Fesili Mai le ʻAufaitau

Ina ua tusi le aposetolo o Paulo e faapea, “o le alofa atoatoa e faateʻaeseina ai le fefe,” o le ā na ia uiga i ai le “alofa atoatoa,” ma o le ā le “fefe” lea e faateʻaeseina ai?

Na tusi le aposetolo o Ioane: “E leai se fefe i le alofa, a o le alofa atoatoa e faateʻaeseina ai le fefe; auā e a lē faasala le fefe; o lē ua fefe, e lē faaatoatoaina o ia i le alofa.”—1 Ioane 4:18.

Ua faaalia e fuaiupu o siʻomia ai, na talanoaina e Ioane le lototele po o le saʻolotoga e tautala ai—aemaise lava le sootaga i le alofa o le Atua ma le lototele e talanoa atu ai iā te Ia. E mafai ona iloa lenei mea i le fuaiupu e 17: “O le mea lava lenei ua atoatoa ai le alofa iā te i tatou, ina ia tatou maua le loto tele i le aso o le faamasinoga.” O le tele o le alofa o se Kerisiano i le Atua ma lona lagonaina o le alofa o le Atua iā te ia, e iai se aafiaga i lona lototele po o saʻolotoga e tautala ai—po o le leai foʻi—pe a tatalo atu i le Atua.

O le faaupuga o le “alofa atoatoa” e iai sona uiga. E pei ona faaaogā i le Tusi Paia, e lē uiga atu i taimi uma le upu “atoatoa” i se mea ua atoatoa ona lelei, o lona uiga o se auala e silisili ona lelei ae e tele ina faatatau atu i se auala faatapulaa. O se faaaʻoaʻoga, i lana lauga i le Mauga, na fetalai Iesu: “O lenei, ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.” Na fetalai Iesu i ona soo afai latou te alolofa atu na o i latou e alolofa iā i latou, o lona uiga e lē atoatoa lo latou alofa. E ao ona faaatoatoa lo latou alofa e aofia ai nisi e oo lava i o latou fili. E faapea foʻi ina ua tusi Ioane e faatatau i le “alofa atoatoa” na ia tautala e faatatau i le alofa i le Atua ma le lotoatoa, ma e aofia ai vala uma o le olaga o se tasi.—Mataio 5:46-48; 19:20, 21.

E iloa e se Kerisiano lona tulaga agasala ma lona lē lelei atoatoa pe a talanoa atu i le Atua i le tatalo. Ae ui i lea, pe afai ua atoatoa lona alofa i le Atua ma ua ia lagonaina le alofa o le Atua iā te ia, e lē popole la o ia e faapea o le a taʻusalaina pe teena o ia. Na i lo lea, ua olioli o ia i le saʻolotoga e tautala ai i le faaalia o le mea o i lona loto, ma ole atu mo le faamagaloga e faavae i le taulaga togiola na saunia ma le alofa e le Atua e ala iā Iesu Keriso. Ua ia mautinoa o loo faafofoga le Atua i lana talosaga.

E faapefea ona “alofa atoatoa” se tasi ma “faateʻaeseina” le fefe i le taʻusalaina po o le teena? Ua faapea mai le aposetolo o Ioane: “O lē tausi i lana afioga, e moni, ua atoatoa le alofa i le Atua i totonu iā te ia.” (1 Ioane 2:5) Ia mātau: Pe afai e alofa mai le Atua iā i tatou a o tatou agasala pea, pe e lē sili atu ea ona ia alofa iā i tatou pe afai tatou te salamō moni ma filigā e “tausi i lana afioga”? (Roma 5:8; 1 Ioane 4:10) O le mea moni, o le umi tatou te tumau ai i le faamaoni, ua iā i tatou le mautinoa lea sa i le aposetolo o Paulo ina ua ia faapea mai e uiga i le Atua: “O ia lava sa na lē faasaoina lona lava Alo, a ua tuuina mai o ia ona o i tatou uma lava, e lē foaʻi fua mai ea e ia iā te i tatou mea uma lava faatasi ma ia i se ā?”—Roma 8:32.