“Ia Outou Loto Tetele i le Alii”
“Ia Outou Loto Tetele i le Alii”
“Ia outou loto tetele i le Alii, ma le malosi o lona mana.”—EFESO 6:10.
1. (a) O le ā le taua uiga ese sa faia pe tusa ma le 3,000 tausaga ua mavae? (e) Aiseā na manumalo ai Tavita?
PE TUSA ma le 3,000 tausaga ua mavae, na fesagaʻi ai ni tagata tau se toʻalua mai ʻautau e lua i laufanua o le taua. O le tagata tau laʻitiiti o le tama leoleo mamoe lea o Tavita. O loo tū i ona luma Koliata o se tamāloa e uiga ese le malosi ma le maualuga. O le mamafa o lona ufifatafata uʻamea e 125 pauna [57 kilokalama] ma o loo ia tauaveina se tao ma se pelu telē lava. E lē o ofuina ni ofutau o Tavita ma e pau lana auupega o loo iai o le maatā. Na ita tele le Filisitia tino ese o Koliata ona ua na o se tamaitiiti le Isaraelu lea o le a la tau. (1 Samuelu 17:42-44) E tutusa lelei le manatu sa i tagata Isaraelu ma tagata Filisitia i le iʻuga e oo iai le taua. Peitaʻi, e lē faapea e manumalo i taimi uma o le taua ē ua malolosi. (Failauga 9:11) Na manumalo Tavita ona o le malosi mai iā Ieova. Na ia faapea mai: “O loo iā Ieova le taua.” Ua taʻua i tala o le Tusi Paia e faapea: “Ua mālō Tavita i le Filisitia i le maatā ma le maa.”—1 Samuelu 17:47, 50.
2. O le ā le ituaiga o taua o loo tau ai Kerisiano?
2 E lē auai Kerisiano i faiga taua faaletino. E ui lava latou te nonofo filemu ma tagata uma, ae o loo latou tau i se taua faaleagaga faasaga i ni fili malolosi. (Roma 12:18) I le mataupu mulimuli o lana tusi i tagata Efeso, na faamatala ai e Paulo se taua e aofia ai Kerisiano uma. Na ia tusi: “Tatou te lē tau ma tagata, a o alii sili, ma faipule, ma alii o le pōuliuli o lenei lalolagi, atoa ma agaga leaga i mea o i le lagi.”—Efeso 6:12.
3. E tusa ai ma le Efeso 6:10, o le ā tatou te manaʻomia ina ia faamautinoa ai lo tatou manumalo?
3 O na “agaga leaga” o Satani ma ana temoni, o ē faanaunau e faaleagaina la tatou faiā ma Ieova le Atua. Talu ai e malolosi tele i latou na i lo tatou, ua pei ai lo tatou tulaga o Tavita ma tatou te lē taulau seʻi vaganā ua faalagolago i le Atua mo le malosi. O le mea moni, ua faalaeiau i tatou e Paulo ina ia “loto tetele i le Alii, ma le malosi o lona mana.” (Efeso 6:10) Ina ua uma ona avatu lenā fautuaga, ona faamatala lea e le aposetolo o fesoasoani faaleagaga ma uiga faa-Kerisiano e mafai ona tatou manumalo ai i le taua.—Efeso 6:11-17.
4. O ā manatu autū e lua o le a tatou talanoaina i lenei mataupu?
4 Seʻi o tatou iloiloina muamua faamatalaga a le Tusi Pai e faatatau i togafiti ma le malosi o lo tatou fili. A uma ona tatou iloiloina lea o gaoioiga e ao ona tatou faatinoina e puipuia ai i tatou. Pe afai tatou te mulimuli i faatonuga a Ieova ona tatou mautinoa lea o le a lē manumalo o tatou fili iā i tatou.
Tau Faasaga i Agaga Leaga
5. E faapefea i le auala o loo faamatalaina ai lenei taua i le uluaʻi gagana i le Efeso 6:12 ona tatou iloa ai togafiti a Satani?
