E Aogā le Taalo mo Tamaiti

E FIAFIA tamaiti e taaalo, peitaʻi ua faamatalaina e le tusi The Developing Child, “e lē o se gaoioiga e lē tāua pe lē aogā. E fesoasoani tele i le tuputupu aʻe o le tamaitiiti.” O le taalo, e aʻoaʻoina ai tamaiti e faaaogā o latou faalogona, malamalama i o latou siʻomaga ma feutagaʻi ai ma isi.

E amata atu i le fā pe lima tausaga ua faaaʻoaʻo tamaiti i tagata matutua. Na fetalai Iesu e faatatau i tamaiti o loo taaalo. O nisi o tamaiti sa mananaʻo e faafoliga o loo latou faia se “faaipoipoga” a o nisi e mananaʻo e faafoliga o loo latou faia se “maliu,” ma e pei ona masani ona faia e tamaiti sa latou finau talu ai sa lē mananaʻo nisi e auai. (Mataio 11:16, 17) O lenei ituaiga o taaloga e mafai ona tāmau i mafaufau o tamaiti ni tiute tauave aogā a o latou tuputupu aʻe.

O loo faataʻitaʻia e tamaiti i ata se faiaʻoga o le Tusi Paia ma se tagata aʻoga. E latou te lē o faia se suʻesuʻega moni faale-Tusi Paia, ae o loo manino i o latou mafaufau le agaga o le tufaina atu o le feʻau o le Tusi Paia. E tāua lenei lesona, ona na faatonu e Iesu ona ʻausoo ina ia faia soo ma aʻoaʻo tagata ia tausi i mea uma na ia aʻoaʻoina ai i latou.—Mataio 28:19, 20.

E mafai ona mitamita mātua pe a fiafia a latou fanau e faafoliga o loo faia se suʻesuʻega faale-Tusi Paia, faia lauga po o le talaʻi mai i le fale le fale. E masani lava, e faaaʻoaʻo tamaiti i mea latou te vaai i ai o faia e tagata matutua. O taaloga faale-Tusi Paia a tamaiti o faailoaga ia o le tausia aʻe o i latou i “aʻoaʻiga ma apoapoaʻiga a le Alii.”—Efeso 6:4.

E finagalo Ieova i tamaiti ina ia auai i le tapuaʻiga moni. Na ia fetalai atu iā Mose ina ia faaaofia ai ma “tamaiti” pe a faitauina le Tulafono. (Teuteronome 31:12) Pe a iloa e tamaiti o loo faaaofia ai ma i latou, e faaatagia mai i a latou taaloga. O le tamaitiiti na te faataʻitaʻia le avea ma se faifeʻau a le Atua e mautinoa e iai le aso o le a avea moni ai ma se faifeʻau.