E Fiafia Auauna a Ieova

“Amuia i latou e manatu mamafa i o latou manaʻoga faaleagaga.”—MATAIO 5:3, NW.

1. O le ā le fiafia moni, ma o le ā e atagia mai ai?

E FAATĀUA e tagata o Ieova lo latou tulaga fiafia. Na alaga le faisalamo o Tavita: “Amuia [pe fiafia] le nuu e fai Ieova mo latou Atua.” (Salamo 144:15) O le fiafia, o le lagonaina lea e se tasi o loo lelei mea uma. O le matuā fiafia o le tagata i totonu, e maua ona ua iloa o loo faamanuia i tatou e Ieova. (Faataoto 10:22) O lenā fiafia e atagia mai ai se faiā vavalalata ma lo tatou Tamā o i le lagi atoa ma le iloa o loo tatou faia lona finagalo. (Salamo 112:1; 119:1, 2) O se mea e mataʻina, ona na lisi mai e Iesu ni māfuaaga e iva e mafai ai ona tatou fiafia. O se iloiloga i māfuaaga e fiafia ai i lenei mataupu ma lea o loo mulimuli mai, o le a fesoasoani e iloa ai e maʻeu lo tatou matuā fiafia pe afai tatou te auauna ma le faamaoni i le “Atua manuia [pe e fiafia],” o Ieova.—1 Timoteo 1:11.

Ia Iloa o Tatou Manaʻoga Faaleagaga

2. O le ā le taimi na fetalai ai Iesu e faatatau i le fiafia, ma o le ā lana fetalaiga amata?

² I le 31 T.A., na faia ai e Iesu se lauga sili ona taʻutaʻua i le talafaasolopito. E taʻua o le Lauga i luga o le Mauga ona sa faia e Iesu i le mauga e faafeagai ma le sami o Kalilaia. Ua faamatala mai i le Evagelia a Mataio: “Ua silasila atu [Iesu] i le motu o tagata, ona maliu aʻe lea o ia i le mauga; ua nofo ai i lalo, ona ō mai ai lea o ona soo iā te ia; ua ia fetalai atu, ma aʻoaʻo iā te i latou: Amuia i latou e manatu mamafa i o latou manaʻoga faaleagaga, auā e fai mo i latou le malo o le lagi.” Pe a faaliliuina saʻo lava fetalaiga amata a Iesu e faitauina faapea: “Amuia ē matitiva i le agaga,” pe “E fiafia ē e ole atu mo le agaga.” (Mataio 5:1-3, NW; Kingdom Interlinear; NW faamatalaga i le pito i  lalo) E faitauina faapenei le Today’s English Version: “E fiafia i latou e iloa e matitiva i mea faaleagaga.” *

3. E faapefea ona saosaolaumea le lotomaulalo i lo tatou fiafia?

³ I lana lauga i le mauga, na taʻua ai e Iesu le fiafia o se tasi pe afai na te iloa ona manaʻoga faaleagaga. O Kerisiano lotomaulalo, latou te iloa lelei o latou tulaga agasala, ma ʻaiʻoi atu iā Ieova mo lana faamagaloga e faavae i le taulaga togiola a Keriso. (1 Ioane 1:9) Latou te maua le filemu o le mafaufau ma le fiafia moni. “Amuia le tagata ua faamagaloina lona solitulafono, ma ua ufitia lana agasala.”—Salamo 32:1; 119:165.

4. (a) I ā auala e faaalia ai lo tatou iloa o o tatou manaʻoga faaleagaga faapena foʻi ma isi? (e) Pe afai tatou te manatu mamafa i o tatou manaʻoga faaleagaga, o le ā e faaopoopo i lo tatou fiafia?