5 Ua faamatalaina e Paulo o loo tatou “tau . . . ma agaga leaga i mea o i le lagi.” O le agaga leaga sili o Satani le Tiapolo, le “alii o temoni.” (Mataio 12:24-26) I le uluaʻi gagana na tusia ai le Tusi Paia, o loo faatusaina la tatou taua e pei o se piiga. Pe a faia tauvaga piiga i Eleni anamua, sa taumafai le isi tagata taalo ina ia faapaʻū i lalo i le palapala le isi tagata. E faapena foʻi ona manaʻo Satani ina ia tatou vaivai faaleagaga ma paʻūʻū ai. E faapefea ona ia faapogaia i tatou ia faia faapea?
6. Ia faaaogā le Tusi Paia e faaalia ai le auala e mafai e Satani ona faaaogā ai togafiti eseese e faavaivaia ai lo tatou faatuatua.
6 E ono gaoioi le Tiapolo e pei o se gata, se leona tagi po o se agelu o le malamalama. (2 Korinito 11:3, 14; 1 Peteru 5:8) E mafai ona ia faaaogāina tagata e sauāina pe faalotovaivaia i tatou. (Faaaliga 2:10) Talu ai o loo pulea e Satani le lalolagi atoa, e mafai la ona ia faaaogāina tuʻinanauga o le lalolagi ma faatosinaga e maileia ai i tatou. (2 Timoteo 2:26; 1 Ioane 2:16; 5:19) E mafai ona ia faaaogāina mafaufauga o le lalolagi po o ē ua fulitua i le upu moni e taʻitaʻi sesē ai i tatou e pei lava ona ia faasesēina o Eva.—1 Timoteo 2:14.
7. O le ā le itu ua faatapulaaina ai temoni ma o ā tulaga lelei ua tatou olioli ai?
7 E ui e foliga mai e malolosi auupega ma le mana o Satani ma ana temoni ae peitaʻi ua faatapulaaina. E lē mafai e nei agaga leaga ona faamalosia i tatou e faia mea leaga e lē fiafia i ai le finagalo o lo tatou Tamā o i le lagi. Na foafoaina i tatou ma le tomai e filifili ai i le saʻo ma le sesē, ma pulea o tatou mafaufauga ma gaoioiga. Ae lē gata i lea, tatou te lē o tau na o i tatou. E tutusa le tulaga o tatou aso ma le taimi o Elisaia: “E toʻatele ua iā te i tatou i ē ua iā te i latou.” (2 Tupu 6:16) Ua faamautinoa mai e le Tusi Paia iā i tatou pe afai tatou te gauaʻi i le Atua ma tetee i le Tiapolo, o le a sola ese o ia mai iā i tatou.—Iakopo 4:7.
Ia Iloa Togafiti a Satani
8, 9. O ā puapuaga na faapogaia e Satani iā Iopu ina ia faaleagaina ai lona faatuatua, ma o ā lamatiaga faaleagaga ua tatou fesagaʻia i aso nei?
8 E tatou te lē valea i togafiti a Satani talu ai ua faailoa mai e le Tusi Paia ana gaoioiga masani. (2 Korinito 2:11) Sa faaaogā e le Tiapolo faafitauli matuiā tau tamaoaiga, maliliu o ē pele, teteega mai aiga, mafatiaga o le tino ma faitioga pepelo mai uō e tau faasaga ai i le tagata amiotonu o Iopu. Na matuā mafatia Iopu ma manatu ai ua lafoaʻia o ia e Ieova. (Iopu 10:1, 2) E ui atonu e lē faapogaia tuusaʻo e Satani faafitauli i aso nei, ae o loo aafia le toʻatele o Kerisiano i na faigatā ma e mafai ona faaaogā e le Tiapolo nei tulaga faigatā e faavaivaia ai.
9 Ua matuā faateleina lamatiaga faaleagaga i lenei taimi o le iʻuga. Ua tatou ola i se lalolagi ua faamamafa ai le saʻilia o meafaitino na i lo sini faaleagaga. Ua faaalia soo mai e faasalalauga feusuaʻiga lē mamā faapea, o le mea lea e maua ai le fiafia na i lo se mea e māfua ai faanoanoaga. O le toʻatele o tagata ua “tele le manaʻo i mea faafiafia a e leai se manaʻo i le Atua.” (2 Timoteo 3:1-5) O nei ituaiga o mafaufauga e mafai ona afāina ai lo tatou tulaga faaleagaga seʻi vaganā ai ua tatou “faamalolosi ona finau mo le faatuatua.”—Iuta 3.
