Lipoti a Ē Faalauiloa le Malo

E Manatua Pea “Ē na Fasiotia ua Faagalogaloina”

I LE amataga o le 2001, na asiasi ai Haykaz, o se Molimau a Ieova e 15 tausaga i se faaaliga na taʻua “O Ē na Fasiotia ua Faagalogaloina,” na faia i Bern, i Suisilani lea e faamaonia ai na sauāina Molimau a Ieova e le ʻau Nasi. I le faaiʻuga o lana asiasiga, na faapea mai ai Haykaz: “Na ou faalogo i sauāga faamanu ma mafatiaga na fai i Molimau a Ieova i le pulega a le ʻau Nasi ae peitaʻi, o le taimi muamua lea ua ou vaai ai i pepa faamaonia ma ata o na taimi. O mea ua faaalia i le faaaliga, o lipoti a ē na vaaitino i ai ma faamatalaga a tusitala o talafaasolopito, na matuā ootia ai loʻu mafaufau ma loʻu loto.”

Mulimuli ane, ina ua tofia Haykaz e tusia se lipoti mo lana vasega i le aʻoga maualuga, na ia filifilia le mataupu “Molimau a Ieova—Ē na Fasiotia e le ʻau Nasi ua Faagalogaloina.” Na talia e le faiaʻoga le mataupu ae na ia fai atu iā Haykaz e manaʻomia ona faaaofia ai faamatalaga mai isi tusi i lana lipoti. Na talia fiafia e Haykaz. “Na ou tusia se otootoga o nisi tusi ua uma ona ou faitau i ai e faatatau i Molimau a Ieova i le pulega a le ʻau Nasi. Na ou faamatalaina foʻi lagona na oo iā te aʻu i le faaaliga ‘O Ē na Fasiotia ua Faagalogaloina.’ Na aofia ai i le lipoti e 43 ona itulau ia ata na tusia ma ata na puʻe.”

Iā Novema 2002, na tuuina atu ai e Haykaz lana lipoti i lana vasega, faiaʻoga, aiga ma ana uō. Mulimuli ane, na iai se vaega o fesili ma tali, lea na maua ai lona avanoa e faamatala ai ona talitonuga faale-Tusi Paia. Ina ua fesili se teine o le aofia pe aiseā na ia filifilia ai lenei mataupu, na faamatala atu e Haykaz e faapea, e lē o taʻua i le tele o tusi o talafaasolopito ia Molimau a Ieova ma e manaʻo ia iloa e tagata le lototetele o Molimau i le tausia o lo latou faatuatuaga faa-Kerisiano. O le ā le iʻuga o lana taulimaga?

Na faapea mai Haykaz: “Na maofa tamaiti o laʻu vasega. Na latou lē iloa na matuā ogaoga le sauāina o Molimau a Ieova. E lē gata i lea, e toʻatele e leʻi iloa na faapipii i ofu o Molimau i nofoaga o faasalaga a le ʻau Nasi se faailoga—o se tafatolu violē.”

Ina ua uma lana taulimaga, na tele nisi avanoa na maua e Haykaz e talanoa atu ai i tamaiti o lana vasega ma faamatala ai talitonuga faale-Tusi Paia a Molimau i tuigātoto, ʻava malosi ma tulaga tau amio. Na mātauina e Haykaz e faapea: “E leai ma se tasi o aʻu uō i le aʻoga na ula pe aamu mai iā te aʻu.” E lē gata i lenā, o loo teuina nei lana lipoti i le faletusi a le aʻoga. O le a fesoasoani lenā e faamautinoa ai e lē faagaloina le tulaga lototetele o Molimau a Ieova.