Le Matagofie o Foafoaga a Ieova

“Le Oloa Tele Mai le Sami”

I LE goto o le lā, ua agi mālie mai ai se savili ma galugalu ai le fogātai, ma fafati lemū atu ai galu i le matafaga. O le leo o le fafati mālie o galu ua matuā tosina atu ai le toʻatele o tagata o ē lolofi atu i le matafaga e mālōlō ma maua ai se toʻafilemu. *

Ua iai vaega uumi o matafaga i le faitau afe o maila o talafatai o le lalolagi atoa. O lenei vaevaeina o le oneone ma le vai, e ui ina fesuisuiaʻi ae ua faatuaoi ai le fafati atu o galu i le matafaga. O le tulaga lenā na fuafuaina ai e Lē na Foafoaina Mea. Ua faalauiloa mai e le Atua e faatatau iā te ia lava e faapea, ua ia “tuuina le oneone e fai ma tuaoi o le sami.” Ua ia faapea mai atili: “O le tulafono e faavavau lea, e lē masopoia; e ui ina fati tetele mai ona galu, e lē mafaia lava; e ui ina taalili mai, e lē masopoia lava.”—Ieremia 5:22; Iopu 38:8; Salamo 33:7.

O le mea moni, o le tele o vaega o lo tatou lalolagi, e ufitia i le vai, e lē pei o isi paneta ia e faataamilo i le lā. E sili atu i le 70 pasene o le lalolagi o loo ufitia i le vai. Ina o sauniunia e Ieova le lalolagi mo le ʻaināina e tagata, na ia poloaʻi mai: “Ia potopoto i le mea e tasi o vai i lalo o le lagi, ia iloa foʻi le eleele mātūtū.” Ona “faapea lava” lea ona fai. Ua toe faapea mai le faamatalaga: “Ua faaigoa e le Atua le eleele mātūtū, O le eleele; a ua faaigoa e ia le faapotopotoga o vai, O le sami; ua silasila atu i ai le Atua, ua lelei.” (Kenese 1:9, 10) O le ā le aogā o le sami?

I le tele o auala mataʻina, na fuafuaina ia vai o le sami ina ia faatumauina ai le ola. O se faaaʻoaʻoga, e iai le tomai i le vai e taofia ai le vevela. I lea, ua avea ai le sami ma nofoaga tele e puʻe ai le vevela, lea ua fesoasoani e taofiofia le mālūlū tele o le tau mālūlū.

E iai foʻi le isi aogā o le vai mo le ola. E mafai e le vai ona faaliusuavai le tele o mea na i lo o se isi lava mea faasuavaia. Talu ai o le faagasologa o le ola e mafai ona maua mai i gaoioiga a vailaau, o le iai la o le vai, ua mafai ona faaliusuavai ai mea malō ma mafai ai ona tuufaatasia mea ninii ina ia maua ai ni mea atoatoa. O loo maua foʻi i le vai ia sela ola. Ua taʻua i le tusi, The Sea, e faapea: “E manaʻomia e mea uma e iai le ola le vai; lea e tele ina maua mai le sami, e oo lava i laau ma manu o loo ola i le laueleele.”

E tāua tele foʻi le vaega o loo faia e le sami i le faamamāina o le atimosifia. O laau ninii ia o loo ola i le sami, e latou te mitiiaina le kasa o le karaponi ae faamatuu mai le okesene. E tusa ma le faamatalaga a se tasi tagata suʻesuʻe e faapea, o le “70 pasene o le okesene lea e faaopoopo atu i le atimosifia i tausaga taʻitasi, e maua mai i laau ninii ia e ola i le sami.”

E maua mai foʻi i le sami ia vailaau faalenatura ia e togafitia ai faamaʻi. E tele senituri o faaaogāina vaega mai iʻa e fai ai vailaau. E tele tausaga o faaaogāina pea le vaisuāiʻa. Talu ai nei, ua faaaogā ai vailaau mai iʻa ma isi mea ola o le sami e togafitia ai le maʻi sela, vairusi ma le kanesa.

Ua faia nei ni taumafaiga e fuafua i le tāua ma le aogā o mea e maua mai i le sami. E ui e lē o mafai ona maua mai se faaiʻuga saʻo, ae  ua fuafua e le ʻausuʻesuʻe, e toetoe lava o le lua vaetolu o mea aogā mo le faagasologa o le ola, e maua mai i le sami. Ua faamautinoa ai i lenei mea le mea moni e faapea, na faia le sami ina ia fesoasoani i le faatumauina o le ola. Maʻeu le fetaui lelei o lenei mea ma le mea ua taʻua e le Tusi Paia o “le oloa tele mai le sami”!—Teuteronome 33:19.

Ua viiviia Ieova o Lē Sili na Fuafuaina Mea ma o Lē na Faia lenei oloa tele. Na faagaeeina Neemia e vivii atu iā te ia i upu nei: “O oe, na o oe lava o Ieova; na e faia le lagi . . . o le sami ma mea uma o i ai, ua e faaola foʻi iā te i latou uma.”—Neemia 9:6.

[Faamatalaga pito i lalo]

[Pusa/Ata i le itulau 9]

Vai, Matagi, ma Galu

E afua e le vai ma matagi galu tetele ia e matuā gogolo pe a fafati atu i mato o papa, e pei o ia e i Kalefonia i le Iunaite Setete. Ua avea pea galu ma vala ofoofogia o le sami e faaalia ai le mataʻutia o le malosi o le sami. Ua avea foʻi galu o se faamanatuga mataʻina o le mana uigaese o Lē na Foafoaina Mea. O Ieova, o lē “savali atu i luga o peau o le sami.” “O lona mana na te faamalūina ai le sami, o lona poto foʻi na te taia ai lona faamaualuga.” (Iopu 9:8; 26:12) E moni lava “o Ieova o i le mea maualuga, e sili ona malosi o ia i le taalili o vai e tele, o peau malolosi o le sami.”—Salamo 93:4.

Faupuʻega o Oneone

I nisi taimi, e masani ona vaaia ai ni faupuʻega matagofie o oneone i matafaga, e pei o mea maupuʻepuʻe ia e vaaia i inei i le talafatai o Namibia, i Aferika i saute. O le matagi, o le malosi sili lea ua faaputuina le oneone i ni tulaga mataʻina. O nisi faaputuga oneone e foliga mai e na o ni nai patupatu laiti, a o isi, e oo atu i le 1,300 futu [400 mita] le maualuluga. O na faaputuga oneone matuā tetele, ua fesoasoani ina ia tatou malamalama ai i faaupuga i le Tusi Paia e faapea, “e pei o le oneone foʻi i le matafaga.” Ua faaaogā lea faaupuga e faailoa mai ai se aofaʻi e lē mafai ona faitauina, e faigatā ona fuaina. (Kenese 22:17) E tatou te tutū ma le migao ma le gatete i luma o Lē na Foafoaina Mea, o lē na saunia le anoanoaʻi o nei pa oneone e taofia ai le maʻemaʻeā o galu malolosi o le sami.

[Ata i le itulau 9]

Le talafatai e taʻua o le Lā Goto i le Bight o Biafra, i Cameroon