“Ia Oofu Outou i Ofutau Atoatoa Mai le Atua”

“Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.”—EFESO 6:11.

1, 2. I au lava upu, faamatala le ofutau faaleagaga lea e manaʻomia ona ofu e Kerisiano.

I LE uluaʻi senituri T.A., sa taʻutaʻua Roma i lona malosi. O le malosi o ʻautau a Roma na māfua ai ona mafai ona ia pulea le tele o vaega o le lalolagi i na ona pō. Na faamatalaina e se tusitala o talafaasolopito lenei ʻautau e faapea, “o le ʻautau aupito sili lea ona taulau manuia i le talafaasolopito.” O le ʻautau a Roma na lelei ona aʻoaʻoina ma toleniina i latou, ae sa faalagolago foʻi lo latou taulau manuia i o latou ofutau ma auupega. Na faaaogā e le aposetolo o Paulo le ofutau fitafita Roma e faataʻitaʻi ai le ofutau faaleagaga e manaʻomia e Kerisiano ina ia tau ai ma le manuia faasaga i le Tiapolo.

² Ua tatou maua faamatalaga o lenei ofutau faaleagaga i le Efeso 6:14-17. Na tusi Paulo: “Inā tutumau ia outou o fusia o outou sulugātiti i le faamaoni, ia oofu foʻi outou i le ufifatafata o le amiotonu; ma ia faaseevaeina o outou vae i le sauniga o le tala lelei o le filemu; ia faaopoopo i na mea uma ona tago atu i le talipupuni o le faatuatua, tou te mafai ai ona tinei o u fanafana mū uma lava a lē o loo leaga. Ia outou ave foʻi le puloutau o le faaolataga, ma le pelu a le Agaga, o le afioga lea a le Atua.” O le ofutau lea na faamatalaina e Paulo e toetoe lava puipuia ai le tino atoa o se fitafita Roma. Na te faaaogāina foʻi le pelu, o lana auupega autū lea e tau ai faasaga i le isi tagata.

3. Aiseā e ao ai ona tatou usiusitai i faatonuga a Iesu Keriso ma mulimuli i lana faaaʻoaʻoga?

³ E ese mai i ofutau, auupega ma toleniga, na faalagolago foʻi le taulau manuia o le ʻautau a Roma i le usiusitai o fitafita i lo latou taʻitaʻiʻau. E faapena foʻi i Kerisiano, e ao ona usiusitai iā Iesu Keriso, o lē ua faamatala mai e le Tusi Paia o le “taʻimua ma le pule i le nuu.” (Isaia 55:4) O ia foʻi o le ‘ulu o le ekalesia.’ (Efeso 5:23) Ua aumaia e Iesu iā i tatou faatonuga mo la tatou taua faaleagaga, ma saunia se faaaʻoaʻoga sili ona lelei i le auala e oofu ai i ofutau faaleagaga. (1 Peteru 2:21) Talu ai e telē le sootaga o uiga e pei o Keriso ma lo tatou ofutau faaleagaga, ua fautuaina ai la i tatou e le Tusi Paia ina ia fai ma a tatou “auupega” le finagalo o Keriso. (1 Peteru 4:1) A o tatou iloiloina vaega taʻitasi o le ofutau faaleagaga, ona tatou faaaogā lea o le faaaʻoaʻoga a  Iesu Keriso e faataʻitaʻi ai le tāua ma lona aogā.

Ia Puipuia le Sulugātiti, le Fatafata, ma Vae

4. I le ā le auala sa aogā ai le fusi i le ofutau o se fitafita, ma o le ā ua faataʻitaʻia mai ai?

⁴ Ia fusia le sulugātiti i le faamaoni. I taimi o le Tusi Paia, sa faaaogā e fitafita se fusipaʻu lautele e lua i le ono inisi (5 i le 15 senitimita) le lautele. Ua manatu nisi ʻaufaaliliu e ao ona faitauina faapea le fuaiupu, “ia fusi lelei lou sulugātiti i le upu moni.” Sa fesoasoani le fusi a le fitafita e puipuia ai lona sulugātiti, ma sa iai se mea e sulu ai le pelu. Pe a fusia e se fitafita lona sulugātiti o lona uiga ua ia sauni i le taua. Na faaaogāina e Paulo le fusi o le fitafita e faataʻitaʻi ai le tele e ao ona pulea ai o tatou olaga e le upu moni. E pei lava e ao ona fusimau ai i tatou, ina ia mafai ona tatou ola e ōgatusa ma le upu moni ma molimau atu e faatatau i ai i so o se taimi. (Salamo 43:3; 1 Peteru 3:15) O lea la, e manaʻomia ona tatou suʻesuʻe ma le filigā le Tusi Paia ma mafaufau loloto i ai. Sa i “totonu lava” o Iesu le tulafono a le Atua. (Salamo 40:8) Ina ua fesiligia o ia e tagata tetee, na ia tali atu e ala i le siiina mai o mau ua ia silafia.—Mataio 19:3-6; 22:23-32.