⁴ O le iloaina o o tatou manaʻoga faaleagaga e uunaʻia ai i tatou e faitau le Tusi Paia i aso uma, mauaina aogā mai taumafa faaleagaga ua faasoa mai “i ona itu aso” e le “auauna faamaoni ma le mafaufau,” ma auai e lē aunoa i sauniga faa-Kerisiano. (Mataio 24:45; Salamo 1:1, 2; 119:111; Eperu 10:25) O le alofa mo tuaoi e tatou te iloa ai manaʻoga faaleagaga o isi ma uunaʻia ai i tatou ia maelega i le talaʻiga ma le aʻoaʻo atu o le tala lelei o le Malo. (Mareko 13:10; Roma 1:14-16) O le faailoaina atu o upu moni o le Tusi Paia i isi, e aumaia ai iā i tatou le fiafia. (Galuega 20:20, 35) Pe a tatou mafaufau loloto i le faamoemoe matagofie ma faamanuiaga o le a aumaia e le Malo, e matuā faafiafiaina ai i tatou. O le faamoemoe o le “lafu mamoe itiiti” o Kerisiano faauuina, o le ola e lē mafai ona oti i le lagi o se vaega o le pulega o le Malo o Keriso. (Luka 12:32; 1 Korinito 15:50, 54) Ae o “isi mamoe,” e faamoemoe i le ola e faavavau i le lalolagi parataiso i lalo o le pulega o le Malo.—Ioane 10:16; Salamo 37:11; Mataio 25:34, 46.

Le Auala e Fiafia ai Ē Faanoanoa

5. (a) O le ā le uiga o le faaupuga o “ē faanoanoa”? (e) Ua faamāfanafanaina faapefea ē faanoanoa?

⁵ O le isi māfuaaga o le fiafia lea na taʻua e Iesu e foliga mai e feteenaʻi. Na ia fetalai: “Amuia ē faanoanoa; auā e faamāfanafanaina i latou.” (Mataio 5:4) E mafai faapefea e se tasi o faanoanoa ae i le taimi e tasi e fiafia? Ina ia malamalama i le uiga o fetalaiga a Iesu, e manaʻomia ona tatou tilofaʻia po o le ā le ituaiga faanoanoa o ia fetalai e faatatau i ai. Ua faamatalaina e Iakopo, o le māfuaaga o le faanoanoa ona o o tatou lava tulaga agasala. Na ia tusi: “Tagata agasala e, inā fafano ia o outou lima, o outou e faalotolotolua e, inā faamamā ia o outou loto. Ia puapuagatia outou, ma ia faavauvau, ma fetagisi. Ia liua o outou ʻataʻata ma faavauvau, ma lo outou fiafia i le faanoanoa; inā faamaulalo ia i luma o le Alii, ona faamaualugaina lea o outou e ia.” (Iakopo 4:8-10) Ua faamāfanafanaina i latou ua matuā faanoanoa i tulaga agasala, ina ua aʻoaʻoina e mafai ona faamagaloina a latou agasala, pe a faatuatua i le taulaga togiola a Keriso ma salamō moni e ala i le faia o le finagalo o Ieova. (Ioane 3:16; 2 Korinito 7:9, 10) E mafai ona latou maua se faiā tautele ma Ieova ma le faamoemoe e ola e faavavau e auauna ma vivii iā te Ia, ma ua matuā faafiafiaina ai i latou.—Roma 4:7, 8.

6. I le ā le uiga ua faanoanoa ai nisi, ma ua faapefea ona faamāfanafanaina i latou?

 ⁶ Ua aofia foʻi i fetalaiga a Iesu i latou e faanoanoa ona o tulaga leaga o loo iai i le lalolagi. Na faatatauina e Iesu iā te ia lava le valoaga i le Isaia 61:1, 2: “Ua i oʻu luga le Agaga o le Alii o Ieova; auā ua faauuina aʻu e Ieova e talaʻi le tala lelei i ē ua tigāina, ua ia auina mai aʻu e fufusi i ē loto momomo, . . . faamatalaloto i ē faanoanoa uma lava.” Ua faatatauina foʻi lenā faatonuga i Kerisiano faauuina o loo i le lalolagi, o ē o faatinoina le faatonuga faatasi ai ma le fesoasoani a a latou aumea, o “isi mamoe.” O i latou ua auai i le galuega o le faailogaina faafaatusa o muaulu o “tagata o ē mapuitigā, ma feoi ona o mea inosia uma ua latou [o ē fulitua ese ma le tapuaʻiga moni i Ierusalema, ia ua faaataina ai lotu ua faapea mai o Kerisiano] fai i ai.” (Esekielu 9:4) Ua faamāfanafanaina i latou o ē faanoanoa e le “tala lelei o le malo.” (Mataio 24:14) Ua fiafia i latou e aʻoaʻoina, ua toeitiiti ona suia lea o faiga leaga o mea a Satani i le lalolagi fou amiotonu a Ieova.

