Fesili Mai le ʻAufaitau

Aiseā ua manatu ai Molimau a Ieova o le numera e 144,000 lea e taʻua i le Faaaliga o se numera moni ae lē faafaatusa?

Na tusi le aposetolo o Ioane: “Na ou faalogo foʻi i le faitau aofaʻi o ē na faamaufaailogaina; e selau afe ma afe e fagafulu ma afe e fā.” (Faaaliga 7:4) I le Tusi Paia o le faaupuga “o ē na faamaufaailogaina” o loo faasino atu i se vaega na filifilia mai le fanau a tagata ina ia pule faatasi ma Keriso mai i le lagi i le lalolagi parataiso lea o loo fotuaʻi mai. (2 Korinito 1:21, 22; Faaaliga 5:9, 10; 20:6) E iai ni māfuaaga ua manatu i ai i lo latou fuainumera o le 144,000 o se numera moni. O se tasi o māfuaaga o loo maua i isi fuaiupu e sosoo ma le Faaaliga 7:4.

Ina ua uma ona taʻu atu i le aposetolo o Ioane i se vaaiga e faatatau i lenei vaega o le 144,000, na ia toe vaaia lea o se isi vaega. Ua faamatala e Ioane lenei vaega o le “motu o tagata e toʻatele mai atu nuu uma, ma aiga, ma nuu, ma gagana eseese, e lē ma faitaulia e se tasi.” O lenei motu o tagata e toʻatele e faasino atu iā i latou o le a faasaoina nai le “puapuaga tele” o le faaumatiaga lea o lenei lalolagi amioleaga.—Faaaliga 7:9, 14.

Ae peitaʻi, mātau le eseesega ua faamatalaina e Ioane i fuaiupu e 4 ma le 9 o le Faaaliga mataupu e 7. Ua ia taʻua e faapea o le vaega muamua, “o ē na faamaufaailogaina” e patino lo latou aofaʻi. Ae peitaʻi, o le vaega lona lua o le “motu o tagata e toʻatele” e lē patino lo latou aofaʻi. Ona o nei faamatalaga, e talafeagai ai ona iloa o le numera e 144,000 o se numera moni. Afai o le numera e 144,000 e faafaatusa ma e faasino atu i se vaega e leiloa le aofaʻi, o lona uiga la, e leai se eseesega o nei fuaiupu e lua. O lea, ua faaalia ma le malosi e isi fuaiupu i le mataupu lava lenā o le numera 144,000 o se numera moni.

Na autasi ia tagata atamamai o le Tusi Paia i aso ua mavae ma aso nei i le faaiʻuga e faapea, o se fuainumera moni. O se faaaʻoaʻoga, i ni tausaga e 100 ua mavae na taʻua ai e se tagata atamai o le Tusi Paia o Dr. Ethelbert W. Bullinger i le Faaaliga 7:4, 9: “O se faamatalaga o mea moni: ua faaeseese i lenei mataupu se aofaʻi patino mai se aofaʻi e lē patino.” (The Apocalypse or “The Day of the Lord,” itulau 282) E lata mai nei lava, na tusi mai ai se polofesa o le Feagaiga Fou mai le The Master’s Seminary i le Iunaite Setete e faapea: “E vaivai tele le finauga e faapea e lē o se numera moni ae e faafaatusa.” Na ia toe faaopoopo mai: “O se aofaʻi patino [lea e taʻua i le Faaaliga 7:4] e eseese ma le aofaʻi e lē patino lea e taʻua i le Faaaliga 7:9. Afai ua manatu i ai o se numera faafaatusa o lona uiga la, e leai se numera i le tusi o Faaaliga e faapea o se numera moni.”—Revelation: An Exegetical Commentary, Volume 1, itulau 474.

Ua finau mai nisi talu ai o le Faaaliga e tele ina faaaogā gagana faafaatusa, o numera uma lava la e maua i lenei tusi e aofia ai ma le numera e 144,000 e tatau foʻi ona faafaatusa. (Faaaliga 1:1, 4; 2:10) E manino e lē saʻo lenā  faaiʻuga. E mautinoa, o loo aofia i le Faaaliga le tele o numera faafaatusa ma e aofia ai foʻi ma numera moni. O se faaaʻoaʻoga, o loo tautala Ioane i “igoa o le ʻau aposetolo a le Tamaʻi Mamoe e toʻasefulu ma le toʻalua.” (Faaaliga 21:14) E manino o le fuainumera e 12 o loo taʻua i lenei fuaiupu o se numera moni ae lē faafaatusa. E lē gata i lea, o loo tusi le aposetolo o Ioane e faatatau i “tausaga e afe” o le puleaga a Keriso. Ua faaalia i iloiloga a le Tusi Paia o lenā numera o se numera moni. * (Faaaliga 20:3, 5-7) O lea la, afai o se numera i le Faaaliga o se numera moni pe faafaatusa e faalagolago i le malamalamaaga ma le tulaga o le fuaiupu.

O le faaiʻuga e faapea o le numera e 144,000 o se numera moni ma e faasino atu i se aofaʻi faatulagaina, o se vaega laʻitiiti pe a faatusatusa atu i le “motu o tagata e toʻatele” e ōgatasi foʻi ma isi mau o le Tusi Paia. O se faaaʻoaʻoga, mulimuli ane i le vaaiga lea na vaaia e le aposetolo o Ioane, ua faamatalaina ai le 144,000 o i latou “o ē ua faatauina nai tagata, o ē ua faapolopoloina.” (Faaaliga 14:1, 4) O le faaupuga “o ē ua faapolopoloina” e faasino atu i se vaega toʻalaiti. E lē gata i lea, a o iai Iesu i le lalolagi, na ia fetalai e faatatau iā i latou o le a pule faatasi ma ia i lona Malo i le lagi ma ia taʻua ai i latou o le “lafu mamoe itiiti.” (Luka 12:32; 22:29) O le mea moni, o i latou mai le fanau a tagata o le a pule i le lagi o se vaega itiiti pe a faatusatusa atu iā i latou o le a ainā le lalolagi Parataiso.

O lea la, o le mataupu atoa lea e maua ai le Faaaliga 7:4 ma isi faamatalaga o le Tusi Paia ua faamautūina ai e faapea, o le numera e 144,000 o se numera moni. O loo faasino atu iā i latou o le a pule mai i le lagi ma Keriso agaʻi i le parataiso i le lalolagi, lea o le a tumu i se aofaʻiga tele o tagata fiafia e tapuaʻi iā Ieova le Atua.—Salamo 37:29.

[Faamatalaga pito i lalo]

[Faamatalaga faaopoopo i le itulau 31]

O le aofaʻi o suli faalelagi e faatapulaa i le 144,000

[Ata i le itulau 31]

E leai se aofaʻiga patino o le “motu o tagata e toʻatele”

[Faamatalaga i Ata i le itulau 31]

Fetu: O le faatagaga a le Anglo-Australian Observatory, ata na puʻe e David Malin