga faaletagata.—Kenese 3:5.

Seʻi manatu iā Veronika, * o lē e nofo i Mekisikō. Ua ia faamatala mai e faapea: “A o toeitiiti lava oo i le faamanatuina o le 15 tausaga talu ona ma faaipoipo, ae taʻu mai e loʻu toʻalua iā te aʻu, o ia o loo iai ni a la faifaiga ma se tasi fafine. Na ia faapea mai, ona o le fafine lea e fai si laʻitiiti ma e fiafia ai o ia, e lē mafai la ona ia tuua le fafine. Na segia loʻu mauli ona sa ou manatu, o le a ma lē toe faifai mea faatasi ma laʻu uō sa sili ona pele iā te aʻu. Sa ou manatu muamua e faapea, o le maliliu o ē pele iā i tatou, o se mea e sili atu ona tigā. Ae peitaʻi, o le mulilua, o se mea e sili ona tigā iā te aʻu. Talu ai ua lē gata ina leiloa atu ai lē sa sili ona ou alofa i ai, ae o loo ia faia pea mea e faatigā ai aʻu.”

E iai foʻi le tulaga o se tamāloa e 22 tausaga le matua, ua tatala lana faaipoipoga ma e iai sona atalii, ae e lē manaʻo e faia ona tiute tauave o se tamā. Ua ia tuu atu i lona tinā e tausia o ia ma lona atalii. Afai e lē faamalieina o ia i mea uma e manaʻo i ai, ona matuā ita lea ma fasifasi upu lona tinā, e pei lava o se tamaitiiti amioleaga. Ua matuā fiu lona tinā i le feagai ai ma na amioga faatigā.

E lē o ni mea fou nei mea. Ua faateteleina ia  teteʻaga ma talaga faaipoipoga i so o se mea. E toʻatele tamaiti ua iloa ua tuua e se tasi o mātua le aiga ae toe amata se isi aiga fou. O nisi o talavou, ua lē toe faaaloalo i isi tagata e oo lava i o latou mātua, ma ua faia amioga sa matuā lē mafaufauina lava i aso ua mavae. Ua sili ona taatele i le tele o atunuu amioga e pei o le faataʻitaʻi o feusuaʻiga, le faaaogāsesēina o fualaau faasāina, osofaʻiga a talavou, ma le fasiotia e tamaiti o faiaʻoga ma mātua. Atonu la ua e iloa ai, e lē na o le tausia o tamaiti ma faaipoipoga ia e feagai ma omiga faigatā i le lalolagi i aso nei.

A o tatou vaaia nei mea e tutupu, atonu tatou te tau manatu ai po o le ā le mea ua tupu i tagata. Afai e moni ua iloa e tagata le lelei mai le leaga, aiseā ua tumau ai ona lē foʻia le tele o faafitauli? Po o manaʻomia ni fautuaga lelei? Po o iai se puna o na fautuaga aogā, se puna ua faamaonia e maufaatuatuaina? E ui lava e toʻatele tagata e faapea mai e talitonu i le Atua ma lana Afioga tusia, ae e foliga mai e lē o tāaʻina ai a latou filifiliga. Ae o ā ni aogā e tatou te maua pe a tatou saʻili ma maua ni fautuaga mai le Atua? Seʻi o tatou talanoaina lenā fesili i le isi mataupu.

[Faamatalaga pito i lalo]