Maaolo Saito e Maua ai Meaʻai i Aso Taʻitasi

UA LOA tausaga o avea le falaoa ma “mataiʻai a tagata.” Mai lava i aso anamua, na avea ai le falaoa ma “taumafa autū.” O le mea moni, o se tasi o manaʻoga aupito sili o tagata, o le fia mauaina lea o meaʻai i aso taʻitasi.

O le tasi o mea autū o loo faia ai le falaoa, o le falaoamata, e maua mai i le oloina o saito ma isi fatu. O le oloina la o saito, o se tomai mai anamua. E aunoa ma le faaaogāina o masini, e ono avea o se galuega fitā le oloina o saito e avea ma falaoamata. I aso o le Tusi Paia, o le leo o le maaolo sa fesootaʻi ma le tulaga masani, o le toʻafilemu, o le lē lagonaina o le leo o le maaolo, na faaalia ai se tulaga faatamaʻiaina.—Ieremia 25:10, 11.

Na faapefea ona oloina saito i le faagasologa o tausaga? O ā nisi o metotia ma mea faigaluega na faaaogāina ina ia faia ai lea galuega? O ā ituaiga fale gaosia falaoa o loo maua ai nei e lou aiga mea ʻai i aso taʻitasi?

Aiseā e Manaʻomia Ai?

Na fetalai atu Ieova le Atua i le uluaʻi ulugalii o Atamu ma Eva e faapea: “Ua ou foaʻi atu iā te oulua o laau afu uma e tutupu ma o latou fua o i le fogāeleele uma lava, atoa ma laau uma ua i ai le fua o le laau e tupu ma ona fatu; e ia te oulua ia e fai ma mea e ʻai.” (Kenese 1:29) I laau na tuuina atu e Ieova le Atua i tagata e fai ma a latou meaʻai, sa iai laau na maua ai fatu i ogālaau, e pei o le saito. Sa talafeagai nei meaʻai mo le ola o le tagata, talu ai o fatu o nei laau uma, ua maua ai le masoā lea ua mafai ona faaliliuina e le tino o le tagata i le suka lea e maua ai le malosi. O nisi o nei laau e aofia ai le saito, karite, araisa, sana, rye, millet, oats ma sorghum.

Ae peitaʻi, e lē mafai e le tagata ona faamalūina ia fatu a o mata. E mafai ona faaaogā e tagata pe afai e faaliliuina e avea ma falaoamata ma faavelaina. O le auala sili ona faigofie e faaliliu ai ia saito ma isi fatu e avea ma falaoamata, o le tuʻiina lea i se tanoa pe oloina i ni maa se lua po o le faaaogāina o na auala uma e lua.

Maaolo Saito e Faaaogā e Tagata

O faatagata na maua mai i tuugamau o Aikupito anamua, o loo faaalia ai le faaaogāina o se tasi o uluaʻi maaolo saito, e pei o foliga o se nofoa tiʻetiʻe solofanua. O le maaolo saito lenei, e lua maa e faia ai; o le maa pito i lalo e fai sina faaofuofu, a o le maa laʻitiiti sa pito i luga. O le tagata olosaito, e masani lava o se fafine, sa tootuli i tua o le maaolo ma uʻu limalua le maa pito i luga. Ona tuu atoa lea o lona mamafa i le maa pito i luga ma tulei i tua ma luma i luga o le maa lapoʻa ma olo ai le saito i le va o nei maa e lua. Maʻeu se auala faigofie ae aogā!

Ae peitaʻi, o le tootuli mo ni taimi uumi na afāina ai i latou. O le oloina i tua ma luma o le maa, na tigā ai le tua, o ogālima, ogāvae, o tuli ma tamatamaʻi vae o le tagata olo saito. I suʻesuʻega na faia i ponaivi na faaleagaina o auivi mai Suria anamua, na iloa ai e tagata suʻesuʻe e faapea, o le  faaaogāina o maaolo faapena, na māfua ai ona afāina fafine talavou i mafatiaga; na faamanuʻalia tupe o tuli, faaleagaina o latou ivitū, ma maua i le gugu o latou vae matua. I Aikupito anamua, o le faagaoioia o le maaolo saito, sa tele lava ina faia e auauna fafine. (Esoto 11:5) * E talitonu nisi tagata popoto e faapea, ina ua tuua e Isaraelu ia Aikupito, na ō lava ma ave le maaolo lea e foliga i se nofoa tiʻetiʻe solofanua.