5. Ia faamatala le auala e fesoasoani ai fautuaga a le Tusi Paia iā i tatou i taimi o faigatā po o faaosoosoga.

⁵ Pe a taʻitaʻia i tatou i upu moni o le Tusi Paia, e puipuia ai i tatou mai mafaufauga sesē ma e mafai ona tatou faia ai ni faaiʻuga atamai. I taimi o faaosoosoga po o faigatā, o le a faamalosia e taʻiala o le Tusi Paia lo tatou faanaunauga e faia le mea saʻo. E pei lava ua tatou vaai atu i lo tatou Aʻoaʻo Sili o Ieova, ma faalogo i upu i o tatou tua o faapea mai: “O le ala lava lenei, ia outou savavali ai.”—Isaia 30:20, 21.

6. Aiseā e manaʻomia ai e o tatou loto se puipuiga, ma e faapefea ona leoleoina e le amiotonu?

⁶ Ufifatafata o le amiotonu. O le ufifatafata a se fitafita e na te puipuia se totoga tāua, o le fatu lea. O o tatou loto—le tagata i totonu, e manaʻomia se puipuiga faapitoa ona o faanaunauga leaga. (Kenese 8:21) O lea la, e ao ona tatou iloa ma naunau i tapulaa amiotonu a Ieova. (Salamo 119:97, 105) O lo tatou naunau i le amiotonu e tatou te teena ai mafaufauga o le lalolagi o le lē amanaʻia po o le faavaivaia o taʻiala manino a Ieova. E lē gata i lea, pe a tatou loto atu i le mea saʻo ma ʻinoʻino i le leaga, ua tatou ʻalofia le faia o se gaoioiga o le a faaleagaina ai o tatou olaga. (Salamo 119:99-101; Amosa 5:15) Ua avea Iesu ma faaaʻoaʻoga sili ona lelei e tusa ai ma lea tulaga, auā ua faapea mai le Tusi Paia e uiga iā te ia: “Ua e fiafia i le amiotonu, a ua e ʻinoʻino i le amio leaga.”—Eperu 1:9. *

7. Aiseā e manaʻomia ai e se fitafita Roma ni seevae malō, ma o le ā ua faaalia ai i lenā mea?

⁷ Ia faaseevaeina vae i le sauniga o le tala lelei o le filemu. Na manaʻomia e fitafita Roma ni seevae malō, talu ai i taimi o latou fetauaʻiga e masani ona latou savavali i le mamao e 20 maila (30 kilomita) i aso taʻitasi a o latou ofuina pe tauaveina ofutau ma auupega e 60 pauna (27 kilokalama) le mamafa. Ua talafeagai ona faaaogā e Paulo seevae e faaalia ai lo tatou nofo sauni e talaʻi le feʻau o le Malo i tagata uma o le a faalogo i ai. E tāua  lenei mea, auā o le a faapefea ona iloa e tagata Ieova pe afai tatou te lē o sauni ma naunau e talaʻi?—Roma 10:13-15.

8. E faapefea ona tatou faaaʻoaʻo iā Iesu o se tagata talaʻi o le tala lelei?

⁸ O le ā le gaoioiga aupito i sili ona tāua i le soifuaga o Iesu? Na ia fetalai atu i le kovana Roma o Ponotio Pilato: ‘O le mea lea na ou sau ai i le lalolagi, ina ia ou molimau i le upu moni.’ Sa talaʻi Iesu i so o se tasi lava e naunau e fia faalogo, ma sa fiafia o ia i lana faiva lea na ia faamuamua ai na i lo ona manaʻoga faaletino. (Ioane 4:5-34; 18:37) Pe afai tatou te pei o Iesu, e naunau e faalauiloa atu le tala lelei, o le a tatou maua le tele o avanoa e taʻu atu ai i isi. E lē gata i lea, o le a fesoasoani lo tatou maelega i le faiva tatou te malolosi ai faaleagaga.—Galuega 18:5.

