Le Auala e Faafetaiaʻia ai le Lotovaivai

PO O e lotovaivai? E toʻatele tagata ua lotovaivai i lenei taimi i le lē mautonu ma le fevaevaeaʻi. Ua lotovaivai nisi ona o le lē maua o ni galuega. Ua feagai nisi ma āuga o se faalavelave faafuaseʻi. O loo tauivi foʻi nisi ma faafitauli i le aiga, gasegase tugā po o faalogona o le tuua toʻatasi.

Pe afai ua e lotovaivai, o fea e te saʻili ai mo se fesoasoani? Ua maua e le faitau miliona i le lalolagi faamāfanafanaga e ala i le faitauina o le Afioga a le Atua, le Tusi Paia. Ua faalaeiauina i latou e ala i upu a le aposetolo o Paulo e faapea: “Ia faamanūina le Atua, o le Tamā o lo tatou Alii o Iesu Keriso, o le Tamā e ona le alofa mutimuti vale, o le Atua foʻi e ana le faamāfanafanaga uma; o lē na te faamāfanafanaina mai iā te i matou i lo matou puapuaga uma lava.” (2 Korinito 1:3, 4) Aiseā e te lē faaaogā ai lau Tusi Paia e faitau ai lenei mau ma isi fuaiupu? O le faia faapea o le a ‘faamāfanafana ai lou loto, ma faatumauina ai oe.’—2 Tesalonia 2:17.

E mafai foʻi ona maua le fesoasoani e faafetaiaʻia ai le lotovaivai e ala i le aumea atu iā i latou o ē auauna iā Ieova. Ua faapea mai le Faataoto 12:25: “O le atuatuvale i le loto o le tagata ua faavaivai ai o ia; a o le upu lelei e faaolioliina ai.” Pe a tatou auai i sauniga faa-Kerisiano, tatou te faalogo ai i “upu lelei” e “suamalie i le loto, ma le mea e mālōlō ai ivi.” (Faataoto 16:24) Aiseā e te lē auai i se sauniga i le Maota o le Malo o Molimau a Ieova ina ia e tofo ai i aafiaga o faalaeiauga o na faatasitasiga?

E te maua foʻi aogā mai le mana o le tatalo. Afai ua lofitūina oe i popolega o le olaga, ia faailoa atu ou faalogona i “Lē faafofoga tatalo.” (Salamo 65:2) E sili atu ona silafia e Lē na Foafoaina i tatou, o Ieova le Atua, o i tatou na i lo i tatou lava. E mafai ona tatou faalagolago i lana fesoasoani. Ua folafola mai e lana Afioga iā i tatou: “Ia e tuuina atu iā Ieova o mea e te popole vale ai; o ia lava na te tausia oe; na te lē tuuna e faavavau le amiotonu ia faagaeetia.” (Salamo 55:22) Ioe, o i latou e “faatalitali iā Ieova, e toe faafouina lo latou malosi.”—Isaia 40:31.

Ua aumaia e Ieova ia sauniuniga sili e fesoasoani iā i tatou e faafetaiaʻia ai le lotovaivai. Pe e te faaaogāina ea na sauniuniga?