Amuia Ē Agamalu

7. O le ā e lē uiga i ai le upu “agamalu”?

⁷ Na faaauau le Lauga a Iesu i le Mauga i le fetalai atu: “Amuia [fiafia] ē agamalu; auā e fai mo latou tofi le nuu.” (Mataio 5:5) E manatu isi i le agamalu e faauiga atu i le  vaivai o uiga o se tasi. Ae peitaʻi, e lē o le tulaga lenā. Na tusi se tagata aʻoga o le Tusi Paia e faamatala le uiga o le upu na faaliliuina i le “agamalu”: “O le uiga sili o se tagata e [agamalu] o ia lea na te pulea o ia lava. E lē palaai pe agavaivai, e lē uiga i le ootia pe gauaʻigofie. O se malosi e pulea lelei.” Na taʻua e Iesu e faatatau iā te ia lava: “O aʻu lē agamalu ma lē loto maulalo.” (Mataio 11:29) Ioe, na lototele Iesu e tausia mataupu silisili amiotonu.—Mataio 21:12, 13; 23:13-33.

8. O le ā e sootaga atu i ai le agamalu, ma aiseā tatou te manaʻomia ai lenei uiga i a tatou faiā ma isi?

⁸ O le agamalu e sootaga atu i le lē gaoiā. O le mea moni, na lisi faatasi mai e Paulo le agamalu ma le lē gaoiā ina ua ia taʻua “fua o le agaga.” (Kalatia 5:22, 23, LT) E ao ona atiina aʻe le agamalu i le fesoasoani a le agaga paia. O le agamalu o se uiga faa-Kerisiano e maua ai le filemu ma tagata tatou te lē tapuaʻi faatasi aemaise i latou i le faapotopotoga. Na tusi Paulo: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o ē ua filifilia e le Atua, o ē ua paia ma ua alofaina; ia fefaapalepaleaʻi, ma ia fefaamagaloaʻi outou.”—Kolose 3:12, 13.

9. (a) Aiseā e lē faatatauina ai le agamalu na o tatou faiā ma isi tagata? (e) E faapefea i ē agamalu ona fai mo latou “tofi le nuu”?

⁹ Ae peitaʻi, e lē faatatauina le agamalu na o tatou faiā ma isi tagata. E tatou te faaalia foʻi le agamalu e ala i le naunau e gauaʻi i le pule silisili ese a Ieova. O le faaaʻoaʻoga sili o lenei mea o Iesu Keriso, o lē a o iai i le lalolagi na agamalu ma gauaʻi atoatoa i le finagalo o lona Tamā. (Ioane 5:19, 30) O le mea muamua ma tāua, ua pule Iesu i le lalolagi, ona o ia o le Tupu tofia. (Salamo 2:6-8; Tanielu 7:13, 14) Ua ia faasafua atu le pule i le 144,000 o “suli” ua filifilia mai “ituaiga uma” ina ia fai i “latou ma tupu i le lalolagi.” (Roma 8:17; Faaaliga 5:9, 10; 14:1, 3, 4; Tanielu 7:27) O le a pule Keriso ma ana pule lagolago i le faitau miliona o tane ma fafine pei ni mamoe o ē o le a faataunuu ai le valoaga a le salamo: “A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Salamo 37:11; Mataio 25:33, 34, 46.

Amuia Ē Fia Aai i le Amiotonu

10. O le ā se tasi o auala e mafai ona faamalieina ai i latou o ē “fia aai ma fia inu i le amiotonu”?

¹⁰ O le isi māfuaaga mo le fiafia na taʻua e Iesu i lana lauga i le mauga i Kalilaia: “Amuia [fiafia] ē fia aai ma fia inu i le amiotonu; auā e maoona i latou.” (Mataio 5:6) Ua faataatia e Ieova tapulaa amiotonu mo Kerisiano. O lea la, o i latou o ē fia aai ma fia inu i le amiotonu, o loo fia aai foʻi ma fia inu mo le taʻitaʻiga a le Atua. O i latou na, ua iloa lelei o latou tulaga agasala ma le lē lelei atoatoa ma ua naunau i se tulaga talileleia i luma o Ieova. Ua matuā faafiafiaina i latou ina ua aʻoaʻo mai le Afioga a le Atua, pe afai latou te salamō ma saʻili le faamagaloga e faavae i le taulaga togiola a Keriso, o le a maua se tulaga amiotonu i luma o le Atua!—Galuega 2:38; 10:43; 13:38, 39; Roma 5:19.

11, 12. (a) Ua faapefea ona taʻuamiotonuina Kerisiano faauuina? (e) E faapefea ona faamalieina le fia inu o aumea a ē faauuina?

