Na Ia Taʻu Atu Ona Talitonuga i Tamaiti o Lana Vasega

PE E te manaʻo e fesoasoani i tamaiti o lau vasega ina ia malamalama atili i ou talitonuga faale-Tusi Paia? E masani ona talanoa Magdalena o se tamaitiiti aʻoga maualuga i Polani, i tamaiti o lana vasega e faatatau i ona talitonuga o se Molimau a Ieova. O le iʻuga e masani ona fesiligia o ia i fesili e pei o le ‘O le ā le uiga o le avea ma Molimau a Ieova?’ ‘Tou te talitonu iā Iesu?’ Na faapefea ona ia fesoasoani i tamaiti o lana vasega? Na tatalo Magdalena iā Ieova mo le taʻitaʻiga ma gaoioi e talafeagai ai ma ana tatalo.—Iakopo 1:5.

I se tasi aso, na fesili ai Magdalena i se faiaʻoga e na te faatāuaina ona talitonuga pe mafai ona faaali i le vasega le ata vitiō o le Jehovah’s Witnesses—The Organization Behind the Name. * Na malie i ai le faiaʻoga. Na taʻu atu e Magdalena i tamaiti o lana vasega: “Ua ou faatulagaina saʻu uō e fai se polokalame e 90 minute i le vasega. O le a aofia ai se vitiō ma se talanoaga e uiga i Molimau a Ieova. E tou te fia auai?” Na faapea uma mai lava ioe. Na amata loa ona sauniunia e Magdalena ma Wojciech o se faievagelia faataimi atoa le polokalame.

O le fuafuaga e amata i le taulimaga e 20 minute e faavae i le polosiua, Molimau a Ieova—O Ai i Latou? O ā o Latou Talitonuga?* ona sosoo lea ma le talanoaga i fesili ma tali. Ona faaali lea o le vitiō i le faletusi a le aʻoga. O le a maua e tamaiti uma o le vasega se meaalofa—o se teutusi telē o loo iai ni nai polosiua, o le tusi Fesili ua Fesili Mai ai Talavou—Tali e Aogā,* o sāvali ma mekasini.

I le aso o le polokalame, na auai tamaiti o le vasega e toʻa 14, o le faiaʻoga ma isi tamaiti e toʻa 4 sa i le faletusi. Na faamatala muamua e Wojciech e iai nisi o fatusolo ma tusitala Polani na latou faaaogā le suafa o le Atua o Ieova i a latou solo ma tusi. Na ia taʻua nisi o tusi tuai o le lotu Katoliko o loo taʻua ai le suafa o le Atua. Na ia faaalia polosiua o ofisa eseese o lālā ma ata o se aofaʻiga o Maota Fono ma faamatala le galuega a Molimau a Ieova i aso nei.

Na sosoo ai ma se talanoaga manaia lea na faaaogā ai e Magdalena ma Wojciech le Tusi Paia e tali ai fesili. Na faagaeetia le aofia ma faatalitonuina ai i latou e lē o talaʻia e Molimau a Ieova ni o latou lava manatu. O ā nisi o fesili a tamaiti ma na faapefea ona taliina?

Fesili: Ua tumu le Tusi Paia i faamatalaga lē manino ma upu faafaatusa ia e mafai ona faauiga atu i mea eseese. E mafai faapefea ona ola e talafeagai ma le Tusi Paia?

Tali: Ua faapea mai nisi, o le Tusi Paia ua pei o se kitara e mafai ona ta ai so o se pese e te manaʻo ai. Peitaʻi, seʻi manatu: Afai e te manaʻo e saʻili le uiga o faamatalaga a se tusitala, pe e lē sili ea ona fesili atu iā te ia? E lē pei o le toʻatele o tusitala ua maliliu, o loo soifua pea Ieova le Atua le Tusitala o le Tusi Paia. (Roma 1:20; 1 Korinito 8:5, 6) O isi fuaiupu o siʻomia ai le mau ua talanoaina e  mafai ona faaalia le faauigaga saʻo. E lē gata i lea, e eseese mau o le Tusi Paia e maua ai faamatalaga i se mataupu e tasi, ma e lelei le tilofaʻia o ia mau uma. O lea la, e mafai ona taʻitaʻia e le Atua o tatou mafaufau, e pei lava o loo ia faamatalaina se mau iā i tatou. Pe e lē moni ea, o le faia faapea, tatou te iloa ai lona finagalo ma ola e ōgatasi ai e pei ona faaalia mai i le Tusi Paia?