Mulimuli ane, na oo ai ina faaleleia le auala e olo ai saito e ala i le faatalatala o maa uma e lua. I le faia o se pu e pei o se faatumu i le maa pito i luga, na mafai ai e le tagata olo saito ona utu le pu lea i saito ma toʻulu atu ai i le va o maa. I lona fā po o lona lima o senituri T.L.M., na uluaʻi gaosia ai i Eleni se faiga e faafaigofie ai le oloina o saito. Sa faapipii i le maa pito i luga se ʻau. O le tuleiina o le ʻau e pei e faataavili puupuu i tua ma luma, na mafai ai ona gaoioi le maa i luga ma oloina ia saito ia e toʻulu atu i le faatumu.

O olosaito uma ia na uluaʻi taʻua, sa lē faigofie ona faagaoioia. Talu ai sa faalagolago na olosaito i le gaoioiga o le tulei i luma ma tua lea sa lē mafai ona aʻoaʻoina se manu na te faia. I lea, sa faalagolago ai nei mea olosaito i le malosi o le tagata. Mulimuli ane, na aliaʻi mai ai se malamalamaga fou i lenei mataupu, ma ua maua ai mea olosaito e faataavili. Na mafai ona faaaogāina ai manu.

Ua Faafaigofie le Galuega i Mea Olosaito Faataavili

E foliga mai, o le mea olosaito faataavili, na gaosia mai i atunuu o le Metitirani, i le tusa ma lona lua o senituri T.L.M. E oo ane i le uluaʻi senituri T.A., ua masani lelei tagata Iutaia i Palesitina ma mea olosaito faapena, auā na fetalai Iesu e uiga i “se maaolo” e pei o lea e faataamilo e se asini. —Mareko 9:42.

Sa faaaogā foʻi i Roma ma vaega e tele o le Emepaea o Roma maaolo saito ia sa tosoina faataavili e manu. O loo iai pea i Pomepei le tele o maaolo saito faapena. Sa faia na maaolo e pei o foliga o se fua itula le maa pito i luga lea sa utu i ai le saito ma se maa lapotopoto e pei o se faatumu lea e pito i lalo. A o faataavili le maa pito i luga i luga o le maa pito i lalo, sa mafai ona utu atu saito i le va o maa e lua, ma nutililii ai. E eseese lava ia maa pito i luga o nei olosaito mai le pe tusa ma le 18 i le 36 inisi (45-90 senitimita) le lapotopoto. O nei maaolo, sa mafai ona oo i le 6 futu (180 senitimita) le maualuluga.

E lē o mautinoa po o fea o ia maaolo saito na muamua po o le maaolo māmā faataavili e tagata po o le maaolo sa faataavili e manu. Ae o le aogā o le mea olosaito lea sa faataavili e le tagata, sa mafai ona feaveaʻi ma faigofie ona faaaogā. E lua ni maa sa faia aʻe ai lea olosaito, pe tusa ma le 12 i le 24 inisi (e 30 i le 40 senitimita) le lapotopoto. O le maa pito i lalo, e pei e faaofuofu agaʻi i luga, a o le maa pito i luga, e lapotopoto lona pito i lalo ina ia fetaui lelei ma le faaofuofu o le maa i lalo. O le maa pito i luga, sa lalago i se faamau faanifo i le ogatotonu ma sa faataavili i se ʻau laau. E masani lava ona faafesagaʻi ai ia fafine e toʻalua, e tofu i laʻua ma le lima e faataavili ai le ʻau ina ia taavili le maa pito i luga. (Luka 17:35) A o le isi lima, e utu ai e se tasi o fafine le saito i le pu o le faatumu i le maa pito i luga, ae aofaʻi e lē isi fafine le falaoamata a o sasaa mai i le augutu o le maaolo saito i se faatanoa po o se ʻie o loo fofola i lalo ifo o le maaolo. O le maaolo lenei sa mafai ai ona faamalieina manaʻoga o fitafita, tagata feoaʻi vaa, po o ni aiga toʻalaʻitiiti sa mamao le mea na nonofo ai.