¹¹ Na fetalai Iesu e fiafia i latou na, talu ai o le a “faamalieina” i latou. (Mataio 5:6, Kingdom Interlinear) O Kerisiano faauuina ia ua filifilia e pule o ni tupu faatasi ma Keriso i le lagi ua ‘taʻuamiotonuina i le ola.’ (Roma 5:1, 9, 16-18) Ua vaetamaina i latou e Ieova o ni atalii faaleagaga. Ua avea i latou ma suli faatasi ma Keriso, o ni tupu ma ositaulaga i lona malo i le lagi.—Ioane 3:3; 1 Peteru 2:9.

 ¹² O aumea a i latou e faauuina e leʻi oo ina taʻuamiotonuina i le ola. Ae peitaʻi, ua mafai ona taʻuamiotonuina i latou e Ieova e ala i le faatuatua i le toto masaa o Keriso. (Iakopo 2:22-25; Faaaliga 7:9, 10) Ua taʻuamiotonuina i latou o ni uō a Ieova mo le faasaoina i le taimi o le “puapuaga tele.” (Faaaliga 7:14) O le a sili atu ona faamalieina lo latou fia inu i le amiotonu i lalo o le “lagi fou,” lea o le a avea ai i latou o se vaega o le lalolagi fou lea e “mau ai lē amiotonu.”—2 Peteru 3:13; Salamo 37:29.

Amuia Ē Alolofa Atu

13, 14. O ā ni auala aogā e tatau ona tatou faaalia ai le alofa, ma o ā aogā o le a tatou maua mai ai?

¹³ I le faaauau ai o lana lauga i le mauga na fetalai Iesu: “Amuia [fiafia] ē alolofa atu; auā e alofaina mai i latou.” (Mataio 5:7) E tusa ai ma le tulafono faalemalo, o le uiga o le alofa atu i lenei mau, e faatatau i le faamāmāina o se faasalaga e le faamasino ma na te lē tuu atu le faasalaga atoa e pei ona faatagaina e le tulafono. Ae peitaʻi, i le Tusi Paia, o upu na faaliliuina i le “alofa” i le uluaʻi gagana e masani ona faasino atu i se faaupuga o le manatunatu ma le agalelei po o le mutimutivalea alofa, lea e aumaia ai se mapusaga iā i latou o manaʻomia. O lea la, o i latou o ē alolofa atu latou te faaalia le agaalofa. O le tala faatusa a Iesu i le tuaoi Samaria, ua saunia ai se faaaʻoaʻoga lelei o se tagata o lē na “alofa atu” i se tasi o loo manaʻomia se fesoasoani.—Luka 10:29-37.

¹⁴ Ina ia tofo i le fiafia lea e maua mai le alofa atu, e manaʻomia ona tatou faia gaoioiga saʻo o le agalelei iā i latou o manaʻomia. (Kalatia 6:10) Na alofa Iesu i tagata na ia silasila i ai. “Ona mutimuti vale ai lea o lona alofa iā te i latou, auā ua faapei o mamoe i latou e leai so latou leoleo; ona aʻoaʻo atu lea o ia iā te i latou i mea e tele.” (Mareko 6:34) Na silafia e Iesu e sili atu ona tāua manaʻoga faaleagaga o tagata na i lo se isi lava manaʻoga. E tatau foʻi ona tatou alolofa atu e ala i le tufa atu i isi o le mea sili latou te manaʻomia—o le “tala lelei o le malo.” (Mataio 24:14) E mafai foʻi ona tatou ofo atu se fesoasoani aogā i Kerisiano matutua, fafine ua oti a latou tane ma ē mātua oti ma “ia faamāfanafana i ē loto iti.” (1 Tesalonia 5:14; Faataoto 12:25; Iakopo 1:27) E lē gata o le a tatou maua ai le fiafia ae o le a avea ai i tatou ma ē mauaina le alofa o Ieova.—Galuega 20:35; Iakopo 2:13.