10-12. (a) O le ā se tasi o lapataʻiga na avatu e Iesu i lana talafaatusa i le tagata lūlū saito? (e) Ia faamatala le auala e mafai ona fetinaiina ai gaoioiga faaleagaga.
10 O se tasi o togafiti a Satani e masani ona taulau manuia ai, o le uunaʻia lea o i tatou e pupū atu i le saʻilia o meafaitino a lenei lalolagi. I lana talafaatusa i le tagata lūlū saito na lapataʻi mai Iesu o nisi o taimi, “o le loto popole i mea a lenei lalolagi, ma le pepelo o le ʻoa ua fetinaiina ai le upu [o le malo].”—Mataio 13:18, 22.
11 I le vao o le teropika, e mafai ona maua ai le ituaiga mati e taʻua o le mati sosolo. E faasolosolo mālie ona ola i luga o se ogālaau o se isi laau. E auaumālie ona siʻomia e le mati le laau lea e sosolo ai ma e atili malolosi ai ona aa. E mitiiaina e aa o le mati toetoe o mea lelei uma mai le palapala lea e siʻomiaina ai le laau, a o lau pito i luga o le mati e punitia ai le oo atu o le malamalama i le laau lea o loo sosolo i ai ma oo ai ina pe.
12 I se auala faapena, e mafai ona faasolosolo mālie ona alu uma le tele o lo tatou taimi ma le malosi i le popole i mea a le olaga nei, saʻilia o le tamaoaiga ma se olaga sologa lelei. Pe a tosina atu o tatou mafaufau i mea a le lalolagi, e faigofie ai ona lafoaʻia suʻesuʻega a le tagata lava ia ma ua fai ma masani le misia o sauniga Kerisiano, ma ua lē maua ai taumafa faaleagaga. Ua suia gaoioiga faaleagaga i le saʻilia o meafaitino ma ua faigofie ai ona maileia i tatou e Satani.
E Manaʻomia Ona Tatou Tumau
13, 14. O le ā e ao ona tatou faia pe a osofaʻi mai Satani?
13 Na faalaeiau Paulo i le ʻauuso talitonu ina ia “tetee atu i togafiti a le tiapolo.” (Efeso 6:11) O le mea moni e lē mafai ona tatou faaumatia le Tiapolo ma ana temoni. Ua tofia e le Atua Iesu Keriso e faia le galuega lenā. (Faaaliga 20:1, 2) Peitaʻi, e ao pea ona tatou “tetee atu” seʻia aveesea Satani ina ia lē lofitūina i tatou i ana osofaʻiga.
14 Na faamamafa foʻi e le aposetolo o Peteru le manaʻomia ona tetee atu iā Satani. Na tusi Peteru: “Ia outou faautauta, ia outou mataala, ona o lē ua fai outou mona fili, o le tiapolo lea, o loo fealualuaʻi o ia e pei o se leona tagi, ua saʻili se tasi e ʻaina e ia; ia outou tetee atu iā te ia, o mausalī outou i le faatuatua, ina ua outou iloa o loo oono lo outou ʻau uso o i le lalolagi i ia lava mea tigā.” (1 Peteru 5:8, 9) O le mea moni, e tāua le lagolagosua a o tatou uso ma tuafāfine Kerisiano, ina ia mafai ona tatou tutū mausalī pe a osofaʻi mai Satani e pei o se leona tagi.
15, 16. Aumai se faaaʻoaʻoga faale-Tusi Paia e faaalia ai le auala o le lagolagosua o le ʻauuso e fesoasoani iā i tatou e tutū mausalī ai.
