O Mea e Manaʻomia Ina ia Maua ai le Fiafia

E SILI atu ona silafia e Ieova o le “Atua manuia [po o fiafia]” ma Iesu Keriso “o le Alii e manuia [po o fiafia] mona ua toʻatasi” na i lo se isi lava le mea e manaʻomia ina ia maua ai le fiafia. (1 Timoteo 1:11; 6:15) O lea la, e lē o se mea e faateʻia ai, o le ki e maua ai le fiafia o loo i le Afioga a le Atua.—Faaaliga 1:3; 22:7.

I lana lauga i le Mauga, na faamatala ai e Iesu mea e manaʻomia e maua ai le fiafia. Ua ia fetalai: “Amuia ē” pe fiafia ē (1) manatu mamafa i o latou manaʻoga faaleagaga, (2) ē faanoanoa, (3) ē agamalu, (4) ē fia aai ma fia inu i le amiotonu, (5) ē alolofa atu, (6) ē loto mamā, (7) ē faatupuina le filemu, (8) ē sauāina ona o le amiotonu ma (9) ē ua upuleagaina, ma faasauāina ona o ia.—Mataio 5:3-11. *

Pe e Saʻo Fetalaiga a Iesu?

E lē tatau ona masalosalo i le moni o fetalaiga a Iesu. E leai se isi e talitonu e faapea, o le a sili ona fiafia le tagata ita, leoleoā ma lē alofa i lo le tagata e agamalu, alofa ma lē gaoiā.

Ae peitaʻi, atonu tatou te tomānatu pe faapefea ona fiafia tagata o loo fia aai ma fia inu i le amiotonu po o ē o faanoanoa. Ua latou  malamalama lelei i mea o loo tutupu i le lalolagi. Ua latou “mapuitigā, ma feoi ona o mea inosia uma” ua faia i o tatou aso. (Esekielu 9:4) Ae peitaʻi ua lē maua ai e i latou le fiafia ona o lea tulaga. Ua latou matuā olioli ina ua latou aʻoaʻoina fuafuaga a le Atua i le aumaia o tulaga amiotonu i le lalolagi ma faiga tonu mo ē lotomomomo.—Isaia 11:4.

O le naunau mo le amiotonu e faapogaia ai tagata e faanoanoa i lo latou lē taulau e faia le mea saʻo. Ua latou manatu mamafa i o latou manaʻoga faaleagaga. Ua naunau na tagata e saʻili le taʻitaʻiga mai le Atua talu ai ua latou mautinoa, ua na o ia e mafai ona fesoasoani i tagata e foʻia o latou vaivaiga.—Faataoto 16:3, 9; 20:24.

O tagata o ē faanoanoa, fia aai ma fia inu i le amiotonu, ma manatu mamafa i o latou manaʻoga faaleagaga ua mataalia i latou i le tāua o le iai o se faiā lelei ma Lē na Foafoaina Mea. O se faiā lelei ma tagata e aumaia ai le fiafia ae peitaʻi e sili atu ai le fiafia e maua ona o le iai o se faiā lelei ma le Atua. E matuā fiafia moni i latou e matuā naunau i le mea ua saʻo ma naunau e talia taʻitaʻiga mai le Atua.

Ae peitaʻi, atonu e faigatā ona e talitonu e faapea, e fiafia se tasi o sauāina ma upuleagaina. Ae ui i lea, e tatau ona moni auā o le mea lenā na fetalai ai Iesu. O lea la, e faapefea ona malamalama i ana fetalaiga?

Fiafia e ui Ina Sauāina —E Faapefea Ona Tupu Lenā Mea?

Mātau e leʻi fetalai Iesu e faapea e maua le fiafia i le upuleagaina ma sauāina o i latou. Na ia faamatala atili: “Amuia [po o fiafia] ē sauāina ona o le amiotonu, . . . pe a latou upu leaga, ma faasauā iā te outou . . . ona o aʻu.” (Mataio 5:10, 11) O lea la, e maua le fiafia pe afai e mafatia se tasi i le upuleagaina ona o le avea ma soo o Iesu ma faaōgatusa lona soifua ia talafeagai ma mataupu silisili na aʻoaʻo e Iesu.

