Le Tatalo a le Alii Lona Uiga mo Oe

O LE Tatalo a le Alii lea na aʻoaʻo mai e Iesu Keriso i le Lauga i le Mauga, o loo maua i le Tusi Paia i le Mataio mataupu e 6, fuaiupu e 9 e oo i le 13. A o leʻi faailoaina mai lenei tatalo, na fetalai Iesu e faapea: “A outou tatalo, aua neʻi tāutu i a outou upu, e pei o nuu ese; auā fa teʻi latou, o le tele o a latou upu e talia ai i latou.”—Mataio 6:7.

E manino lava la, e leʻi finagalo Iesu ina ia toe taʻua upu lava ia e i le Tatalo a le Alii. E moni, na ia toe taʻua mulimuli ane lenei tatalo ina ia aogā mo le isi ʻaufaalogologo. (Luka 11:2-4) Ae e fai sina eseese o faaupuga o lenei tatalo i tusi e lua o Mataio ma Luka. E lē gata i lea, i isi tatalo mulimuli ane a Iesu ma ona soo, e leʻi taumulimuli i upu patino o lana tatalo faaaʻoaʻo.

Aiseā ua faamauina ai le Tatalo a le Alii i le Tusi Paia? Auā e ala i lenei tatalo faaaʻoaʻo, ua aʻoaʻo ai i tatou e Iesu i le auala e mafai ai ona talia e le Atua a tatou tatalo. I lenei tatalo, ua mafai ai foʻi ona tatou maua tali i nisi o fesili autū e uiga i le olaga. O lea la, seʻi o tatou iloiloina ia vaega taʻitasi o le Tatalo a le Alii.

O Ai le Suafa o le Atua?

“Lo matou Tamā e, o i le lagi, Ia paia lou suafa.” (Mataio 6:9) O nei upu amata o le tatalo faaaʻoaʻo, ua fesoasoani iā i tatou e faalatalata atu ai i le Atua i le faalagi o ia, o “lo matou Tamā.” I le pei o se tamaitiiti, e masani ona faalatalata atu i se matua alofa ma malamalama, e mafai foʻi ona tatou faalatalata atu i lo tatou Tamā faalelagi ma le mautinoa o loo fia faafofoga mai o ia i a tatou tatalo. Na pese le tupu o Tavita e faapea: “Le faafofoga tatalo e, e ō atu iā te oe tagata uma lava.”—Salamo 65:2.

Ua faatonuina i tatou e Iesu ina ia tatou tatalo mo le faapaiaina o le suafa o le Atua, pe faailogaina o se mea e paia. Ae o ai le suafa o le Atua? Ua tali mai le Tusi Paia i upu nei: “O oe, e ou le suafa o Ieova, na o oe lava o le Silisili ese i le lalolagi uma.” (Salamo 83:18) Pe na e faitau ai i le suafa o Ieova i le Tusi Paia?

 O le mea moni, e toetoe faa 7,000 ona taʻua le suafa o le Atua, o Ieova i tusitusiga anamua o le Tusi Paia. Ae peitaʻi, ua oo lava ina aveesea e nisi tagata faaliliu lea suafa mai le Tusi Paia. O le mea lea, ua tatau ai ona tatou tatalo ina ia faapaiaina le suafa o Lē na Faia i tatou. (Esekielu 36:23) O se tasi o auala e faia ai lenei mea ina ia ōgatasi ma lea tatalo, o le faaaogā o le suafa o Ieova pe a tatou tatalo atu i le Atua.

O se fafine e igoa iā Patricia, na ola aʻe o se Katoliko ma e masani lelei lava ma le Tatalo a le Alii. O ā ona uiga faaalia ina ua faaali atu e se Molimau a Ieova iā te ia mai le Tusi Paia le suafa o le Atua? Na faapea mai o ia ma le ofo tele: “Sa faigatā ona ou talitonu i ai! O lea na ou suʻe ai i laʻu lava kopi o le Tusi Paia, ma sa iai foʻi le suafa o le Atua. Ona faasino mai lea e le Molimau le Mataio e 6:9, 10 ma faamatala mai e faapea, o loo taʻua i inei i le Tatalo a le Alii e iai le suafa o le Atua. Na ou matuā fiafia lava ma talosaga atu iā te ia ina ia faia sa ma suʻesuʻega o le Tusi Paia.”