O le Talipupuni, le Puloutau ma le Pelu

9. Pe na faapefea e le talipupuni ona puipuia se fitafita Roma?

⁹ Le talipupuni o le faatuatua. E tusa ai ma le upu Eleni ua faaliliuina i le “talipupuni” o loo faasino atu i le talipupuni lea e toetoe mafai ona pupuni ai le tino atoa. E puipuia ai mai “ū fanafana mū” ia o loo taʻua i le Efeso 6:16. I taimi o le Tusi Paia, sa faaaogā ai e fitafita ia ū e faia i ofe e iai matatao e utu i vai oona ona tutu lea. Ua faamatalaina e se tasi tagata aʻoga nei ū o se “tasi o auupega e aupito i sili ona mataʻutia i faiga taua i aso anamua.” Afai e leai se talipupuni a se fitafita e puipuia ai o ia mai ū fanafana mū, e ono matuiā lona manuʻa pe oo lava ina fasiotia ai.

10, 11. (a) O ā “ū fanafana mū” a Satani e mafai ona faavaivaia ai lo tatou faatuatua? (e) Ua faaalia faapefea e le faaaʻoaʻoga a Iesu le tāua o le faatuatua i taimi faigatā?

¹⁰ O ā “ū fanafana mū” o loo faaaogā e  Satani e faavaivaia ai lo tatou faatuatua? Atonu na te faapogaia sauāga po o teteega i le aiga, i galuega po o le aʻoga. O le faanaunauga e fia maua le tele o meafaitino, ma le mailei o amioga lē mamā ua faaleagaina faaleagaga ai nisi Kerisiano. Ina ia puipuia i tatou mai na lamatiaga e ao ona tatou “tago atu i le talipupuni o le faatuatua.” E maua le faatuatua mai le aʻoaʻoina e uiga iā Ieova, fesootaʻi e lē aunoa ma ia i le tatalo ma ia malamalama i le auala na te puipuia ma faamanuia ai i tatou.—Iosua 23:14; Luka 17:5; Roma 10:17.

¹¹ A o iai Iesu i le lalolagi, na ia faaalia le tāua o le mauaina o le faatuatua malosi i taimi faigatā. Na ia faatuatuaina faaiʻuga a lona Tamā ma sa olioli e fai le finagalo o le Atua. (Mataio 26:42, 53, 54; Ioane 6:38) E ui ina sa tigāina o ia i le faatoʻaga i Ketesemane, ae na fetalai atu Iesu i lona Tamā: “Aua le faia loʻu loto, a o lou finagalo.” (Mataio 26:39) E leʻi galo iā Iesu le tāua o le tausia o le faamaoni ma faafiafia le finagalo o lona Tamā. (Faataoto 27:11) Pe afai e iai so tatou mautinoa faapena iā Ieova, o le a lē faavaivaia ai lo tatou faatuatua ona o faitioga po o teteega. Na i lo lea, o le a faamalosia lo tatou faatuatua pe afai tatou te faalagolago i le Atua, alofa iā te ia ma tausia ana tulafono. (Salamo 19:7-11; 1 Ioane 5:3) E lē mafai ona faatusatusa ni taui faaletino po o le faamalieina o tuʻinanauga ia e vave mavae, i faamanuiaga mai iā Ieova ua faatalitalia e i latou e alolofa iā te ia.—Faataoto 10:22.

12. O le ā le vaega tāua o i tatou e puipuia e le puloutau faafaatusa, ma aiseā e tāua ai lenā puipuiga?

¹² Le puloutau o le faaolataga. O le puloutau  e puipuia ai le ulu ma le faiʻai o le fitafita—le puna o mafaufauga. Ua faatusaina lo tatou faamoemoe faa-Kerisiano i se puloutau talu ai e puipuia ai o tatou mafaufau. (1 Tesalonia 5:8) E ui lava ua toe fuataʻiina o tatou mafaufau i le iloa lelei o le Afioga a le Atua, ae o i tatou o tagata vaivai e lē lelei atoatoa. E faigofie lava ona faaleagaina o tatou mafaufau. O sini o loo faaauiluma i lenei faiga o mea e mafai ona faalavelavea ai i tatou pe suitulaga i lo tatou faamoemoe mai le Atua. (Roma 7:18; 12:2) Na iʻuvale taumafaiga a le Tiapolo e taʻitaʻi sesē Iesu e ala i le ofoina atu iā te ia o “malo uma o le lalolagi ma o latou matagofie.” (Mataio 4:8) Na matuā teena e Iesu lenā ofo, ma ua faapea mai Paulo e faatatau iā te ia: “Na faatauvaa iā te ia [Iesu] le mā, ona o le olioli sa tuu i ona luma, ua nofo foʻi o ia i le itu taumatau o le nofoālii o le Atua.”—Eperu 12:2.