Ua faaalia lenei tulaga e ala i mea na tutupu i uluaʻi Kerisiano. Na aami e sui o le Saniterini o le faamasinoga maualuga lea a Iutaia “le ʻau aposetolo, ua sasa iā te i latou, ma fai atu, ia soia le tautala i le igoa o Iesu; ona tuuina atu lea iā te i latou e ō.” Na faapefea ona tali atu le ʻau aposetolo? “Ona ō lea o i latou nai luma o le fono, ua olioli ina ua taʻuaogāina i latou ia faaleagaina ona o lona suafa. Ua lē mapu foʻi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei o Iesu le Keriso.”—Galuega 5:40-42; 13:50-52.

Na aumaia e le aposetolo o Peteru se malamalamaaga sili i le sootaga o le upuleagaina ma le fiafia. Na ia tusi: “Afai e upuleagaina outou ona o le suafa o Keriso, amuia [po o fiafia] outou; auā o loo tumau iā te outou le Agaga o le mamalu, o le Agaga o le Atua.” (1 Peteru 4:14) Ioe, o le mafatia i le avea o se Kerisiano mo le faia o le mea saʻo, e ui lava e lē logolelei na mafatiaga, ae e maua le fiafia i le iloaina ua maua e se tasi le agaga paia o le Atua. E faapefea ona fesootaʻi le agaga o le Atua ma le fiafia?

Galuega o le Tino po o Fua o le Agaga?

E na o i latou e usiusitai i le Atua o ia o le pule, e mauaina le agaga paia o le Atua. (Galuega 5:32) E lē auina atu e Ieova lona agaga iā i latou o ē faia “galuega a le tino.” O na galuega “o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagaʻi, o le femisaʻi, o le losilosi vale, o le lotoa, o le finau vale, o le fevaevaeaʻiga, o maseiga, o le matauʻa, o le onaga, o le poula, ma mea faapena.” (Kalatia 5:19-21) E moni i le lalolagi i aso nei ua matuā taatele ai “galuega a le tino.” Ae o i latou o ē faia na galuega e lē maua le olioli moni ma le fiafiaga tumau. Na i lo lea, o le faia o na mea e faaleagaina ai se faiā lelei a se tasi ma ona aiga, uō ma ē masani. Ae o le laualuga o na mea uma, ua taʻua i le Afioga a le Atua o i  latou o ē “faia mea faapena, e lē fai le malo o le Atua mo latou tofi.”

I lona eseesega, e avatu e le Atua lona agaga iā i latou o ē atiina aʻe “fua o le Agaga.” O uiga e faia aʻe ai lenei fua o le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā.” (Kalatia 5:22, 23) Pe a tatou faaalia nei uiga, ua tatou atiina aʻe se faiā filemu ma isi ma le Atua, lea e iʻu i le fiafia moni. (Tagaʻi i le pusa.) E sili atu i lenā, e ala i le faaalia o le alofa, agalelei, mataalofa ma isi uiga o le Atua, ua tatou faafiafia le finagalo o Ieova ma maua le faamoemoe fiafia o le ola e faavavau i le lalolagi fou amiotonu a le Atua.

E Mafai Ona Fiafia pe a Faia Filifiliga Saʻo

Ina ua suʻesuʻe ma le naunau e Wolfgang ma Brigitte, o se ulugalii e alaala i Siamani le Tusi Paia, na la maua le tele o meafaitino lea e manatu i ai tagata e maua ai le fiafia. E talavou i laʻua ma lelei o la soifua mālōlōina. Na la laʻeiina ofu taugatā, nonofo i se fale manaia ma na ola se la pisinisi na iai. O le tele o lo la taimi na alu i le saʻilia o nisi meafaitino ae peitaʻi, e leʻi mafai ona la maua ai le fiafia moni. Ae mulimuli ane, na faia loa e Wolfgang ma Brigitte se filifiliga tāua. Na amata ona la tuuina atu le tele o le taimi ma taumafaiga i le saʻilia o mea faaleagaga ma taulaʻi atu i ni auala e vavalalata atu ai iā Ieova. O lea filifiliga na iʻu ai i le suia o o la uiga, lea na uunaʻia ai i laʻua e faafaigofie o la olaga ma galulue ai o ni paeonia po o faievagelia faataimi atoa o le Malo. I aso nei, o loo la galulue o ni tagata tauofo i le ofisa o le lālā o Molimau a Ieova i Siamani. E lē gata i lea, o loo la aʻoaʻoina se gagana Asia ina ia fesoasoani ai i tagata ese e aʻoaʻoina le upu moni o le Afioga a le Atua o le Tusi Paia.