Ia Faia le Finagalo o le Atua i le Lalolagi

“Ia oo mai lou malo. Ia faia lou finagalo, I le lalolagi e pei ona faia i le lagi.” (Mataio 6:10) O le a faapefea ona faataunuuina lenei vaega o le tatalo faaaʻoaʻo? O le toʻatele o tagata, e manatu i le lagi e faapea, o se nofoaga o le filemu ma le saogalemu. Ua faasino atu le Tusi Paia i le lagi e faapea, o le “afioaga paia ma le matagofie” o Ieova. (Isaia 63:15) E lētioa ona tatou tatalo ina ia faia le finagalo o le Atua i le lalolagi “e pei ona faia i le lagi”! Ae o le a faapefea ona tupu o lenei mea?

Na valoia e le perofeta a Ieova o Tanielu e faapea: “E faatūina ai e le Atua o le lagi o le malo e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) Ua lē o toe umi se taimi ona gaoioi loa lea o lenei Malo po o le pulega faalelagi e aumaia le filemu i le lalolagi aoao e ala i se pulega amiotonu.—2 Peteru 3:13.

O le tatalo ia oo mai le Malo o le Atua ma ia faia lona finagalo i le lalolagi, o se faaaliga lea o le faatuatua ma e mautinoa o le a lē iʻuvale. Na tusi le aposetolo Kerisiano o Ioane e faapea: “Na ou faalogo foʻi i le leo tele mai le lagi, ua faapea mai, “Faauta, ua i ai le afioaga o le Atua faatasi ma tagata, e mau foʻi o ia ma i latou; e fai foʻi i latou mona nuu, e iā te i latou le Atua lava. E sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po  o se auē, e leai foʻi se toe puapuaga; auā ua mavae atu mea muamua.” Ona toe faapea mai lea o Ioane: “Ua fetalai mai foʻi lē tiʻetiʻe i le nofoālii: . . . Ia e tusi; auā o upu nei e moni ma le faamaoni ia.”—Faaaliga 21:3-5.

Tatalo mo o Tatou Manaʻoga Faaletino

O mea ia na fetalai i ai Iesu i le tatalo faaaʻoaʻo, ua ia faaalia ai e ao ona taulaʻi atu muamua a tatou tatalo i le suafa o le Atua ma lona finagalo. Ae ua faaauau mai le tatalo faaaʻoaʻo e tusa ai ma mea e manaʻomia e le tagata lava ia, lea e talafeagai ona faailoa atu iā Ieova.

O le uluaʻi talosaga e tusa ma ia mea, e faapenei: “Ia e foaʻi mai iā te i matou i le aso nei a matou mea e ʻai e tatau ma le aso.” (Mataio 6:11) E lē o se talosaga lenei mo ni ʻoa faaletino. Ua faalaeiauina i tatou e Iesu ina ia tatalo mo “a [tatou] mea e ʻai e tatau ma le aso.” (Luka 11:3) I le ōgatusa ma le Tatalo a le Alii, ia tatou tatalo ma le faatuatua o le a foaʻi mai e le Atua mea e tatou te manaʻomia i aso taʻitasi pe afai e tatou te alolofa ma usiusitai iā te ia.