Loto Mamā ma ia Faatupu le Filemu

15. E faapefea ona mamā o tatou loto ma faatupu le filemu?

¹⁵ Na faatulaga e Iesu le māfuaaga lona ono ma le fitu e fiafia ai e pei ona mulimuli mai: “Amuia ē loto mamā; auā latou te iloa atu le Atua. Amuia ē faatupuina le filemu; auā e taʻua i latou o atalii o le Atua.” (Mataio 5:8, 9) O le loto mamā o se tasi e lē gata e mamā tau amio ae mamā foʻi faaleagaga ma autasi atu i le tuutoina iā Ieova. (1 Nofoaiga a Tupu 28:9; Salamo 86:11) O lē faatupu le filemu e nonofo filemu ma o latou uso Kerisiano, ma pe afai e mafai ai ia  nonofo lelei foʻi ma o latou tuaoi. (Roma 12:17-21) Latou te “saʻili i le filemu ma tausisi i ai.”—1 Peteru 3:11.

16, 17. (a) Aiseā ua taʻua ai ē faauuina o “atalii o le Atua” ma e faapefea ona latou “vaai” iā te ia? (e) E faapefea e “isi mamoe” ona ‘vaai i le Atua’? (i) E faapefea ma o afea o le a taunuu atoatoa ai le avea o “isi mamoe” ma “atalii o le Atua”?

¹⁶ Ua saunia se folafolaga mo ē loto mamā e faatupuina le filemu e faapea, ua “taʻua i latou o atalii o le Atua” ma latou te “iloa atu le Atua.” Ua faauuina e le agaga paia nei Kerisiano ma ua vaetamaina e Ieova e avea ma ana “fanau” a o iai i le lalolagi. (Roma 8:14-17) Pe a toe faatūina i latou e faatasi ma Iesu i le lagi, o le a auauna i latou i luma o Ieova ma iloa moni ai o Ia.—1 Ioane 3:1, 2; Faaaliga 4:9-11.

¹⁷ O “isi mamoe” o ē faatupuina le filemu ua auauna iā Ieova, i lalo o le Leoleo Mamoe Lelei, o Iesu Keriso, o lē ua avea ma o latou “Tamā o le faavavau.” (Ioane 10:14, 16; Isaia 9:6) O i latou na sao mai le tofotofoga mulimuli ina ua mavae le pulega a Keriso i le afe tausaga, o le a vaetamaina o ni atalii faalelalolagi o Ieova ma maua le “saʻolotoga o le fanau a le Atua e manuia ai.” (Roma 8:21; Faaaliga 20:7, 9) A o tepa taulaʻi atu i lenei mea, ua latou taʻua ai Ieova o lo latou Tamā, talu ai ua tuutoina atu o latou ola iā te Ia ma amanaʻia o Ia o le Foaʻi Ola. (Isaia 64:8) E pei o Iopu ma Mose o aso anamua, ua mafai ona latou ‘vaai i le Atua’ ona o le faatuatua. (Iopu 42:5; Eperu 11:27) O ‘mata o latou loto’ ma e ala i le poto saʻo e uiga i le Atua, latou te iloa ai uiga matagofie o Ieova ma taumafai e faaaʻoaʻo iā te Ia e ala i le faia o lona finagalo.—Efeso 1:18; Roma 1:19, 20; 3 Ioane 11.

18. E tusa ai ma māfuaaga e fitu e fiafia ai na faatulaga e Iesu, o ai i aso nei o maua le fiafia moni?

¹⁸ Ua tatou iloa o le a maua e i latou e manatu mamafa i o latou manaʻoga faaleagaga, o ē faanoanoa, o ē agamalu, o ē fia aai ma fia inu i le amiotonu, o ē alolofa atu, loto mamā ma e faatupuina le filemu le fiafia moni i le auaunaga iā Ieova. Ae peitaʻi, e masani lava ona fesagaʻi i latou na ma teteega, e oo lava i sauāga. Po o faaleagaina ai e lenei mea lo latou fiafia? O le a talanoaina lenā fesili i le mataupu o mulimuli mai.

[Faamatalaga pito i lalo]

O se Autaluga

• O le ā le fiafia e maua e i latou e manatu mamafa i o latou manaʻoga faaleagaga?

• I ā auala ua faamāfanafanaina ai i latou o ē faanoanoa?

• E faapefea ona tatou faaalia le

agamalu?

• Aiseā e ao ai ona tatou alolofa atu, loto mamā ma ia faatupuina le filemu?

[Fesili mo le Suʻesuʻega]

[Ata i le itulau 10]

“Amuia i latou e manatu mamafa i o latou manaʻoga faaleagaga”

[Ata i le itulau 10]

“Amuia ē alolofa atu”

[Ata i le itulau 10]

“Amuia ē fia aai ma fia inu i le amiotonu”