 Faagaoioia e le Vai po o le Matagi

Pe tusa o le 27 T.L.M., na tuuina mai ai e se inisinia Roma o Vitruvius se faamatalaga e uiga i se maaolo saito i ona aso sa faagaoioia e le vai. O le tafe atu o le vai ma taia ai lau o le peʻapeʻa o se uili telē lea sa faamau i se ʻau umi ma mafai ai ona taavili le uili. O faanifo o le uili na mafai ai ona gaoioi le ʻau umi, ma mafai ai e le ʻau ona faataavili se maaolo telē.

E faapefea ona faatusatusa mea na mafaia ona fai e le maaolo e alu i le vai ma isi maaolo saito? O maaolo saito sa faataavili i lima, sa fuafuaina e faapea, e itiiti ifo i le 20 pauna (10 kilo) o saito na mafai ona oloina ai i le itula, a o maaolo saito sili ona aogā sa faataavili e manu vaefā, sa oo atu i le 100 pauna (50 kilo). I le isi itu, o le mea olosaito e alu i le vai lea na faia e tusa ma le ata na uluaʻi faatulagaina e Vitruvius, sa mafai ona oloina ai le 300 i le 400 pauna (150 i le 200 kilo) i le itula. E ui i le anoanoaʻi ma le matalasi o mea sa faaleleia, ae mo le tele o senituri mulimuli ane sa faaauau ai pea ona faaaogā e tagata na faia mea olosaito, ia faiga na faailoa mai e Vitruvius.

E lē na o vaitafe le pogai o le malosi faalenatura lea sa faaaogāina e faagaoioia ai ia maaolo saito. Pe afai e suia ia uili e taavili i le vai i peʻapeʻa e tulei e le matagi, e mafai ai foʻi ona faia le mea lava lenā e tasi. Na amata ona faaaogāina ia peʻapeʻa e tulei e le matagi e faagaoioia maaolo saito i Europa, masalo po o le lona 12 o senituri T.A. ma na salalau atu le faaaogāina i Peleseuma, Siamani, Holani, ma isi foʻi atunuu. Sa faaaogāina pea na auala e olo ai saito seʻia oo ina faaaogāina ia masini e faaalu i le vevela ma isi lava malosiaga, ma faasolosolo mālie ai ona lē toe faaaogāina isi auala.

‘A Tatou Meaʻai e Tatau ma le Aso’

E ui i le agaʻigaʻi i luma o le auala e olo ai saito, ae o loo faaaogāina pea maaolo o aso ua mavae i le tele o atunuu o le lalolagi. O loo faaaogā pea i vaega o Aferika ma le Pasefika le maa omea ma le maa e tuʻi ai mea. I Mekisikō ma Amerika Tutotonu, o loo faaaogā ai ia maaolo e pei o nofoa tiʻetiʻe solofanua e olo ai sana e fai ai panikeke mafolafola. E le gata i lea o loo faaaogāina pea i lea nofoaga ma lea nofoaga ia maaolo e faaalu i le vai ma le matagi.

Ae peitaʻi, o le tele o le falaoamata e faia ai falaoa i atunuu atiaʻe i le lalolagi i aso nei, o loo saunia mai i masini e alu i le eletise. E auaumālie lava ona liua ia saito e avea ma falaoamata a o oloina i ni uʻamea talatala lapotopoto se lua e eseese lava lo latou saosaoa e taavili ai. O lenei faiga ua mafai ai ona saunia ai ituaiga eseese o falaoamata i se tau taugofie.

E mautinoa lava la, ua lē o toe faigatā le mauaina o le falaoamata e fai ai meaʻai e pei ona sa iai muamua. Ae e tatou te matuā lotofaafetai i Lē na Foafoaina i tatou ona o le foaʻiina mai iā i tatou o le saito faapea le atamai e faia ai e avea ma a tatou “mea e ʻai e tatau ma le aso.”—Mataio 6:11.

[Faamatalaga pito i lalo]

[Ata i le itulau 23]

Maaolo saito a Aikupito e pei o se nofoa tiʻetiʻe solofanua

[Faamatalaga i Ata]

Soprintendenza Archeologica per la Toscana, Firenze

[Ata i le itulau 23]

Sa faaaogāina se maaolo e tulei e manu vaefā, e tatau ai le olive e maua mai ai le suauu

[Faamatalaga i Ata i le itulau 22]

From the Self-Pronouncing Edition of the Holy Bible, containing the King James and the Revised versions