Fesili: O le ā le eseesega o Kerisiano ma Molimau a Ieova?

Tali: O i matou o Kerisiano! Peitaʻi, na i lo le na o le faapea mai o Kerisiano, ua tauivi Molimau a Ieova ina ia ola e talafeagai ma o latou talitonuga ma le mea o aʻoaʻoina ai i latou e le Atua e mo lo latou lelei. (Isaia 48:17, 18) Talu ai e faavae a latou aʻoaʻoga uma i le Tusi Paia, ua latou iloa ua latou maua le upu moni.—Mataio 7:13, 14, 21-23.

Fesili: Aiseā tou te faalatalata atu ai i tagata tou te lē masani ai ma maumauaʻi e talanoa iā i latou? Pe tou te lē o faamalosia ea i latou e talitonu i mea tou te talitonu i ai?

Tali: E sesē pe a fesili atu ma le faaaloalo se tasi iā te oe i luga o le auala ma tāpā sou taofi e faatatau i se mataupu? (Ieremia 5:1; Sefanaia 2:2, 3) (Na faataʻitaʻia e Wojciech ma Magdalena le auala na la fesili ai i tagata feoaʻi i le auala pe e silasila alofa mai le Atua iā i latou o ē o mafatia i se lolo talu ai nei lava i Polani.) Ina ua matou iloa taofi a tagata, e matou faasino atu loa i le Tusi Paia. Pe afai e lē o fia talanoa se tasi e na o matou faatofā lava i ai ma faaauau. (Mataio 10:11-14) Pe o le faamalosia lenā o isi e talanoa? Pe e lē tatau ea ona fetalanoaaʻi tagata?

Fesili: Aiseā tou te lē faamanatu ai aso mālōlō?

Tali: E matou te faamanatu na o le aso na faatonuina ai i tatou e le Tusi Paia e faamanatu—o le Faamanatuga o le maliu o Iesu Keriso. (1 Korinito 11:23-26) E mafai ona e iloa tupuaga o aso mālōlō e ala i le suʻesuʻeina o encyclopedia ma isi tusi maufaatuatuaina. Pe afai e te faia faapea, o le a faigofie ai ona e iloa le māfuaaga matou te lē faamanatuina ai na aso.—2 Korinito 6:14-18.

E tele isi fesili na fai ma taliina. Talu ai o le umi tele o le talanoaga na tolopō ai le faaalia o le ata vitiō.

O le ā le tali a tamaiti aʻoga? Seʻi faamatala atu e Magdalena: “Na faateʻia aʻu ona o nisi o tamaiti e masani ona lē mafaufau ma ula, sa faia ni fesili uigā. E ui na latou faapea mai e lē talitonu e iai se Atua, ae i le taimi o le talanoaga na latou faaalia le faatuatua i le Atua!” Na talia ma le lotofiafia e i latou na auai ia meaalofa—na tuua iā i latou tusi e 35, polosiua e 63 ma le 34 mekasini.

Maʻeu se iʻuga matagofie na maua mai lenei gaoioiga na faia i le aʻoga! E lē gata na fesoasoani i tamaiti o le vasega a Magdalena e iloa ma malamalama atili i Molimau a Ieova ae ua faalaeiauina ai le toʻatele o talavou ina ia mafaufau e faatatau i le māfuaaga o loo soifua ai tagata. Aiseā e te lē taumafai ai e fesoasoani i tamaiti o lau vasega ina ia aʻoaʻo atili e faatatau i ou talitonuga?

[Faamatalaga pito i lalo]

[Ata i le itulau 31]

O Magdalena ma Wojciech o loo sauniuni mo le talanoaga