O le popole vale i faafitauli tau tamaoaiga, e ono tatou tuulafoaʻia ai o tatou manaʻoga faaleagaga ma lē taulau ai ona tatou faia mea o loo faatalitalia e le Atua mai iā i tatou. Ae a tatou faamuamua le tapuaʻiga i le Atua i o tatou olaga, e tatou te mautinoa lava, o le a taliaina a tatou talosaga mo o tatou manaʻoga faaletino, e pei o meaʻai ma lavalava. Na fetalai Iesu: ‘A ia outou muaʻi saʻili le malo ma le amiotonu a le Atua; ona faaopoopoina atu lea o ia mea uma ia te outou.’ (Mataio 6:26-33) O le saʻilia o le amiotonu a le Atua, o se luʻi, talu ai e agasala i tatou uma lava ma e manaʻomia se faamagaloga. (Roma 5:12) O loo talanoaina foʻi i le Tatalo a le Alii lenā mataupu.

A Tatou Tatalo ma le Faamagaloga

“Ia e faamagalo iā te i matou i a matou agasala, E pei o i matou foʻi ona matou faamagaloina atu i ē ua agaleaga mai iā te i matou.” (Mataio 6:12; Luka 11:4) Po o le a faamagaloina moni e Ieova a tatou agasala?

E ui lava sa faia e Tavita le tupu o Isaraelu anamua agasala matuiā, ae na salamō o ia ma tatalo atu ma le mautinoa e faapea: “Auā le Alii e, [Ieova e,] o oe e lelei, ma ua e faamagalo sala; e tele foʻi lou alofa iā te i latou uma o ē valaau atu iā te oe.” (Salamo 86:5) Maʻeu se manatu faamāfanafana! O loo nofo sauni pea lo tatou Tamā faalelagi “e faamagalo” agasala a i latou o ē valaau atu iā te ia ma le salamō moni. E moni e faamagalo atoatoa e Ieova le Atua a tatou agasala.

Ae peitaʻi na taʻua e Iesu se tuutuuga: Ina ia faamagaloina e le Atua, e tatau foʻi ona tatou faamagalo atu i isi. (Mataio 6:14, 15) E ui lava sa faileagaina e uō e toʻatolu ia le tagata amiotonu o Iopu, ae sa ia faamagalo atu ma tatalo foʻi mo i latou. (Iopu 42:10) Afai e tatou te faamagalo atu iā i latou ua agasala mai iā i tatou, o le a tatou faafiafiaina ai le Atua ma maua ai aogā mai lona alofa mutimutivale.

O le naunau o le Atua e faafofoga mai i a tatou talosaga, e ao ona uunaʻia ai i tatou e saʻili ina ia maua lona finagalo malie. E mafai ona tatou faia faapea e ui lava tatou te lē lelei atoatoa. (Mataio 26:41) E mafai foʻi ona fesoasoani Ieova iā i tatou i lenei itu, e pei lava ona faaalia e Iesu i le faaiʻu mai o le tatalo faaʻoaʻo i se talosaga tāua.

Fesoasoani ina ia Faaauau i se Ala Amiotonu

“Aua foʻi e te taʻitaʻiina i matou i le faaosoosoga, A ia e laveaʻi ia i matou ai le leaga.” (Mataio 6:13) E lē tuulafoaʻia i tatou e Ieova i faaosoosoga pe faapogaia i tatou ina ia paʻuū atu i le agasala. Ua faapea mai lana Afioga: “E lē mafai ona faaosoosoina o le Atua i mea leaga, e lē faaosooso atu foʻi o ia i se tasi.” (Iakopo 1:13) E ui e lē taofia e le Atua le faaosoosoina o i tatou, ae e mafai ona ia laveaʻi iā i tatou mai Lē Faaosooso Sili, ‘lē o leaga’ ua lauiloa o Satani le Tiapolo.

Ua timaʻi mai le aposetolo o Peteru i uso Kerisiano e faapea: “Ia outou faautauta, ia outou mataala, ona o lē ua fai outou mona fili, o le tiapolo lea, o loo fealualuaʻi o ia e pei o se leona tagi, ua saʻili se tasi e ʻaina e ia.” (1 Peteru 5:8)  Ioe, e oo lava i le tagata lelei atoatoa o Iesu Keriso sa faaosoosoina e Satani! O le ā na sini i ai le Tiapolo? Ina ia tataʻi ese Iesu mai le tapuaʻiga mamā iā Ieova le Atua. (Mataio 4:1-11) Afai la o e saʻili e auauna i le Atua, ua sini foʻi la Satani ina ia ʻaina oe!