15 Pe a tagi se leona e latalata ane i le mea o iai aila i fanua laugatasi o Aferika, latou te ono gaoioi e ala i le tamomoʻe saosaoa ina ia sao. Ae o elefane o se faaaʻoaʻoga lelei lea o le felagolagomaʻi. Ua faamatala mai e se tusi: “O le auala e masani ona faia e elefane e puipuia ai i latou, o le faia lea o se liʻo ona faasasaga lea o elefane matutua i le fili ae puipuia tamaʻi elefane i totonu o le liʻo.” (Elephants—Gentle Giants of Africa and Asia) E seāseā ona osofaʻia tamaʻi elefane e se leona ona o lenā faaaliga o le malosi ma le lagolagosua.
16 E faapena ona manaʻomia ona tatou faatasitasi ma galulue soosootauʻau ma o tatou uso, o ē malolosi i le faatuatua, pe a oo ina faamataʻuina i tatou e Satani ma ana temoni. Na taʻutino mai e Paulo le avea o isi uso Kerisiano ma “faamatalaloto” iā te ia i taimi o lona faafalepuipui i Roma. (Kolose 4:10, 11) O le upu Eleni ua faaliliuina i le “faamatalaloto” e na ona faatasi ona maua i uluaʻi tusitusiga i le faa-Eleni o le Mataio i le Faaaliga. E tusa ai ma se lomifefiloi, “pe a faaaogā lenei upu o se veape, e faauiga atu i vailaau e faaitiitia ai le tigā.” (Vine’s Expository Dictionary of New Testament Words) E pei o se vai nini na te faaitiitia le tigā o se manua, e faapena le lagolagosua a tagata tapuaʻi taʻumatuaina o Ieova e faateʻa ai le tigā e māfua ona o puapuaga tau faalogona po o mafatiaga o le tino.
17. O le ā e mafai ona fesoasoani iā i tatou e faamaoni ai i le Atua?
17 O faalaeiauga mai uso Kerisiano i aso nei ua mafai ona faamalosia ai lo tatou faanaunauga e auauna ma le faamaoni i le Atua. Ua faapitoa lava ona naunau toeaina Kerisiano e saunia le fesoasoani faaleagaga. (Iakopo 5:13-15) O vala e fesoasoani i lo tatou faamaoni e aofia ai le suʻesuʻe i le Tusi Paia e lē aunoa ma le auai i sauniga faa-Kerisiano, fonotaga ma tauaofiaga. O la tatou lava faiā vavalalata ma le Atua e fesoasoani iā i tatou e tumau ai i le faamaoni iā te ia. O le mea moni, pe tatou te aai, inu pe faia so o se mea, e ao ona tatou faia mea uma ia viia ai le Atua. (1 Korinito 10:31) E lē gata i lea, e manaʻomia foʻi ona faalagolago iā Ieova faatasi ma le tatalo ina ia mafai ai ona faafiafia lona finagalo.—Salamo 37:5.
18. Aiseā e lē tatau ai ona tatou fiu e ui i tulaga faigatā ia e faavaivaia ai i tatou?
18 O nisi taimi e sau ai osofaʻiga a Satani pe a tatou vaivai faaleagaga. E osofaʻia e se leona se manu ua vaivai. O faafitauli i aiga, faigatā tau tamaoaiga po o le maʻi e mafai ona faavaivaia ai lo tatou itu faaleagaga. Ae ia aua neʻi fiu ma tuua le faia o mea e faafiafia ai le finagalo o le Atua, auā na faapea mai Paulo: “Pe a ou vaivai, ona ou malosi ai lea.” (2 Korinito 12:10; Kalatia 6:9; 2 Tesalonia 3:13) O le ā le uiga o lana faamatalaga? O lona uiga, o le mana o le Atua e mafai ona fesoasoani i o tatou vaivaiga faaletagata pe afai tatou te ole atu iā te ia mo le malosi. O le manumalo o Tavita iā Koliata ua faaalia ai e mafai e le Atua ma na te faamalosia ona tagata. Ua faamaonia e Molimau a Ieova i aso nei i taimi o faigatā mataʻutia, latou te lagona le faamalosiau o le Atua.—Tanielu 10:19.