13. E faapefea ona tausia lo tatou mautinoa i le faamoemoe o i luma?

¹³ O le mautinoa sa iā Iesu e lē o se mea na teʻiteʻi ona maua. Pe afai e faatumu o tatou mafaufau i faanaunauga ma sini o lenei faiga o mea na i lo le taulaʻi atu i le faamoemoe o i luma, o le a tauau ina vaivai lo tatou faatuatua i folafolaga a le Atua. Mulimuli ane, o le a oo ina mou atu lo tatou faamoemoe. Ae i le isi itu, afai e lē aunoa ona tatou mafaufau loloto i folafolaga a le Atua, o le a faaauau ona tatou olioli i le faamoemoe o loo i o tatou luma.—Roma 12:12.

14, 15. (a) O le ā la tatou pelu faafaatusa ma e faapefea ona faaaogā? (e) Ia faataʻitaʻi le auala e fesoasoani ai le pelu a le agaga iā i tatou e teena faaosoosoga.

¹⁴ O le pelu a le agaga. O afioga a le Atua po o feʻau ua i le Tusi Paia ua pei o se pelu e faataumaʻai ona itu, e na te mafai ona soloiesea aʻoaʻoga sesē a lotu ma fesoasoani i tagata loto faamaoni e maua le saʻolotoga faaleagaga. (Ioane 8:32; Eperu 4:12) E mafai e lenei pelu faaleagaga ona puipuia i tatou mai le tele o faaosoosoga po o taumafaiga a ē ua fulitua i le upu moni ina ia faaleagaina lo tatou faatuatua. (2 Korinito 10:4, 5) Maʻeu lo tatou loto faafetai ona o ‘tusi paia uma lava e mai le agaga o le Atua ma ua saunia ai tatou i galuega lelei uma lava’!—2 Timoteo 3:16, 17.

¹⁵ Ina ua faaosoosoina o ia e Satani i le vaomatua, na faaaogā ma le uigā e Iesu le pelu a le agaga e tetee atu ai i manatu sesē ma faaosoosoga faaʻoleʻole. Na ia tali atu i luʻi uma a Satani e faapea: “Ua tusia.” (Mataio 4:1-11) O Tavita, o ia o se tasi o Molimau a Ieova i Sepania, na ia iloa foʻi le aogā o mau o le Tusi Paia e teena ai faaosoosoga. Ina ua 19 ona tausaga, na faapea atu se tamaʻitaʻi talavou aulelei e la te faigaluega faatasi i se kamupani faamamā, “e ā pe a ta ō ta te eva i se mea.” Na teena e Tavita le valaaulia a le tamaʻitaʻi ma talanoa i lona pule ina ia faigaluega i se isi vaega ese ina ia aua neʻi toe tulaʻi mai le tulaga lea. Na faapea mai Tavita: “Na ou manatua le faaaʻoaʻoga a Iosefa. Na ia teena amioga lē mamā ma vave ona ʻalo ese mai ai. Na ou faia le mea lenā.”—Kenese 39:10-12.

16. Ia faamatala le māfuaaga tatou te manaʻomia ai toleniga ina ia “talaʻitonuina ai le upu moni.”

¹⁶ Na faaaogā foʻi e Iesu le pelu a le agaga e  fesoasoani ai i isi e sosola ese mai le pule a Satani. Na fetalai Iesu: “O laʻu aʻoaʻoga e lē o saʻu lava, a o lana na auina mai aʻu.” (Ioane 7:16) Ina ia faaaʻoaʻo i le auala atamai na aʻoaʻo atu ai Iesu tatou te manaʻomia ai ni toleniga. E tusa ai ma fitafita Roma, na tusi le tusitala o talafaasolopito o Iosefasa: “E ao i fitafita ona matuā filigā e faamalositino i aso uma e pei lava o loo tau i se taua, ma o le māfuaaga lenā sa faigofie ai ona latou onosaia faigatā o fetauaʻiga.” E manaʻomia ona tatou faaaogā le Tusi Paia i la tatou taua faaleagaga. E lē gata i lea, e ao ona tatou ‘taumafai ina ia avea i tatou ma ē ua fiafia mai i ai le Atua, o ē faigaluega e leai se mea e mā ai, ma talaʻitonuina le upu moni.’ (2 Timoteo 2:15) E maʻeu lo tatou faamalieina pe a tatou faaaogā le Tusi Paia e tali ai fesili a se tagata fiafia!