E ala i le lalolagi lea o loo ia pulea, e ono taumafai le Tiapolo e faaosoosoina i tatou ina ia auai i faiga leaga ia e lē fiafia i ai le Atua. (1 Ioane 5:19) O lea, e tāua tele ai lo tatou liliu atu pea i le Atua mo se fesoasoani, aemaise lava pe a tatou fesagaʻi ma se faaosoosoga faifai pea. Afai la tatou te tapuaʻi iā Ieova e tusa ai ma lana Afioga, le Tusi Paia, o le a ia laveaʻiina i tatou e ala i le fesoasoani mai ina ia tetee atu i le Tiapolo. Ua taʻu mai e le Tusi Paia iā i tatou e faapea: “Ua faamaoni le Atua, o lē na te lē tuuina atu outou i le faaosoosoga e sili i se mea ua outou lavatia.”—1 Korinito 10:13.

E Tatau ona Faatuatua i le Atua

Maʻeu le faamāfanafanaloto i le iloa e naunau mai lo tatou Tamā faalelagi iā i tatou taʻitoʻatasi! Sa ia finagalo foʻi ina ia aʻoaʻoina i tatou e lona Alo o Iesu Keriso i le auala e tatalo ai. Ona o lea, ua uunaʻia ai i tatou ina ia faafiafia Ieova le Atua. E faapefea ona tatou faia o lenei mea?

Ua faapea mai le Tusi Paia: “A leai foʻi se faatuatua e lē mafai ona fiafia mai o ia [le Atua]; auā e tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.” (Eperu 11:6) E faapefea ona maua sea faatuatua? Ua faapea mai le Tusi Paia: “E tupu le faatuatua i le taulogologo atu.” (Roma 10:17) E matuā fiafia lava Molimau a Ieova e talanoa i mataupu faale-Tusi Paia ma i latou uma o loo mananaʻo e auauna i le Atua i le faatuatua moni.

E iai le faamoemoe ua faalolotoina e lenei talanoaga lou malamalama i le uiga o le Tatalo a le Alii. O le aʻoaʻoina atili o le poto e uiga iā Ieova ma ana taui mo i latou e “matuā saʻili iā te ia,”o le a faamalosia ai lou faatuatua i le Atua. Tau ina ia e aʻoaʻo atili e uiga iā te ia ma ana fuafuaga ina ia e olioli ai i se faiā vavalalata e faavavau ma lou Tamā faalelagi.—Ioane 17:3.

[Faamatalaga faaopoopo i le itulau 7]

“Lo matou Tamā e, o i le lagi, Ia paia lou suafa. Ia oo mai lou malo, Ia faia lou finagalo, I le lalolagi e pei ona faia i le lagi. Ia e foaʻi mai iā te i matou i le aso nei a matou mea e ʻai e tatau ma le aso. Ia e faamagalo iā te i matou i a matou agasala, E pei o i matou foʻi ona matou faamagaloina atu i ē ua agaleaga mai iā te i matou; Aua foʻi e te taʻitaʻiina i matou i le faaosoosoga, A ia e laveaʻi iā i matou ai le leaga.”—Mataio 6:9-13

[Ata i le itulau 7]

E saunia e Ieova mea e manaʻomia e i latou o ē alolofa iā te ia

[Ata i le itulau 7]

E fesoasoani foʻi le Atua iā i tatou e tetee atu i le Tiapolo

[Ata i le itulau 7]

Afai e pei i tatou o Iopu e faamagalo atu i ē o agasala mai, o le a tatou maua ai le alofa mutimutivale o le Atua