19. Aumai se faaaʻoaʻoga e faaalia ai le auala e mafai ona faamalosiau ai Ieova i ana auauna.
19 Na tusi mai se ulugalii faaipoipo e tusa ai ma le lagolagosua a le Atua iā i laʻua e faapea: “I le tele o tausaga o ma auauna iā Ieova o se tane ma se avā ua ma olioli i le tele o faamanuiaga ma iloa ai le toʻatele o tagata lelei. Ua toleniina ma faamalosiau maʻua e Ieova ina ia tumau i tulaga faigatā. I le pei o Iopu, ma te leʻi malamalama i le māfuaaga na tutupu ai mea peitaʻi, na ma mautinoa na fesoasoani pea Ieova iā i maʻua.”
20. O ā faamaoniga faale-Tusi Paia ua faaalia ai e lagolagoina e Ieova ona tagata?
20 E lē faapuupuuina aao o Ieova na te sapasapaia ma faamalosia ona tagata faamaoni. (Isaia 59:1) Na pese le faisalamo o Tavita: “E taofia i luga e Ieova atoa uma ē paʻūʻū; o ia foʻi lē faatusaʻoina o ē ua faanoʻunoʻu uma lava.” (Salamo 145:14) O le mea moni, e tauaveina e lo tatou Tamā o i le lagi a tatou “avega” i aso uma ma saunia mea tatou te manaʻomia.—Salamo 68:19.
Tatou te Manaʻomia le “Ofutau Atoatoa Mai le Atua”
21. Na faamamafa faapefea e Paulo le manaʻomia o le ofutau faaleagaga?
21 Ua uma ona tatou talanoaina nisi o auala a Satani ma le manaʻomia ona tutū mausalī i ana osofaʻiga. O lea, e ao la ona tatou iloiloina se isi fesoasoani tāua mo le puipuia o lo tatou faatuatua. E faalua ona taʻua e Paulo i lana tusi i tagata Efeso se mea e manaʻomia e tetee atu ai i togafiti a Satani, ma ia taulau i la tatou taua ma agaga leaga. Na tusi Paulo: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo . . . Ia outou tago ai i ofutau atoatoa mai le Atua, ina ia outou mafaia ona tutū ma tetee atu pe a oo i le aso vale, pe a uma ona outou faia o mea uma, tou te tutumau ai lava.”—Efeso 6:11, 13.
22, 23. (a) O le ā e aofia ai i la tatou ofutau faaleagaga? (e) O le ā o le a tatou iloiloina i le mataupu o sosoo mai?
22 Ioe, e manaʻomia ona tatou ofuina le “ofutau atoatoa mai le Atua.” Ina ua tusi e Paulo lana tusi i tagata Efeso, na leoleoina o ia e se fitafita Roma lea atonu sa ia ofuina i nisi taimi se ofutau. Ae peitaʻi, na faagaeeina e le Atua le aposetolo o Paulo ina ia faamatala le matuā tāua i auauna a Ieova ona ofuina le ofutau faaleagaga.
23 O lenei ofutau mai le Atua e aofia ai uiga e manaʻomia mo Kerisiano atoa ma sauniuniga faaleagaga ua saunia e Ieova. O le a tatou iloiloina i le mataupu o sosoo mai vaega taʻitasi o le ofutau faaleagaga. O le a mafai ai ona tatou iloa pe o faapeʻī ona tatou sauniuni mo la tatou taua faaleagaga. Ae i le taimi e tasi, o le a iloa ai le auala ua fesoasoani mai ai le faaaʻoaʻoga matagofie a Iesu Keriso iā i tatou, ia taulau manuia e tetee atu iā Satani le Tiapolo.
O le a Faapefea Ona E Tali?
• O le ā le taua o loo tau e Kerisiano uma?
• Ia faamatala nisi o togafiti a Satani.
• E faapefea i le lagolagosua a uso talitonu ona faamalosiau ai i tatou?
• O le malosi o ai tatou te faalagolago i ai ma aiseā?
[Fesili mo le Suʻesuʻega]
[Ata i le itulau 11]
O Kerisiano o ‘loo tau ma agaga leaga i mea o i le lagi’
[Ata i le itulau 12]
O le popole i mea o lenei faiga o mea e mafai ona fetinaiina ai le upu o le malo
[Ata i le itulau 13]
E mafai ona avea uso Kerisiano ma “faamatalaloto”
[Ata i le itulau 14]
Pe e te tatalo i le Atua mo le malosi?