Ia Tatalo i Aso Uma

17, 18. (a) O le ā le aogā o le tatalo i le teena o Satani? (e) Ia aumai se faaaʻoaʻoga o le tāua o le tatalo.

¹⁷ Ina ua uma ona iloiloina le ofutau atoatoa faaleagaga, ona toe faaopoopo mai lea e Paulo o se isi fautuaga tāua. Ina ia teena Satani e ao i Kerisiano ona fai “talotaloga ma faatoga uma.” O le ā le tele tatou te tatalo ai? Na tusi Paulo: ‘Ia outou tatalo i le agaga i aso uma lava.’ (Efeso 6:18) Pe a tatou fesagaʻi ma faaosoosoga, tulaga faigatā po o le lotovaivai, e mafai ona matuā faamalosia i tatou e le tatalo. (Mataio 26:41) “Sa tatalo atu [Iesu] . . . ma ʻaiʻoi atu ma le tagi tele ma loimata i lē na mafaia ona faaola iā te ia nai le oti, na faafofogaina foʻi o ia ona o lona migao.”—Eperu 5:7.

¹⁸ Ua faapea mai Milagros o lē na tausia lana tane ua maua i se gasegase faaumiumi mo le sili atu i le 15 tausaga: “Pe a ou lagona le lotovaivai ou te faalatalata atu iā Ieova i le tatalo. E leai se tasi e mafai ona fesoasoani mai iā te aʻu e pei o ia. Ioe, e iai taimi na ou lagona ai ua lē mafai ona ou lavatia. Ae peitaʻi, pe a uma ona ou tatalo iā Ieova, ou te lagona le toe faafouina o loʻu malosi ma ua toe lelei oʻu faalogona.”

19, 20. O le ā tatou te manaʻomia ina ia manumalo ai i la tatou taua faasaga iā Satani?

¹⁹ Ua iloa e le Tiapolo ua saasaa ona aso ma ua ia taumafai malosi ai ina ia manumalo iā i tatou. (Faaaliga 12:12, 17) E ao ona tatou teena lenei fili malosi ma “tau le taua lelei i la le faatuatua.” (1 Timoteo 6:12) E manaʻomia ai le matuā tele o le malosi. (2 Korinito 4:7) E tatou te manaʻomia foʻi le fesoasoani a le agaga paia o le Atua ma e ao ona tatou tatalo ina ia maua. Na fetalai Iesu: “O outou e leaga, afai ua iloa e outou ona avatu o mea lelei ma a outou fanau, e le sili ea ona foaʻiina mai e lo outou Tama o i le lagi le Agaga Paia i ē ole atu ai iā te ia?”—Luka 11:13.

²⁰ E manino la, e tāua tele lo tatou ofuina o le ofutau atoatoa ua saunia e Ieova. O le ofuina o lenei ofutau faaleagaga e manaʻomia ai le atiina aʻe o uiga faale-Atua e pei o le faatuatua ma le amiotonu. E manaʻomia ona tatou naunau i le upu moni e pei ua fusia ai i tatou, ia nofo sauni e taʻu atu le tala lelei i so o se taimi ma ia teu i manatu le faamoemoe o loo i o tatou luma. E ao ona aʻoaʻoina i tatou ina ia faaaogā ma le atamai le pelu a le agaga. E ala i le ofuina o le ofutau atoatoa mai le Atua, e mafai ai ona tatou manumalo i la tatou taua ma agaga leaga ma aumaia ai le viiga i le suafa paia o Ieova.—Roma 8:37-39.

[Faamatalaga pito i lalo]

O le a Faapefea Ona E Tali?

• O ai ua saunia le faaaʻoaʻoga sili o le ofuina o le ofutau faaleagaga, ma aiseā e ao ai ona tatou iloiloina lelei lana faaaʻoaʻoga?

• E faapefea ona puipuia o tatou mafaufau ma loto?

• E faapefea ona avea i tatou ma ē atamamai i le faaaogāina o le pelu a le agaga?

• Aiseā e ao ai ona tatou tatalo i aso uma?

[Fesili mo le Suʻesuʻega]

[Ata i le itulau 17]

O le suʻesuʻe ma le filigā o le Tusi Paia e uunaʻia ai i tatou e faalauiloa le tala lelei i so o se mea

[Ata i le itulau 18]

O lo tatou faamoemoe mautinoa e fesoasoani iā i tatou e feagai ai ma faigatā

[Ata i le itulau 19]

Po o e faaaogāina le “pelu a le agaga” i le faiva?