Fesili Mai le ʻAufaitau

Ina ua faatonu e Iesu ona soo “ia avatu tupe e nonōina, aua le faamoemoe i se mea e tasi e au mai,” po o lona uiga e lē tatau ona talosaga atu e totogi le tupe na nonō?

E iloa le uiga moni o fetalaiga a Iesu i le Luka 6:35, pe a tomānatu i le Tulafono a Mose. Na poloaʻia e le Atua le fanauga a Isaraelu ia nonō atu a latou tupe e aunoa ma se tupe faasili, i isi tagata Isaraelu o ē matitiva pe moomia se fesoasoani. (Esoto 22:25; Levitiko 25:35-37; Mataio 5:42) O le māfuaaga o na nonogatupe, e lē ina ia maua ai se polofiti faapisinisi. Na i lo lea, e fesoasoani i ē matitiva po o ē o iai i tulaga faigatā. O se gaoioiga matuā lē alofa le faaaogā o tulaga lē tagolima o isi, ina ia maua ai se polofiti. Ae e mafai e lē e ana le tupe ona toe maua lana tupe na nonō atu, o nisi taimi e fai ai se maliega (se mea e faamau ai le nonogatupe).—Teuteronome 15:7, 8.

E ui ina tausisi i le Tulafono, ae e sili atu le auala na faatatauina ai e Iesu ina ua fetalai e lē tatau i lē o loo avatu le fesoasoani ona faamoemoe “i se mea e tasi e au mai.” E pei o tagata Isaraelu, e iai taimi e suia ai le tulaga tautupe o Kerisiano po o isi foʻi tulaga, lea e iʻu ina matitiva ai pe leai ni mea e ola ai. Pe a talosaga mai se Kerisiano ua pagatia faapena mo se fesoasoani tautupe, pe e lē o se gaoioiga agalelei le fesoasoani i ai? Ioe, o le alofa moni e uunaʻia ai se tagata Kerisiano e fesoasoani i se uso ua lē tagolima ona o tulaga lē maʻalofia. (Faataoto 3:27) E mafai ona avatu se meaalofa tautupe i se uso faapena, e ui e itiiti ifo na i lo se tupe e nonō atu.—Salamo 37:21.

Na tofia Paulo ma Panapa i le uluaʻi senituri, e momoli atu meaalofa foaʻi a Kerisiano i Asia Itiiti mo o latou uso i Iutaia o ē na mafatia i se oge. (Galuega 11:28-30) E masani foʻi ona auina atu e Kerisiano i aso nei, meaalofa mo o latou uso o loo manaʻomia le fesoasoani. O le faia faapea ua latou avatu ai se molimau lelei mo isi. (Mataio 5:16) Ae e tatau ona iloilo le tulaga ma mafaufauga o lē o loo talosaga mai. Aiseā ua ia manaʻomia ai se fesoasoani? E manaia upu a Paulo: “Pe afai e lē fia galue se tasi, aua neʻi ʻai foʻi o ia.”—2 Tesalonia 3:10.

Pe afai e lē o mataʻutia tele le tulaga o se uso ae o loo manaʻo i sina fesoasoani ona ua suia lona tulaga tautupe, atonu e talafeagai le nonō i ai o se tupe e aunoa ma se tupe faasili e maua mai ai. O le toe totogi uma o se nonogatupe i tulaga faapena, e lē feteenaʻi ma fetalaiga a Iesu i le Luka 6:35. E tatau ona tusia se maliega na fai, ma e tatau i lē na nonō i ai le tupe ona taumafai e toe totogi le tupe e tusa ai ma le maliega. O le alofa faa-Kerisiano e ao ona uunaʻia lē na nonō i ai le tupe e toe totogi le nonogatupe, e pei foʻi ona uunaʻia ai lē e ana le tupe e avatu le fesoasoani.

E tatau foʻi e le tagata e ana le tupe (po le meaalofa) ona tilofaʻia le tulaga o lona aiga. O se faaaʻoaʻoga, pe e afāina ai le tausiga o manaʻoga o lona aiga, lea o se tiute tauave tāua faale-Tusi Paia? (2 Korinito 8:12; 1 Timoteo 5:8) E ui i lea, e saʻilia e Kerisiano avanoa e alolofa atu ai i isi, ma faaalia lenā alofa i auala aogā e ōgatusa ma mataupu silisili faale-Tusi Paia.—Iakopo 1:27; 1 Ioane 3:18; 4:7-11.