Pe na maua e lenei ulugalii le fiafia moni? Ua faapea mai Wolfgang: “Talu ona ma saʻilia mea faaleagaga, ua sili atu ona ma fiafia ma faamalieina. Ua faamalosia foʻi la ma faaipoipoga ona o le auauna iā Ieova ma le lotoatoa. Na fiafia lo ma aiga i le taimi muamua peitaʻi, na iai o ma tiute tauave ma e eseese mea ma te fiafia i ai lea na māfua ai ona eseese o ma sini. Ae o le taimi nei, ua ma autasi ma saʻilia le sini e tasi.”

 Faapefea Ona Fiafia se Tasi?

I se faaupuga puupuu: ʻAlofia “galuega a le tino” ma atiaʻe “fua o le agaga [o le Atua].” Ina ia fiafia, e manaʻomia e se tasi ona faanaunau e maua se faiā vavalalata ma le Atua. O se tasi o loo tauivi e maua lea tulaga ua talafeagai i ai le fetalaiga a Iesu o se tasi e fiafia.

O lea la, ia aua neʻi faia se faaiʻuga sesē e faapea e lē mafai ona e maua se olaga fiafia. E moni, atonu i le taimi nei e lē o lelei lou soifua mālōlōina po o iai foʻi ni faafitauli i lau faaipoipoga. Pe atonu e lē o maua sau fanau po o e tauivi ina ia maua se galuega lelei. Atonu e lē tusa lou tulaga tau le tamaoaiga i le taimi ua mavae. Ae ia e lototele ma aua le lotovaivai! O le a foʻia e le pulega a le Malo o le Atua nei faafitauli ma le anoanoaʻi o isi. O le mea moni, ua lē o toe pine ae faataunuu e le Atua lana folafolaga e pei ona taʻua e le faisalamo: “O lou malo o le malo lea e faavavau lava . . . O loo e faamafola lou aao, ma faamaoona le manaʻo o [tagata ma] mea ola uma lava.” (Salamo 145:13, 16) E pei ona faamaonia e le faitau miliona o auauna a Ieova i le lalolagi aoao, o le manatuaina pea o lenei folafolaga a Ieova o le a saosaolaumea ai i lou fiafia i aso nei.—Faaaliga 21:3.

[Faamatalaga pito i lalo]

[Pusa/Ata i le itulau 6]

Vala e Saosaolaumea i le Fiafia

Ia alofa atu ma o le a alofagia ai oe e isi.

E avatu e le olioli iā te oe le malosi e feagai ai ma luʻi.

E fesoasoani le filemu iā te oe e tausia ai au faiā e aunoa ma ni fevaevaeaʻiga.

O le onosai e mafai ona e maua ai le fiafia e ui o e fesagaʻi ma faafitauli.

O le agalelei e tosina atu ai isi iā te oe.

O lou faaalia o le mataalofa, o le a faapena ona tali mai nisi pe a e manaʻomia se fesoasoani.

O le faatuatua o le a faamautinoa ai iā te oe le taʻitaʻiga alofa a le Atua.

O le agamalu o le a e maua ai le filemu o le loto, mafaufau ma le tino.

O le amio mamā po o le pulea o oe lava o le a faaitiitia ai au mea sesē.

[Ata i le itulau 7]

Ina ia e maua le fiafia, e manaʻomia ona e faamalieina ou manaʻoga faaleagaga