Se Tofi e Mafai Ona E Faatuatuaina

“PE AFAI e te maua se tusi mai se tagata i le meli e faailoa atu ai e faapea, o loo iai se tofi na tuu e sou tauaiga ua maliu mo oe, ia e faaeteete. E ono avea oe ma taulaʻiga a se tagata faitogafiti.”

O se lapataʻiga lenā mai le Matagaluega o Falemeli i le Iunaite Setete na faailoa mai i le Initineti. Aiseā? Talu ai, e faitau afe tagata na maua ni faaaliga mai le meli e faapea, ‘E iai se tofi na tuua mo ia e sona tauaiga ua maliu.’ O lea na lafo atu ai e na tagata i le meli ni tusi e tāpā ai se tupe e saunia ai ni faamatalaga e uiga i le mea o iai le tofi ma le auala e maua ai. O le iʻuga, na lafoina atu ai e le toʻatele o tagata i le meli le totogi e $30 Amerika pe sili atu foʻi mo sea lipoti, ma le manatu o le a faamatala mai ai mea uma. Ae na matuā lē fiafia lava i latou i le mea na oo i ai. E tasi lava le tali na maua e i latou uma na lafo atu tupe; o le leai o se mea.

O na faiga, na maileia ai faanaunauga o tagata o le fia maua o se tofi. Ae peitaʻi, o loo faamaonia e le Tusi Paia i latou o ē saunia se tofi i le faapea mai: “O le tagata lelei na te tofia ana mea i le fanau a lana fanau.” (Faataoto 13:22) O le mea moni, e leai lava se tasi na i lo o Iesu Keriso o lē na faia lenei faamatalaga lauiloa ma le alofa i lana Lauga i le Mauga e faapea: “Amuia ē agamalu; auā e fai mo latou tofi le nuu.”—Mataio 5:5.

O fetalaiga a Iesu, ua faamanatu mai ai upu tauatua na tusia e Tavita le tupu o Isaraelu anamua i senituri muamua atu e faapea: “A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Salamo 37:11.

“E fai mo latou le nuu,” maʻeu se faamoemoe fiafia! Ae pe mafai ona tatou mautinoa e lē o se isi lea taumafaiga faatogafiti ua faia ina ia faasesēina ai foʻi tagata? Ioe, e mafai. Talu ai o le lalolagi o se vaega o le foafoaga ofoofogia a Ieova, ua iā te ia la o Lē na Faia ma o Lē e ana le foafoaga ona iai le aiā tatau e tuuina atu ai i so o se tasi ua ia finagalo i ai. E ala i le tupu o Tavita, na faia ai e Ieova lenei folafolaga faavaloaga i Lona Alo pele o Iesu Keriso e faapea: “Ia e fai mai iā te aʻu, ona ou foaʻiina atu ai lea iā te oe o nuu ese e fai mou tofi, ma tuluʻiga o le lalolagi e fai mou.” (Salamo 2:8) O le māfuaaga lea na faamatalaina ai e le aposetolo o Paulo Iesu Keriso e faapea, “o lē ua tofia e [le Atua] e fai mea uma lava mona tofi.” (Eperu 1:2) O le mea lea, e mafai ai ona tatou mautinoa atoatoa e faapea, pe a fetalai Iesu, o ē agamalu “e fai mo latou tofi le nuu,” sa ia faia faapea ma lona faanaunauga moni, ma ua iā te ia le pule tonu e faataunuuina ai lana folafolaga.—Mataio 28:18.

O le fesili tāua la, O le a faapefea ona faataunuuina lenā folafolaga? Talu ai e so o se  mea lava tatou te vaai atu i ai i aso nei, e foliga mai, o loo taulau manuia ia tagata faasausili ma le faamaualuluga, ma o loo maua mea uma latou te mananaʻo i ai. O fea la o iai se tofi mo ē agamalu? E lē gata i lea, ua malaia le lalolagi i faafitauli matuiā ma le polusione, ma ua faaleagaina ona punaʻoa i le matapeʻapeʻa ma le papaʻu o le tofā a tagata. Po o le a iai ea la se tofi aogā i le lalolagi? Matou te valaaulia oe ina ia faitau le isi mataupu lea e sosoo mai, e maua ai le tali i lenei fesili ma isi fesili tāua.

[Ata i le itulau 3]

Po o le a e maua se tofi moni?